英文生字

澄澄上咗K2之後，我除咗教佢加減數，中文字之外，每日我都叫澄澄背兩個英文生字，到依家佢已經背默到四十幾個，加埋中文字，都應該有七、八十個詞彙，因為澄澄讀嘅係有學卷嘅幼稚園，所以到咗K2先開始學筆畫、線條，英文字母同簡單嘅生字，所以我要私下幫佢惡補，等佢唔好比同齡嘅小朋友落後太多。


好在澄澄都係個肯學嘅小朋友，叫佢做功課同讀書佢都會照做，只係有時佢都會同我講數，umbrella太長，讀uncle一個先啦!
 
至於一啲個位加個位，或者十嘅combination，佢已經朗朗上口，有時佢仲會心算，連手指都唔使用，有時我都會担心會唔會逼得佢太犀利，但係小朋友嘅學習能力真係唔可以低估，佢地就好似一塊海棉咁，你教佢幾多佢就吸幾多，好難預計佢地嘅容量有幾深!
 
希望澄澄繼續努力，唔好越大越懶惰就好喇!