大陸過年

年初三我地一家人去咗大陸，諗住探杰杰表哥一家。

眼見佢地幾個都食得瞓得，心裡面都舒一口氣。

澄澄見到年紀比佢細嘅軒軒一味mark住佢嚟玩，可能佢同其他表哥表姐年紀上有一段距離，所以寧願同弟弟玩。

响香港出世嘅柔柔表妹就越大越高，同澄澄只係差半個頭，柔柔仲終日唔停口咁食，可能因為咁所以佢長得比同齡嘅小朋友高！

除咗軒軒，澄澄最鍾意同佢玩嘅就係杰杰表哥，無論坐車、食飯都要坐杰哥隔離，呢次係佢三歲以嚟首次唔使我坐响佢隔離，真係女生外向！

夜晚食完飯後，大姨、細姨帶佢地班豆靚去買烟花同炮仗玩。澄澄係第一次玩，除咗放烟花比較大聲，佢有啲驚之外，玩滴滴金佢就最興奮，完全無咗對火應有嘅危機意識，不過就好有過年氣氛...

大陸過年的確氣氛比香港好，但係就真係好凍，連擦牙洗面都頂唔順，成個咀都麻木咗。我仲覺得發冷，食過藥之後就匿咗上床成晚都唔想郁！

新年講嘅吉利說話

新年前我已經開始教佢講啲乜嘢吉利嘅說話，例如見到老人家可以講身體健康、心想事成、萬事勝意，見到女士們可以講青春常駐，做生意嘅就恭喜佢地生意興隆，如果係小朋友就快高長大、聰明伶俐....

舊年澄澄收到利是，都會乖乖咁交俾我幫佢收埋；但係今年佢一收到利是就會收响佢自己身上啲袋度，唔願俾我。

不過佢收人封利是之前都會先望吓我，得我准許，佢至會收，當然佢仲會講句多謝！

年初二同三伯公飲茶嘅時候，爸爸整蠱澄澄，話澄澄食嘢慢，要澄澄請飲茶，點知佢即刻大滴眼淚咁喊... 佢可能開始意識到錢嘅重要性....

有一次佢又問我要利是封，話要俾利是佢個囡囡菲菲！

年初一

今年嘅大年初一，唔須要好早起身，因為婆婆返咗大陸過年，唔使跟佢週圍去拜年，所以朝早起身仲可以食埋蘿蔔糕至出發。

第一站去咗姨婆度，以為會見到表哥表嫂，點知佢地又改咗初二至返嚟，所以坐咗一陣就離開喇。下一站本來要去二嬸度，但係佢又要去人地度，所以最後決定買個藍莓脆脆蛋糕同YunYun姑姑慶生。原來同日亦係澳洲嘅國慶日，爸爸同澄澄都係澳洲籍，不過對澄澄嚟講，就無乜特別意義，最緊要係有蛋糕食！

之後仲可以返屋企瞓個晏覺，休息一下，好relax！夜晚再去二叔婆度，然後打算去醫院探姑太，不過最後都俾人勸阻唔好去。夜晚返咗去嫲嫲屋企食飯同團拜，席上仲有爸爸嘅補習老師，澄澄本來食飯有啲慢，但係一知道有老師在場，佢就稍稍食快少少。老師嘅影響力果然非同凡響！

Surprise???

爸爸今日由印尼返嚟一齊過年，我同澄澄諗住去機場接機俾個surprise爸爸，所以事前無同佢講我地會去，點知等咗好耐，都唔見爸爸出嚟.... 澄澄由原來興致勃勃咁等爸爸都變得無晒心機！仲邊有surprise俾爸爸呢！

原來爸爸貪近由B閘口出咗去，好彩佢臨上巴士前打咗個電話俾Sarah，先知道我地去咗機場，如果唔係，大家就撲個空。

因為姑婆一家人同日會去宿務旅行，所以我地相約咗响機場美心飲茶，接機之餘順便送機添。

之後澄澄提醒咗我未同佢去打流感針，於是即刻同佢落去Dr. Wu度打針。

澄澄好叻，醫生問佢想打pat pat定係打大脾，於是我同佢講打pat pat會無咁痛，佢就乖乖同Dr 講打pat pat；然後佢又聽Dr 話擰轉面唔好睇，打針嘅時候，佢只係捉緊我手一下就打完喇，連哎喲一聲都無叫到，好勇敢！

又放假...

今日係學校嘅農曆新年慶祝會，小朋友都會着中國服返學校玩。

澄澄返去玩完果個半鐘就又有兩個星期嘅新年假。

每次我一講話又放假，佢就會學我嘅語氣講，嘥晒啲學費，成日放假唔返學。

我今年都買咗套新嘅華服俾澄澄(就係上面紅衫黑褲果套)，不過要天氣冷啲至可以着。

粉紅色條裙最多着埋今個農曆年已經好難再着，澄澄着完都會指住自己個肚話有BB，因為條裙包住咗佢個肚仔！

澄澄係大人!!!

澄澄近來成日話自己係大人，因為佢係菲菲嘅媽咪，佢又會照顧表弟表妹，所以澄澄大個女喇！

有次出街，佢係要用揹帶揹埋菲菲出去，管理處嘅姨姨問佢個洋娃娃叫乜名？佢同人講佢囡囡叫菲菲，又話菲菲個爸爸响印尼做嘢...

不過，澄澄真係好鍾意照顧細過佢嘅小朋友；所以對子君表妹，同浩浩表弟都好痛錫，見到佢地就話要抱佢地。

有時响街上見到一啲弟弟、妹妹，佢仲會摸吓人地塊面，好老積！

賀年活動

星期六係澄澄學校辦嘅親子賀年活動，教小朋友做笑口棗同炮仗。

澄澄同幾個小朋友一入到課室，就自動自覺坐响張地墊上面等候老師嘅指示。可能佢地已經習慣咗上堂嘅摸式，咁都係好嘅！

因為老師話每個小朋友都要幫手搓麵粉做笑口棗，所以小朋友又會自動自覺去排隊洗手，預備整嘢食。澄澄當然唔使人叫都會做，因為佢好鍾意幫老師手，可能佢係鍾意俾人讚！

因為老師準備嘅麵粉有啲黏手，所以澄澄搓咗幾吓已經唔肯再搓，於是我叫佢幫手負責將搓圓咗嘅笑口棗浸水同沾上芝麻，佢都好認真同做得好好。寶姐幫小朋友炸好啲笑口棗後，澄澄竟然急不及待要食返粒，令我覺得有啲意外；畢竟佢肯試新嘢，我當然無反對。之後佢仲話好食，梗係啦，煎炸、香口嘅嘢有邊個小朋友唔鍾意？

呢幾日澄澄經常講就快新年喇...又成日哼瑞士糖個廣告歌，話好鍾意聽...

為咗添多份新年氣氛，今年我都買咗好多賀年嘅揮春同掛飾，又同澄澄一齊買放响全盒嘅糖果，由佢去挑選，佢仲要爭住自己俾錢添...

澄澄好怕人大聲

澄澄好怕人大聲講話或者鬧交，佢真係會驚到喊！

上個星期六屋企發生咗啲唔開心嘅事，澄澄舅母因為產後抑鬱同婆婆鬧到一發不可收拾。

婆婆從舅母屋企返嚟嘅時候，怒氣沖沖咁講話以後唔會再認呢個人做新抱。澄澄見到婆婆咁惡鬧人，跟本都唔知道人地係咪話佢就已經喊定先，話好驚婆婆鬧人。我唯有同佢講係舅母唔乖，鬧婆婆所以婆婆至咁嬲。

點知澄澄竟然返學校同佢嘅老師講返件事。

其實我都担心呢啲負面或者唔好嘅嘢同佢講咗，都唔知佢明唔明白，怕佢會經常掛响口邊，問點解，或者响當事人面前講返出嚟，令人難堪。所以我又同佢講件事已經發生咗，唔好再提喇，因為婆婆同舅父都會唔開心。

希望佢都會慢慢咁將呢件唔開心嘅事忘記咗佢，唔好有啲負面嘅影響！

曳曳受罰

下午lunch嘅時候我打電話返屋企想同澄澄講兩句，點知佢响電話另一邊大叫大嚷唔肯聽電話，第二次再打返去佢仲搶埋姐姐個電話，都係唔肯聽，仲話會打姐姐(因為姐姐要佢聽電話)，所以我同姐姐講放工返嚟我就會罰佢。

返到屋企我响鏡裡面見到澄澄企响廚房入面唔敢行出嚟，因為佢意識到我會罰佢。我換過衫之後就叫咗佢埋嚟同我講點解下畫咁曳唔肯聽電話仲話要打人，然後我就叫佢去房度罰企，諗吓自己做錯啲乜嘢要俾人罰。佢竟然問返我係咪要企到我沖完涼為止？

罰完企過之後，佢仲好嗲咁爬上我度叫我，好似無事咁，都唔知佢係咪真係反醒過，知道錯咗啲乜嘢。

壞消息

星期六接到個壞消息，响大陸嘅唐弟一家三口撞車入咗醫院，所以星期日我趕咗上去睇吓乜嘢情況。 不幸中之大幸，一家三口都無生命危險，最嚴重嘅唐弟就裂了六條肋骨同股骨，杰杰就頭骨裂了少許，但係三人嘅精神尚算滿意，都算安心啲。

臨去前一晚我都有同澄澄講點解要去大陸，因為杰杰表哥撞到個頭，所以瞓咗响醫院，到朝早澄澄起身嘅時候，媽咪已經出咗門口，所以唔使揾媽咪喇！到夜晚電視唱國歌嘅時候我就會返嚟。
澄澄都好清楚我講啲乜嘢，結果第二朝起身佢自己落床揾我，問過姐姐我去咗邊，佢就無再要揾我。

到夜晚佢聽到電視唱國歌見我都未返嚟，於是打電話問我係邊度？我其實都好心急想快啲返屋企見澄澄，結果都要差不多八點至返到屋企。

返到屋企佢就問我杰杰表哥係咪仲响醫院呀？點解佢唔小心撞車呀？澄澄仲記得好清楚前一晚我同佢講過嘅嘢....

澄澄乖嘅一面

雖然澄澄有時真係好曳，但係都有佢乖嘅時候嘅！

我同佢講過聖誕節雖然收咗好多禮物，但係都唔可以一次過拆晒佢，因為咁樣澄澄就唔會識得珍惜啲玩具。

今日嫲嫲帶咗一份人地送俾澄澄嘅禮物過嚟，澄澄都無要求拆，仲話要等我返嚟問過媽咪先。結果我放工返嚟，佢真係同我講返有份禮物，問我可唔可以拆，我見佢實在有太多玩具，所以都無拆到，佢亦都好聽話無再要求，仲同返我講，要珍惜啲玩具！

今晚我同佢食完飯過咗姑婆屋企揾子君，我同澄澄講都係時候要還返個麵飽飯盒俾君君喇！

因為佢之前同我講過想借返嚟放假玩，咁依家都返學喇，梗係要還返俾子君啦。佢眼仔碌碌諗咗一下就話好，仲話要俾個玩具子君。結果佢帶埋一條玩具鎖鑰去，話俾君君玩，不過就唔係想留低响君君屋企嘅。

結果走嘅時候佢又唔記得囉，佢想叫我返上去囉返，我就同佢講，輪到你借返俾君君玩啦！結果佢都答應咗，有來有往嘛，都算係咁啦！

另一樣值得一讚嘅係，姐姐話呢兩日晏畫澄澄自己瞓醒都唔會扭計或者喊住話要揾媽咪。今晚佢仲自己攞蘋果食，唔使人氹佢先肯食，可能真係近來胃口好咗，所以肯食嘢！

澄澄經常欺負姐姐

澄澄同Aan姐姐已經相處咗快一年時間，開始識得欺負姐姐，有時對佢大聲呼叫，有時甚至出手打人 (雖然唔係好大力)，試過同佢好聲好氣講解過，打人係唔得架，無人會鍾意呢啲小朋友，亦都有罰過佢，都係改唔到，真難搞！

噙晚我响toliet入面聽到佢對姐姐大聲講，我都話唔係咁囉，我打你架！

返出去我第一時間問澄澄乜嘢事咁惡鬧姐姐呀？佢無答我，但係就承認有鬧人。我亦都試過同姐姐講，唔可以由得澄澄對佢亂發脾氣，如果係澄澄唔講道理，就唔好睬佢，就算喊都由得佢。但係姐姐就怕澄澄喊，所以事事都遷就佢，仲同我講佢下次都會再犯，所以覺得無乎都係算啦！

姐姐呢種心態真係唔要得，咁樣只會令澄澄變本加厲，就算我點教都無用，無佢嘅配合。

今朝澄澄返學唔肯俾姐姐同佢着件外套，於是企响我面前都照樣用手半推半打咁推開姐姐，我即時已經罰打咗佢一下手板，佢又係例行公事喊住咁同我講佢以後都唔會喇。

但係無論點，澄澄都好鍾意Aan姐姐，每晚都要姐姐陪佢玩砌積木、UNO、超級市場等遊戲。只係一到要正經嘅時候，例如擦牙、着片、換衫，佢就唔合作，又話人整痛佢，總之就好識得揾時機欺負姐姐！

2009年第一個返學日

放咗咁耐假，我都預計到澄澄今日返學會有一完嘅難度。

早一晚臨瞓前我已經同佢講第二朝要早起身返學呀，今朝佢都算合作，只係叫咗兩次佢就起身食奶。但係之後去洗面擦牙，我已經聽到佢講話唔想我返工，一陣又話唔想返學，喊到眼紅紅咁。

換過校服之後，澄澄又眼紅紅同我講叫我帶佢返工，我話要同老闆開會喎，入咗房無人理澄澄喎，佢竟然叫我帶埋佢去開會囉！

最後唯有出剎手簡，就係芝士薯條喇。我同佢講如果放學返嚟好快食完飯，就可以食薯條，佢突然雙眼放光，終於肯收聲。但係我出咗門口之後，已經聽到佢又喊住同姐姐講，好想媽咪同我返學。我自己响門外聽到佢呢番說話都爭扎咗一陣，個心有啲酸溜溜，但係我都無開返門入去，等佢經歷吓啦，反正學校放假總會有，遲吓又到年假，點都要俾佢適應吓放完假就要返學呢個事實。

夜晚我放工返嚟問佢學校有無小朋友喊呀？佢話無，仲同我講無小朋友打乞嗤！因為之前我同佢講如果有小朋友咳或者乞嗤，澄澄要行開啲，如果唔係就會傳染到，佢果然有記住我講嘅嘢！

姐姐仲話佢瞓晏覺前飲咗支奶，好快就瞓着咗；我覺得可能係佢要返學所以有啲攰啫。Anyway佢肯食都好嘅，難得佢有胃口食嘢，瞓醒之後五點幾，佢仲食咗半個提子包，結果晚飯咪食得唔多囉！

今日之後，我相信佢應該適應咗。今晚臨瞓時，雖然佢都有叫我陪佢瞓，但係我同佢講咗個故事之後，佢已經肯乖乖地自己瞓，無再喊或者扭計，算叻女啦！

新玩意!

一連放咗兩個星期聖誕假，澄澄每朝就瞓到九點半，我都唔知佢星期一點起身返學。

噙晚我同佢講，要好似以前咁，夠鐘就自己上床瞓覺，點知佢喊到好可憐咁同我講，話要媽咪同佢瞓，因為佢怕媽咪會走咗！我重提返佢以前係點樣自己瞓覺，我又同佢講我只係响出面做嘢，做完就會陪佢瞓，佢好似好委屈咁忍住一泡眼淚，攬住Minnie同佢瞓。然後我就熄燈走人，無耐佢就瞓咗！

今朝早八點鐘佢就醒咗，仲同我講話有提子飽食(係噙晚同佢一齊買嘅)。我因為仲想瞓，於是叫佢瞓多半個鐘至起身，點知一瞓就到九點半！呢次都係我自己唔好，學咗佢賴床。

之後去咗婆婆度，我同舅父借咗部NSD嚟玩，點知澄澄就當咗係佢嘅咁攞住唔肯放手，仲話係舅父借俾佢嘅。夜晚返屋企嘅時候，因為我要去Jusco買啲嘢，叫佢俾部NSD我保管先，仲要應承佢叉完電就俾佢玩，佢至肯交俾我。

返到屋企樓下嘅時候，佢開始提我：叉完電俾我玩。我故意扮唔知佢講乜，於是佢又話：果個你幫我保管嘅呢，黑色架，可以寫字嘅呢，畫畫畫架...見佢形容得好辛苦，於是我同佢講係咪舅父借俾我個NSD呀？佢即刻點頭，叫我叉完電俾個NSD佢玩。估唔到一個三歲嘅靚妹都學人玩NSD，無呃你，佢係真係識玩其中一個將幾個同樣嘅動物排成一行就算贏嘅game。

最近佢仲經常揾人陪佢玩UNO，佢已經可以一個人玩兩份牌，一份自己，一份菲菲，仲會捉人唔記得講UNO，好犀利！

仲有一份聖誕禮物吸塵機，佢又係每朝都叫我幫佢倒啲垃圾出嚟俾佢吸塵，吸完一次唔夠，仲要吸夠好幾次，真要命！

澄澄胃口好了

呢兩日澄澄胃口好了，不單止午飯同晚飯都開胃了，食多了飯，亦沒有把飯含在口裡面太耐。唔知道同佢早一輪食藥有無關呢？

呢兩日晏畫澄澄瞓覺前仲要求食奶先，平時叫佢食都唔肯食，既然佢叫到，我亦都開咗7oz俾佢，佢好快就食完，然後十分鐘就瞓着咗。夜晚食完一碗烏冬，隔一陣佢仲可以食埋個壽包，真係不可思義！

唔知會唔會因為早排因為一大班人，所以佢有啲心野，唔認真食飯，呢兩日得返我同佢，所以都有進步。小朋友有時都真係要有個安靜嘅環境俾佢地至可以集中精神，專注學習！

澄澄賣口乖

呢幾日爸爸叫澄澄同佢講早晨或者晚安，澄澄都好唔合作，諸多扭擰。有時什至激得爸爸好唔開心。

今日爸爸搭飛機返印尼，我同澄澄都有送爸爸去巴士站。澄澄仲要用條baby sling帶埋菲菲落去，沿途好多人見到澄澄用揹帶揹著菲菲，都覺得好好笑。因為踫啱有人示威遊行，所以班車遲咗好多至到，不過最後都等到架車。

爸爸一上咗車，澄澄就同我講，好掛住爸爸。我都唔知佢講真定講假，因為之前佢又好硬頸，唔肯叫就唔叫，但係轉過頭又話好掛住。

我隔著車窗嘅玻璃同爸爸講澄澄話好掛住爸爸，爸爸雙眼都似有啲紅，唔知係咪好感動呢？