澄澄一直期待去Disneyland，由農曆新年開始就等呢一日，終於踫啱舅父舅母佢地有張免費入場券，於是大家約埋一齊入去住返晚，等澄澄一嘗心願。
另一個原因澄澄咁期待嘅，係因為我應承過佢俾佢扮一次公主同影相，所以佢寧願玩少一陣都要做佢嘅Belle公主!
到達樂園之後，首要去酒店check-in兼且買門票，之後又搭返shuttle bus入樂園裡面，匆匆忙忙搵啲嘢食醫肚，之後，就帶澄澄趕返去酒店化妝影相。
姐姐問澄澄以前化過妝未，澄澄拎拎頭，其實佢又真係未試過正式嘅化妝，新年嘅時候我都只係貪得意幫佢塗少少粉就當係，所以佢一路化妝就一路問姐姐呢啲係乜嘢，要嚟做乜? 當姐姐幫佢用水噴濕啲頭髮嘅時候，平時佢會好驚，今次佢為咗貪靚，所以佢都頂硬上...
化好妝之後，姐姐又問佢要唔要埋套手襪、手袋同權仗，佢諗都唔使諗就話要，之後仲想要埋對鞋，不過我覺得唔係太靚，兼且有啲oversize，所以無要到，但係都可以着住影相，都ok啦!
澄澄大大話話影咗成六、七十張相，但係個package本身只係包一張相，期間啲工作人員又無阻止我私下幫佢影，所以我亦幫佢影咗唔少，成個過程由化妝到影相搞咗差唔多一個鐘，都算快；我見現場仲不停有自由行嘅內地人帶著小朋友walk-in入嚟話要影相，個個小朋友都變成父母心目中嘅靚靚公主。等咗大約二十分鐘，有個姐姐攞住一大疊8R相，仲有一大堆鎖匙扣俾我選擇。
我睇住啲相，有種感覺好似當年自己''簡''婚紗相咁，張張都想要，好彩有一半嘅相，澄澄都笑到好似
賣牙膏廣告咁，有啲大頭相本來影得幾好，但係得返個頭，成個公主造型都睇唔到，所以又可以放埋一邊，最後都只係''簡''咗四張大相加兩款鎖匙扣，就當作一個紀念，等佢將來大個睇返自己係幾幸福，可以影公主相!
之後佢就着住套公主裙嚟玩，好彩當日嘅天氣都唔凍；沿途都有好多人讚澄澄呢個公主好靚，我當然扮聽唔到，但係就暗地裡覺得好開心，總算值回票價。期間我地排隊玩小飛象嘅時候，有個媽咪猛叫個仔同澄澄公主影張相，但係個仔仔有啲怕醜，叫咗好幾次都會唔肯，但係個媽咪就好想幫佢地影張相，最後個仔仔都同澄澄影咗一張相。
因為化妝都去咗兩個幾鐘，我地又book咗枱食飯準備食完睇煙花，所以第一日都無玩太多嘢，留返第二日再玩過，諗住過咗weekend會人少啲，結果一樣好多自由行嘅內地人士。
唔知係咪澄澄大個咗，一路都好少有人派貼紙俾佢，反而表弟皓皓就收集咗好多，有套公主貼紙仲係靠表弟至有，真失敗!
可能皓皓B仲細，對稍為大聲嘅3D影院或者夜晚嘅煙花表演，佢都唔係好鍾意，仲有啲驚，唔知會唔會嚇親呢?
返咗酒店之後，兩老表仲玩過唔停，尤其表弟成晚都响兩間房之間爬嚟爬去，好唔得閒。
