首輪小一入學申請

眨吓眼澄澄就已經要準備升小一，已經唔再係一個任由我搓圓噤扁嘅小娃娃。星期五一早就幫佢去咗嘉諾撒交表，簡呢間學校因為鍾意佢校風純樸，又有女子中學函接，而且老師都推介呢間學校較一般嘅傳統學校較為活一啲；於是我同Eric都好快就得出結論，以呢間學校作為首選。

呢兩日身邊嘅朋友都有問我有無幫澄澄揾直資學校，其實我地都有諗過，不過無考慮要幫佢揾，始終我唔想佢去到太遠返學，而好啲有名氣嘅私校或者直資學校都要去到銅鑼灣或者灣仔，搭車來回都花上一個多鐘頭，而且事前要準備好多嘢，砌靚個profile至可以申請，一則我無咁多時間，二則佢亦無乜特別嘢可以堆砌出嚟見人，三則學費亦係一個要考慮嘅因素，其次係日後佢所面對同臍嘅壓力亦唔會少，咁辛苦嘅日子，仲有好多年要佢去捱，所以我都係聽天由命，最緊要佢生活得開心同做一個安份守己嘅人，唔好要我地太担心已經好好。
 
如果上天眷顧，俾佢入到呢間學校，真係無嘢好奢求，就等佢完成呢幾年免費教育，至張羅一吓澳洲果邊嘅學校，希望佢好似佢爸爸咁輕輕鬆鬆完成整個教育嘅階段，就投入社會，唔使大費週章，咁煩人！