要搬家！

最近我地想搬屋，因為住緊果度嘅樓上樓下、左右隔離都經常發出一啲好滋擾嘅聲音，唔係樓上搬抬搬櫈，就係隔離'砰'門聲 (经常性穿梭兩個單位)，一係就輪到樓下隻狗吠聲 (因為佢嘅主人遲歸，可能間屋無燈無糧)。呢個情況維持咗足足三年，話說係因為我無再响SCB返工之後，唔需要响外邊留到十二點幾，所以至知道有呢啲騷擾。前前後後我亦投訴過好幾次，不過都無改善。

今晚十點左右，澄澄剛入睡，樓上突然又'砰隆'一聲，嚇到澄澄醒咗大喊。我問佢咩事呀？佢話: 澄澄唔開心，喊呀...好淒凉 (呢句係佢嘅口頭禪)。我曾經同佢講過係樓上個哥哥唔聽話，於是佢同我講: 叔叔唔乖，跌嘢嘈醒澄澄，我地買新屋啦，唔住南豐。之後又問我幾時買？我話等爸爸返嚟先啦，佢都話要依家，可能佢今次俾樓上嚇親，所以唔想住呢度！

今朝早佢又同我講，媽媽買張床床，澄澄瞓下面，大個先瞓上面，自已瞓得喇。佢開始意識到就嚟要搬家了！