等到差唔多樂園開嘅時候，我地就搭返shuttle bus過去，以為星期一會少啲人，因為唔係假期，點知一樣好多自由行，本來人多都唔緊要，至慘係啲內地人唔興排隊，鍾意搏矇，唔守規矩。
澄澄今次已經係第三次入樂園，但係有啲嘢佢仲係唔係好敢玩，好似亞馬遜河嗰隻觀光船，佢對果啲噴火、土人放飛箭、河馬張開大口，佢都仲係會驚，甚至喊! 反而皓皓B都仲未知乜嘢事，唔識得驚著。仲有一樣就係坐Winnie the Pooh嘅蜜糖車，一樣係唔明佢驚乜??
而澄澄最鍾意嘅就係騎旋轉木馬同咖啡杯，玩完一次又一次。之後去完小小世界嘅時候，佢竟然好記性到連上一次同丁丁、洛程嚟呢到玩完，之後坐响出面食雪糕都記得，於是同我講坐完船就食雪糕，我都已經唔記得啲先後次序，難得佢咁好記性。
其間我地見到Micky、Minnie等人物出場，奇怪地只有Daisy無乜人排隊，於是叫澄澄行埋去影相，點知原來有人排緊，不過可能已經截咗龍，結果俾澄澄插隊成功同唯一嘅Daisy影咗張相。
玩到四點半都已經玩得七七八八，走嘅時候婆婆提醒澄澄，玩咗兩日千祈唔好到時唔捨得又喊呀。點知當佢地落咗車之後，澄澄真係話唔捨得，仲喊咗少少，不過就唔係好淒涼果隻。
總算實現咗新年前對佢嘅承諾，對小朋友講過嘅嘢真係唔可以敷衍了事，佢會每日都掛住响口邊，直到你做到為止，果份認真簡直難以想象!
沒有留言:
發佈留言