好感動...

今日澄澄同我講發生咗一件事令佢好感動，於是我問佢來龍去脈...

事源放學嘅時候，佢同其他小朋友去公園玩，佢爬一張拱形樓梯上滑梯嘅時候，突然坐咗响度唔上唔落，呢個時候，佢嘅同學仔Aden行埋去教佢點樣用腳撑起身再上埋去，就係咁，佢話覺得好感動，Aden好好人，搞到佢想同佢結婚..... 吓? 佢講嘅時候仲好感動，話有啲想喊，真係感情豐富!

我同佢講返朋友係應該互相幫忙架，咁容易就要同人結婚，咪好多老公?

大人=工人?

澄澄漸漸長大，把口講嘢有時令人哭笑不得。

有次爸爸同佢傾計，佢話想做大人，於是爸爸同佢講，做大人要識得洗碗、抹地、自己洗衫... 澄澄聽完後就話：我係要做大人，唔係做工人呀！

戲院睇戲

澄澄咁大個女，臨五歲前，終於第一次正式入戲院睇戲！全因為Jac姨姨送咗兩張好貴嘅戲飛俾澄澄做生日同聖誕禮物....感激!


原來係場3D動畫嘅首影，所以之前响戲院嘅翠華餐廳有免費招待貴賓；但係我入去嘅時候全因時間尚早，諗住揾啲嘢醫肚，結果求祈叫了一碗魚蛋粉、一杯凍檸茶，到臨走要埋單至知道係唔使俾錢，蠢咗!

入場嘅時候，每人仲有一袋禮物，小朋友果份仲大份，多咗個cushion，又有人俾cookies佢地。但係澄澄最興奮係見到電視台嘅演員，就係演鐵馬尋橋個三哥，我就見到以前九餅個Teresa，澄澄當然唔識佢。

坐响餐廳嘅時候，澄澄不停摧我快啲入場，到差唔多入場，佢又開始話驚，結果我地第一個入場。我同佢講一陣睇到有乜要我睇就俾我一個暗號，因為講嘢會騷擾人地睇戲。佢真係好聽話，一開場無耐就捉一捉我隻手，反而係我唔記得呢個係暗號。

成套戲每逢有啲緊張嘅音樂氣氛，佢就話緊張，不過都無事，反而係最後一幕，其中一個主角Nick要消失人間，Gobie救唔到佢，於是澄澄就忍唔住喊出嚟....原來Nick就係Santa Claus，結果梗係大團圓結局啦！

我問澄澄好唔好睇，佢都話好，總算响五歲前又有一個突破。讚！

英語對話

今晚放工返嚟，嫲嫲話澄澄一直不停咁用英文同佢講話，我返嚟都聽到佢講: Grandma, I don't know you speak Cantonese, you speak English.... Thank you grandma you come my home see me 哈哈！當然文法未係好準啦，但係佢點解可以講咁耐，我當然知道小鬼搞邊科。


佢其實唔想答亞嫲問嘅問題，於是特登留難亞嫲，如果唔用英文同佢講，佢就扮唔識、唔答；之後我放工返嚟，又不停講多謝佢嚟探佢，其實想趕客！

澄澄又投訴話嫲嫲俾個ugly tummy佢地，又話嫲嫲嘅hand呀, foot呀，所有嘢都ugly，佢以為亞嫲唔知佢講乜；呢個小鬼越嚟越多估靈精怪嘢！

靈丹妙藥

日子有時過得唔如意嘅時候，以前會覺得人生無乜趣味，但係有咗澄澄响身邊，放工返嚟可以攬一下佢，成個人都會軟化落嚟，好過食任何靈丹妙藥。

今日响公司同老闆有頂撞，一時含寃莫白，忍唔住都要爆發出嚟；返到屋企，我問澄澄媽咪返工唔開心點算？佢諗咗一陣就話：辭職

雖然我明知有難度去實現呢個夢想，但係聽到佢咁講我忽然覺得輕鬆咗；澄澄仲幫我諗好晒點樣我至有錢用唔使返工，好搞笑！

早熟嘅澄澄

最近澄澄每逢睇電視見到一啲好sweet嘅畫面，例如個男仔同個女仔求婚，或者有kiss嘅鏡頭，佢都會好唔好意思，將塊面擰轉，或者匿埋响sofa度.....

但係近來有套韓劇花樣男子，佢好鍾意睇，仲好鍾意入面嘅男主角尹梓皓同女主角甘艾草，雖然最後結果係另一個男主角瞿峻柏同甘艾草响埋一齊，佢都無唔開心，因為澄澄話甘艾草鍾意峻柏多啲。

之後佢又話要同姜心健結婚，仲話一定要，唔係講笑喎.....哈哈哈!

Halloween at Ocean Park

澄澄一向細胆，逢係鬼鬼怪怪，甚至小丑佢都會驚。今日同表妹一齊去Ocean Park，事前佢已經要考慮會唔會有鬼，因為電視廣告有影過出嚟，佢見到都有啲驚，所以佢怕去到會見到鬼鬼。

一路玩，一路佢都keep住問我會唔會有鬼架?到咗四點左右，見到有一班化咗妝着住黑袍嘅哥哥姐姐行過，應該佢地係要去鬼屋準備，澄澄見到已經喊住話要走，果陣至四點多啲，我地氹咗佢好耐，至叫到佢去兒童機動遊戲果邊玩，沿途經過見到有工作人員，我問佢小朋友果邊會唔會有鬼怪出現，點知佢話會，澄澄一聽見就話走喇，後尾見到有佢鍾意嘅旋轉木馬，佢都想唔玩，要氹咗佢好耐，仲要應承佢六點就走...

雖然佢一路玩，一路都担心，不過佢都有玩到蛙蛙跳，即係跳樓機，都算唔錯啦，結果六點三我地就離開，走嘅時候，澄澄話咁攰，都係唔使再嚟住，可能佢仲驚緊！？

活用記憶法

暑假同澄澄上咗個親子記憶法，雖然佢係班上最細果個，所以即場表現唔係好跟得到，但係落堂之後再同佢溫習返，佢已經明白個道理。最近，佢仲曉得利用記憶法去幫自己去記一啲生字點串，值得一讚！

個記憶堂只得四堂，完咗之後，澄澄仲話想繼續上；其實佢另外都有個中文記憶堂上緊，老師對佢嘅comment都好好，讚佢有用心去記，有時見到啲字係由兩個部首組成，佢認得出就會同老師講，所以老師對佢印象好深刻....

希望將來佢上到小學，呢套記憶法仲可以幫到佢。

人細鬼大

開學一段時間，澄澄重新將身邊嘅好朋友定位，以前有Jaycee，依家就係鄧海悠，本來仲有個好朋友姜秀欣，組成光之美少女，不過呢個學期開始，秀欣轉咗校，剩低悠悠一個。但係兩個女仔竟然都有爭風呷醋嘅時候...

澄澄同我講悠悠鍾意姜心健，佢曾經都係澄澄K1時嘅'老公'，佢話悠悠見到佢兩個行埋一齊傾計，悠悠就唔開心... 吓，咁細個小朋友都有呢啲問題？

但係澄澄話佢會讓悠悠，因為悠悠係佢朋友，以前如果澄澄做咗啲嘢令Jaycee唔高興，Jaycee就會同澄澄講話唔同佢玩，所以澄澄話悠悠好啲，不過佢仲係好掛住Jaycee呢個好朋友，唔知呢段友誼可以維持幾耐呢？

澄澄其實都唔係一個計較嘅人，所以佢唔會好容易就話唔同呢個玩、唔同果個玩，呢樣嘢佢就handle得比媽咪好，想當年媽咪見到啲咁嘅情形就最怕，寧願行開就算數了事。希望澄澄慢慢長大，會交到更多真正嘅好朋友！

第一次唔响媽咪身邊

澄澄自出世以來都未試過離開我身邊半步，噙日星期六，佢首次留响婆婆屋企過夜。因為早一個星期同萍姑姐一家去咗廸士尼，無返去探婆婆，於是澄澄話好掛住婆婆喎，明明星期日至返去婆婆度，佢都等唔切，係要我星期六就帶佢返去。

結果夜晚佢就留低唔走，佢寧願夜晚唔食奶，但係我走咗之後，佢又要婆婆同佢買維他奶同牙擦....我返到屋企都有打過電話俾佢，佢真係無事喎；起初我都擔心佢突然掛住夜晚陪佢瞓覺個枕頭，或者掛住我，結果兩樣都無喎！

第二朝晨咁早六點，佢就跟婆婆起身去公園晨運，佢就顧住玩韆鞦，玩咗成個鐘頭。八點半佢就打電話嚟叫醒我起身，摧促我過去同佢飲早茶，但係到我過到去嘅時候，我仲比佢早到一步。

因為太早起身嘅關系，所以下畫叫佢瞓晏覺，唔使五分鐘佢就瞓着咗。我問佢下次仲要唔要留低响婆婆屋企過夜，佢都話無問題，不過公公同婆婆就好攰，因為佢一分鐘都停唔到落嚟，成晚要揾人陪佢玩。哈哈！

首輪小一入學申請

眨吓眼澄澄就已經要準備升小一，已經唔再係一個任由我搓圓噤扁嘅小娃娃。星期五一早就幫佢去咗嘉諾撒交表，簡呢間學校因為鍾意佢校風純樸，又有女子中學函接，而且老師都推介呢間學校較一般嘅傳統學校較為活一啲；於是我同Eric都好快就得出結論，以呢間學校作為首選。

呢兩日身邊嘅朋友都有問我有無幫澄澄揾直資學校，其實我地都有諗過，不過無考慮要幫佢揾，始終我唔想佢去到太遠返學，而好啲有名氣嘅私校或者直資學校都要去到銅鑼灣或者灣仔，搭車來回都花上一個多鐘頭，而且事前要準備好多嘢，砌靚個profile至可以申請，一則我無咁多時間，二則佢亦無乜特別嘢可以堆砌出嚟見人，三則學費亦係一個要考慮嘅因素，其次係日後佢所面對同臍嘅壓力亦唔會少，咁辛苦嘅日子，仲有好多年要佢去捱，所以我都係聽天由命，最緊要佢生活得開心同做一個安份守己嘅人，唔好要我地太担心已經好好。
 
如果上天眷顧，俾佢入到呢間學校，真係無嘢好奢求，就等佢完成呢幾年免費教育，至張羅一吓澳洲果邊嘅學校，希望佢好似佢爸爸咁輕輕鬆鬆完成整個教育嘅階段，就投入社會，唔使大費週章，咁煩人！

剪短髮

澄澄一直喜歡留長頭髮，包括我本人都鍾意幫囡囡紥辮，但係佢嘅髮質天生帶點倦曲，如果唔係因為要梳髻上跳舞班，可能我都已經要佢剪短咗頭髮。

為咗唔想佢個長度不倫不類，因為好難紥辮，於是叫hair stylist幫佢一次過剪多啲。但係剪之前，個hair stylist話要先濕咗個頭，澄澄當然好驚，因為佢未試過，不過對方應承佢只係洗一分鐘就得，於是半推半氹之下終於試咗第一次洗頭。事後佢都係話好驚，雖然整個過程，我已經幫佢遮住眼睛同耳朵，佢都係話好驚，無辦法！

當剪到差不多嘅時候，佢話自己好似詩詩表姐，因為佢好鍾意詩詩表姐，所以一啲都唔後悔剪咗啲頭髮，仲話自己似冬菇頭.... 其實我覺得佢個短髮樣都幾可愛，好cute!

不過幾日後，佢開始同我講，一時話其實佢都鍾意長頭髮，一時又話佢都鍾意長頭髮同短頭髮，今日佢再同我講，要留番長都好快啫，我諗佢開始有啲唔捨得把長髮，哈哈！不過正如佢所講，好快又會長返啦，使乜担心呢！

暑假完了

一個月嘅暑假好快就過去，尤其中間仲幫澄澄安排咗個多元化嘅summer course，有兩文三語，有故事，有話劇，仲有馬賽克砌嘅勞作堂，都算精彩！

不過澄澄竟然最想返學，因為佢掛住啲同學仔，仲有一個原因係佢升咗上高班可以做大姐姐。

總結呢個暑假，雖然無乜去邊度玩，但係澄澄都作出咗多種嘗試；原本佢好驚游水，依家佢都仲係有啲驚俾水花濺入眼，但係起碼肯落水玩，有時甚至玩到唔願走。

本來都想幫佢報名學游水，可惜遲咗，唯有等出年暑假，今年俾佢玩多年添！

暑假期間，佢仲參加咗今年嘅跳舞考試，連埋試考一共考咗三次，應該算準備充足，希望無白費到過去一年嘅學習，至少攞番張cert啦！

新嘗試

呢個暑假澄澄作出咗好多新嘗試，有好大進步！

吞藥丸
澄澄第一次試食膠囊藥，爭紥咗成半點鐘，一味話驚，又話怕苦，不過最終都食咗。

事隔幾日，叫佢再食，已經易如反掌，兩啖水就已經吞咗。

游水
經過海下沙灘之旅，澄澄應承去印尼嘅時候，會跟爸爸游水，結果佢真係兌現佢嘅承諾，到達萬隆嘅Sheraton Hotel，佢就同爸爸去咗游水；玩咗一陣就已經適應咗，臨尾佢仲玩到唔願走。之後仲識得用手袖自己游。
第二朝輪到媽咪同佢游，佢一樣唔驚。

梳打水

澄澄以前好怕飲有汽嘅果汁，例如可樂、芬達等等。但係有次响印尼我俾佢試飲提子梳打，佢飲過之後就話唔怕有汽嘅嘢，仲好鍾意飲添。

食風沙丸

澄澄從印尼到返香港都有時不時叫肚痛，於是我俾咗小小六神丸佢試食，因為六神丸夠細粒，落咗口都無味道，之後再俾佢試食風沙丸，佢都做得到，結果肚痛都好番。

試新嘢

澄澄一向唔肯試新嘅嘢食，但係今個暑假佢試咗沙嗲牛肉、咕嚕魚、咕嚕肉、咸水角、布冧；但係同樣有好多以前佢食嘅嘢依家又唔食，好似佢以前最鍾意嘅奇異果。

總之呢個暑假澄澄有好大轉變。

炎炎夏日 ~ 海下

澄澄自從去過三亞返嚟之後，一直好抗拒去沙灘，今次表妹子君叫佢去海下玩"筆"泥沙，佢見係表妹叫到，所以佢都無托手踭。

點知佢一去到目的地，準備踏入沙灘，就已經開始喊，話好驚。之後換過泳衣，帶佢去岸邊，佢就猛叫要返屋企。最後幾經艱苦終於勸到佢企响沙上面，頭十幾分鐘佢都一味要返屋企，我又要氹佢話小巴走咗要等佢返轉頭至可以返屋企。最後佢都企咗十分鐘左右，埋返到沙灘佢又嫌污糟(因為有沙)，前前後後可能都搞咗半粒鐘至完成第一回合。

小休咗一陣，叫佢玩堆沙，出海邊幫姑姐執貝殼，終於幫佢打開咗佢個細胆；估唔到之後佢仲可以自己出去裝水、俾姑丈幫佢淋身、响沙上面來來回回，無停過。當然最後都要鼓勵佢，姑丈仲買咗支甜筒俾佢同表妹食；之後我問佢下次仲肯唔肯去沙灘玩，佢都唔使考慮就應承我，佢仲話原來沙灘都幾好玩。

雖然今次佢都無真係行出去深水啲嘅地方，只係企响岸邊玩吓，但係至少佢無唔肯淋身；點都好起碼踏出咗第一步，慢慢再同佢玩多幾次，希望佢有朝一日終於肯學游水，唔使我地逼佢去做。

心散....有機心

澄澄近來開始變得越嚟越心散，以前放學返嚟食完飯會做功課，再做練習；但係最近佢每做一樣嘢都會同我講數、講條件。起初同我講，習作留返瞓醒晏覺至做，慢慢就同我要求由寫一版變成一行；一係就同我講佢會快啲做完功課，因為佢想留返啲時間去玩、去畫公仔、聽故事，總之就求求其其寫完要寫嘅交俾我，結果依家每晚我放工返嚟都要將啲功課擦晒再寫過，真係激氣！

我有時都覺得好難取捨，到底由得佢咁嘅學習態度，開開心心過日子，抑或要嚴謹一啲至啱，我有時都好迷惘。無錯我係唔想俾到佢壓力，如果佢對自己嘅生活識得遁規道舉，識得做功課嘅時候就認真做，做完至玩，咁樣無問題；但係老人家覺得寫字唔重要，應該同佢多講故事，多啲提問、溝通，寫字可以遲吓大啲至寫....澄澄聽到當然舉腳贊成，因為正中下懷，結果變成今日咁嘅態度。

但係當佢越嚟越大，就嚟要準備升小一，就算我無打算要佢講私校或者名校，都要打好基礎儲定本錢，萬一派得太差至有資格去選擇其他學校....抑或真係由得佢咁樣順其自然發展？

我由細已經講，要教好小朋友，有規律，有時序，唔係一朝一日，係要經過漫長嘅過程；但係要推返以前辛苦建立嘅，就話都無咁易，所以要對佢放鬆管教，真係易如反掌。加上佢都開始長大，會有自己嘅思想，更加唔係你講佢就要聽，有啲嘢想逼都逼唔嚟，要同佢講道理....

最近佢每逢放學後都要玩一輪，同啲小朋友你追我逐，試過整親自己，又試過整親人地，於是我唔俾佢再玩，隔得兩三日，佢又同我講條件，話會乖、會聽話，結果就乖一日嚟換取第二日放學後可以玩，都唔知佢响邊度學返嚟！佢仲好可憐咁叫我俾一次機會佢，唉！

最近亞嫲甚至帶埋朱古力嚟睇佢，所以佢仲學會知道有着數就打電話叫嫲嫲每日嚟探佢，相反以前，嫲嫲每朝打電話同佢傾計，佢就唔多願講，變得咁現實，點算好呢？

成功戒片

澄澄即將踏入四歲半，我同佢講不如唔好再着尿片瞓覺啦？佢一口就應承我，一來夏天就到，着住成晚都幾熱幾唔舒服；二來佢覺得咁樣代表自己已經大個女。

其實之前佢都已經訓練到成個月條片瞓醒都唔會濕，起初會半夜叫醒佢起身去廁所，之後將起身嘅時間逐少逐少推遲，之後又試過由得佢咗起身，結果都無出事，所以就正式幫佢放棄着片。

每晚臨瞓前，我都會提佢先去廁所，然後所提醒佢已經無着片；呢兩晚佢仲會自動自覺起身同我講要去廁所，都算成功同過程都幾順利，值得為佢而驕傲！

見家長

今年已經係澄澄學校第三次見家長，我當然最關心係自從Jaycee離開之後，佢响學校嘅情況。原來劉主任同吳老師都担心同一個問題，怕佢會好唔開心。

但係老師話佢都算適應得快，開始同其它小朋友玩，有男有女，無再只focus响一個人身上。反而上堂佢變得集中咗，以前就經常撩Jaycee傾計；但係原來畫畫，佢一直都在模仿Jaycee，而Jaycee嘅畫工就較為細緻，所以一旦無咗Jaycee响身邊，老師都話澄澄嘅畫差咗。但係老師話咁樣反而仲好，希望佢會畫出真正屬於自己嘅畫；我於是醒覺到一直以嚟原來澄澄畫嘅我跟本唔係我，我明明係電髮，但係佢就畫長直頭髮，因為果個其實係Jaycee嘅媽咪！返屋企我都有問返澄澄，佢話係一時唔記得啫！

但係仲有一件事老師話較為担心嘅，就係佢有時會因為貪玩而唔識得分辨對錯，總之有得玩就玩咗先。其實最近放學惟後佢都唔肯即刻返屋企，硬要响學校門口同其他小朋友跑一輪，有時玩到樂極忘形，整傷自己又有，唔小心撞親人又有；老師話要趁佢年紀尚小就要令佢識得分對錯，否則將來好易受人影響咗，我都好同意。其實澄澄並唔係唔識分對錯，而係佢真係比較貪玩，有時甚至連我叫佢停佢都唔聽，真係要好好同佢講！免得將來仲難教....

善解人意嘅澄澄

仲有一個星期，爸爸就從印尼回來。澄澄好清楚知道有乜嘢係爸爸唔鐘意佢做，有乜嘢爸爸好想佢做....

好似噙日佢响Jusco見到啲貼指甲嘅貼紙，好想要，但係佢又知道爸爸唔鐘意佢咁貪靚，所以佢同我講，唔好貼住，等爸爸走咗先貼！

今晚佢又突然同我講：我地喺香港，爸爸就返嚟，不如你同我講多啲英文，如果唔係爸爸返到嚟問我媽咪有無同你講英文，我話無，佢就會鬧你。澄澄可能係見過我同爸爸有拗撓，所以唔想見到我地咁樣，又可能係佢怕爸爸會怪佢唔學好啲英文；我都唔知呢啲算唔算係我地做人父母俾咗佢嘅無形壓力?!

連咁細個嘅佢都識得幫我地諗，真係有啲慚愧，只怪我地做大人嘅唔可以好好咁控制自己嘅情緒，俾佢見到我地相處間嘅問題，反過嚟幫我地担心；所以算係為咗佢，我希望自己可以抑制一啲，唔好俾咗啲不良陰影响佢嘅童年。尤其係我知道佢好喜歡模仿我嘅一切，所以言行舉止都要特別小心，但係我都好需要身邊嘅人給予支持同配合，先可以事半功倍！

充實嘅週末

最近澄澄話好想學畫畫，剛啱星期六其中一個鐘嘅英文會話又上完，佢又唔想再上，於是我應承佢抖一抖，學第二樣輕鬆吓，結果幫佢報名試堂。之前一晚，佢捉住我要我陪佢畫公仔，但係我同佢爸爸都唔係呢方面嘅材料，不過我都陪佢畫咗一晚。仲要係我畫一筆，佢又畫一筆...

到試堂嘅時候，我企响門外睇，原來Miss都係咁樣教小朋友畫，當然都有教佢地構圖方面嘅比例，唔好太大或太細。呢堂小朋友畫嘅係小丑同熊熊玩雜技，我第一個反應係澄澄點可能响一張畫紙上面表達到咁多樣嘢?

結果佢真係做到，雖然唔算好靚，但係都畫齊老師要求嘅嘢，之後澄澄仲同我講佢畫咗啲乜嘢，點解要咁...我都有問老師佢學成點，老師話都唔錯，不過佢畫得仲快過老師，即係老師未畫到佢已經自己開始畫；同噙晚佢要我等埋佢嚟畫又唔同喎! 之後我都有帶佢參觀另一間教室學畫畫，但係佢都要响呢間學，個原因係佢話鐘意跟住老師教佢點畫，而唔係自己畫。

之後我又帶佢上咗一堂梓峰教育辦嘅小領袖戲劇班，目的係訓練佢嘅自信心同胆量；由於事出突然(臨時趁佢朝早上Phonics嘅時候搵嘅)，我只係同佢講有角式扮演，可能係公主、白兔之類；講完我已經察覺到我唔應該俾佢呢個錯覺，以為一定有公主，萬一公主無佢份就大件事，於是我糾正佢可能只係扮小動物咋...

到要上堂嘅時候，佢又例行工事要扭扭擰擰，不過今次算順利，因為朝早佢個朋友仔介紹過負責教呢班嘅Miss Lam俾佢識，加上Miss Lam攞住盒Zingo準備上堂，澄澄見到即刻話佢都識玩，於是老師話請佢教小朋友點玩，所以佢好樂意應承老師，然後就跟老師入咗課室。結果一個鐘頭嘅試堂好快就過去，响我同老師了解佢上堂嘅情形之前，我問咗澄澄上堂玩咗啲乜嘢，點知佢真係第一句就同我投訴無得辦公主...哈哈!

然後佢同我講，佢講咗Snow White嘅故事俾小朋友聽，同時間，佢又講一次個故事俾我聽。之後Miss Lam同我傾計，一開始佢問我點解要帶澄澄上呢個堂？我有啲似幫澄澄interview嘅感覺，雖然無準備，但係我都講咗我嘅原因，係想佢練得大胆啲，有自信，而唔係要幫佢準備小一嘅面試，因為我都無諗過要佢考一流嘅名校小學，所以亦無打算幫佢做定一大堆profile嚟面試。竟然Miss Lam認同我嘅想法，不過有幾真就唔知喇！

Miss Lam讚澄澄好淡定，以佢嘅歲數，可以對住小朋友講完整個故事都唔驚，已經好叻！於是我同佢講返我事前要同佢做嘅準備功夫，雖然唔多，但係都臨急講咗上堂大概會係點嘅情形俾佢聽，等佢有心理準備。原來當Miss Lam話叫小朋友扮小動物嘅時候，澄澄都有提到點解唔扮公主，之後澄澄仲肯聽Miss Lam講，扮佢本來覺得"咦，核突"嘅小豬添，仲玩得好開心。我都有同Miss Lam講，佢之所以表現得好可能係因為人少(得三個小朋友)，所以佢無咁驚；要睇吓下一堂佢係咪真係可以維持到呢個水準至知，唯一可以肯定嘅係，我問澄澄仲要唔要上Miss Lam嘅堂，佢話要!