蘋果妹妹

今晚我放工之後，爸爸話不如外出食飯，結果去咗Jusco入面嘅Pokka Cafe。

坐低無耐，有個waitress姐姐攞咗一份Disney嘅玩具埋嚟，話送俾蘋果妹妹。我好奇怪澄澄幾時有個咁嘅名，雖然呢間Pokka我地都嚟慣嚟熟，好多時澄澄想食餐包，而我又唔係叫set，佢地都會照樣俾個餐包澄澄，仲唔收錢，有時又會送dessert，都係因為澄澄幾氹得人開心啫。不過我都估唔到今次送份禮物咁大份啫！

唔知係咪因為澄澄今日塊面有小小紅卜卜，所以俾人叫佢做蘋果妹妹？

麵包飯盒

有時候小朋友嘅喜好真係好難捉摸，夜晚食過飯後去咗姑婆屋企，因為叔公從印尼返咗嚟，不過去到嘅時候，佢剛好上咗的士，結果緣慳一面。

澄澄响姑婆屋企見到一個麵包形飯盒，好鍾意，捉捉把玩咗成個鐘頭，臨走時仲唔捨得放手，堅持要帶返自己屋企，仲喊到好淒涼，一味話我好鍾意個麵包，嗚~嗚~

我地從旁同佢解釋，因為子君瞓咗覺，要等佢起身問過佢，可以借返屋企玩先可以帶個麵包返屋企。最後當然無俾佢帶走，因為唔想令佢有種錯覺以為每樣嘢佢想要就有。

返到屋企臨瞓前我再同佢訓示一次，如果佢想要借個麵包飯盒，就要攞自己一樣玩具去交換。起初佢都好大方，但係借出去嘅都係一啲佢唔太在乎嘅玩具，例如果隻會彈起嘅駱駝，又或者層層疊嘅積木；後來我話要佢借架手推車俾子君玩，佢就話唔好。仲教返我轉頭，如果俾咗自己架手推車子君，就叫我再買過一架俾佢；另一個方法就係買過一個麵包俾子君。嘿，你都無佢咁”精” 呀！

有趣嘅習慣

澄澄有個好得意嘅習慣，就係瞓覺嘅時候要捉著隻枕頭角嚟入睡。

呢個習慣由佢七、八個月大嘅時候我已經察覺到。佢當時好喜歡有個枕頭放响側邊，可能覺得有安全感，大大吓就鍾意摸住隻角嚟瞓。如果你响佢未瞓着嘅時候攞走佢個枕頭，佢就會耍盲雞咁用手揾返個枕頭出嚟，好得意！

佢有樣嘢好似我亦都算係一個好習慣，就係固定一個地方放嘢。你只要同佢講一次，佢就會記住邊個地方用嚟放啲乜嘢。有次我無意中將佢玩完嘅UNO放錯咗第二個櫃桶，佢當然揾唔到啦，於是走嚟問我；我好自然就耍開佢，話係平時個櫃桶囉！佢答我都無；於是我醒起放咗响第二個櫃桶，叫佢去睇吓係咪，佢一見到就皺埋眉頭同我投訴，都唔係放呢度嘅！我唯有同佢say sorry，因為係我擺錯地方，然後再同佢講，因為佢無收拾好，所以我至幫佢收拾，咪擺錯地方囉！

Boxing Day ~ 拆禮物

下午去咗婆婆屋企，澄澄仲繼續收禮物，點算過後澄澄總共收咗十幾份聖誕連同生日嘅禮物，其中Hello Kitty頸巾都有兩條，背囊同手袋都有三個，其餘仲有形形式式嘅玩具同衫裙。多到連澄澄或者我都唔記得係邊個送俾佢，足夠佢每個月拆一份，又或者特別日子拆夠兩份，實在誇張！

芸芸禮物當中(已經拆咗計) ，澄澄比較鍾意果個有佢半個size咁大嘅洋娃娃，澄澄幫佢取名Mimi，望落其實有啲嚇人，但係其他小朋友嚟到，都會將佢抱上手，所以小朋友嘅品味有時都好難理解！其次就係層層疊嘅積木，而最怕算係一個掛滿約干嘅行裝就會彈起身嘅Camel，因為會嚇佢一跳，所以佢唔係好敢玩。

Christmas Party

今日係聖誕節，一早約好一班朋友仔返嚟開party，交換禮物，所以最開心都係啲小朋友。

因為係第一次搞party, 由於時間關係，大部份嘅食物都係從Maxim’s order返嚟，有大蝦salad、腸仔肉醬意粉、鰻魚雞粒炒飯、芒果pudding、葡汁焗四蔬，再加自己準備嘅雞翼同啫喱糖，再加咗兩個pizza，個份量其實就啱啱好，不過啲食物認真麻麻，下次都係親自出馬好過。結果當然係我嘅啫喱糖最受歡迎，一來係小朋友嘅favorite，二來仲有得意念嘅Hello Kitty、bear bear同Miffy形狀，當然受歡迎啦！

一交換完禮物，小朋友們已經急不及待拆禮物，因為Chelsea抽到一份自己屋企都有嘅Hello Kitty吸塵機，結果就同澄澄抽到嘅Barbie對調咗，呢份亦係澄澄曾經祈待過嘅禮物，不過我無幫佢放電池，所以佢玩兩玩就無興趣玩落去。

我同佢講其餘嘅禮物都留待到Boxing Day至會拆，佢亦都無反對，或者佢真係收得太多禮物，所以都唔太在乎幾時拆！

表弟走了！

不經不覺表弟已經返咗嚟兩個幾星期，聽日就要返美國。朝早姑婆請飲茶，之後雯雯姑姐返我地屋企收拾細軟，準備返佢娘家嘅屋企過一晚夜，然後從屋企出發去機場會比較方便。

經過連日嘅相處，澄澄對於同表弟嘅分離有少少唔捨得。一醒咗佢就問表弟去咗邊？我同佢講表弟已經走咗，返咗去佢婆婆屋企，聽日就返美國。佢問我去美國要唔要搭飛機？又問我佢地幾時再返嚟？好明顯佢係有啲唔捨得…

Jaden响度嘅時候，澄澄尤如一個家姐咁，經常陪伴Jaden左右，當佢玩啲唔應該玩嘅嘢，佢又會阻止佢，同佢講唔玩得架！

下午約咗Carmen姐姐食lunch，又去佢屋企玩咗一陣，走嘅時候，Carmen好唔捨得澄澄，叫澄澄留低陪佢瞓覺，怕醜嘅澄澄當然唔肯啦，但係佢都好鍾意同Carmen玩，見到面就手拖手一齊行成對孖公仔咁！

三歲生日

今日澄澄無乜心機，可能因為噙日無休息夠加上夜晚飲咗杯橙汁，今日咳得好犀利，仲流埋鼻水，屋企有啲看門口嘅藥俾佢食埋都唔見好轉，唯有去睇醫生；下午瞓醒覺仲有微微發燒，不過食過退燒藥就無事，原本要去沙田食乳鴿，結果都無同佢去，只好安安靜靜响屋企過，直到夜晚爸爸外出食完飯返嚟至同澄澄吹臘蠋、食蛋糕。

生日歌一唱完，我都未來得切準備相機，佢已經吹熄咗支臘蠋，連一張全家福都影唔到，真係激死！

表叔結婚了

今日係表叔結婚，我地一早起身準備好就去教堂觀禮。澄澄係第一次出席呢種場合，不過佢都好合作，要站立嘅時候就站立，要瞌埋眼睛祈禱嘅時候就瞌埋，就連在場嘅表弟Jaden同表妹君君响度叫囂或者走來去去，佢都好安靜咁留响自已個位度。

到有人唱詩歌嘅時候，佢又扮彈琴。我印象中嘅澄澄都好似無試過响呢啲類似嘅場合上做出一啲令我同爸爸尷尬難堪嘅場面，都算係咁啦！

忙咗一個朝早，响回程途中佢已經太攰瞓着咗，但係返到屋企擺佢落床又醒咗唔肯瞓，於是換過衫又再出發去酒店嘅飲宴。

澄澄見到新娘換咗幾次晚禮服出嚟，第一次見嘅時候佢竟然唔認得，同我講個有第二個新娘姐姐，經我解釋之後，佢已經知道其實係新娘換咗套衫，佢仲好心水清個新娘換過幾多套裙、係乜嘢顏色。

結果返到屋企瞓得落床已經十二點，超攰！好在澄澄同我都開始放聖誕假…

提早慶祝生日及過冬

因為星期日係永利表叔嘅結婚大日子，所以提早响婆婆屋企做冬。於是澄澄收到第一份生日禮物，就係舅父舅母送嘅BB playmat 一張同埋輝輝舅父送嘅Hello Kitty背囊，剛好將所有菲菲、南南、蓉蓉等洋娃娃全部放進去。澄澄因為新鮮，不停將菲菲放入去瞓覺，之後又攞佢出嚟話佢要起身，就咁拎出拎入就玩咗一個晚上！

今個冬仲多咗一個新成員，就係剛出世嘅表弟浩浩，澄澄都好錫呢個表弟，成日話要抱佢，又錫佢塊面同摸佢。其實佢對年紀比佢細嘅表弟表妹都好痛錫，好有大家姐風範！

學校觀課

星期五係澄澄學校嘅觀課日，因為澄澄學校做緊嘅第一個蘋果project剛好完結，所以學校邀請家長去分享小朋友嘅成果同埋了解吓學校上堂嘅情形。

澄澄見到我嚟睇佢上堂，都有啲興奮，亦都如我所料變得唔尊心，成日望著我。不過當老師叫佢出去幫手嘅時候，佢都好認真，好聽話，都算係咁啦！

個蘋果project原來教咗小朋友用蘋果煲湯，仲有做蘋果pie，澄澄依然係一貫嘅習慣，只係象徵式咁咬咗一啖就算數。

之後家長再去第二個課室同老師做分享或者發問問題，個感覺都幾好，可以多啲了解小朋友响學校嘅學習情況，又或者有問題可以同學校講，等老師幫忙可以同家長一齊作出配合，令問題得以解決。慶幸澄澄暫時都未有咁嘅須要，不過亦有家長真係因此而受惠，令小朋友變乖。

迎聖誕

近日聖誕節嘅氣氛越嚟越濃厚，澄澄每次見到聖誕樹都好雀躍，有時夜晚返屋企見到啲燈飾佢都會講好靚呀！

我見依家間屋企大咗啲，都可以放到一個聖誕樹，所以叫Wallace叔叔送聖誕樹俾澄澄。澄澄對Wallace一啲都唔生保，仲叫人同佢一齊玩波波。之後我同澄澄開始裝飾聖誕樹，成個過程佢都好興奮，唯一美中不足就係欠缺咗閃燈同音樂。佢成日提我屋企嘅聖誕樹無燈燈嘅？等我再考慮吓要唔要買燈燈先？！

家長日

星期六係澄澄學校嘅家長日，主要係俾家長了解吓學校嘅教學模式，同時亦俾家長了解吓佢地嘅小朋友响學校嘅表現係點樣，學校同家長可以點樣互相配合，可以令小朋友學習得好啲。我聽完之後亦對學校同澄澄了解多咗，點都係一件好事！

其中一位家長仲提到佢個仔係今年至轉過嚟躍思讀K1，最大嘅分別就係佢個仔由好唔鍾意返學變咗好鍾意返學，其中一個原因係佢以前嘅學校嘅課本大部份都係文字，同埋好多功課，令到仔仔產生咗恐懼，每朝返學都好似打仗咁。

亦都有啲小朋友响升K1嘅時候出現好大嘅阻力，因為小朋友要適應新課室、新嘅老師同朋友仔。聽完呢一切，我對跟住落嚟嘅面試(蘇浙)已經有咗盤算。

但係澄澄一路以嚟都好記住上次爸爸同佢去過呢間學校登記嘅時候，有好多哥哥姐姐係度跑跑跑，於是佢又跑埋一份，好高興！

所以我都同佢講，如果佢要轉校，就會無咗依家嘅好朋友，仲要早啲起身搭校車返學，如果佢唔覺得有問題，就要睇吓學校收唔收佢至可以決定。佢都諗咗一陣然後同我講睇吓學校收唔收啦!

另一個令我打退堂鼓嘅原因係面試嘅時候老師同我講K2開始就會完全用普通話上堂，但係澄澄太少接觸普通話，如果要佢轉咗個上學模式，可能會令佢有不良後果，與其係咁，我寧願佢開開心心享受呢幾年嘅學校生活，反正躍思都有普通話授課，只不過唔係主力啫！

同埋我要澄澄明白佢唔好誤會咗以為呢間學校唔使上堂，只係見到哥哥姐姐係度跑，好開心嗰一面，不過我自覺收佢嘅機會亦唔大，始終佢都係插班，大部份嘅學位都已經留咗俾原校由K1升上去嘅小朋友。所以我都無抱任何希望，聽其自然啦！

課外活動

星期六學校有個關於音樂嘅課外活動，係由一個國際機構叫美育奧福音樂舞蹈團體主辦嘅。小朋友全部入課室聽導師教，而各位家長就跟一位由台灣專程過嚟嘅導師學，教我地點樣投入由小朋友角度去開開心心咁感受學習音樂嘅快樂過程。在座嘅每位爸爸媽媽都變成一個五歲嘅小朋友，跟住老師做動作，學習乜嘢叫四分音符，乜嘢係八分音符。

其實呢個活動嘅目的都係旨在令家長明白學音樂係一件快樂嘅事，唔應該俾小朋友太大嘅壓力，甚至邊打邊學，將一件快樂嘅事變成苦差。我自己就親眼見個以前住响我樓下個女仔就係用籐篠嘅威迫下學鋼琴，有時候真係喊住嚟學，咁又何必呢！

其中導師又講到有時候我地問小朋友問題，佢即時答唔到，啲家長就會好忟憎，怪個小朋友唔認真學習，其實大人同樣會有呢個問題；係因為我地未有心理準備要反應，所以一時間都唔識答，但係唔代表小朋友就係蠢、唔叻。呢個毛病我諗好多人都會試過，我自己都唔例外，不過我唔係怪個小朋友蠢，而係心急點解佢會唔答？

澄澄都仲好鍾意音樂有關嘅嘢，不過佢開始會怕醜，當老師叫小朋友出去表演俾爸爸媽媽睇，佢都唔肯，係要黏著我，要叫咗好一陣至肯郁吓。之後佢見到焯謙玩乜、做乜，佢就有樣學樣。

澄澄時乖時唔乖

今日晏畫澄澄食飯嘅時候打電話俾我，喊得好厲害，喘晒氣，話要媽咪，我問極佢都講唔到俾我知點解。後尾我問姐姐，原來佢扭計要姐姐抱佢，連姐姐都話佢最近好扭計，小小事就發難，真係要等佢爸爸返嚟好好咁教吓佢！

夜晚我約咗Wallace叔叔食飯，澄澄今晚嘅表現都算唔錯，無話怕怕醜醜唔肯叫人。後尾仲多得澄澄，我地免費有碟雞搥食。

事緣係因為間餐廳嚟錯咗碟辣嘅雞搥，搞到澄澄無得食，不過我地亦無打算換過，反正澄澄已經食咗飯先跟我出去。之後個serve我地嘅waiter問我地對啲食物滿唔滿意，我地講返佢知個order錯咗，senior waiter知道咗件事之後，話唔會收我地錢，仲話請澄澄食雪糕或者飲橙汁。我對佢本來嘅offer已經好滿意，話晒我地都食咗碟雞搥，加上澄澄又有少少咳都唔應該飲橙汁，點知個哥哥好熱情咁仲話杯橙汁無落冰嫁；見盛情難卻，唯有要咗，然後分咗大半俾Wallace叔叔，澄澄都好大方無反對。

其實今時今日仲有呢種服務態度真係好難得，個senior哥哥仲臨走嘅時候同澄澄講，等佢下次好返再請澄澄食雪糕。當我叫澄澄多謝個serve我地果個哥哥，澄澄話都唔係佢請澄澄飲，於是我同佢解釋呢個哥哥都有話請，不過佢唔係老闆，所以佢唔可以決定，於是杯橙汁咪唔係佢親自送過嚟囉。

Wallace叔叔質疑澄澄到底明唔明我講乜，於是問澄澄幾時生日，澄澄唔識答，但係就識念三字經，所以叔叔笑我簡單嘅常識唔教，就教佢啲咁難嘅嘢。

不過叔叔話澄澄好好玩，又好老積，因為佢同澄澄玩掉亂兩杯水同橙汁，再叫澄澄估吓邊杯至係橙汁。澄澄估兩次都中，後來我整估佢話佢錯，佢試晒兩杯然後好唔甘心咁同我講呢杯真係橙汁嚟嫁，然後指住另一杯話呢杯係水。講嘅時候仲皺晒眉頭，好好笑！

到Wallace叔叔要走嘅時候，澄澄好聽話咁去送客，仲講咗句下次再嚟啦！

秋季旅行

今日係澄澄學校嘅秋季旅行，上次係爸爸媽媽一齊陪小朋友去，今次就係小朋友跟老師去。可能老師一早就同小朋友講咗，所以當我問佢嘅時候，佢同我講上次媽咪去咗囉，今次我自己去得喇！

我諗返上次我同佢去都好辛苦，今次只係得老師同佢地去，一陣要幫小朋友pee pee，一陣又要幫佢地食嘢，仲要睇實佢地唔好少緊一個，都幾高難道。我突然間諗起如果係啲男仔要去洗手間咁點算呢？老師又唔可以帶佢地去男廁，小朋友自己又未必肯跟老師入女廁，咁會點呢？

去完返嚟我問澄澄有無小朋友賴濕濕呢？澄澄講有呀，高希愛賴尿呀！然後佢講我知濤濤佢係自己去嫁！原來男仔係無人幫嘅。

澄澄都未夠三歲就已經自己去旅行，佢嘅爸爸媽媽三歲嘅時候都唔知做緊乜，可能仲係一舊飯...

澄澄又有新問題

今晚澄澄睇緊電視嘅時候見到汪亞姐個頭髮紥起個髻(因為係套古裝劇)，就問我點解佢要紥起啲頭髮？

於是我同佢講佢係古代人，結咗婚就要紥起啲頭髮；

佢諗咗一陣就話好似姑太咁呀....我同佢解釋姑太梳起個頭係因為佢唔結婚呀...

於是佢又問我點解我唔紥起啲頭髮？(佢真係多問題)

我再同佢講我係現代人嘛，唔使紥頭髮嫁！

你估唔估到佢再問乜嘢呢？佢竟然問我點解姐姐又紥起頭髮嘅？

Oh My God,佢真係留意得好清楚，我唯有同佢再解釋姐姐仲未結婚，不過佢紥起頭髮方便做嘢嘛，而唔係佢唔結婚！唔知佢會唔會覺得好confuse呢？

澄澄講咩呀？

星期日同澄澄去街嘅時候，佢突然大叫話好多烏蠅呀！我即刻問佢邊度呀？因為香港好少聽見話有好多烏蠅，如果係鄉下地方就唔出奇。之後澄澄指住個天空遠處同我講，原來佢講嗰啲係麻鷹，真係好多隻，不過唔係烏蠅！

有日澄澄突然又講咗句死喇，幣家伙，我問佢點解，其實佢都唔知乜嘢意思，都唔知佢係邊度學返嚟。

今晚澄澄又曳曳，因為我話佢唔乖，菲菲乖過佢，於是佢大叫，係要我讚佢乖，我無理佢，佢就越叫得大聲；後尾佢打乞嗤，流咗少少鼻水出嚟，姐姐幫佢抹，佢唔俾仲話要食咗佢，佢見我唔出聲，佢就越放肆，於是我叫姐姐唔好理佢，佢至知驚話唔再曳。其實佢係知道自己做錯啲乜嘢，不過佢見我唔出聲就好得戚，於是我罰佢無得玩玩具，結果佢成晚坐定定睇電視直到食奶為止(半個鐘頭)，時不時又爬上我身坐响我膝頭上面望住我，到我問佢仲會唔會曳，佢即刻扁晒咀眼淚汪汪話唔敢喇，好可憐咁！之後佢知我原諒咗佢，佢就笑返晒。

電視廣告好吸引

最近有幾個電視廣告澄澄好鍾意睇，一個係Lucido賣Hair Jel嘅，佢睇到就會學電視個女model咁摷亂啲頭髮。

一個係好似關於電訊嘅廣告，每次佢睇到都話佢用個雞脾聽電話嘅？

仲有一個佢好鍾意嘅就係吻百蜜醫痱滋嘅廣告，播親佢就會唱埋一份，吻百蜜醫痱滋好，係小朋友都知道！

有晚我放工返嚟，佢走嚟同我講不如用微波爐蒸魚俾我食啦！原來係Rasonic嘅電視廣告呀，真係利害！

表弟生日會

今日係澄澄嘅表弟一歲生日會，Fanny姨姨喺Spaghetti House幫表弟樂樂開咗個Birthday Party。不過可能表弟唔夠瞓，又見到咁多人，所以起初都有啲扭計，不過短差咗一輪電之後，佢已經適應咗，好叻仔呀！

澄澄今日竟然變咗全場最大嗰個姐姐喎，其他小朋友都只係一歲至兩歲左右，真搞笑，眨眼間做咗人地嘅榜樣。好彩呢個姐姐都算乖，無同小朋友爭玩具，又好錫表弟，成日話要同表弟玩同影相。

連Aan姐姐都讚澄澄好叻，平時成日癡住媽咪唔肯自己玩，但係今日澄澄全個party都係自己玩，週圍走來走去，亦都無叫姐姐陪佢，真係有進步！比起上個星期去洛程屋企就正常返好多，上星期真係唔知佢發生乜嘢事，有啲失常？

過去兩年嘅生日，澄澄都無自己開生日會，反而係趁做冬出去食飯順便幫佢慶祝埋，本來澄澄今年三歲都好想幫佢開個生日會，搵啲小朋友返嚟同佢玩，不過今年撞啱佢嘅表叔又結婚，連續兩日有function又怕佢會太攰，所以都係考慮吓先啦！

澄澄軟功受落

自從上星期罰過佢之後，我有留意到佢同菲菲玩媽咪同囡囡嘅時候，佢成日話菲菲唔乖，唔係含飯就係唔聽媽咪話，所以要我罰佢。我意識到佢好介意俾我罰，所以都要我罰菲菲。

有次我問返佢係咪唔想俾媽咪罰，叫佢應承我以後唔好再激我同要聽話，咁我亦都應承佢唔再罰佢，因為罰澄澄媽咪個心都一樣咁痛。之後佢又真係比以前有改善，有時佢自己仲會講媽咪叫我收拾我就收拾，乖唔乖呀？

其實我都唔想用體罰去迫佢改過，不過有時真係俾佢激都紥紥跳，忍無可忍唯有出手。但係見佢有咁深遠嘅影響，我又於心不忍。以後唯有俾啲耐性去教佢，希望遁遁善誘可以令佢改變！

變幻無常

星期日係我嘅同學生日，前一晚我已經同澄澄講咗會帶佢去見佢嘅好朋友洛程同丁丁姐姐，又會去洛程嘅新屋參觀吓。所以朝早一起身佢就話要去洛程度，我同佢講係下午瞓醒覺至去。點知到佢晏畫瞓醒嘅時候，佢話唔想去，要留响屋企，幾經辛苦至叫到佢去...

差唔多到嘅時候，入咗Lift佢就話自己怕醜，開始有啲驚咁。入到屋見到好多玩具佢都唔肯行埋去一齊玩，一路要跟住我，寸步不離。都唔知佢發生乜事？

後來我同佢講如果你唔同好朋友玩，咁就媽咪去玩啦，點知佢好惡咁同我講，佢地係我嘅好朋友，意思係我唔可以同佢地玩，佢就得。但係結果成晚佢都無同佢地玩過，好似唔識咁，真係激死！唔知會唔會係因為洛程搬咗新屋，個環境唔同咗，所以有啲怕生保呢？

學校旅行

星期六係澄澄學校嘅旅行，去咗屯門公園嘅爬蟲館、嘉道理農場同恆香製餅廠，下午lunch嘅時候就食韓國buffet，不過啲食物就麻麻地。

其實每個地方都逗留得唔長，反而親子活動嘅時候係最長，澄澄都算投入啦，話晒都係老師叫佢地做嘅，小朋友都好合作。

不過我發現澄澄唔係太合群，除咗同佢同枱食飯嘅黃焯謙有同佢玩之外，都唔見佢同其他小朋友一齊玩，反而佢鍾意跟住啲老師，或者自己玩。不過亦都可能係因為佢嗰班得好少女仔參加，所以無佢嘅好朋友喺度。

回程嘅時候，叔叔叫小朋友出去唱歌，澄澄見有人出去，於是佢都話唱，可能係因為有禮物嘅關係啦，不過至少佢都肯參與，唱咗首"Twinkle Twinkle Little Star"。

澄澄仲記得噙晚嘅事

今朝澄澄一起身第一句就問我噙晚點解媽咪唔幫我擦牙？我好意外佢醒咗第一件事就問返我噙晚嘅嘢，我照樣同佢講返，因為佢曳唔聽話，不過我亦都讚返佢原來澄澄已經大個女識得做好多嘢，自己塗牙膏、擦牙、洗面、痾vivi、着尿片、着褲。於是今朝起身佢又要自己擦牙，唔使姐姐幫手，亦唔俾佢企喺度睇，後來我同佢講姐姐睇吓你係咪真係咁叻嘛，佢至肯叫姐姐睇佢擦牙、洗面。

今日澄澄學校派返呢一個月學過嘅書簿同習作返屋企，原來澄澄已經學咗好多個字，例如眼、耳、口、鼻、手、腳、日、月、星、風、雨、雲、屋、門、爸、媽；當我問佢嘅時候佢都識讀，不過可能佢係睇到副圖畫，所以講得出個字。之後我又幫佢溫習返其他科目，有普通話、數學、英文同唱遊。然後再做埋功課，咁聽日就可以安安樂樂去學校搞嘅旅行喇！

自己搞掂

澄澄今晚又曳曳....

事緣係澄澄差唔多夠鐘瞓覺，於是叫佢要收拾完玩具就去擦牙，點知佢見到姐姐已經開始拆佢嘅積木，佢就開始發作，喊晒要姐姐還原返個積木俾佢自己拆，我後來警告佢唔可以咁野蠻，叫佢繼續收拾其餘嗰啲，但係佢已經發咗癲咁喊，我唯有攞把間尺出嚟，佢至肯收聲。後來我罰佢要自己收拾所有玩具，自己擦牙，自己尿尿同着尿片，唔準叫人幫手，因為佢認叻唔使人幫，樣樣要自己搞掂。點知佢又真係唔使叫人幫手，一手包辦，由擦牙到着尿片、着褲，連抹pat pat都自己搞掂，我本來見佢咁叻都想讚吓佢，但係又怕佢會變得好得戚，所以都無讚出口，而佢自己就已經覺得好叻，响度沾沾自喜，真係激死！

有時候人真係要迫出嚟，有啲事佢其實唔係做唔到，而係佢肯唔肯去做。不過每次都要我發惡，佢至肯做就唔係好好啦，唔知幾時佢至肯學乖。

澄澄叫自己做媽咪

澄澄最近成日話自己係媽咪，仲係菲菲個媽咪。今晚佢食飯嘅時候同我講，菲菲佢吐飯、又唔食菜。於是我問佢咁你有無同佢講咁樣係唔得架？佢話有啊，不過佢都唔聽話呀！於是我問佢咁佢唔聽話，我就罰佢好唔好？佢可能俾我罰得多，於是佢要其他人都一樣俾我罰，所以諗都唔使諗就話好。我同佢解釋罰佢前應該俾個機會佢，如果佢都係唔聽至罰啦，佢考慮咗一陣至話好啦。唔夠五秒，佢又話菲菲唔肯食菜呀？其實可能佢只係想我罰佢，於是佢可以扮我去罰人。可能最近我對佢有啲苛刻，罰得佢多反而令佢變得更加硬頸，唔接受硬功，唯有再俾啲耐性去教佢、同佢講解。

夜晚出咗去食飯，係姑婆同爺爺嘅生日飯。佢一見到子君就拍幾吓手，然後話要抱子君。仲成個姐姐咁口吻，同子君講啲杯杯碟碟唔玩得架，係玻璃嚟架。

但係到食嘢嘅時候，佢就唔夠子君咁叻喇，啖啖飯都要含住一輪，真係攞命！後來仲因為我唔俾佢食佢想食嘅嘢，竟然同我出力鬥搶，差啲想攞對筷子就打落佢隻手度，不過始終有咁多人响度，我又唔係太想當衆罰佢，好傷害佢嘅自尊心。

希望我遲啲改用軟功，佢會肯接受變返好、變返乖啦！

學校換季喇！

澄澄嘅學校由十一月十日開始換冬季校服，初初我仲怕天氣咁熱要換季好辛苦，點知天氣又真係變冷，啱啱好！但係亦都因為天氣突然間轉變，小朋友同大人都好容易中招，澄澄都唔例外，有小小流鼻水嘅跡象。最終都係逃唔過每月見一次醫生，順便問埋醫生有關打流感針嘅事。不過因為澄澄都有啲傷風同要食藥，所以都唔可以打針住。

雖然未可以打針，我都要同佢做定心理準備，問醫生係打pat pat定係打手臂，難得佢識得同我講，打咗針唔會有病菌，不過個醫生聽到澄澄咁講都忍唔住話句聽住先啦，睇吓到時係咪真係咁叻？

成長中學習

有晚電視播緊美國新一任嘅總統選舉結果，澄澄突然大叫係奧巴馬，於是我問佢奧巴馬係邊個呀？佢竟然識答我係美國總統；於是我同佢講奧巴馬好叻架，佢係第一個黑人美國總統，佢仲喺印尼讀過書。第二日我再問返佢，佢已經識得同我講奧巴馬係美國黑人總統。 其實都唔係好知佢係幾時或者邊度學返嚟、聽返嚟，總之佢就係不知不覺中入咗腦。

今晚唔記得傾緊啲乜嘢topic講咗句所以囉，姐姐問我所以點解，我解釋即係therefore，於是澄澄又問我所以係乜嘢嚟，我就同佢舉咗個例子，因為澄澄唔着拖鞋四圍走，所以對腳好污糟，佢於是傻笑，都唔知佢係咪明白呢？等我揾日又再考考佢......

嘉年華

今日係渣打辦嘅嘉年華會，有好多攤位免費教你做有趣嘅手工藝，澄澄都好喜歡，除此之外，仲有表演、花車巡遊、又有導師教跳舞。唯一澄澄唔鍾意嘅就係高腳七(即係踩高蹺嗰啲人)，佢連行近佢都唔肯，更加唔肯同佢影相。

逗留咗兩個鐘頭，因為要食飯，所以澄澄唯有依依不捨咁離開。仲話食完再去過，不過食完飯又已經好晏，所以無再去到。

澄澄最鍾意就係品嗰頂紅番帽，因為好似長頭髮咁，所以沿途佢都唔肯除低落嚟，真係好貪靚！

瞓醒覺佢無端端講句敝家伙，我問佢知唔知點解，其實佢都唔識，都唔知佢喺邊度學返嚟？

澄澄打人!!!!

澄澄近日唔知為乜開始變得好曳，一向佢都唔係咁驚湊佢個姐姐，有時佢發起脾氣上嚟，都會對人粗聲粗氣，呼呼喝喝。今日佢仲大胆到打人，雖然只係一吓，但係都係唔啱，我最驚佢就係越嚟越大胆，同無規無矩，第日都唔知點教返好。

於是今晚我用間尺打咗佢隻手，因為佢郁手打人在先；之後再罰佢企咗五分鐘，要佢想想自己做錯咗啲乜嘢，點解俾人罰。其實近日我都不停咁同佢講道理，因為佢唔乖，晚晚都有啲事激我，所以迫於無耐要出手懲罰佢。最後佢都知道錯咗啲乜嘢，話以後唔會再打人，希望佢真係知道錯，識得學乖！

其實除咗佢打人唔啱之外，姐姐都一樣有錯。如果唔係我聽都啪聲，姐姐都無諗住同我講，佢嘅解釋係澄澄下次又會唔記得再犯，所以無同我講，真係俾佢激死。可能佢無湊過小朋友都係差啲，繼續咁落去只會更加縱容澄澄變本加厲，到時佢係害咗我而唔係幫我，想唔辭職自己湊返個女都唔得！

澄澄好多問題

澄澄近來都唔係好乖，好多時要我重複講好幾次至肯聽話。有時我都會好忟憎，要出手教訓佢，不過我唔識好似佢爸爸咁用手彈佢，我係用間尺兇佢。

佢竟然問我點解唔識好似爸爸咁用手手喎，我話我唔想用手彈，咁樣我隻手會痛，我仲話佢知爸爸用手可以隨時隨地罰佢，如果用間尺就要响屋企先可以罰佢。點知佢問返我"咁你咪唔可以响街度罰我"，真係唔知好嬲定好笑！

打流感針？

最近我公司有免費流感針打，因為我打過都無副作用，所以我都會打。我都有考慮過好唔好幫澄澄打，因為怕遲吓流感高峰期好容易中招。於是返去問佢打唔打，佢反問我有無打針。

起初佢都係話怕痛，之後我同佢講，細個嘅時候佢好叻，唔怕痛又唔會喊，同埋打針其實好快，唔會好痛。之後佢就話去搵佢個Dr. Wu幫佢打針，所以我都會搵吓邊間診所有得打。

不過另方面我又担心佢唔知會唔會有副作用，例如發燒，到時有會好辛苦，好可憐！唯有阿Q精神同自己講，病完一次就會好喇！

曳曳澄澄

澄澄開始越大越唔聽話，有時候明知有啲嘢係唔啱、唔做得嘅，做完之後就叫姐姐唔好講俾我知，然後佢自己就同我講無嘢。例如夜晚刷牙叫咗佢唔准搞我嘅嘢，吐水水要小心啲唔好整濕個地，佢就係要玩，之後驚姐姐會話我知，佢就話唔好講。

有日嫲嫲帶佢去supermarket，澄澄扭計要買朱古力，嫲嫲話無錢買叫佢擺返低，於是澄澄就將朱古力掉咗喺地上面，我估佢可能未必想掉落地，但係佢就係發脾氣想放低，於是跌咗落地。但係無人將件事講返俾我知，直到今日我打長途俾爸爸，佢至講我知。

事後我問返嫲嫲，佢至講我知，仲話澄澄塔Lift嘅時候發脾氣掉咗只頭夾落地。其實小朋友曳係好正常，亦係必經階段，但係錯咗就要即時糾正佢地，解釋俾佢知點解唔啱。件事隔咗咁耐我今日再問澄澄，佢係咪有發脾氣掉個嘢落地，叫佢要誠實認錯，佢已經唔記得咗，一味話無，我都信佢係記唔返，因為佢仲未開始講大話。

今晚食完飯落咗Jusco行吓，姐姐同我講佢因為想玩某樣嘢，同人爭仲推人。臨瞓前，我再同佢講返佢做過嘅所有行為，解釋俾佢知咁樣做係唔啱，教佢用自已放返响件事上面，如果係佢俾人捱佢又會點樣？於是佢都知道錯，喊住同我講話自己唔乖，唔會再做。我希望佢真係知錯，同明白點解。

有時候亦因為啲大人過份溺愛同縱容佢，令佢唔知乜嘢係錯同啱。好似佢含住啖飯足足五分鐘，嫲嫲都出力咁讚佢話佢食飯食得好快，可能佢係想激勵佢食快啲，但係就不得其法。咁樣只会誤導咗佢以為自已真係食得好快。好彩澄澄都識得話自已食飯唔乖、唔叻。

佢爸爸話澄澄識得揀人嚟恰，知道嫲嫲好錫佢所以就'蝦'嫲嫲。其實有邊個人唔錫佢，正因為嫲嫲從來只會有讚無鬧，咁佢好自然就會知道原來對嫲嫲唔禮貌、唔尊敬都唔會有事。其実就算個大人唔介意，覺得係童言無忌，對個細路嘅心智發展都唔係好事。就連姐姐都同我講嫲嫲唔會鬧澄澄食飯食得慢，又唔坐定週圍走，但係婆婆就會話佢同要佢坐好。相反澄澄亦唔敢對婆婆放肆，但係亦唔會唔鍚佢個會惡嘅婆婆！所以教細路真係一門好深嘅學問，要佢聽亦要佢受至有用。

扮鬼扮馬

今日萬聖節，爺爺嫲嫲一早就過咗嚟睇澄澄打扮成點。去到學校門口見到好多小朋友，個個都扮鬼扮馬着到古靈精怪，女仔多數扮公主或者天使，男仔嘅有Peter Pan，機械人，南瓜俠，魔鬼......等等。有啲仲戴哂面具，連係邊個都唔知，好可愛。

起初澄澄見到啲小朋友，都唔肯入門口，後尾見到越嚟越多小公主出現，佢先肯入去，後來連見到有小朋友戴咗面具嘅佢都唔驚，亦都無喊，可能佢已經明白咗佢地全部都係自己嘅好朋友！

Halloween 扮咩好?

？

星期五Halloween，澄澄嘅學校都有party，叫小朋友穿著自已喜歡嘅服裝返學，澄澄咁細胆就當然唔肯著到古靈精怪啦，再加上佢又貪靚，最後都係買咗套天使服俾佢。

自從上次佢俾Denzel表哥嚇過之後，佢就成日掛住响口邊，話好驚面具，所以我都幫佢做晒心理輔導，就算佢唔扮醜樣，都會有其他小朋友扮，但係佢地姶終係澄澄認識嘅好朋友，所以係唔使驚嘅！唔知其他小朋友會扮咩嘢呢？

澄澄有進步

自從澄澄上咗K1之後，學多咗好多英文，好似What is this，Excuse me，仲有最長果句Can you wash it for me please，今日佢就學咗句Let's go vivi，佢仲會响適當時候運用出嚟。

基本上好多英文名詞，或者句子佢都聽得明識得答，好似叫佢朝早起身幫我Switch off the air-cond，go to brush your teeth，take a bath, go to sleep...等等，但係到你要佢用英文講返出嚟，就未係好得(七成度啦)。好多時候就算明明佢係識講，佢都怕醜唔夠膽講。

中文字方面好似一般嘅眼、耳、口、鼻、爸、媽....都已經學到，問題係佢記唔記得！同埋我唔知道佢係真係識得個字定係認得個圖畫??

俾狗咬

噙日返婆婆屋企，澄澄係要同毛毛玩，連毛毛要食嘢佢都唔停手，係要掃佢肚腩，結果撩到毛毛發火，都唔知佢係個口啲牙定係隻手啲爪將澄澄塊面畫花咗，好可憐！

澄澄一邊喊，一邊怪罪毛毛話係佢唔乖，話唔同佢玩，搞到所有人都鬧阿毛，其實最無辜嘅係阿毛至真！反而澄澄好快就無事，搭地鐵途中仲好好唱口，自己作曲作詞，簡直旁若無人！

放暑假??

澄澄一連兩個星期都只係返三日學，唔係教師進修日就係運動日，然後就係重陽節或者學校補假，搞到澄澄都以為放暑假一樣，日日問住我係咪唔使返學。

上個月就因為颱風所以成日放假，今個月就因為公眾假期加學校假期，總之啲學費就交得唔係好抵。

鬼靈精

有次我同Jayme講，媽咪返咗工都會諗住澄澄，如果我打電話返嚟，澄澄同我講佢都掛住我，咁媽咪就會好開心。自此之後，每逢我打電話返嚟佢就第一時間同我講"I Miss You, Mommy"。夜晚我放工返嚟，佢又會同我講"好耐無攬你呀，攬吓先"，跟住就抱住我，好sweet架。佢呢啲口甜舌滑唔知係咪遺傳佢爸爸呢？

漸漸長大，佢啲脾氣都開始出嚟。有時候佢要某啲嘢或者唔要姐姐幫佢手，佢就會好忟憎，一係就挈開個口喊。不過佢呢啲"曳"嘢都只係夠胆向姐姐發出嚟，所以佢都好識得睇人嚟"恰"。爸爸問佢有無"曳"，佢就話"媽咪係度會鬧"，真係人細鬼大。

今朝我返工嘅時候，佢見我要搽防哂粉，佢係都要搶住幫我搽。有時候佢玩扮靚，仲會問我"小姐，你想要咩色呀?"。 然后幫我塗眼蓋、胭脂、搽唇膏，仲有搽指甲油，搽完就問"你睇吓靚唔靚?"。有時佢仲叫我將啲返工衫(佢認為好靚嘅)留返俾佢大個返工着，好好笑。

無膽鬼

澄澄越嚟越無胆，以前細細個玩韆鞦可以玩到好高，依家連上韆鞦都唔肯，就算氹到佢上去坐响度，佢都唔肯俾人搖個韆鞦，真係激死！

上星期六佢話要去公園玩單車，結果踩得一個半個圏又話唔玩。依家唯一剩返滑梯佢係肯玩，反而擒高擒低佢就最啱。

呢個月係Halloween，有次係Toys'R'us見到好多面具，佢驚到喊，幾經解釋至令佢接受面具係セ嘢嚟，唔駛再驚。原因係佢俾Danzel表哥用頭盎嚇過，自此就好怕類似面具嘅物體。


不過問佢要唔要着南瓜衫扮南瓜，佢就唔制，貪靚要扮公主。所以最後都係買咗套天使造型嘅服飾俾佢用嚟返學開party用。