課外活動

星期六學校有個關於音樂嘅課外活動，係由一個國際機構叫美育奧福音樂舞蹈團體主辦嘅。小朋友全部入課室聽導師教，而各位家長就跟一位由台灣專程過嚟嘅導師學，教我地點樣投入由小朋友角度去開開心心咁感受學習音樂嘅快樂過程。在座嘅每位爸爸媽媽都變成一個五歲嘅小朋友，跟住老師做動作，學習乜嘢叫四分音符，乜嘢係八分音符。

其實呢個活動嘅目的都係旨在令家長明白學音樂係一件快樂嘅事，唔應該俾小朋友太大嘅壓力，甚至邊打邊學，將一件快樂嘅事變成苦差。我自己就親眼見個以前住响我樓下個女仔就係用籐篠嘅威迫下學鋼琴，有時候真係喊住嚟學，咁又何必呢！

其中導師又講到有時候我地問小朋友問題，佢即時答唔到，啲家長就會好忟憎，怪個小朋友唔認真學習，其實大人同樣會有呢個問題；係因為我地未有心理準備要反應，所以一時間都唔識答，但係唔代表小朋友就係蠢、唔叻。呢個毛病我諗好多人都會試過，我自己都唔例外，不過我唔係怪個小朋友蠢，而係心急點解佢會唔答？

澄澄都仲好鍾意音樂有關嘅嘢，不過佢開始會怕醜，當老師叫小朋友出去表演俾爸爸媽媽睇，佢都唔肯，係要黏著我，要叫咗好一陣至肯郁吓。之後佢見到焯謙玩乜、做乜，佢就有樣學樣。