小小Model總決賽

今日係SDM芭蕾舞學校搞嘅聖誕聯歡會同小小Model嘅總決賽。因為學校話小朋友要自已响屋企化埋妝、打扮好至出場，所以我都只係幫澄澄淡淡咁掃層閃粉响面就算，話晒小朋友最真嘅一面至係最靚。

由於場地响紅磡海灣軒海景酒店，我地都唔係太肯定個位置，唯有搭的士，到達場地嘅時候已經比原定遲咗半個鐘；reception 已經叫小朋友召集準備rehearsal，澄澄本來有啲驚，但係工作人員已經匆匆忙忙將佢帶咗入房；而我就响門外留低睇吓佢會唔會喊，要安撫佢。其間我聽到佢同人講” 媽咪已經幫我化咗妝，唔使再化喇”… 原來學校都預備幫小朋友打扮，唔怪得我見有啲現場嘅小朋友set行晒頭，化晒妝咁隆重啦，而澄澄就比對起嚟清淡，無咁起眼!

等咗好一陣，終於聽到台上有工作人員話，小朋友準備出場rehearsal；我不停望住個門口怕佢見唔到我會喊，同樣地我亦見佢對眼睛响度搜索緊我同爸爸嘅踪影，當四目交投嘅時候，澄澄竟然笑住同我地揮手，我當時真係好感動，差啲喊出嚟；原來係我太杞人憂天，澄澄表現得好好，或者同連日嚟嘅經歷有關 ….(响三亞嘅時候識到啲外國小朋友，一齊玩韆鞦打成一片、噙日又同丁丁跳舞) ，所以個胆壯大咗。

擾攘完一輪，小朋友就返埋位先享受會場準備咗嘅buffet，現場就有另一啲小朋友表演助慶。到正式嘅時候，工作人員再度召集，澄澄已經駕輕就熟，自動埋位，跟住工作人員入房等候，相比上一次初選時候嘅表現實在好一百倍!

終於等到澄澄出場，一行到咪前，佢以經一輪機關搶咁自我介紹，可能因為咁，所以都俾咗個較正面嘅印象評判；到後來澄澄表現越戰越勇，唯一輸蝕可能係無特別裝扮啦!

其實我真係無諗過佢會有任何獎項，唯一可以出分力就係幫佢拉票叫人响網上投佢一票，但係都係贏唔到；反而攞咗個明日之星獎，唔知係咪評判覺得佢呢一刻都未係表現得好好，要過多幾年等佢長大啲可能會好啲….無論如何，呢個都係澄澄嘅第一個獎項，相當年我同爸爸咁嘅年齡嘅時候都無攞過任何獎，佢已經叻過爸爸媽媽好多!

比賽過後，仲有抽獎，我地都好好彩抽到一份女孩子嘅玩具，澄澄對果對高跟涼鞋情有獨鍾，一去到婆婆屋企已急不及待要拆出嚟着，真係每一個女孩子都有嘅天性。

希望佢經過呢一次嘅經驗，會大胆啲，無咁怕事，已經係最大嘅得着!

X'mas Party

今日約同一班好朋友慶祝聖誕，下午先一齊飲茶食lunch，見到久未露面嘅星哥同雅君姐姐，雖然個樣無乜變到，不過都已經分別讀小學二年級同四年級喇!

飲完茶就操到我地屋企，打麻雀嘅打麻雀、玩啤牌嘅玩啤牌、細路就有細路自已嘅世界，我地亦唔使好似上年咁要搵個大人看管住佢地，加上有雅君姐姐幫手睇住，大家各有各玩。

原本我都怕會悶親雅君兩姐弟，因為年紀差咗一段距離，仲全場得一個男孩子，加上兩個上咗小學之後，功課忙咗，一年都只係見一兩次，怕佢地會變得生疏；但係出奇地佢地又玩得埋。雅君一時同小朋友玩，一時又同啲daddys打吓啤牌；星哥初初都係玩啤，之後跟埋啲女仔一齊玩，都算無悶場啦!

 
晚餐嘅時候，我地今年選咗元氣壽司，仲有Pokka Cafe嘅Roast Ribs，自家制嘅煎雞亦同鹵水雞亦，同埋蒟蒻沙律，之後仲追多個pizza同意粉。今年嘅食物比往年响Maxim好得多，賣相同味道都好好!
 
到全日嘅高潮就係交換禮物，本來禮物都係自由選擇，但係有男仔嘅關係，好難買到一份既適合男仔又適合女仔嘅，結果我地負責買俾唔同嘅family，起碼可以投其所好。

澄澄明顯對今年嘅禮物唔係太感興趣，因為佢交換到嘅係一份公主嘅餐具，而唔係玩具，反而佢同我講佢鍾意我買俾洛程嘅Kitty貼紙機。不過澄澄好快就走咗去玩，無再理會份禮物。

無論如何，小朋友都過咗個好開心嘅快樂聖誕!

海南、三亞之旅 (三)

第三日已經開始有啲懶洋洋，一起身已經九點，匆匆梳洗完畢就落樓下食早餐，之後又帶澄澄去游水；其實澄澄一啲都唔鍾意，本來一件人地眼中嘅樂事，就變成澄澄嘅苦差，見到佢喊得咁淒涼，我都有啲心痛，但係爸爸都係想佢好嘅，不過咁勉強令佢咁驚，我又有保留咁嘅方法係咪湊效？

所以我自已唔鍾意游水我都着好泳衣陪佢，作為支持，結果每個早上去游水對澄澄都變成一場幾經辛苦嘅掙紮。

夜晚出去搵咗間西餐廳叫"Fat Daddy胖老爹"，其實似一間pub多啲，不過啲嘢食出奇地好食，最難得就係門外有澄澄最鍾意嘅韆鞦，又有snooker，澄澄仲交到幾個外國朋友仔，難得呢幾個外國小朋友嘅普通話仲講得好好，於是澄澄都放胆講埋一份!

呢個旅程雖然澄澄唔鍾意游水，但係佢講多咗普通話，唔理啱定唔啱，佢都夠胆同陌生人講或者發問，都係一個難能可貴嘅經歷嚟嘅!

海南、三亞之旅 (二)

第二朝澄澄比我地都早起身，所以九點未夠就已經落咗去食早餐buffet，今日呢一餐都有啲驚喜，一來款式多、種類多，其次味道亦唔錯，好過噙日嘅lunch好多。食完嘢之後，返酒店休息一會就帶澄澄去酒店嘅泳池玩水。

酒店裡面大大細細嘅泳池起碼有四、五個，所以唔會好多人。我地先去咗個有滑梯嘅泳池，果度啲水都淺啲；但係澄澄仲係對上次俾爸爸抱住佢'sir'咗落水底有陰影，所以今次係我自已玩先，其實我一向對水上活動不感興趣，亦有啲驚，因為我都唔識游水，不過為咗個女，我都要頂硬上，至少做個榜樣俾佢睇，幾偉大!

之後佢都肯跟我玩咗一次，我都已經盡力唔俾佢跌入水裡面，沿途仲要一手攬住佢，一手要控制個速度唔好太快，怕又嚇親佢，結果都無跌佢入水，但係佢一樣係唔敢再玩第二次，無論我再多玩多幾次，佢都無興趣。之後爸爸教佢游水，佢又係捉到爸爸實一實，好耐至warm up得到...

後來帶佢培沙灘果邊，好難至叫到佢响沙上面行，去到海邊佢已經要掉頭走，俾爸爸强行帶佢出去，所以搞到佢聲淚俱下，我睇見都心痛，一個開開心心嘅假期變得咁難為；但係爸爸都係想佢學識游水有一技旁身啫，所以我都硬起心腸無理佢對我嘅呼喚同求救。

過咗一個咁難忘嘅朝早，梳洗完之後，我地今日都無打算即刻出外，於是order咗room service，有澄澄最鍾意嘅薯條，就當係幫佢慶祝四歲生日，佢已經好滿足。

夜晚我地叫咗車出去亞龍灣行吓，不過實在無乜好行，同大陸無乜分別，最怕就係沿途都有啲人力車sell你去邊啲景點；結果我地只係去咗間supermarket買咗啲糧食，出嚟嘅時候終於上咗架三輪車叫佢送我地去某某地方，但係行咗無耐，Eric已經覺得唔對路，因為佢似乎要送我地去一啲海鮮街，同我地要去嘅地方係相反方向，於是我地叫停佢，原本佢話只係收兩蚊，我地仲諗住俾夠五蚊佢，點知佢又係果啲搵水魚幫襯嘅車伕，怪不得全部都話只收兩蚊，最緊要就係令你上車，再成功送到你去果類海鮮食店，佢地就可以分紅，呢啲就係佢地嘅搵食手法!

落車之後，我地隨便搵咗間餃子店，睇見啲人食嘅嘢都唔差，仲好多人等，心想都應該唔錯嘅，不過就要自已搵位。等咗差唔多半個鐘終於有位，原來已經差不多八點，於是快快點咗個雞絲湯麵，一碟餃子，一條糖醋魚，味道都好好，不過就上菜亂啲，要三番四次催促，有人就遲過我地仲走的先過我地....


食完已經九點幾，之後又輪到要搵的士，足足等咗成個鐘至等到一部，返到酒店休息一會就瞓覺，其實都幾休閑!

海南 ~ 三亞之旅 (一)

今個聖誕假期，準備帶澄澄去印尼以外嘅地方見識吓。本來澄澄話想睇雪，但係怕佢唔適應咁凍嘅氣候，所以都係去啲熱帶地方，我自已就想去新加坡，但係爸爸就話寧願去海南島；其實只要唔係印尼，去邊度都無乜所謂。

最後決定揾間靚啲嘅酒店休息吓，於是搵咗間五星級嘅Kempinski Resort & Spa (凱賓斯基)；間酒店嘅特色係有自已嘅私人沙灘，真係水清沙幼...

到埗嘅第一個活動就係搵嘢食醫肚，行咗酒店一個圈，選咗間西餐廳，啲嘢食就麻麻，尤其係爸爸嘅吉列豬扒，又貴又唔好食；澄澄叫嘅就係漢堡腸薯條，反而我嘅辣子雞丁仲惹味，不過呢餐飯就一啲都唔平。

 

响酒店閒逛咗一陣，返咗房休息，瞓醒已經差不多六點半，房裡面有私人嘅露天浸浴，於是試吓個浸浴池，剩係準備缸水都用咗成四十分鐘，其實都幾浪費，不過人一世物一世，都要試吓嘅。三個人玩完一輪再沖過涼，已經八點幾。今次去試咗間中菜館，水準果然好啲，而且價錢同晏晝個餐差唔多，但係有三個餸加個炒飯!

第一日嘅行程就係咁過去，大家都倦極而睡!

McDonald生日派對

今年係澄澄第一年响McDonald搞生日會，一早起身佢就話要着公主裙，其實係我買嚟俾佢二十七號用嚟參加小小Model總決賽嘅，不過佢自已話用嚟今日結婚着喎！


因為生日會十二點半至開始，所以澄澄有大把時間準備，之後仲不斷摧促我地，問去得未。

由於場地就响屋企樓下，於是我地响開始前十分鐘到達，但係原來有家長比我地更加早已經嚟到，之後陸陸續續都好多人到達，比如期中仲多咗人參加，好彩個場地都夠大，更加誇張嘅係澄澄收到嘅禮物好似座山咁高…

有小朋友見到澄澄即刻大叫”王思澄你好靚呀”, 反而澄澄無乜反應喎，可能佢未試過俾同齡嘅小朋友讚美，平時大人讚就見慣不怪。

今次生日會好彩有McDonald嘅姐姐帶住，如果唔係我同爸爸都幾唔得閒，又要招呼小朋友嘅家長，又要幫小朋友影相、拍video。姐姐先安排咗大家order嘢食，填飽個肚仔就開始同小朋友玩遊戲。

小朋友都好聽話，好合作，可能同平時學校嘅模式大同小異，所以雖然有成二十個小朋友參與，但係氣氛同秩序都好好，每個遊戲之間又有小小嘅禮物，所以小朋友份外留心同積極，都算無選錯地方！

因為澄澄嘅生日好近聖誕節，所以每年嘅生日蛋糕都會有聖誕老人嘅裝飾，順便慶祝埋聖誕一舉兩得。今年個蛋糕都係由澄澄自已點選，原本我想訂雪糕蛋糕，不過怕天氣凍，未必每個小朋友都食得，結果都係傳統嘅聖誕蛋糕。小朋友知道要切蛋糕，都自動自覺圍埋一齊，又唱生日歌；澄澄俾咁多小朋友包圍住，連兩邊面珠都紅晒，但係唔係因為佢怕醜，而係有啲焗啫！

短短個半鐘頭嘅生日會，好快就過去，見到每個小朋友都帶住歡樂離開，我都覺得呢個生日會搞得好值得。

之後我地出動全家上下成六、七人至搬齊澄澄嘅禮物返屋企。之後要去婆婆屋企過冬至，晚飯之後仲要返去執行李準備聽日出發去三亞旅行，呢個聖誕都算豐富啦！

聖誕聯歡會

今日係澄澄學校嘅X'mas Party，今年無時間再幫忙準備食物，只係簡單準備用具之類嘅東西。


過咗一年，小朋友都懂事得多，老師教嘅每個動作同歌詞都整整齊齊完成整個表演，好厲害!
 

但係澄澄今日就有啲唔開心，因為佢嘅好朋友Jaycee近來對澄澄有啲冷漠，令佢悶悶不樂。今日响學校見到面，都唔肯一齊玩，到後來雖然企埋一齊表演，但係澄澄都係有啲介懷，鼓起泡腮，一副楚楚可憐相!

 

 

 

 

 

 

 

 

 

 

 

 

 

 

 

   

希望Jaycee係一時鬧情緒啦，因為佢同屋企人原來準備明年五月移民加拿大，到時澄澄唔知會點呢?

流感針

今年年頭嘅時候帶澄澄打過流感針，之後因為針口附近位置令澄澄痛咗成個星期，留低咗難以磨滅嘅陰影...

所以今次勸咗佢好耐都唔肯去打針，直到今晚响公司帶咗一袋小飾物返嚟(其實係顧顧姨姨送俾澄澄嘅)，同佢講話獎去打針嘅，佢就一口應承我。

我見機會難能可貴，即刻就同佢去診所打針，佢都好合作，又無喊，連醫生叔叔都讚佢叻。返到屋企，當然係第一時間拆佢嘅獎品，連pat pat嘅痛楚都唔記得喇!

家長會談日

星期六係澄澄學校嘅家長會談日，老師同我講咗好耐關於澄澄响學校食飯越嚟越慢，差不多要成個鐘頭，有時甚至需要老師餵佢食埋剩低果啲。

我仲以為佢有進步，因為佢平時同我講佢係第一個食完，睇嚟都唔係真啦！不過老師都話可能係佢唔鍾意食螺絲粉嘅原因...

另外老師都話澄澄其實有啲嗲，又有啲任性，不過都係一個上堂專心嘅小朋友。我忽然諗起早幾日佢同我講過:响學校俾老師鬧！我問佢發生乜事呀？佢講我知原來佢喺學校推跌小朋友...我再細問佢嘅原因，原來佢係為咗要霸位俾佢個好朋友Jaycee一齊坐，所以用力過度推跌咗小朋友；我知道既然佢肯講我聽，我知佢都係有悔意嘅；反而我想知老師點樣鬧佢，因為印象中老師係唔會隨便鬧人。

澄澄於是覆述老師同佢講果番說話俾我聽，其實老師都唔係鬧，只係同佢講咁樣會嚇親小朋友，或者整傷佢。响我未問佢老師點講之前，我都係同佢講類似嘅說話，仲叫佢要諗吓如果係佢俾人推跌，咁佢會點呢？其實澄澄已經知錯，仲應承我第二日同小朋友講對唔住...

咁啱見家長前我見到果個俾佢撞倒嘅小朋友，我問返佢澄澄係咪推跌過佢，小朋友已經唔係好記得；再問佢澄澄有無同佢講對唔住呀？佢就話有喎。我將呢件事講返俾老師聽，老師竟然唔係要同我傾返呢件事，反而同我講好欣賞澄澄咁坦白同我講起呢件事，叫我要欣賞佢同我講佢响學校發生嘅點滴，呢點我當然好同意。

另外老師都叫我要同佢做多啲心理準備，話佢太容易將感情付託喺一個人身上，怕佢大個萬一識到嘅朋輩唔係好嘅一群，對佢會有不良影響；就正如佢只會視Jaycee係佢最好嘅朋友，連將來升上小學，都話要一齊，如果Jaycee搬走咗，佢又要跟住搬...

我希望呢啲係佢作為一個小朋友所有嘅純真情感，唔係乜嘢大問題，當然作為媽咪，我都會密切留意佢成長嘅過程嘅!

同印度人做朋友

呢個星期我有兩位朋友從印度嚟咗香港、澳門玩，為咗一盡地主之誼，星期一我特地請咗假陪佢地去咗山頂，搭吓纜車，當然唔少得帶埋澄澄。亦因為咁有機會俾澄澄接觸一啲外國人，練大個胆講吓英文!

起初澄澄見到佢地都有啲怕醜，唔敢講嘢，又挨到我實一實；但係auntie一攞啲禮物出嚟俾佢，佢就開始生猛，又auntie貼粒貼紙响額頭，仲一粒唔夠貼夠三粒。原來我地去咗酒店pick up uncle & auntie，只係短短十分鐘，澄澄已經撩auntie同佢玩，不過佢經常對住人地講廣東話，要我翻譯...慢慢佢都會亂噏一餐。

星期五晚我地再約咗食晚飯，澄澄已經話好鍾意同uncle auntie玩，仲問我星期六會唔會見佢地! 最好笑係星期六佢返英文堂嘅時候，老師同我講平時佢會講廣東話，今日佢竟然對住小朋友講，"speak English"，哈哈，呢句明顯係學我同佢講嘅說話啦，真係好笑! 都好嘅，至少佢肯試吖...

舉棋不定

自從澄澄知道小小Model入圍要再一次決賽，佢就開始心大心細，一時話要參加，一時又話唔想去，真難搞!

可能佢都係基於胆怯，怕要面對好多人；詳情我都唔係太清楚，只知道佢會同小朋友一齊自我介紹，再表演約一分鐘嘅catwalk；聽落就唔難嘅，不過好難做得好突出；其實我都只係想佢可以完成咗要做嘅嘢就足夠，都無打算要佢贏。而我可以幫到嘅就係叫多啲人响網上投澄澄一票，同俾多啲鼓勵佢，希望唔會對佢造成壓力!

小小Model大募集 ~ 入圍總決賽

澄澄上次參加小小Model大募集嘅面試竟然入圍，真係搞嘢!

因為我已經同佢講多數都唔得啦，因為佢都唔夠胆；我仲勸佢不如退出啦，因為總決賽嘅時候仲要現場行catwalk，佢何來呢份勇氣!

起初佢都堅持要參加，但係最近佢又同我講:都係唔想選Model啦... 點知今日竟然收到學校嘅入選通知書；當我將呢個消息同佢講嘅時候，澄澄皺起眉頭同我講：我都喊，點解會選我嫁？我見到佢咁認真個樣都忍唔住笑...

我唯有同佢講，咁我地努力啲啦，睇吓會唔會攞到一個半個獎... 點知佢就同我講：你上次話輸都唔怕嘅! 佢真係有記性，於是我唯有叫佢試埋呢次就算啦，輸贏真係唔緊要，盡過力同試過就得喇!

好彩佢最後都同我講：我連果個哥哥(即係張繼聰)都唔會驚嫁...希望佢真係做得到啦。

親子旅行~元朗大棠荔枝山莊

今日係澄澄學校嘅親子旅行，早上起床覺得天氣有啲涼，仲以為會凍，點知又係好似上年一樣熱到救命!

今年澄澄嘅好朋友Jaycee無去，後來見到佢嘅媽咪帶住妹妹Heidi出現，至知道原來Jaycee患咗哮喘，入咗醫院。佢同澄澄嘅癥狀好相似，大家都係容易氣管敏感，直到呢次Jaycee覺得唞唔到氣，醫生至check到佢係哮喘，我都要留意吓澄澄會唔會越嚟越嚴重。

點完名上咗車之後，老師知道好多小朋友都可能未瞓醒，所以先俾小朋友休息咗半個鐘，之後開始唱歌、派禮物。去到目的地先嚟一張K2大合照，然後就係集體活動...

同上年一樣唔少得小朋友最鍾意嘅氣球傘，warm up咗之後，又玩'包剪揼'、親子拔河，連串遊戲過後，就係自由活動同學校一早準備咗嘅'野外定向'。玩法其實係學校沿途準備咗一啲'蓋章'，集齊晒就可以去老師度領獎；當然我地都無失威集齊所有蓋印，亦因為咁唔係太多時間行晒成個山莊。

澄澄亦唔敢餵小動物，沿途我地見到有牛、羊、兔仔，佢都唔肯行近佢地，更何況餵佢地! 最多都只係玩咗個踏浪吊橋，同上觀景臺行咗一轉。

回程途中，大部份嘅小朋友都因為太攰，响車上面瞓覺，就只有澄澄同坐前面嘅焯謙，一路都好精神，玩過唔停!直至焯謙落咗車，澄澄終於面露疲態，簡直一百八十度轉變，幾乎可以即刻瞓着。

我唔知澄澄對呢次旅行有幾深刻同享受，不過佢今日應該過得好開心嘅，至少有佢鍾意嘅焯謙陪佢...哈哈!

四歲生日會

澄澄一直渴望响麥當奴開生日會，終於上星期幫佢book咗下個月二十日星期日嘅場地，之後佢就一味催促我開始幫佢寫邀請卡...我問佢要請邊幾個好朋友，於是佢講咗一堆名，其實我都唔知應該照佢意思去請抑或全班同學都請，如果請少咗又唔知會唔會俾人話大細超、搞小圈子!?

最後我都係跟佢講嘅名幫佢寫邀請卡，除咗小朋友，佢仲話要請埋幾位老師。寫完之後我問佢識唔識得派啲卡俾小朋友，佢睇完一輪只係認到樂天(因為有個'天'字)同Jaycee，其餘佢話會揾老師幫手派，都算佢醒目!

佢仲自己親手寫咗兩張卡俾我同爸爸，而公公婆婆、爺爺嫲嫲嘅卡就由我捉住佢隻手教佢寫，都算係一份心意。

小小Model大募集 ~ 試鏡

星期五晚突然收到SDM嘅電話問我星期六下午有無時間，原來澄澄被學校選中參加小小Model大募集首輪試鏡!

學校講第一輪會有二十位小朋友去試鏡，行吓catwalk，影啲相作為參考，之後再選五個，選中會幫一個鞋嘅牌子影廣告相。我第一時間已經同學校講澄澄唔識行catwalk，但係佢地話無問題，到時會有人教... 我心諗都好啦反正對佢嚟講係一個難能可貴嘅經驗，但係另一方面我都担心佢有無咁嘅胆量!

到咗面試當日嚟到奥海城總校，果然都有十幾二十個小朋友，大部份同澄澄差唔多年紀，都係三至五歲。開始點名排隊，澄澄係第一個，排隊嘅時候，佢已經開始捉住我隻手要我一陣陪佢入去；我一路都安撫住佢，亦同佢講所有媽咪都唔可以入去，只可以响出面等；點知姐姐一開口叫小朋友一個跟一個行入去，佢就已經喊出嚟，結果又擾攘咗一陣，好彩有個太古城分校嘅姐姐响度幫手，認得澄澄拖住佢入去，如果唔係怕且佢都唔使試囉!

之前我都同佢講咗好耐，叫佢考慮清楚，如果唔夠胆就放棄啦，但係佢死都唔肯，仲話一定要選中... 唉，我都知無咁易，就算呢一輪俾佢pass到，都好難可以响下一輪喺沙田行現場catwalk，聽聞係同張繼聰一齊表演。

大半個鐘之後，小朋友行返出嚟，個姐姐同我講澄澄開頭喊咗一陣，姐姐話如果喊就要出返去，於是佢又好合作無再喊。我後來問返澄澄做咗啲乜，佢話有姐姐幫佢地影相，但係就無行catwalk；我唔知係佢唔肯行定係無得行喇，但係就算影相，我都可以相像到佢個表情有幾生硬，尤其佢啱啱喊完。

雖然澄澄係唯一一個喊嘅，但係總算叫做完成咗成個過程，都值得鼓勵嘅! 我都無乜期望，因為我都知佢一定過唔到下一關，只係希望佢可以慢慢練大啲個胆，唔好似媽咪一樣咁細胆啦!

心算

澄澄近來嘅加減數大有進步，其實都相隔咗一段時間無同佢操練，今晚再同佢溫故知新，佢已經開始自己運用心算去答題目。

初初學加數，我教佢將大嗰個數目放响心裡面，然後用手指加細嗰個數；學減數亦同樣道理。今日佢已經可以連手指都唔用，靜靜用心計算，真係直得一讚! 佢仲要求我記得同爸爸講佢有幾叻...

上咗K2之後，明顯地見到佢識多咗生字，起初我都有啲担心佢遲遲都未起步學嘅寫字，唯有自己摧鞠吓佢。但係最近又見佢學多咗、寫多咗字，都放心啲!

一直以嚟佢都只係識寫自己個名Jayme，呢兩日我開始教佢寫自己個名，頭兩個字'王思'已經無問題，不過個'澄'字就比較深，可能要再過一兩日至學識。我教佢寫嘅時候同佢講，個字好似畫叮噹個樣，左一撇、右一撇，加個口仔同兩撇鬚就係喇，連澄澄自己都話好似喎，所以應該好易記得到!

即時反應~喊

澄澄最近好鍾意喊,尤其係當佢做錯嘢嘅時候，知道會俾我話，佢嘅即時反應就係喊，扮可憐! 當我問佢做乜喊，佢就話驚我會鬧佢...哈！其實佢以為開定聲喊，就唔會俾人怪責佢，真係人細鬼大!

有次我打電話俾佢，佢趕住收綫就同我講話要寫字喇，唔同我講；到夜晚我放工返到屋企，佢話未寫完字，於是我問佢點解仲未做完功課?因為下畫佢明明話要寫字，我都未講完，佢就即刻大喊出嚟，連出咗門口嘅嫲嫲都聽到，以為我鬧到佢喊!?

最近我吩咐佢每日要响我放工返屋企前做完我同學校俾佢嘅功課，同每日背兩個生字，噙日佢都做得到，但係今日我一入門口都未開口講嘢，佢就挈大個口喊，原來因為佢仲未背到ball同bird個字...

之後俾多十分鐘佢，已經可以背得到，我同佢講喊都唔會令佢識背個字，如果浪費時間去喊，倒不如讀多幾分鐘咪做到囉。可能都係我平時對佢比較嚴厲，所以令佢有壓力，或者我須要調教一下自己嘅語氣，唔好再嚇倒佢，不過有時太輕鬆，佢又會掉以輕心，唔正視我同佢講過嘅嘢，真係難做!

想做'模特兒'?

澄澄學Ballet Jazz間學校舉辦緊一個"小小Model大募集"，想'簡'選一啲小朋友做親善大使，推廣舞蹈文化....其實可能係想借小朋友幫手做吓宣傳!? 估唔到澄澄今次竟然有興趣，叫我幫佢參加，仲話自己一定有好多人選佢喎??

其實我又唔係想佢要俾人選中，或者出風頭之類，但係呢次都係一個好好嘅經驗，等佢見識吓，又可以見多啲唔同嘅人，壯大啲佢個胆，都未嘗唔係一件好事。

但係要參加一啲都唔容易，又要準備一張造型照，一張舞蹈姿態照，然後再撰寫一篇唔超過五十字介紹點解鍾意响SDM跳舞嘅原因。後者明顯要家長讚美學校，無乜難度啦；但係前者要準備啲相，臨時臨急都唔知點搵!

後來我打開佢嘅衣櫃睇吓有無啲衫見得吓人嘅，就求祈幫佢做啲嘢當交功課；又俾我搵到一條裙，都唔記得係邊個送俾佢，幾時送? 於是叫佢擺啲'甫士'俾我影相，佢影咗幾張就問我得未呀?點解影咁耐? 我同佢講啲真model要影好多相又要影好耐至可以收工，等佢唔好以為玩，萬一選中咗，仲要幫學校影一輯相作為宣傳廣告之用，到時仲辛苦呀!

所以都係玩吓，當做攞個經驗算啦!

愛嗲嘅囡囡

澄澄把口有時真係氹死人，又愛撒嬌!

有時放工佢打電話俾我，問我係邊呀？我話搭緊地鐵啦，佢就會同我講，你行前啲去司機度，同佢講唔該開快啲吖，因為佢囡囡好掛住佢呀!

Lunch time嘅時候，佢又叫我唔好返工，快啲返屋企陪佢。我同佢講老闆喺我隔離喎！佢話我知，嗰個係Ricky叔叔，唔係Edward喎，佢唔會鬧你嘅，你靜靜雞走啦....

晏晝佢瞓醒就喊住咁打俾我，原來佢又賴濕咗我張床，於是喊住同我講叫我唔好鬧佢，因為佢瞓覺前唔記得去厠所；但係我下畫先打咗電話提佢，不過見佢喊得咁慘，仲邊捨得鬧佢呢!

今晚臨瞓前，佢又叫我唔好做嘢，要我陪佢瞓覺，兩隻大眼睛，淚水汪汪，好凄慘咁，叫人無辦法唔心軟，尤其我都係眼淺之人，有乜辦法唔感動呢?

唔知點解佢近日咁痴我呢，一時叫我唔好返工留低湊佢；一時叫我唔好返工陪佢，我地希望有呢日嘅，不過到時候佢又可能唔使我陪喇!

海洋公園半日遊

澄澄等咗好耐終於可以再去海洋公園玩! 其實佢最想去嘅仲係首選迪士尼，次選海洋公園，然後就係去昂坪360坐纜車。本來我打算同佢去坐360纜車，不過姑姐同姑丈較早前先去完，碰上大風，坐到有啲驚，所以最後都係去返澄澄鍾意嘅Ocean Park。

本來仲有另外一個選擇就係馬灣附近嘅羅亞方舟Naoh Ark's Park，不過上網check過啲料，我估澄澄未必有興趣，首先無機動遊戲，其次都係睇吓一啲假嘅動物，以前同佢去真嘅safari，佢都無興趣仲話驚，所以最後都無去。

澄澄同表妹君君玩得好開心，連晏覺都唔使瞓，玩到變成兩隻落湯雞咁....之後返屋企同佢沖咗個涼至出去食飯，因為佢地頭汗實在太嗅。食完飯好似仲意猶未盡，於是又上咗姑婆屋企再玩咗一陣，最後又係由頭濕過晒，不得已又再沖涼! 天氣已經開始變涼，兩隻豬仔仲可以玩到濕晒真係佩服，不過今日又離奇地比早前熱返。

本來我都係諗住天氣開始有啲涼，最好就係去戶外活動吓，不過難得佢地玩得咁開心，我地幾個大人又有annual pass，唔去又係浪費!

返到屋企，澄澄終於都俾睡魔急call，食完奶上床無耐就昏睡咗! 小朋友嘅耐力真係唔可以睇少...

物質豐富嘅一代

澄澄生長喺呢個年代真係好幸福，要乜有乜，連佢自己都會講，"我想要呢樣就呢樣"!

其實我都唔想太縱容佢，怕佢會變得唔珍惜。但係有時候我自己見到一啲好靚嘅玩具，我都會忍唔住買俾佢，一方面想佢開心，另方面都滿足自己，因為自己細個嘅時候都無玩過。

但係有時我以為佢會鍾意嘅嘢原來佢都唔鍾意，之後件玩具就唯有送俾人。亦有啲係佢要求我買，但係之後無乜時間玩，又擺埋一邊，得個睇字，都幾可惜!

於是近來我買咗個mini bank俾佢，目的係想佢開始學習儲蓄，最重要係要令佢知道無嘢係伸手就有；我同佢講如果佢想去Disneyland就要儲夠錢買自己張入場券先可以去。佢當然唔知要幾多錢至夠，但係我同佢講只要佢將原來想買嘅嘢放棄，我就會將同等嘅錢俾佢用嚟入錢箱；佢都有試過真係放棄唔買喜羊羊嘅漫畫書，而儲起啲錢。不過唔知可以維持幾耐呢?

Halloween 2009

今年係澄澄自懂性以嚟嘅第二個萬聖節。今年學校無叫小朋友扮鬼扮馬返學校，反而個主題係相關嘅南瓜豐收節，教小朋友做同南瓜有關嘅小食，例如南瓜曲奇!

雖然學校無辦Halloween，澄澄班朋友仔就相約咗出嚟玩，所以我今年幫澄澄買咗套小妖精嘅服飾，但係我只係同佢講話係小精靈，因為佢唔鍾意做妖精或者巫婆之類，但係仙女响上年又已經買過；好彩澄澄都好鍾意呢個造型。

丁丁嘅裝扮就係花仙子，而洛程就係icy wincy spider，不過由於佢套衫比較厚，而星期六嘅天氣又出奇地熱，所以結果無着到；後尾連澄澄都頂唔順結果都除咗，好遺憾無趁佢地着住嘅時候一齊影返張相紀念!

我又整蠱澄澄話中環就會有啲鬼鬼出嚟拉你啲手手腳腳，於是佢又驚到喊；其實佢真係太細胆，Irene姨姨買咗一人一個mask，之前我已經同佢講定，叫佢唔使驚，因為mask係用嚟嚇人地，起初佢唔肯帶，後尾見洛程佢地都帶，佢至肯試，不過當小朋友扮鬼咬我嘅時候，佢又扁晒咀唔俾佢地咬我，其實都係玩吓啫，不過佢就好認真咁同人地講唔可以咬我個媽咪，都算佢錫我啦!

姨姨仲買咗一個木乃伊嘅蛋糕，澄澄因為驚所以又係唔肯食，真係無用!

忙碌嘅假期(下)

星期六一行八人就浩浩蕩蕩出發去港澳碼頭坐Turbo Jet去澳門，因為之前搭船澄澄嘔過，所以今次再搭佢都有啲陰影。反而我就唔係好頂得住Turbo Jet嘅氣油味，加上澄澄最後都係嘔咗小小朝早飲完嘅奶，加埋呢陣酸奶味，我仲覺得辛苦，如果多搭十分鐘我都可以嘔埋一份!

Check in咗酒店之後我地就開始咗呢個胃食之旅...第一站係九如坊食葡国菜，有血鴨、燒羊脾、咖喱雞等等；之後澄澄就急不及待過咗隔離買雪糕食，連出名嘅九記手打雪糕都等唔切；有人就去咗'拮魚蛋'，之後再去咗義順食燉奶, 總之人人都飽到攬住個肚。

食飽我地就去咗大三巴、又去咗氹仔果邊嘅威尼斯人酒店同新濠天地見識吓。晚飯嘅時候我介紹佢地去峰景餐廳食水蟹粥、炸米通球、蒸鱔...都無令大家失望，呢餐都未食完，已經有人計畫定宵夜要食細龜嘅干炒牛河同彈牙雲吞麵。

因為我地帶住澄澄，所以食完晚飯我地就各自活動，我地就當然返酒店啦，其他人就去咗葡京見識見識。

返到酒店，澄澄仲好乖聽我地講，臨瞓前做吓加數嘅練習題，睇見佢好認真個樣，我心裡面都好安慰，有此囡囡，畢生無憾! 結果當然係無人食宵夜啦，因為實在太飽。

第二朝食完buffet早餐，已經無乜特別節目，只係响附近咀香園買啲手信，就起程返香港，因為有啲朋友要搭夜晚機返澳洲。

响機鐵站仲有另外一啲朋友專誠嚟跟大家見過面，食個lunch。雖然行程短短兩日，但係節目緊湊，難得好耐無咁大班人嘅敍會，仲要遠道而來，離別時都有啲依依不捨, 我地已經相約咗出年响上海嘅Expo再見!

其間澄澄發生咗一段小插曲，响準備返香港前，佢忽然鬧起離愁別緒，好淒涼咁話好掛住佢個好朋友Jaycee! 話買嘢俾佢都話唔要，唔知佢真係掛住同學仔定係唔捨得uncles、aunties佢地呢? 情形就同上次從鄉下返嚟一樣，好掛住詩詩表姐!?