郊遊

呢個新年假唔去拜年，又唔去旅行真係有啲浪費，連廸士尼最後都去唔成，澄澄當然有啲失望。我唯有應承佢下次補返數，最多帶佢影埋公主造型相!


結果去咗姑姐屋企，其實澄澄都係去過兩次，仲係剛剛識行嘅時候，所以佢已經無乜印象。呢個假期見得最多嘅就係表妹，但係見極佢地都唔會厭，最緊要有得玩。食過lunch之後，見無乜好做，於是去咗錦田鄉村俱樂部，想話摘士多啤梨，點知原來朝早落過場大雨，個地又濕濕轆轆，連士多啤梨都濕壞咗，所以最後都空手而回...連子君想睇嘅bunny兔兔都無得睇，因為已經將近關門。

之後我地去咗元朗嘅B仔涼粉醫肚，其實我地一家三口都係第一次去咁遠嘅郊外，如果唔係姑丈揸車，又點會山長水遠入到元朗、錦田呢啲地方，打過白鴿轉就走!
 
對於兩個小朋友嚟講，全日嘅高潮仲係兩個小朋友喺屋企玩最開心，根本邊度都唔使去。

澄澄嘅願望

耐不耐澄澄就會同我講，佢好想做家姐....有時佢見到Jaycee個妹妹Heidi，佢仲叫佢去自己屋企玩陣先；噙晚臨瞓前佢又同我講，叫我俾個弟弟妹妹佢....

唉，起初我以為係有人教佢講嘅，例如嫲嫲、爸爸等人，因為佢地成日都話唔理仔女都好，最重要係俾多個伴佢，等佢將來有商有量...

一時間，我都俾佢感動到，有啲心軟，覺得佢一個好似好可憐咁! 其實平時我都有留意到佢對比佢年紀細嘅弟弟妹妹好照顧同關心，可能佢未必完全做到照顧弟妹，有次佢仲因為怕表妹沖完涼唔着衫會凍親，於是想閂埋門唔俾佢出去，結果反而夾倒表妹嘅手指；又有一次落雨濕濕，佢想拖住表妹行，結果論論盡盡兩個一齊跌晒落地，表妹仲四腳朝天，衫都濕埋；但係無論點，都係原來出於佢嘅一片好心同緊張，不過佢仲細未能夠應付得嚟，至於送佢一個弟妹就聽其自然啦!

挪亞方舟

因為今年唔方便週圍去拜年，除咗初一同初二兩日返去同爺爺嫲嫲、公公婆婆拜年之外，留响屋企又好似好浪費；踫啱今年姑姐一家三口又留港度歲，於是我地一早打算去廸士尼玩兩日，但係直到放假前都搵唔到酒店，結果告催。

最後選擇咗年初三去挪亞方舟....當我地去到目的地嘅時候已經係三點幾；澄澄同子君表妹仲响門外跳石頭都跳咗大半個鐘，然後我地至開始入場。

兩老表參觀咗多媒體展館，對澄澄都有啲教育意義嘅；至於表妹就爸爸畫大花面，好彩唔係塊面!

後來輪到去睇挪亞方舟嘅故事，當個展館一熄燈，子君已經驚叫出嚟，最後都係要工作人員放佢出去。至於澄澄都係一邊睇，一邊喊；不過爸爸抱住睇，佢都支撐倒全場。之後又去到另個個3D展館，講述人類應該要愛惜地球...今次子君好快就意到到又係剛才類似嘅嘢，連燈都未熄就已經要離開。而澄澄就稍為好啲，不過都係喊!

好唔容易至睇完兩套片，呢個時候澄澄突然好傷感咁喊住話：好掛住剛才睇過嘅地球仔!

結果我要用相機影低佢，佢至肯收聲!

最後我地都無行完所有地方，因為天氣實在太凍，亦將近閂門嘅時候，結果我地都係提早走人。晚飯去咗和民食日本嘢，之後，兩隻小鬼仲嫌未玩夠，於是去咗我地屋企再玩過。

到澄澄瞓落床嘅時候，已經幾乎十二點，唔使幾分鐘就倒頭大睡，不知幾咁攰!?

去朋友屋企玩

澄澄開始放新年假，就已經約咗去好朋友Jaycee屋企玩。其實呢次已經唔係佢嘅第一次出去玩，想當年我咁細個都未知係乜嘢一回事，更加唔敢跟姨姨去佢屋企，因為我要返工，姐姐又初嚟步到，所以要勞煩Jaycee媽咪嚟帶佢過去。澄澄咁大個都無乜離開過我，有時連公公話帶佢落街買啲嘢，佢都唔肯，但係有得玩就乜都得....

澄澄一玩就玩咗幾個鐘，仲長時間過返學。食完飯姨姨要返工，佢仲唔願走，又同姨姨講話我准佢留低玩多陣，要我三催四請至肯返屋企，無晒分寸，激氣!

放工返去，問佢玩咗啲乜嘢? 原來auntie播咗隻Cinderella嘅碟俾佢地睇，呢次係澄澄第一次睇戲，因為佢一直都驚入戲院，又或者有啲較為刺激嘅場面，佢都會驚，所以今次有好朋友陪住睇又好啲嘅，都算有得着。

太太走了

剛剛出去食完晚飯，返到屋企見到婆婆同舅父嘅missed calls，原來係我嘅嫲嫲，即係澄澄嘅太太佢終於走了! 事實佢亦都年紀好大，已經九十幾歲，只要走得安詳都算係一種福氣。

我都有將呢個消息講俾澄澄聽，我同佢解釋因為太太年紀好大喇，總會有死嘅一日，佢聽完後無乜太大嘅反應，或者佢仲未好感受到乜嘢係生離死別，又或者佢對太太嘅感情唔係好深厚啦!

因為發生件咁嘅事，所以今年我地都唔方便去同人拜年。澄澄反應好快就問返我，咁第二年太太都係唔喺度，我地都唔可以拜年啦! 唉，呢個小鬼真係機靈，咁都俾佢諗到!

新姐姐!

照顧咗澄澄兩年嘅Aan姐姐終於噙日last day咗! 起初我以為澄澄會唔捨得同喊，但係唔知佢係因為鬥氣抑或真係無唔捨得......

因為朝早澄澄要返英文，放學我就要帶姐姐去Agent度辦埋手續就離開；我曾經同澄澄講不如叫姑媽或者爺爺接佢放學，等我搞掂就接返佢，但係佢係都唔要；朝早嫲嫲仲打電話嚟話接佢放學，可能澄澄聽到我地講電話，已經發脾氣又扮嬲；我之後同佢講咁你唔好到時喊喎，點知佢答我話：我唔鍾意嗰啲人我唔會喊嘅!

去到Agent度見到新嘅Yani姐姐，佢怕醜唔肯望人，仲纏住Aan姐姐，點知無耐，佢就同Aan姐姐握手bye bye，之後就鬼咁熱情咁攬住個新姐姐隻腳，玩得不知幾開心! 我都唔明點解澄澄對啲印尼姐姐總係咁熱情?

相處咗都唔夠半日，澄澄已經同Yani姐姐講，叫佢第日唔好返印尼，哈，唔通係一見鍾情?

課外活動 ~ 溜冰

噙日係澄澄學校搞嘅課外活動之一，去太古城中心嘅溜冰場溜冰，時間大約一個鐘。起初我都以為小朋友無乜機會玩，因為大部份嘅小朋友都係未玩過嘅，如果每個小朋友玩一陣，頂多都係玩五至十分鐘；原來負責教呢二十幾三十個小朋友嘅都只係得三個人，即係一個負責八至九個小朋友，真厲害!

開始嘅時候，全部小朋友都係坐响膠櫈上面，開始學踏步，因為對溜冰鞋對小朋友嚟講都幾重。之後就開始扶住張櫈學行；再者就運送膠圈，然後就徒手傍住張櫈行，成個過程都唔使半個鐘，完全係速成班!

澄澄起初都喊，但係個叔叔同佢傾咗兩三句就收咗聲，之後澄澄仲好投入，玩得好開心。小朋友嘅學習能力真係好快，簡單幾個方法就已經令佢地掌握到，想當年我都係跌跌撞撞咁學，邊有咁快咁見效!
 
澄澄之後仲同我講想喺呢度學溜冰添，叻女!

賴濕床

其實澄澄下畫瞓覺唔着尿片已經有成半年時間，但係澄澄間中仲係會失手；有時遲咗瞓，於是又遲起身，結果就會唔識起身去厠所；有時臨瞓前飲多咗水就更難避免....依家幾乎每日下午我都會打電話提佢去完厠所至好上床，但係都會失手，真係無晒乎!


搬屋後我同佢張新床都已經唔止一次中招，最後我都要鋪多張床墊以防萬一，但係張床單就好難避免，除非要佢着返片片瞓覺，但係我又唔想，二來佢自己都覺得着片唔係咁舒服；所以唯有繼續冒遲早報銷床褥呢個險，希望佢早日成功戒掉條片，不過我都知道夜晚嗰條仲更加有難度，唔知上小學前戒得甩未呢?

我都有試過買戒片褲俾佢着，但係都係無用嘅，濕起上嚟，一樣濕到床褥；我諗要佢先戒咗唔飲夜晚餐奶可能仲有啲機會，但係佢仲係prefer飲奶先至瞓。
 
上星期日朝早，我叫佢不如唔飲奶，去同公公婆婆飲茶啦，起初佢都話好，但係轉頭又好可憐咁同我講，都係好想飲奶，唔通支奶真係咁好味?

英文生字

澄澄上咗K2之後，我除咗教佢加減數，中文字之外，每日我都叫澄澄背兩個英文生字，到依家佢已經背默到四十幾個，加埋中文字，都應該有七、八十個詞彙，因為澄澄讀嘅係有學卷嘅幼稚園，所以到咗K2先開始學筆畫、線條，英文字母同簡單嘅生字，所以我要私下幫佢惡補，等佢唔好比同齡嘅小朋友落後太多。


好在澄澄都係個肯學嘅小朋友，叫佢做功課同讀書佢都會照做，只係有時佢都會同我講數，umbrella太長，讀uncle一個先啦!
 
至於一啲個位加個位，或者十嘅combination，佢已經朗朗上口，有時佢仲會心算，連手指都唔使用，有時我都會担心會唔會逼得佢太犀利，但係小朋友嘅學習能力真係唔可以低估，佢地就好似一塊海棉咁，你教佢幾多佢就吸幾多，好難預計佢地嘅容量有幾深!
 
希望澄澄繼續努力，唔好越大越懶惰就好喇!
 

參觀小學

今日係澄澄嘅學校辦第二次參觀學校，第一次佢無乜特別鍾意定唔鍾意，反而呢一次佢同我講唔要參加...我覺得有啲奇怪?

問佢點解，佢話佢會喊，唔通上次佢都喊? 再問多兩句，佢話唔鍾意做佢地要做嘅嘢! 其實我都唔係好明佢唔鍾意老師要佢做嘅嘢，抑或哥哥姐姐佢地上堂做嘅嘢?

我同佢解釋只係去參觀吓，到時佢再話我知鍾意邊間學校多啲啦! 當然我都有提佢唔好喊，咁樣會影響到哥哥姐姐上堂...

結果佢都順利參觀咗間學校，仲收到學校送俾佢嘅一大袋小食禮物同一盆植物；到我問佢鍾意邊間學校，佢就話兩間都唔鍾意，佢想讀萍姑姐嗰間小學! 但係我就無乜印象姑姐讀邊間小學，所以都唔明佢點解咁想讀嗰間學校，等我遲吓調查吓先。

但係轉過頭佢又同我講，不如去加拿大啦...原來佢仲係想跟著佢個好朋友Jaycee，讀埋同一間學校!