澄澄自出世以來都未試過離開我身邊半步，噙日星期六，佢首次留响婆婆屋企過夜。因為早一個星期同萍姑姐一家去咗廸士尼，無返去探婆婆，於是澄澄話好掛住婆婆喎，明明星期日至返去婆婆度，佢都等唔切，係要我星期六就帶佢返去。
結果夜晚佢就留低唔走，佢寧願夜晚唔食奶，但係我走咗之後，佢又要婆婆同佢買維他奶同牙擦....我返到屋企都有打過電話俾佢，佢真係無事喎；起初我都擔心佢突然掛住夜晚陪佢瞓覺個枕頭，或者掛住我，結果兩樣都無喎！
第二朝晨咁早六點，佢就跟婆婆起身去公園晨運，佢就顧住玩韆鞦，玩咗成個鐘頭。八點半佢就打電話嚟叫醒我起身，摧促我過去同佢飲早茶，但係到我過到去嘅時候，我仲比佢早到一步。
因為太早起身嘅關系，所以下畫叫佢瞓晏覺，唔使五分鐘佢就瞓着咗。我問佢下次仲要唔要留低响婆婆屋企過夜，佢都話無問題，不過公公同婆婆就好攰，因為佢一分鐘都停唔到落嚟，成晚要揾人陪佢玩。哈哈！
