角色扮演

最近澄澄喜歡玩role play，一時扮蔡主任，將菲菲，蓉蓉，南南佢地放晒响地上面排排坐，然後佢負責教佢地讀書，又排隊去"vi vi"。有時佢又扮我話自己係媽咪，蓉蓉係澄澄，然後用手推車帶澄澄出街。 有時佢又扮doctor要幫蓉蓉佢地檢查身体，探熱、打針同餵葯。

以前爸爸曾經同佢玩過煮飯仔同茶客，依家佢就幫菲菲，蓉蓉佢地玩酒樓飲茶，總之就將日常生活佢見過嘅、體驗過嘅事情當成遊戲，自得其樂一番！

記憶力驚人！

今朝早我返工前，澄澄响我手袋裡面攞咗個散字包出嚟同我講：Kitty姨姨都有呢個銀包呀！剎時間我都要諗吓佢講緊邊個，原來佢係講緊三個幾禮拜前我地同Kitty食lunch嘅時候，佢曾經攞過個散字包出嚟，個款係一樣但唔同色，佢竟然仲記得，更加估唔到嘅係佢連Kitty個名都記得。因為平時比較多提住嘅都係Jac姨姨、顧顧姨姨，Kitty就比較少見同提起，更出奇就係我問佢：咁Kitty姨姨有個女女叫詡賢姐姐都送過禮物俾你喎？佢即刻就指住擺咗响電視機柜個玩具話：呢個電腦囉！話說呢個電腦係大約半年前有晚响西貢食飯時候，詡賢姐姐送俾澄澄嘅，佢竟然仲記得喎，真厲害！

又有新名字

澄澄之前曾經講過學校有個小朋友講嘢好大聲，俾佢嚇親仲走去同蔡主任投訴，當時我問佢個小朋友叫咩名佢都唔識講，事隔兩個禮拜，佢再同我講返件事，已經可以講埋個名，原來佢叫亜濤。


之後澄澄又講俾我知：我地橙組仲有穎欣，力生哥哥調去萍果組喊呀！於是我攞學校派返嚟嘅校刋俾澄澄睇，佢都可以逐個小朋友講佢地個名俾我知，當我認錯咗某個小朋友個名，佢仲指証我：媽咪搞錯咗呀！


So far 我都未有聽佢講過邊個小朋友唔同佢玩或者同佢爭嘢玩等負面嘅報告，希望佢同其他小朋友可以容洽相處啦！佢最近返學如果唔見到蔡主任企响門口接佢，佢就唔肯行入學校，係都要等到老師出嚟，真係難搞。

普通話？

今日澄澄突然同我講：碑紙，講嘅時候仲有個手勢，但係我都唔知佢講乜嘢。唯有問佢，佢話用嚟飲水架。哦！原來佢講緊普通話嘅"杯子"，一定係學校嘅孫老師教佢啦！

朝早同公公婆婆佢地飲茶嘅時候，澄澄指住個茶杯又同婆婆講：呢個"杯子"嚟架，婆婆因為學過普通話，所以都聽到澄澄講乜，相反公公就完全唔識，以為澄澄講"筆"、講"筷子"，搞到連澄澄都取笑公公無用，唔識聽普通話！

吸取教訓

噙晚食完飯同澄澄落咗Jusco 嘅supermarket諗住買定啲餸，澄澄一見到購物車就爭住要推。以前佢要有得坐嗰種，或者尊係俾小朋友揸車嗰種，依家佢就要最普通嗰款，志在推車。但係佢都開始百厭，有時企响車上面，有時又坐响車底，後尾我要佢拖住我行，佢唔想俾我拖之餘，仲出力想甩開我隻手，佢咁大個都係第一次同我鬥力，當然佢最後都係要服從我。返到屋企佢又入廚房開雪柜、拉柜桶，我怕佢會夾手，所以要佢出嚟，但係屢勸唔聽，最後我嚇佢話要玩就留响入面，我要關門，呢個時候佢就知驚喇，仲嗌大個口喊，話澄澄依家乖喇，下次唔敢(呢句係佢嘅口頭禪)。

今晚食完飯，佢特登走嚟同我講，澄澄噙晚入廚房唔乖，今日無入喇！我於是再同佢解釋點解唔可以入廚房.... 除咗掉垃圾。佢竟然同我講話要入去揾姐姐問嘢，作為藉口借故入去，真係蠱惑！

學校生活(二)

今晚臨瞓前，澄澄同我講佢响學校嘅嘢，話"陸啟謙佢喊呀"。呢個名之前我從未聽過，我問佢呢個小朋友係咪新嚟架？於是就同佢講澄澄曾經都係咁喎，仲教佢要鼓勵啟謙唔使驚架，因為學校裡面仲有好多老師同小朋友，好開心架。之後佢同我講逐個小朋友嘅名：晉毅、崇熙、芷欣、力生哥哥、朗維、天行、溥軒，原來小鬼响學校認識咗咁大班朋友仔。

好多時我都会問佢關于學校嘅嘢，例如普通話老師姓乜架？唔知佢係真唔知道抑或唔識聽老師嘅介紹，所以答唔到我？試過問佢好幾次，佢都唔識答，但係前日佢終於話到俾我知佢係'孫老師'。再細問佢教咗澄澄啲乜嘢？佢就仲未好識得點樣瞄述俾我聽，反而有時候佢自己想講俾我知，仲會講得多啲。今晚佢已經識得同我講，孫老師同佢地講"早安，好"！

遲啲學校會有啲錄影咗佢地嘅學校生活嘅DVD出售，我都會買返一隻作為紀念，兼且可以了解多啲小朋友返學嘅情況。

小弟弟？

今朝早澄澄突然同我講話想要個細佬，我唔知邊個教佢講呢啲說話，或者係想利用佢把口向我傳遞信息。雖然我本人唔係好想再生，但係我都唔想俾佢一個負面嘅訊息，所以同佢講，做姐姐要幫媽媽手照顧弟弟，要愛鍚佢喎！佢就問我：係咪俾細佬咬呀都唔好鬧佢喎？吓？？ 原來細佬咬人嘅.....哈哈

要搬家！

最近我地想搬屋，因為住緊果度嘅樓上樓下、左右隔離都經常發出一啲好滋擾嘅聲音，唔係樓上搬抬搬櫈，就係隔離'砰'門聲 (经常性穿梭兩個單位)，一係就輪到樓下隻狗吠聲 (因為佢嘅主人遲歸，可能間屋無燈無糧)。呢個情況維持咗足足三年，話說係因為我無再响SCB返工之後，唔需要响外邊留到十二點幾，所以至知道有呢啲騷擾。前前後後我亦投訴過好幾次，不過都無改善。

今晚十點左右，澄澄剛入睡，樓上突然又'砰隆'一聲，嚇到澄澄醒咗大喊。我問佢咩事呀？佢話: 澄澄唔開心，喊呀...好淒凉 (呢句係佢嘅口頭禪)。我曾經同佢講過係樓上個哥哥唔聽話，於是佢同我講: 叔叔唔乖，跌嘢嘈醒澄澄，我地買新屋啦，唔住南豐。之後又問我幾時買？我話等爸爸返嚟先啦，佢都話要依家，可能佢今次俾樓上嚇親，所以唔想住呢度！

今朝早佢又同我講，媽媽買張床床，澄澄瞓下面，大個先瞓上面，自已瞓得喇。佢開始意識到就嚟要搬家了！

又跌落床？

澄澄每晚都係攬住Minnie就自己瞓覺，我就会把握呢段黃金時間去處理一下我嘅私人事務。噙晚我寫緊Blog嘅時候，突然"砰"一聲，跟住就係澄澄嘅喊聲，我即刻就意識到佢一定係跌咗落床，於是乎即刻入房睇吓佢，已經見佢"趴"咗响地上面。我問佢有無邊度痛，佢都只係一邊喊一邊又好眼瞓。於是我幫佢檢查過佢嘅頭、手同脚，見佢無特別喊得厲害就應該係無大礙嘅，尤其係佢一向都跌慣，佢係呢張床大大話話都跌過十次八次，嗰陣都只係一歲左右！

今朝起身我再問返佢，佢都已經唔記得哂，仲問我係咪細個果陣？算啦好彩佢都無乜大礙。咁岩前晚學校派咗本書返嚟要家長同佢講解，裡面曾經見過一張上下格床嘅圖書，佢即時就聯想起，仲同我講: 澄澄依家細個，要瞓下面，大個先瞓上面，因為會跌落床架！幾醒....哈哈！

澄澄係姐姐？

今日同澄澄去律師樓辦埋少少瑣事，我同澄澄講：啲律師哥哥、姐姐，仲有律師姨姨都好叻，咁你大個要唔要做律師呀？點知佢擰哂頭話唔要。可能佢都仲未知律師究竟係點解！

之後我地就去咗婆婆度，澄澄話要去揾表妹盈盈，初頭佢兩個見到面都唔係太熱情，但係當澄澄想玩表妹啲玩具時，佢都肯先問一下表妹可唔可以俾佢玩，然後表妹又好願意俾佢玩，都無搶嘢玩。之後熟落咗，仲玩到糖痴豆咁。差唔多夠鐘要返婆婆度食飯嘅時候，澄澄成個大家姐咁問盈盈要唔要一齊去，仲拖住佢只手邊講邊出門口。落到街我話等我拖表妹同佢啦，佢竟然話唔駛，仲話盈盈細個要兩個一齊拖住佢，睇見佢兩個小鬼真係好得意。之後澄澄仲做個好榜樣俾表妹睇，食哂碗飯仲飲完一碗湯，不過表妹就唔肯食飯！

澄澄叫"阿薇"

澄澄呢幾日好得戚，聽到嫲嫲或者婆婆佢地叫我個名，佢又嗌埋一份，我不停咁同佢講，話佢細個唔可以咁樣叫我，於是佢又問我咁公公呢？爸爸呢？姑媽呢？....然後我話萍姑姐都唔得，因為佢細過我。

跟住佢就當唱歌咁，成日問住我萍姑姐唔可以叫乜嘢？我知佢常藉口又叫我個名，於是我話：唔可以叫我個名囉！佢即刻就問我：係咪"阿薇"呀？跟住佢就笑得好得戚！因為連萍姑姐都唔叫得，佢竟然可以講，激死！

三字經

最近我教澄澄三字經，只係讀咗幾次，佢就記得點唸。我發覺佢嘅記性都幾好，比起認字快好多，不過都要經常同佢溫習，否則就好似唸ABC咁，明明兩歲前已經識得背哂A-Z，上星期我再問返佢，只係得返A-E，真係激死喇！

弊喇，澄澄鍾意鍚鍚 :(

最近唔知點解澄澄每當見到啲佢鍾意嘅嘢，無論廚窗裡面嘅招財貓，抑或係貨架上面嘅玩具，佢都嘟個咀埋去鍚一啖，真係激氣！

最近嘅手足口病仲咁猖獗，佢表妹只係五個月大都中咗招，澄澄响學校接觸咁多小朋友，我都好担心佢會唔會有事，好在學校嘅老師都好留意佢地嘅衛生同健康情況，每當有少少異樣，就會同家長聯絡，報告一吓近況。好似噙日老師話佢比平日多咗流眼水，不過就無紅無腫無眼膠，亦唔見澄澄有摔眼嘅現象，所以叫我多啲留意下佢就得喇。

呢排亦從佢口中聽多咗一啲我無教過佢嘅詞彙，例如"裝修、轉燈、地震"...等等。唔知佢响邊度學返嚟，有時佢食完飯飽飽嘅時候，佢就摸吓自己個肚皮話"我有BB呀"，俾我好多驚喜！

母親節

學校因應即將來臨嘅母親節，教咗小朋友一啲小手工。

今日放工返嚟，澄澄就指住枱面嘅一個勞作話送俾媽媽架。裡面係一個小朋友自己整嘅紫菜麵包圈，另外仲有一條用膠珠穿成嘅手鏈。我問係咪澄澄做架，佢就點頭然後攬住我話 '攬吓媽媽先，我好鍾意媽媽架'。聽到佢咁講真係好窩心，有乜唔開心都可以拋諸腦後。成晚佢對我都好熱情，又攬又鍚。

後尾幫佢檢查書包嘅時候，見到佢嘅手工簿，貼咗首歌頌媽媽嘅兒歌，我問佢點讀架，佢就即刻表演俾我睇。你地都睇吓個video啦！同時亦將佢送俾每一個母親。Have a Happy Mother Day!

澄澄受傷了！

下午收到幼稚園蔡主任嘅電話，心諗唔通澄澄唔舒服定係唔乖？原來老師話佢响學校玩韆鞦嘅時候，有個小朋友幫佢推嘅時候唔小心篤倒佢嘅下眼皮，好彩唔係眼睛，只係差一亳米距離，真係好險。老師話當時聽到澄澄'哇'一聲大喊，於是問佢咩事，佢就喊住話俾老師聽好痛，老師幫佢檢查一番，發覺無乜大礙就安撫咗佢，再問佢係咪响屋企定係學校整傷？澄澄就話响學校玩韆鞦整到呀。老師當時並無同我講係邊個小朋友整傷澄澄，只係通知我有呢件事發生。

放工我返到去即刻就幫佢檢查多次，都只係少少皮外傷，然後就問佢點解整到架？佢就話俾我知，"我玩韆鞦,宝軒推我呀"。於是我同佢講，小朋友係一時唔小心整到澄澄呀，咁你原諒佢啦，佢就點一點頭。我咁講係唔想佢對小朋友有咗種抗拒感，唔敢同人玩，最緊要佢無受傷，小小碰撞實在聽所難免。

第一次食糖

噙日响玩具反斗城澄澄見到瑞士糖，係都要我買俾佢，後來我話買軟糖啦，但係又無得賣，結果就成全佢買咗佢想要嘅第一筒糖。初初佢攞咗一粒揸住响手點都唔肯食，後尾我話要沒收咗佢筒糖至肯食。因為佢係第一次食糖，而瑞士糖又有啲硬，食食吓黏住响啲牙度，佢覺得好唔舒服，於是猛叫我地幫佢整返出嚟。之後我問佢仲要唔要食糖，佢就耍手兼擰頭。有剩嗰啲糖我叫佢帶返學校請小朋友食，佢都無反對！

迎奥運

今日學校大慨係同小朋友佢地講解奧運會嘅課題，放學嘅時候又派每人一把火炬，我問澄澄係咩嚟架？佢就舉起手話'傳聖火呀，跑跑跑！'

沿路响街上一路都見到好多小朋友揸住唔同形式嘅火炬。依家嘅學校果然活動教學，因應住唔同嘅節日就講唔同嘅教材，比起我地嘅年代，真係變咗好多！