愛嗲嘅囡囡

澄澄把口有時真係氹死人，又愛撒嬌!

有時放工佢打電話俾我，問我係邊呀？我話搭緊地鐵啦，佢就會同我講，你行前啲去司機度，同佢講唔該開快啲吖，因為佢囡囡好掛住佢呀!

Lunch time嘅時候，佢又叫我唔好返工，快啲返屋企陪佢。我同佢講老闆喺我隔離喎！佢話我知，嗰個係Ricky叔叔，唔係Edward喎，佢唔會鬧你嘅，你靜靜雞走啦....

晏晝佢瞓醒就喊住咁打俾我，原來佢又賴濕咗我張床，於是喊住同我講叫我唔好鬧佢，因為佢瞓覺前唔記得去厠所；但係我下畫先打咗電話提佢，不過見佢喊得咁慘，仲邊捨得鬧佢呢!

今晚臨瞓前，佢又叫我唔好做嘢，要我陪佢瞓覺，兩隻大眼睛，淚水汪汪，好凄慘咁，叫人無辦法唔心軟，尤其我都係眼淺之人，有乜辦法唔感動呢?

唔知點解佢近日咁痴我呢，一時叫我唔好返工留低湊佢；一時叫我唔好返工陪佢，我地希望有呢日嘅，不過到時候佢又可能唔使我陪喇!