郊遊

呢個新年假唔去拜年，又唔去旅行真係有啲浪費，連廸士尼最後都去唔成，澄澄當然有啲失望。我唯有應承佢下次補返數，最多帶佢影埋公主造型相!


結果去咗姑姐屋企，其實澄澄都係去過兩次，仲係剛剛識行嘅時候，所以佢已經無乜印象。呢個假期見得最多嘅就係表妹，但係見極佢地都唔會厭，最緊要有得玩。食過lunch之後，見無乜好做，於是去咗錦田鄉村俱樂部，想話摘士多啤梨，點知原來朝早落過場大雨，個地又濕濕轆轆，連士多啤梨都濕壞咗，所以最後都空手而回...連子君想睇嘅bunny兔兔都無得睇，因為已經將近關門。

之後我地去咗元朗嘅B仔涼粉醫肚，其實我地一家三口都係第一次去咁遠嘅郊外，如果唔係姑丈揸車，又點會山長水遠入到元朗、錦田呢啲地方，打過白鴿轉就走!
 
對於兩個小朋友嚟講，全日嘅高潮仲係兩個小朋友喺屋企玩最開心，根本邊度都唔使去。