唔知點解澄澄好容易就發燒，星期一晚佢玩得好好地，到食奶嘅時候，佢要枕响我大脾上面食奶，摸一摸佢個頭就覺得有啲熱，一探個額頭原來38.9C，其實就唔算好燒，不過摸埋佢隻手掌仔同脚仔都唔係平時嘅溫度，我就知佢係發燒，之後俾咗退燒葯佢食就上床瞓覺。到清晨五點幾，再摸吓佢都仲有啲，又叫醒佢食多次药，然後再瞓過。
朝早起身我同佢講因為澄澄有少少發燒，所以休息一日啦，點知佢即刻就問我好返可唔可以唔返學？真係激死，我於是問佢點解唔鍾意返學，係咪有嘢唔開心，原來佢話想媽咪湊佢返學。於是我同佢解釋，如果我要送佢返學先返工，咁我就會遲到。佢即刻扮老闆好大聲咁講：媽咪你做乜遲到唔返工，係咪唔要揾錢，唔買書書俾澄澄呀？
其實佢又未至於討厭返學，不過就係唔熱衷，有時候學校有工作紙派返嚟，佢又好積極同認真去做，仲講俾我聽係邊個老師教嘅，所以我估佢上堂都係留心嘅！
你要食多D， 身体好就无甘容易病。 发烧好辛苦。 好返未？
回覆刪除佢發燒一向都唔係好高,around 38-39C左右，仲好好精神添除咗流鼻水。今日帶佢睇咗個兒科醫生，一睇佢就話佢係鼻敏感，因為細路仔一般好少眼角下面皺皺巴巴，仲有黑眼圈，呢啲都係鼻哥嘅血液循環得唔好，所以特別容易傷風同敏感。估唔到佢遺傳咗我呢樣嘢！
回覆刪除哎呀， 甘架？！
回覆刪除公公以前都有鼻敏感， 行山多好返。 你多D跟姑妈行山可能有帮助。