第一堂英文課

澄澄今日上學校以外嘅第一堂英文課，係trail lesson嚟嘅。澄澄曾經同我講學校咪有Miss Parri囉，點解仲要學英文?我同佢講因為學校講得太少，所以要响出面學囉!

去到學校門口佢曾經有過幾秒鐘嘅爭扎，最後佢都行咗入課室等老師嚟；喺課室突然見到澄澄以前响寶寶上playgroup時候嘅朋友仔"琳琳"。再見到琳琳，佢依然係個好少出聲嘅女孩子，但係就唔會好怕醜。可能係咁，所以澄澄都無乜點驚，最後仲同我揮揮手bye bye，自己一個繼續上堂。

差不多放學嘅時候，我响門外觀察咗一陣，見到澄澄都好留心聽老師嘅指示，做剪貼同寫英文字母；當我見到佢嘅工作紙真係有啲意外，佢竟然識寫abc?因為咁耐以嚟我都只係教佢寫數目字(1-10)，完全未開始寫字母；雖然話係跟住啲虛線寫，都算寫得似模似樣啦....

落堂嘅時候，我問老師佢有無講英文，Nita同我講佢講好多廣東話，但係佢寫字嘅能力好好。如無意外，呢堂trail lesson都應該pass嘅，我會俾佢繼續學落去。可能我真係要下啲功夫，同佢講多啲英文，佢未必即時識得講，但係起碼識聽吖，上堂唔會無反應，已經好好!

澄澄要獨佔媽咪?

下畫澄澄沖完涼喺房着衫嘅時候，望住放响窗台嘅相，睇到一啲爸爸媽媽後生時候嘅拍拖相，有啲係爸爸狽住媽咪嘅；於是佢同姐姐講，如果澄澄出咗世，我會推開爸爸！

姐姐想講俾我知，但係澄澄唔俾姐姐講；其實佢係驚我會話俾爸爸知，會俾爸爸鬧。後來姐姐講咗俾我知，我再問澄澄點解，佢又講一次俾我知，如果我出咗世呢，我會將爸爸掉咗落垃圾桶！吓??

我問澄澄點解呀？佢話媽咪係我嘅，爸爸唔可以錫我媽咪....我同佢講我都係爸爸嘅老婆喎，咁爸爸梗係可以錫媽咪啦！佢繼續堅持佢嘅一套，唔得，我會掉咗佢去垃圾桶...我唯有同佢講爸爸知道實唔開心，到時係佢掉你落垃圾桶就真！佢即時定咗一定，唔敢再講落去。

其實有時我同爸爸拖手行街，又或者爸爸想搭我膊頭，佢都會將我拉開，爸爸曾經問過澄澄係咪想爸爸只係錫澄澄一個呢？澄澄點點頭，原來佢係唔想爸爸錫佢媽咪至真！

發開口夢??

今晚澄澄瞓覺發開口夢，大叫大嚷；其間我聽到佢講"...細樽樽呀...唔係呀...打你架..."

佢竟然連發夢都話要打人，真係惡！之後佢仲舉起手想打人咁，不過就打咗埋牆。我有啲担心佢唔知會唔會係夢遊，所以唔敢叫醒佢。

過咗一陣見佢醒醒地，我就問佢點解咁惡鬧人、打人呀？佢當然無睬我啦，因為佢都未醒...

流感第二針

一個月前(即農曆年前)，帶澄澄打咗第一支流感針，今日夠期打第二針；所以放工返嚟，我就同澄澄講要打埋第二針喎！佢無扭計話唔打，仲同返我講"唔打第二支呢會留低啲細菌响pat pat度架"！ 然後又同我講"我驚痛喎"！我叫佢唔好緊張就唔會痛喇，之後佢好乖咁跟我去doctor度打針。

入到去見到doctor佢仲同doctor問好"你好嘛?"，doctor話"我幾好，不過你一陣就唔知好唔好喇..."。我幫佢同doctor講"佢上次都無喊架，不過返到屋企佢就話個pat pat痛"。

初頭澄澄除低條褲仲識講笑話"好痕呀"，我叫佢擰轉面，而doctor就同佢傾計，分散佢注意力；當支針打落去，佢先大叫好痛呀，然後就喊出嚟喇。不過都只係喊咗兩聲，之後doctor問澄澄要唔要維他命C呀？佢就收聲喇!

上一次佢無喊可能因為之前我同佢做足心理準備，又唔知打針會有幾痛；今次佢仲記憶猶新，所以落針之前佢已經有啲緊張，可能係咁所以就覺得好痛囉！到佢四歲再打嘅時候，希望佢已經唔記得咗打針會有幾痛啦...

古古怪怪

澄澄有個好得意嘅毛病, 就係對某一類嘅詞彙佢需要一段時間去適應同練習, 至可以講得啱個名詞。

例如細個响 Disneyland 見到 Chip & Dale, 佢會叫咗做 Jingle Bell; 史廸仔會叫咗做廸士仔; 蓮蓉飽會叫咗做黃奶飽 (唔係奶黃飽噃); 聖誕節見到來朝拜耶穌嘅三皇，就叫佢地做皇兄弟；仲有姑太就叫咗太婆…，不過經過一段若干嘅時間，佢就會講得返正確嘅名，好奇怪！

今晚佢又無端端講"歡迎光臨，隨便柬"，唔知又喺邊度聽返嚟?

澄澄近來嘅行為仲有啲返轉頭，變返一個唔懂事嘅細路仔乜都搞。細個嘅時候佢唔會玩塗鴉，即係唔會亂响啲牆或者櫃上面寫字，但係依家就會。細個佢又唔會爬高爬低，依家佢又會企上枱搞搞震！真係激氣...

三十八個月大嘅澄澄...妙問妙答

話咁快澄澄已經三歲兩個月，佢已經唔再係BB，連佢自己都話自己大個喇，係大大人喎！

佢唔鍾意我話佢係小朋友，亦都唔鍾意話佢係小大人，佢話自己同菲菲度高，佢都高過菲菲，所以佢係大大人！然後我問佢如果你係大大人，咁你同媽咪邊個高啲吖，佢答我爸爸高啲....??

今朝佢一起身就突然問我"係喎，以前我有個釣魚嘅玩具，有紅色、黃色好多顏色，仲有枝棍棍爛咗嘅呢，依家喺邊度呀?"

我當然知道佢講緊乜嘢，但係我都唔肯定係咪舊年搬屋嘅時候已經掉咗，佢竟然無端端唸起呢樣嘢問我，真係好記性得嚟又有啲莫明其妙！

今朝我同澄澄講好,話係時候要帶佢去剪頭髮，佢都應承我仲好神氣咁走去同姐姐講。我仲叫佢大大人要自己坐响度剪頭髮喎，佢都無say no 仲同我講要剪得靚啲喎！

點知佢去到門口嘅時候，突然拉返我轉頭，仲喊住話要走。唯有帶佢行開一陣，安撫吓佢再試過，點知都係喊！於是我同佢講數話俾佢抽隻扭蛋，但係佢答我"我乜嘢都唔想要....." 。最後威迫利誘之下都成功咗，佢坐低咗就無再話要走或者喊，仲表現得好合作，哥哥叫佢瞌埋眼就瞌埋。

之後我地再經過間salon嘅時候，佢仲講俾婆婆聽佢喺邊度剪頭髮，係邊個哥哥幫佢剪！希望呢次嘅經歷無將佢嚇倒啦。

之後我都去咗剪頭髮，返嚟嘅時候我問佢婆婆去咗邊？佢話婆婆去咗買"脆卜卜"(即係燒肉)，我問澄澄做乜婆婆又買脆卜卜呀？佢答我話"因為婆婆好錫我嘛"！其實澄澄都好錫婆婆，因為朝早搭車嘅時候，澄澄同我講"我好鍾意去婆婆度，因為我好掛住婆婆"。

物極必反

最近澄澄經常吹蠟燭、食蛋糕，食到有啲膩！

由表妹子君生日開始計，兩個半月食咗五個生日蛋糕，你話怕唔怕。都係因為週圍嘅人太錫佢，以為佢鍾意食，所以連唔係生日嘅日子，都買個蛋糕返嚟俾佢過吓吹蠟燭癮。

上次Valentine Day我買咗一個好細細嘅朱古力蛋糕返嚟當慶祝，佢已經食得唔多，只係食咗一半就話唔要。

今晚响嫲嫲屋企食完飯，又有蛋糕食，不過無人生日亦唔係乜嘢特別日子。今次澄澄只係食咗啲生果，個蛋糕一啖都無食，就已經宣布離場，可能佢見到蛋糕已經怕怕...

之前餐飯(其實係麵至真)，佢仲食到最後嗰啖至全部嘔返出嚟，所以一定唔會係因為飽而唔食。之後，返屋企途中經過Jusco，我怕佢肚餓(因為無嘢落過肚)，於是問佢食唔食麵包，佢就好雀躍話要，仲自己柬咗個dongnut一個人食晒。可能因為佢真係肚餓喇...

所以我同佢講唔會再買蛋糕，因為佢已經唔鍾意食；果然物極必反嘅道理係啱嘅！

天真無邪

今朝起身澄澄講咗句好好笑嘅嘢想同大家分享吓。

Mami : 澄澄仲有無俾蚊蚊咬呀？
Jayme : 無喇
Mami : 因為媽咪買咗個驅蚊器嘛，如果唔係澄澄又會俾蚊蚊咬
Jayme 皺起眉頭 : 點解蚊蚊要咬我啫，咁衰！
Mami : 因為你啲肉甜囉
Jayme : 咁都唔可以咬我假...
Mami : 啲蚊蚊肚餓想食嘢，你啲肉又咁甜，咁佢地咪咬你囉！
Jayme : 我又唔係HONEY，做乜咬我啫，唔可以嫁！

我覺得好好笑，佢竟然形容自己係honey，但係佢又無講錯喎，因為我話佢甜，所以佢至會講honey呢個字；當然佢唔係指甜心或者蜜糖兒嘅意思，只係好單純咁憑直覺將"honey"同"甜"兩樣嘢聯系起嚟。

練習畫線

今日澄澄學校派返嚟嘅功課係畫一圈圈嘅曲線，我之前都有買一啲練習簿俾佢學寫數字1-10；除咗個8字，佢已經識得寫晒，原來我都忽略咗一啲應有嘅基本功。

上星期畫落雨嘅斜線，今個星期已經畫火車頂嘅烟，遲吓仲會有响迷宮搵出路、畫海浪嘅波浪紋、仲有畫圓圈，好似有啲學返轉頭咁。都係我自己無幫佢按步就班咁學，希望唔會對佢有乜影響！

平時佢嘅功課仲會有填顏色，可能細細個佢已經開始玩，所以佢都唔會亂油一通，不過我又唔覺佢對畫畫有特別濃厚嘅興趣。都係實際啲幫佢搵啲英文或者普通話嘅堂上，對佢將來搵小學可能仲有幫助，總好過由得佢成日响屋企玩UNO。

澄澄又俾蚊咬

今日澄澄隻手同腳又俾蚊蚊咬咗幾啖，手腕果粒又大、又紅、又腫，我問佢痛唔痛，佢話痛，問佢痕唔痕，佢又話痕，我見到個蚊口仲好大，唔似一般嘅蚊。本來想帶佢睇醫生，又怕好似小提大做，所以都係同佢搽咗啲蚊膏再決定。

後來見佢無乜事，無特別叫痛，所以無去睇醫生；結果我又去Jusco買咗個驅蚊器，希望保護到佢，唔好俾蚊咬得咁狠！

大廈依家維修緊，搭咗棚圍咗網，佢都俾蚊咬成咁，遲吓拆棚咁點算呢？估唔到呢樣嘢佢就似足我一樣咁惹蚊！將來再買樓，裝修嘅時候都要安裝埋隔蚊網，以防萬一！

好返喇！澄澄說話都精靈啲...

今朝起身澄澄已經無再發燒，亦唔覺佢流鼻水或者打乞嗤，不過我都幫佢準備定個口罩，免得傳染俾其他小朋友，話晒依家係流感高峰期！點知佢係都要帶住個mask返學。

今早我要去胸肺科再檢查，因為怕咳得太耐，驚可能係肺結核(即肺癆)。去到見到全部都係老人家，大部份都要接受藥物治療，即係帶菌者，我都好驚因為咁而中咗招，到時要隔離，唔可以見澄澄，我會好唔捨得。

好彩結果只係虛驚一場，睇完醫生啱啱好十二點，可以接澄澄放學。澄澄出嚟換鞋嘅時候，見佢週圍望，可能佢係搵緊姐姐；當佢一見到係我，佢就講點解你唔返工、你唔乖。我當然要同佢解釋，我唔係唔返工而係要睇醫生。

夜晚放工返嚟嘅時候，我講番俾佢知朝早見到好多公公婆婆咳，要睇醫生食藥；我話如果媽咪唔好彩真係中招，就要住醫院，要同澄澄分開；於是佢同我講佢會好傷心架。佢仲話我知學校有小朋友咳咳同打乞嗤，佢即刻就行開咗，都算佢醒目。

後來爸爸打電話返嚟，問澄澄仲有無唔聽媽咪嘅電話，佢竟然同爸爸講"媽咪好忙要做嘢所以無打電話返嚟"。呢個又的確係事實，不過我之前無同佢講過話下晝唔得閑同佢講電話，佢都算答得有紋路，叻女！

見到佢精神返我都放心啲，雖然佢都打咗流感針，但係仲差一枝未打，要下星期完成埋佢。如果要病，我寧願自己辛苦啲代佢喇！

澄澄又發燒

澄澄好經常性半夜嘅時候就發燒，雖然唔係燒得好犀利，但係都好似一個小暖蛋咁。

其實星期六朝早開始，佢有小小流鼻水嘅跡象，但唔嚴重；點知噙晚夜出去食完餐飯，响姑婆屋企玩咗一陣，返屋企就開始發燒 (38.4C)，好在子君瞓咗覺無同澄澄玩。

澄澄食咗藥又好啲，今朝起身又唔見佢有燒，不過安全起見，我都再俾佢食退燒同傷風藥。

但係今晚夜佢都仲係有啲熱熱地，依然係38.2C左右。瞓覺嘅時候，流到一頭大汗，我試吓味，又係淡嘅，好似一啲鹽份都無咁，真係敝；因為老人家話流淡汗嘅人身體好虛，都唔知要食啲乜嘢去補返佢？

澄澄大個喇

澄澄成日話自己已經大個喇！因為佢係菲菲嘅媽咪....

今晚佢食奶嘅時候又要瞓响我大脾上面食，啱啱睇到有個廣告話"慳得一蚊得一蚊"。我問佢仲記唔記得係邊個同佢講過？佢答我Carmen妹妹。

係就係Carmen，不過係Carmen姐姐，因為Carmen四歲，大過澄澄一歲，所以澄澄先係妹妹，因為佢細啲。點知佢即刻就皺埋眉頭同我講，我大個喇，我係媽咪呀！真係激死，我唯有同佢講咁點解大個女要瞓响媽咪大脾度飲奶嘅？佢至無聲出...

招積澄澄

因為澄澄激嬲媽咪，所以呢兩晚食完飯我就自己一個出咗街四圍行吓，專登唔帶澄澄去。

今晚咁啱婆婆打電話嚟搵我，澄澄同婆婆講我出咗街，無帶佢去；婆婆於是問點解澄澄無得去，澄澄都好誠實咁講俾人知，因為澄澄曳俾媽咪鬧...仲話就算乖媽咪都唔會帶我去啦，幾招積！

今日下畫，姐姐幫佢打電話俾我，一開口佢就同我講"媽咪，對唔住呀"；但係我無同佢傾落去，一來有嘢做忙緊；二來我都想等佢試吓，人地唔聽佢電話會唔會唔開心。

夜晚瞓覺前我問返佢呢兩日知唔知道媽咪唔開心，佢點點頭，我再問佢咁點解澄澄知道媽咪唔開心都唔氹返我，又唔同我講嘢、放工返到屋企又唔叫我? 佢無答我但係就見到佢一對眼睛開始有淚光同變紅，最後終於忍唔住喊出嚟。

佢其實好清楚知道自己衰咗乜嘢，但係就驚唔敢行埋我度同我講話，不過佢會好留意我一舉一動，睇我會有乜反應。

今次我就嬲到呢度為止，因為要嬲澄澄，我自己都好辛苦，同好唔開心。有時佢顧住玩，就係無心機去做其他嘢；始終佢都仲細；就算係佢爸爸都會有呢個問題，更何況係一個小朋友?!

澄澄激嬲媽咪

每朝早我出門口之前，我都會同澄澄講，下畫我會打電話返嚟俾佢，佢都會應我好呀！

今日下畫我打電話返屋企想同澄澄傾計，點知佢無心機講，姐姐叫極佢都唔肯聽，所以我都嬲嬲地收咗佢線。

夜晚到我放工返嚟，佢可能知道自己做錯嘢，所以都唔敢企出嚟叫我，結果令我更加唔開心啦！於是成晚我都無同佢講嘢，佢亦都無同我傾計，只係叫姐姐同佢玩....真係心淡！

俾蚊咬...可憐!

天氣稍稍回暖，屋企就開始有蚊，噙晚澄澄仲俾蚊蚊咬到一面都係，睇見都心痛！

今朝澄澄起身嘅時候同我講隻手手痛，至知道原來佢俾蚊咬腫咗隻拇指同手腕，面上仲有四大粒蚊蚊，連手連腳一共九粒，真係可憐。

平時如果我俾蚊咬，就一定會起身開燈趕走隻蚊我至瞓，但係今次隻蚊只係咬澄澄一個，所以連我都唔知，幫佢唔到。

以往我都係好惹蚊嘅人，但自從澄澄出咗世之後，佢就代替咗我，好多次俾蚊咬到豬頭咁。最誇張個次係佢七、八個月大嘅時候，响印尼果邊一夜之間俾蚊蚊咬咗二十一粒，又大又瘀，好彩佢當時仲細，唔識得痛或者痕。

澄澄同我原來都係.......熱血之仕！

感性的澄澄

澄澄真係一個好感性、又容易喊嘅小朋友。有時睇電視佢見到有人俾人打，佢都會驚，話要熄電視唔睇。

今日我同佢講木偶奇遇記個故事，因為小木偶講大話，所以個鼻哥伸長咗，後來因為佢貪玩唔讀書，俾人賣咗佢去馬戲團賣藝，澄澄聽到呢度已經開始流眼淚，喊得好淒涼，我同佢解釋呢個只係故事，叫佢聽埋落去；佢就一邊喊，一邊撲咗响我身上，一路喊住咁聽我講完個故事，真淒慘！

我問佢點解喊？係咪驚個鼻哥變長，或者變咗隻驢仔？佢都只係識喊住咁點頭！

佢好細個嘅時候就試過睇兒歌嘅VCD見到超人打怪獸，佢都驚到喊仲要熄埋個電視唔要睇，真係細胆！

自動自覺

今日澄澄要返學，前一晚我同佢講第二朝要自己識得起身，我只係會叫佢一次咋。

今朝我起身入咗厠所洗面，行出嚟嘅時候，未夠八點佢已經企咗响厠所門口，叫姐姐幫佢除咗條尿片。其實佢平時都好好記性，有啲嘢只要同佢講一次，佢就會記住。

放咗假咁耐，我問澄澄學校有無小朋友喊呢？佢同我講橙橙組同蘋果組小朋友喊呀！當然啦佢地係小弟弟小妹妹嘛，就好似澄澄細個果陣，一放完假返學就會喊囉。佢笑咗一笑就行開咗，可能佢覺得醜怪啦！

每日澄澄必玩嘅遊戲

澄澄每晚都例必要人同佢玩UNO，所以佢已經玩得好叻，知道幾時應該用Wild Card，幾時用罰人嘅Draw 2 card。

佢有一樣好值得讚賞嘅行為，就係佢玩遊戲唔會介意贏定輸，佢都只係會叫"再玩"。

其實澄澄都算係一個唔錯嘅細路，佢唔會刁蠻扭計，由細到大同佢講過唔可以搞嘅嘢，例如電制，或者擺响床頭嘅相架，佢都一律唔會搞；出外飲茶或者去飲宴要坐成兩個幾三個鐘，佢都唔會離開張櫈四圍走，呢個優點亦曾經有好多朋友稱讚過佢，連我自己都覺得教得佢唔錯啦！

唯一最令人頭痛嘅就係食飯唔叻，經常含飯，要食成個鐘頭，真係無晒佢符！

上學期成績表

放春節假期前，學校已經派咗小朋友嘅成績表，老師對澄澄嘅評語都好好...

"思澄個性活潑開朗，臉上常帶笑容，喜親近老師，及與同伴玩耍，相處頗融洽。學習時留心，能明白老師的講解及指示，語文表達流暢。當遇上困難時會主動向老師尋求協助，對新事物表現好奇。對美勞及大小肌肉活動興趣濃厚。自理能力良好，當遇上困難時亦能盡力完成工作。"

她喜歡親近老師係事實，亦會主動提出幫老師，但係對新事物表現好奇，我就有啲保留，尤其係自理能力良好，可能佢响學校真係會自己食飯、自己着鞋、着衫，去厠所，但係一返到屋企，佢就會依賴姐姐。難怪顧顧姨姨都話老師嘅評語判若兩人！

放咗兩個星期假，終於要返學，但係澄澄每朝都瞓到差唔多九點鐘，都唔知佢點起身返學，又或者唔知要叫佢幾多次至肯起身？

大人口吻

澄澄近來講嘅越嚟越似一個大人嘅口吻！

因為我咳咗都成幾個月都未好返，於是澄澄同我講"點解你咁耐都未好返嫁，睇完醫生又睇醫生，都唔好嘅？"

然後佢又叫我咳唔可以食橙同香蕉，唔可以飲橙汁，呢啲都係平時我同佢講過嘅嘢....

佢又同姐姐講你未好返要戴口罩，因為仲有細菌，會傳俾我嫁！

夜晚佢同姐姐玩煮飯仔嘅時候，佢又同姐姐講如果菲菲唔食快啲，就要罰佢去厨房洗碗；玩UNO嘅時候，又同姐姐講唔可以挭牌，如果唔係，就無人同你玩，因為之前澄澄經常將啲罰人嘅Draw2 card、或者百搭嘅Wild card派晒俾自己，所以我同佢講咁茅唔會有人同佢玩嫁。

如果有啲嘢(例如去提款機攞錢)我同佢講等佢大個先做得嘅，佢就會同我講我已經大個喇，我係菲菲媽咪！可能响佢心目中，媽咪就等如係大人。

病倒了

可能返來嘅天氣忽冷忽熱，Aan姐姐又唔聽我講着多啲衫，終於大年初一就病倒喇！

因為夜晚佢要幫嫲嫲準備餸菜招呼親友，於是傳染咗俾嫲嫲；見佢經常話想嘔同頭痛，於是叫佢去阿姑屋企搵Yani幫佢挖沙，於是連Yani都中招；我算係最遲中招果個，因為初三要上大陸，嗰朝要入厨房執啲用品，結果咁就中咗，之後仲連把聲都無埋，要急急睇醫生。

可能呢個星期太頻撲，休息唔夠所以容易受到感染。好彩澄澄無事，我寧願自己辛苦啲受咗佢，都總好過病嘅係佢。仲有幾日就要返學，好在爸爸都已經返咗印尼，可以俾澄澄回復返正常嘅作息時間，做好返學嘅準備。