都係奶樽好

澄澄噙晚試過用杯飲奶之後，今晚就唔肯再用，喊哂口係要用返奶樽至飲，可能佢覺得好多，又要好小心，所以都係放棄。用返奶樽，唔使十分鐘就飲完，又真係好容易，又唔會倒瀉，算啦，遲吓再俾佢試啦！

聽日爸爸就返嚟，夜晚澄澄叫我幫爸爸'check him'....吓？係咪佢個朋友仔'卓謙'呀？都唔係，原來係'check-in'至真！

我早幾日已經開始同澄澄講要學吓喺隔離間房同姐姐瞓，佢就話等爸爸返嚟先啦，又睇吓佢到時係咪真係肯。其實每晚佢都係自己瞓，唔使人陪，又唔係怕黑，都唔知有乜問題咁難換房嘅？

樂天熊仔餅有三聚氰胺

自從內地傳出三鹿牌奶粉含三聚氰胺，導致好多BB患上腎結石，嚴重嘅一歲都過唔到，就算過到都要換腎先可以續命，真係好慘！

於是乎好多奶製品都要抽驗，結果問題食品越揭越多，無論大人細路都有機會中招。我一直都有留意住澄澄飲開嘅奶粉有無出事，好彩無中招。點知我自已反而食過嘅伊利牌牛奶布丁雪條，就榜上有名。慶幸我係大人又唔係食得好多，所以都唔會有乜影响，反而電視新聞啱啱講樂天熊仔餅嘅大陸版，都check到有三聚氰胺超標而要回收。澄澄都食過唔少樂天熊仔餅，不過就係日本版嘅，好彩好彩！

所以我對大陸做嘅嘢真係無乜信心，就算幾平都無用，出名假嘢多，就連藥物都唔知係乜嘢嚟，總之就要小心啦！

用杯飲奶

澄澄自從返咗學之後，學識咗用杯飲水，加上佢都快三歲，所以開始要俾佢轉用杯飲奶。結果成餐奶用咗25-30分鐘至飲完，比起用奶樽多咗十幾廾分鐘，所以我都只係會喺夜晚餐奶至轉用杯，否則朝早實遲到返學！

同埋唔知點解用杯飲好似多咗好多咁，只係飲咗一半，澄澄就話飽喇，飲到好辛苦咁！

自從屋企多咗個姐姐，澄澄就唔多唔少有咗依賴，有時玩完收拾玩具、著鞋著襪、擦牙都假手他人，叫姐姐幫手。所以到依家都未係好熟悉點樣自己用匙羹'畢'飯食，更何況用筷子食飯。所以請工人都係有利有弊，澄澄什至會'恰'姐姐，唔同佢合作，有時什至郁手郁腳，會對姐姐無禮貌搶嘢。可見細路仔其實都好'精'，識得尊卑有別！不得了......

何謂老人家?

上星期日同爺爺、嫲嫲、姑媽仲有丈公同姑婆一家去咗飲茶。其間唔記得邊個問澄澄我地有幾多個人呀，又有幾多個男同女，之後問澄澄有幾多個老人家，佢就數咗爺爺、嫲嫲、丈公同姑婆四個。好叻喎，答啱咗。於是有人問佢老人家係點架？佢嘅答案係................................帶眼鏡嘅!

哈哈...唔知係佢嘅觀察力觀察到嘅答案，定係有人教佢咁講呢??咁PoonPoon姑丈同舅父輝、舅父健咪變埋老人家？好彩媽咪做咗Lasik啫......哈哈!!!!

澄澄話要返學!!!

因為颱風關係，學校連續兩日唔使返學，就連今日堂爵士舞都無得返。下晝澄澄瞓醒咗就話要去學校跳舞，到我放工返嚟，佢問我點解唔可以返學呀？我同佢講因為大風，小朋友返學會好危險，好易俾風吹走架。於是佢又問我點解大人唔會吹走咩？

好難得佢咁想返學，可能佢係好想去學跳舞，不過佢都有話好鍾意返學，因為有好多好朋友喎！

今晚佢突然又同我講: 爸爸返嚟問點解唔寫字呀？叫我俾本作業佢寫，於是今晚就練習咗'2'、'3'、'4'同個'7'字，都算係咁啦！

打風唔駛返學

因為黑格比，澄澄無端端又多日假期。噙晚婆婆打電話同澄澄講一號風球，可能聽日又唔使返學喇！澄澄即刻就話都未二號風球.....

今朝早我同佢講天文台公報咗幼稚園唔使返學喇，佢即刻就落床望吓個電視，然後問我使唔使返工。平時叫佢起身食奶、返學，佢都無咁快，一話唔使返學，佢就即刻起身落床！

因為今日佢唔使返學無功課派返嚟，所以自己俾咗啲作業佢練習，練吓橫、直、斜、彎線同圓圈，佢都好俾心機做，不過做得四五頁佢就話夠喇夠喇。為咗唔想佢對做功課有抗拒感，所以我都唔會迫佢，亦因為咁，所以佢對自己嘅功課都好着緊去做，都算係咁啦！

澄澄教跳舞

澄澄上咗K1已經開咗學個半月，大致上都無乜問題，唯一問題係唔太熱衷返學，經常問住今日係咪放假，激氣！好似今晚响電視見到一號風球，佢即刻就問點解未二號嘅？

為咗等佢培養多少少對返學嘅興趣，今年幫佢報咗個爵士舞班，可惜之前唔記得同佢做心埋準備，結果第一堂就唔記得起身去上堂。姐姐結果要將從睡夢中嘅澄澄叫醒，咁佢就當然好唔likely啦，仲同佢講話係去返學，搞到佢喊住打電話同我講話唔要去！結果第一堂佢只係企埋一邊睇，唔肯跳。之後又同我講話係對鞋唔舒服，所以我應承星期日買對dancing shoes俾佢，於是佢成個雀躍起嚟，返到屋企連着緊對鞋都未除就好緊張咁放好對跳舞鞋先。

今晚放工返嚟，一入門口只見佢將所有公仔放晒响地上面，播住首Jingle Bell話要教佢地跳舞，好好笑。其實佢只係上咗一堂，唔知道佢係咪真係鍾意呢？

去見好朋友...

今日係幫Idy姨姨同Venda姨姨做生日，下晝瞓醒覺就去咗第一城丁丁姐姐嘅屋企。我同佢講丁丁姐姐屋企有好多玩具，因為佢有表哥表妹。澄澄忽然問我如果丁丁姐姐話唔肯借玩具俾澄澄玩咁點呀？我就同佢講Idy姨姨會幫你同丁丁姐姐借嘅，再唔得嘅話，就等丁丁玩完先啦。澄澄都肯講道理，就點吓個頭應承我唔會爭嘢玩。之後佢地都玩得好容洽，無爭嘢玩，仲玩到唔捨得走。

之前其實我都有同澄澄講星期日會同丁丁、洛程佢地見面，佢就同我講話丁丁同洛程係佢嘅朋友嚟架！唔知佢係咪想話俾我知佢地小朋友有佢地自已一派？但係最鍾意同佢玩嘅其實仲有雅筠姐姐，澄澄仲成晚叫住星哥星哥，冧死人架！星哥連最後一件义燒都讓咗俾澄澄食....真厲害！

澄澄唔乖...原唔原諒？

澄澄好多時知道自己做錯嘢俾我知道，佢就會驚然后流哂眼淚問我"原唔原諒佢呀"？又會話"下次唔敢喇"。

今日我特登話唔原諒喇，然後要佢自已上床瞓覺，因為澄澄每次都係話下次唔敢，但係又屢犯不改。於是佢喊到好淒凉咁，企响房門口叫我同佢講一個故事就瞓覺，我堅決唔講只係同咗佢入房，然後佢自己上床，我就熄燈閂門，佢亦都無再扭計或者喊就瞓覺喇！

其實佢唔係犯咗好大錯，不過我唔想佢當"耳邊風"或者唸口旺咁講完就以為無事。希望佢真係明白我嘅意思啦！有時有啲佢知道係危险嘅、對佢係唔好嘅，佢真係會記住唔再做，但係叫佢唔好對姐姐無禮貌，要聽姐姐話，佢就講極都係咁，好識得"恰"人。

結婚九週年

今日响公司竟然收到Daddy送嘅花，先至醒起聽日就係'九一九'結婚週年。其實呢幾晚都心血來潮，翻睇咗好多舊相，只不過無為意係乜嘢日子。

放工帶埋扎花返屋企，澄澄即刻就問我點解有花嘅？我話佢知係爸爸送嘅，佢就扁扁咀問點解爸爸唔送俾澄澄？不過佢好快就轉咗話題話好鍾意紫色花花。

食完飯之後我打個電話俾爸爸，同佢講聲'thank you'，澄澄即刻就搶咗個電話問爸爸點解唔買花俾澄澄呀？爸爸同佢講咗一陣就俾返個電話我話要淋花。其實佢都好易氹嘅！

花名

今朝早起身，澄澄自己幫自己起咗個名叫"Bebe"，於是媽咪又同佢講我都有個花名叫"Lulu"，然后我地一齊幫爸爸都改咗個叫"Puku"。其實係澄澄剛啱瞓醒，講咗啲太空話就改咗個花名，仲好認真同人講"我個花名叫"Bebe"。

如何慶中秋

一連幾日假期，對澄澄嚟講除咗唔使返學之外，有燈籠玩(我今年係第一次買俾佢，係粒Hello Kitty 星星，因為每年婆婆都好早就買咗俾佢)，有螢光波波，仲有就係......好多水果食架！

星期五晚提早就帶咗澄澄去公園玩燈籠，因為諗住會人少啲。但係佢其實比較鍾意玩螢光波波，仲同一個只有十五個月大嘅妹妹玩踢波，結果玩到一頭大汗。個燈籠就成晚坐冷板凳，因為澄澄唔肯俾佢著聲。於是第二晚去嫲嫲屋企，就帶隻唔會發聲嘅飛機燈籠(係舊年嗰隻)，點知太古城平台原來有function，有吹气橡皮滑梯，但係成十呎高仲要自已爬上去(無樓梯嗰隻、又唔可以大人陪玩)，都未啱澄澄玩；仲有表演玩魔術、玩噴火、雜技等等；另外有兩個小丑，一個係高脚七，一個用汽球扭公仔，澄澄見到兩個小丑已經唔肯行埋去，佢最驚就係見到個長脚嘅，無論我地點同佢解釋點解個小丑會咁高，又或者話佢地兩個係'十兄弟'，一個高脚七，澄澄就係大喊十，佢到走都係唔肯行過去同小丑影張相、握個手。

結果成晚都無玩過，連波波都無地方踢，得個"熱鬧"嘅"熱"字。正日果晚，盈盈表妹又唔响屋企，所以帶哂啲道具去都係無得玩，但係就食咗好多水果，有柚子、提子、楊桃，奇異果同香蕉，仲食咗少少冰皮月餅，真係夠哂，反正佢兩日無'poo poo'，食完今朝終於去個痛快。

今日就去咗樂樂表弟(佢得十個月大，重24谤)個屋企玩波波池，好開心，一入屋見到個波波池都未問人就爬咗入去。自从手足口病同流感高峰期，就無带佢去冒險樂園，學校嘅波波池亦都收起咗，所以佢玩得好高興，表弟仲好likely表姐噃。

就咁一個long weekend就過完喇，除咗佢肯食多咗啲未食過嘅水果同月餅之外，今朝佢突然同我講，佢好鍾意返學，因為學校有佢嘅好朋友，仲有餅乾同提子包，仲好好玩。唔知因乜佢突然咁講，不過都係件好事嚟嘅，值得安慰！

三字經 (二)

細路仔其實真係好好記性，除咗婆婆教過澄澄首"床前明月光"，瞓覺前我都教咗佢一啲三字經，依家佢已經背到两節，一節係"人之初、性本善"，另一節係"養不教、父之過"，每節八句，佢已經朗朗上口，當然我亦有同佢講係點解，其實從中我亦學埋一份，幾有意思。

優異奬

上次中秋節用廢物造嘅燈籠原來攞咗個優異奬，不過就唔覺有家長投票，唔知頭三名有幾靚呢？老師仲送咗本Hello Kitty貼紙簿俾澄澄。但係到我放工返嚟已經連影都無埋。姐姐話有啲佢貼咗响本貼紙簿度，其餘俾澄澄撕爛哂掉咗。真係激死我！

學校呢幾日都係以中秋節做主題，因為派返屋企嘅功課都係叫家長同子女一齊搜集啲有關嘅图片同填色作為功課，睇吓佢畫得靚唔靚？

玩呼拉圈

澄澄係姑媽屋企玩過幾次呼拉圈之後，我見佢都幾鍾意玩，所以就响Toy'R'us買咗個小朋友玩嘅俾佢。今晚佢話要玩俾我睇，雖然仲未係好叻，不過都玩到兩三下，仲叫我影低佢。睇吓佢玩得好唔好啦....

學校今日派咗幾本上堂嘅習作返嚟，叫家長幫佢地包好啲書簿。原來學校教咗一啲普通話嘅短句，仲學緊大楷同小楷ABC，大楷A-Z基本上佢已經識咗，但係小楷嘅b、d、p、q佢就經常混埋一堆，睇吓遲啲學校教完返嚟，佢會唔會認得？

同病相憐！

上星期六帶咗澄澄去睇醫生，因為自從佢返學之後就幾乎每個月都要睇醫生，唔係傷風咳就係發燒，時好時壞足足大半年，乜嘢葯都試過，有效都變無效。所以同佢轉個醫生睇，醫生話佢係鼻敏感，所以每次傷風都會搞好耐。但係幾日嘅葯食完之後都仲係止唔到鼻水，今日又要再搵過個醫生再睇吓點。不過之前都有人同我講過，返咗學就係咁，起碼病三年啦，就當係build up佢嘅抵抗力，希望佢唔會病咁耐啦！

同佢睇開醫生，我自己都順便睇埋一份。可能因為之前食嘅腰骨葯食得太多，傷咗個胃，呢幾日都好唔舒服，真係一波未平一波又起。依家唯有停咗医腰骨嘅葯，搞返掂個胃先！

沒有爸爸的日子

學校有個親子活動，要小朋友同爸爸媽媽利用廢物造一個燈籠。呢樣正正係mommy嘅弱項，上次做月餅都仲可以，砌燈籠以前都係由公公做搶手，仲貼堂兼攞奬。所以今次唯有請公公出手相助，只係短短一個午睡(一個多小時)，公公就幫我做咗架巴士出嚟，估唔估到用咗乜嘢廢物呢？就係載tissue嘅盒做個車身，扭扭旦個殼做車轆，汽球嘅棍仔就做車軸喇。媽咪同Aan姐姐幫我做窗門，其餘啲乘客係我自已貼架，mommy再幫我修飾吓架車同埋揾我做司機。幾乎全屋總動員都有出力，好似婆婆幫我揾做窗門嘅胶片，舅父就幫我剪嘢啦....等等。

原本呢啲應該係由爸爸去做嘅，不過佢唔响度，唔知daddy係度又識唔識做呢？可能佢會用雲石砌架飛機俾我？!

阿澄整餅

今日學校有中秋節慶祝會活動，教小朋友做冰皮月餅、猜燈迷，砌花燈，都幾好玩，可以加强佢地對节日嘅認識。

澄澄仲第一次試食冰皮月餅(豆沙饀)，可能佢見到每個小朋友同家長都食，所以佢都無吐返出嚟。不過問佢仲要唔要，佢就耍手擰頭。

原唔原諒?

澄澄相對上比較驚佢daddy，但係佢就好怕激嬲mommy，有時候澄澄唔聽話，我唔睬佢佢就會驚，然後喊哂好淒凉咁問我原唔原諒澄澄呀？佢喊起嚟眼淚鼻涕都出晒嚟，好可憐咁，自自然然你就會心軟落嚟，唔再嬲或者激氣。

講真佢又未至於好難教，好百厭，至少佢都係個肯講道理嘅人，唔係刁蠻公主。呢樣唔知會唔會似佢爸爸咁大棚道理，變咗有佢講無人講呢？

澄澄又發燒！

唔知點解澄澄好容易就發燒，星期一晚佢玩得好好地，到食奶嘅時候，佢要枕响我大脾上面食奶，摸一摸佢個頭就覺得有啲熱，一探個額頭原來38.9C，其實就唔算好燒，不過摸埋佢隻手掌仔同脚仔都唔係平時嘅溫度，我就知佢係發燒，之後俾咗退燒葯佢食就上床瞓覺。到清晨五點幾，再摸吓佢都仲有啲，又叫醒佢食多次药，然後再瞓過。

朝早起身我同佢講因為澄澄有少少發燒，所以休息一日啦，點知佢即刻就問我好返可唔可以唔返學？真係激死，我於是問佢點解唔鍾意返學，係咪有嘢唔開心，原來佢話想媽咪湊佢返學。於是我同佢解釋，如果我要送佢返學先返工，咁我就會遲到。佢即刻扮老闆好大聲咁講：媽咪你做乜遲到唔返工，係咪唔要揾錢，唔買書書俾澄澄呀？

其實佢又未至於討厭返學，不過就係唔熱衷，有時候學校有工作紙派返嚟，佢又好積極同認真去做，仲講俾我聽係邊個老師教嘅，所以我估佢上堂都係留心嘅！