善解人意嘅澄澄

仲有一個星期，爸爸就從印尼回來。澄澄好清楚知道有乜嘢係爸爸唔鐘意佢做，有乜嘢爸爸好想佢做....

好似噙日佢响Jusco見到啲貼指甲嘅貼紙，好想要，但係佢又知道爸爸唔鐘意佢咁貪靚，所以佢同我講，唔好貼住，等爸爸走咗先貼！

今晚佢又突然同我講：我地喺香港，爸爸就返嚟，不如你同我講多啲英文，如果唔係爸爸返到嚟問我媽咪有無同你講英文，我話無，佢就會鬧你。澄澄可能係見過我同爸爸有拗撓，所以唔想見到我地咁樣，又可能係佢怕爸爸會怪佢唔學好啲英文；我都唔知呢啲算唔算係我地做人父母俾咗佢嘅無形壓力?!

連咁細個嘅佢都識得幫我地諗，真係有啲慚愧，只怪我地做大人嘅唔可以好好咁控制自己嘅情緒，俾佢見到我地相處間嘅問題，反過嚟幫我地担心；所以算係為咗佢，我希望自己可以抑制一啲，唔好俾咗啲不良陰影响佢嘅童年。尤其係我知道佢好喜歡模仿我嘅一切，所以言行舉止都要特別小心，但係我都好需要身邊嘅人給予支持同配合，先可以事半功倍！

充實嘅週末

最近澄澄話好想學畫畫，剛啱星期六其中一個鐘嘅英文會話又上完，佢又唔想再上，於是我應承佢抖一抖，學第二樣輕鬆吓，結果幫佢報名試堂。之前一晚，佢捉住我要我陪佢畫公仔，但係我同佢爸爸都唔係呢方面嘅材料，不過我都陪佢畫咗一晚。仲要係我畫一筆，佢又畫一筆...

到試堂嘅時候，我企响門外睇，原來Miss都係咁樣教小朋友畫，當然都有教佢地構圖方面嘅比例，唔好太大或太細。呢堂小朋友畫嘅係小丑同熊熊玩雜技，我第一個反應係澄澄點可能响一張畫紙上面表達到咁多樣嘢?

結果佢真係做到，雖然唔算好靚，但係都畫齊老師要求嘅嘢，之後澄澄仲同我講佢畫咗啲乜嘢，點解要咁...我都有問老師佢學成點，老師話都唔錯，不過佢畫得仲快過老師，即係老師未畫到佢已經自己開始畫；同噙晚佢要我等埋佢嚟畫又唔同喎! 之後我都有帶佢參觀另一間教室學畫畫，但係佢都要响呢間學，個原因係佢話鐘意跟住老師教佢點畫，而唔係自己畫。

之後我又帶佢上咗一堂梓峰教育辦嘅小領袖戲劇班，目的係訓練佢嘅自信心同胆量；由於事出突然(臨時趁佢朝早上Phonics嘅時候搵嘅)，我只係同佢講有角式扮演，可能係公主、白兔之類；講完我已經察覺到我唔應該俾佢呢個錯覺，以為一定有公主，萬一公主無佢份就大件事，於是我糾正佢可能只係扮小動物咋...

到要上堂嘅時候，佢又例行工事要扭扭擰擰，不過今次算順利，因為朝早佢個朋友仔介紹過負責教呢班嘅Miss Lam俾佢識，加上Miss Lam攞住盒Zingo準備上堂，澄澄見到即刻話佢都識玩，於是老師話請佢教小朋友點玩，所以佢好樂意應承老師，然後就跟老師入咗課室。結果一個鐘頭嘅試堂好快就過去，响我同老師了解佢上堂嘅情形之前，我問咗澄澄上堂玩咗啲乜嘢，點知佢真係第一句就同我投訴無得辦公主...哈哈!

然後佢同我講，佢講咗Snow White嘅故事俾小朋友聽，同時間，佢又講一次個故事俾我聽。之後Miss Lam同我傾計，一開始佢問我點解要帶澄澄上呢個堂？我有啲似幫澄澄interview嘅感覺，雖然無準備，但係我都講咗我嘅原因，係想佢練得大胆啲，有自信，而唔係要幫佢準備小一嘅面試，因為我都無諗過要佢考一流嘅名校小學，所以亦無打算幫佢做定一大堆profile嚟面試。竟然Miss Lam認同我嘅想法，不過有幾真就唔知喇！

Miss Lam讚澄澄好淡定，以佢嘅歲數，可以對住小朋友講完整個故事都唔驚，已經好叻！於是我同佢講返我事前要同佢做嘅準備功夫，雖然唔多，但係都臨急講咗上堂大概會係點嘅情形俾佢聽，等佢有心理準備。原來當Miss Lam話叫小朋友扮小動物嘅時候，澄澄都有提到點解唔扮公主，之後澄澄仲肯聽Miss Lam講，扮佢本來覺得"咦，核突"嘅小豬添，仲玩得好開心。我都有同Miss Lam講，佢之所以表現得好可能係因為人少(得三個小朋友)，所以佢無咁驚；要睇吓下一堂佢係咪真係可以維持到呢個水準至知，唯一可以肯定嘅係，我問澄澄仲要唔要上Miss Lam嘅堂，佢話要!

學校觀課

呢次唔係第一次去學校觀課，但係覺得眼前嘅澄澄有些少唔同，唔知同少咗好朋友喺身邊有無關係?

一開始係全部小朋友一齊跳"身痕"舞，澄澄好似唔係太投入，無乜點郁；之後响課室，佢竟然坐到最後一行，以往佢都係拍住Jaycee坐响老師面前第一、二行，如今佢走到最後面，唔知點解呢?

不過，上堂嘅時候都見佢有留心聽老師講課，都算係咁啦! 但係因為第一節普通話已經上咗一個鐘頭，所以無時間再同老師會談，有啲可惜。

放學嘅時候，原來婆婆過咗嚟睇澄澄，所以澄澄好開心，又可以向婆婆詐驕，要人陪佢瞓覺。希望佢無受到Jaycee影響，繼續開開心心返學，識多啲朋友仔，做個人見人愛嘅好寶寶!

好朋友終於要走了...

澄澄嘅好朋友Jaycee一家人終於聽日要離開移民去加拿大...

今日放學嘅時候，auntie Jane專程帶同Jaycee仲有妹妹Heidi去學校等澄澄放學，然後送咗張咭俾澄澄，仲同佢講聽日要走喇。澄澄當然好唔開心，要auntie Jane氹返佢。

Lunch time嘅時候，我如常打返屋企，佢已經忍唔住喊住同我講，唔想Jaycee聽日走，想佢下個禮拜先走....其實下個星期又有乜分別? 我真係無諗過以澄澄咁細嘅年紀，就要經歷離愁別緒嘅滋味；佢仲話驚Jaycee遲啲會唔記得咗自己，於是我同佢講放工返嚟我同佢去買張咭送返俾Jaycee佢地啦，佢至肯收聲。

但係放工嘅時候我考慮咗好耐，應唔應該去買呢張咭？其實送咭本身係無問題，但係當澄澄見到Jaycee果一刻，肯定又會難捨難離，到時又喊到收唔到聲就麻煩!


結果無去買咭，但係我响Facebook度搜尋咗auntie Jane個profile，將佢加咗落去我個friend list度俾澄澄睇，佢一見到佢嘅好朋友就即刻笑番晒，我叫佢將來學識寫中文英文就可以同佢地聯絡喇!

其實我都有send個message俾auntie Jane同佢道別，不過離別在即，應該無乜時間check email或者回覆，希望佢地一家好快可以settle down同適應新生活....再見，好朋友!

扁桃腺發炎

噙日澄澄終於都返唔到學要留响屋企休息一天，因為朝早起身摸佢嘅額頭同手掌都有啲燙手，體溫38.3-38.8C，而且已經食過好幾次退燒藥都唔見佢完全退燒，所以我都臨時請假留响屋企照顧佢。

一早起身我就煲咗啲藥草俾佢飲，主要幫佢降溫；見佢精神都唔錯，又無喉嚨痛，所以無即時帶佢睇醫生，因為退燒藥都只係得一種，而屋企都有存貨...但係到晏晝食完粥，再摸吓佢越嚟越熱，一探仲39.7-40.2C，真係有啲嚇親，於是即刻帶佢去睇醫生，Dr.話佢扁桃腺兩邊都有啲腫，可能未痛出嚟，所以佢無覺得唔舒服，結果要食抗生素....唔知係咪啲藥重，食完係無咁高燒，不過就不停留汗，就算佢坐定定唔郁，都不斷標汗，連汗衫都濕埋。

到瞓晏覺嘅時候，連佢個枕頭仔都濕晒，我仲以為佢賴濕床，原來係佢頭汗水，真係誇張! 有人話係啲藥太散，雖然我唔係好知點解，但係咁出汗法，唔多唔少都會令到個人脫水，唔係好事，不過都無辦法，總好過燒壞腦...

夜晚開始見佢有好轉，無乜燒，胃口仲比下晝好，食到碗幾通心粉，可能同肚餓有關?! 起碼可以放下心頭大石....點知到半夜四點佢又再有返少少燒，結果半夜都要搞醒佢起身食藥，真可憐，最慘係瞓到佢成身濕晒，由底到面，不過實在唔忍心再整醒佢，唯有幫佢墊條毛巾隔開件"濕"底衫。

好彩今朝起身終於退晒燒，佢仲好想返學，因為好朋友返埋呢個星期就走喇，於是講講吓佢仲聲淚俱下，好可憐嘅小寶....於是今日澄澄帶住口罩都要返學!

下晝我打電話問佢仲有無燒，佢探咗幾次都話係35點幾度，搞到我半信半疑，不過平時佢都識得幫自己探熱，所以唔應該質疑佢嘅能力嘅，最後求証埋姐姐都話無燒，我就安心喇! 放工返嚟見到佢，忽然一陣心酸，我寧願自己病都好過係佢；佢仲叫我坐底先，然後攞杯水俾我飲，真係感動。

夜晚終於見佢生猛番晒，又叫又跳，又唱國歌，希望佢真係好返，然後至可以幫佢調理返好個身體，做個健康嘅小寶。

陌生人電話?

今日澄澄突然打電話俾我，問我如果有人打嚟問佢"媽咪個電話號碼幾號，我就會話唔係好清楚喎!" 我問佢係咪有人打嚟搵我呀？佢答我話"唔係，我只係話如果啫；我唔會講俾人聽嘅，如果唔係就會有壞人呃你，然後捉咗你..."

其實係我好耐以前教過佢嘅，因為嗰陣(大約三歲左右)佢開始背我嘅電話號碼，我怕佢响街上面亂咁講闖出禍，所以我將個後果嘅嚴重性講俾佢聽，要佢好好記住，估唔到事隔咁耐，佢都有記起心裡面，真好!

晒親定發燒??

噙日天氣回暖又有陽光，於是同澄澄去咗鰂魚涌公園玩佢最鍾意嘅韆鞦。咁啱佢又撞倒同班嘅朋友仔鄧海攸，起初人地叫佢一齊玩佢都唔係好想，後尾佢就跟到實一實，人去邊佢又去邊。

攸攸因為年紀比 澄澄大，所以爬高爬低嘅都難佢唔倒，相反澄澄就無胆玩喇!

玩咗一個鐘實在太晒工都不宜久留，之後去咗姑媽屋企食飯；之後如常瞓晏覺，直到夜晚同表姨食飯。澄澄對上一次見表姨已經係兩年幾前，所以初初見到佢都係慣常嘅表現...怕醜! 之後食飯佢已經唔再驚，仲叫表姨食完飯上我地度玩Wii。

一整晚都唔覺澄澄有乜異樣，係好間中聽佢咳一兩聲，點知今朝起身摸摸佢額頭有微微嘅熱，但係探熱都係37.5至38左右，唔算發燒，所以都照俾佢返學；到放學嘅時候，再叫佢探吓熱，已經38.3、4左右，於是吩咐姐姐俾佢食定退燒藥。一路到我放工返嚟，佢都係有啲熱，但係又一頭汗，都唔知無端端點解會發燒，唔通噙日晒過頭，無散熱? 希望佢聽朝瞓醒無事....

影宣傳相

上次澄澄參加完小小Model選舉之後，得獎就會被挑選去幫學校影一輯宣傳相；而今日就上咗studio影相，我除咗幫佢換好跳舞衣同梳頭之外，跟住就交俾學校同佢化妝，然後影相，為時三個鐘。一開始澄澄都有啲驚，唔想影，後來知道有得化妝，於是我話唔好影佢都唔肯。

趁佢影相之際，我去咗皓皓屋企參觀吓，間屋面積雖然細，但係同樣好見地方用。最重要係有個超正景觀，有小小海景之餘仲可以睇到煙花添，間屋一樣開揚。同噙日睇過嘅除咗面積大少有異，公屋同私人樓分別之外，影觀一啲都唔會輸蝕，其實講到尾都係最緊要住得舒服啫!

夠鐘去接返澄澄，原來除咗佢地果一輪，仲有第二輪大個小小嘅都係影相；响我未到嘅時候，澄澄乖乖咁喺間房度等我，亦都無驚，已經係一大進步! 讚

參觀豪宅

朋友仔丁丁最近搬咗去烏溪沙銀湖天峰，於是今日我地去咗探訪佢嘅新居。可能因為Idy、William都係設計出身，所以間屋嘅色調好舒服，加上露台望到少少海景，又夠開揚，整體感覺好自在，難怪佢地話唔捨得賣返出去....

依家嘅新樓全部都會有齊會所、康樂設施嘅配套，所以house-warming party可以分別娛樂大人同小朋友。大朋友就攻打四方城，小朋友就落會所玩，各自各精彩!

夜晚仲book咗BBQ場燒烤，有水有爐，有張長餐枱，好有布吉feel；難得連天氣都唔太熱，真係好"正"。班細嘅醫飽個肚就走晒去會所再玩過，簡直樂而忘反。

不過唔知點解，三個小鬼開始玩分化，得三個人都要話唔同其中一個玩，真係煩! 澄澄雖然唔係講果個，但係佢就好易俾人擺佈；日頭就孖住丁丁攬頭攬頸，到走嘅時候因為我地跟洛程架車，於是佢又同人好friend咁，真過份!好彩小朋友都係唔記仇啫，之後澄澄仲相約佢地下次嚟我地屋企玩Wii呢!

澄澄同爹啲媽咪嘅Wii

澄澄每次去Carmen姐姐屋企都會玩Wii，佢第一次接觸Wii可能係三歲半左右，嗰陣我都無玩，所以無乜興趣；直到上次復活節我玩過打網球嘅遊戲之後，就愛上咗呢部機! 原本爸爸上次都問澄澄買部返屋企好唔好，點知澄澄話唔好，因為佢想去Carmen屋企同Carmen一齊玩!

反而我就心思思，終於最近响Jusco見有discount，就買咗返屋企；剩係砌部機(主要係connect去部電視同set up)都搞咗我兩個鐘，無辦法因為屋企少咗個男人就要親力親為啦! 澄澄一邊好心急想玩，但係佢又知道唔可以催促我；砌好之後，澄澄當然急不及待要玩啦，佢最想玩就係踩單車同劍擊，幾乎肉緊到打埋部電視機度；玩咗一陣，我叫佢去瞓晏覺休息吓，好在佢都肯聽，可以好刻制自己，無話玩到唔願停...

之後夜晚同姑媽、姑姐佢地一齊去咗Outback据扒，因為今日係姑媽生日。 食完澄澄想叫姑媽上我地度玩Wii，不過因為已經九點幾，所以無玩到。我都同佢約法三章，只係會週末或放假嘅時候至可以玩，平時要專心讀書返學，佢都應承我，呢個女都算係咁啦!  讚!!!

其實除咗玩之外，我亦希望佢要謹記樣樣事都唔好怕輸，呢個道理我地由細到大都有提住佢，佢亦無令我地失望，不過有時候佢都會唔忿氣要求輸咗再玩，始終佢都係個四歲嘅小寶寶啫。

近日我好鍾意叫佢做小寶，佢都好鍾意我咁叫，不過佢強調唔要做韋小寶就得喇!