澄澄乖嘅一面

雖然澄澄有時真係好曳，但係都有佢乖嘅時候嘅！

我同佢講過聖誕節雖然收咗好多禮物，但係都唔可以一次過拆晒佢，因為咁樣澄澄就唔會識得珍惜啲玩具。

今日嫲嫲帶咗一份人地送俾澄澄嘅禮物過嚟，澄澄都無要求拆，仲話要等我返嚟問過媽咪先。結果我放工返嚟，佢真係同我講返有份禮物，問我可唔可以拆，我見佢實在有太多玩具，所以都無拆到，佢亦都好聽話無再要求，仲同返我講，要珍惜啲玩具！

今晚我同佢食完飯過咗姑婆屋企揾子君，我同澄澄講都係時候要還返個麵飽飯盒俾君君喇！

因為佢之前同我講過想借返嚟放假玩，咁依家都返學喇，梗係要還返俾子君啦。佢眼仔碌碌諗咗一下就話好，仲話要俾個玩具子君。結果佢帶埋一條玩具鎖鑰去，話俾君君玩，不過就唔係想留低响君君屋企嘅。

結果走嘅時候佢又唔記得囉，佢想叫我返上去囉返，我就同佢講，輪到你借返俾君君玩啦！結果佢都答應咗，有來有往嘛，都算係咁啦！

另一樣值得一讚嘅係，姐姐話呢兩日晏畫澄澄自己瞓醒都唔會扭計或者喊住話要揾媽咪。今晚佢仲自己攞蘋果食，唔使人氹佢先肯食，可能真係近來胃口好咗，所以肯食嘢！