家長教師日

星期六係澄澄學校嘅家長教師日，老師update咗我澄澄响學校嘅情形，有啲係連我都估唔到，大至上係好壞參半。

老師話澄澄有時都幾蠱惑，知道有啲嘢唔做得嘅，就會週圍望吓有無人望住佢先曳曳。最近佢又好喜歡跟住老師，以前嘅澄澄好獨立，樣樣嘢都會自己做；原來佢係學佢嘅好朋友Jayce，要'癡'住老師，結果一人mark咗一個老師。

另外老師話澄澄喜歡模仿人地，有時上堂要小朋友自己靠想像力創作一啲圖畫或者手工，澄澄會睇人地嘅然後又做一樣嘅嘢，所以老師話佢唔夠獨立。

澄澄又好細胆，學校有時有啲大肌肉訓練，叫小朋友爬高爬低，佢都話唔敢，呢樣可能係因為同我平時叫佢唔好做啲危險動作有關，怕會令佢受傷；做父母真係難，想保護佢竟然又變成害咗佢...唉！

老師都有讚澄澄嘅，就係佢好好記性，平時教小朋友嘅語文或者兒歌，澄澄都係第一個學識嘅，仲朗朗上口；再者，就係佢上堂好專心聆聽老師講嘅話。

有時老師講一句好過我地講十句，所以結果都係老師幫手勸服咗澄澄今個暑假參加游泳班，學啲簡單嘅踢水技巧，希望佢真係肯玩，唔好到時唔肯落水就好喇！

最後老師都有讚佢自從六月多咗兩個小朋友响學校食飯，澄澄都多咗份推動力，食飯都有進步，又唔會偏食。總括嚟講我都算滿意佢嘅表現，不過真係要諗吓可以點樣令佢獨立啲，大胆啲，千祈唔好似媽咪咁'籐雞'....

心情好了!

踏入六月，澄澄嘅好朋友Jayce都開始留响學校食午飯，於是我再聽唔到澄澄楚楚可憐咁話唔想喺學校食飯。聽佢講仲有卓謙都係响學校食，但係頭兩日澄澄話卓謙都唔肯食，要求姐姐帶佢走，老師亦無强逼佢，直到噙日即係第三日，卓謙終於肯留低喇！

第一日澄澄話食得最快嘅係Jayce，佢就第二；今日澄澄話三個都好叻，一齊食得好快喎，食飯又無偏食，有食蛋、菜、蘿蔔同飯，唔知真定假呢？今個星期六家長會嘅時候，等我問吓老師了解吓先...

不過可以肯定嘅係....澄澄心情好咗，願意繼續喺學校食飯，希望經過呢兩個月嘅訓練，對佢有幫助，至少唔需要依賴姐姐餵...我都安慰啦！

忽然心傷?

澄澄習慣每晚九點半就上床瞓覺，我幫佢蓋好被，say過goodnight，就會熄燈關門，等佢自己先瞓。

噙晚一切如常，但係唔夠五分鐘就聽見佢把聲，一開門原來澄澄喊到聲淚俱下，好可憐！我問佢乜嘢事，佢只係話唔想我喺出面做嘢，想我陪佢瞓覺！

我都唔知佢最近發生乜事，有時朝早我返工出門口，佢又同我講唔想我去返工，要我唔好做嘢留响屋企湊佢，唔知會唔會同剛啱放完一連四日嘅假期有關，因為我陪咗佢咁多日，唔通佢唔捨得？

今晚臨瞓前，佢自己都識講，噙晚我自己唔瞓倒，要媽咪陪...好彩今晚佢無事喇，自己上床就瞓覺。可能佢都係想嗲吓、撒吓嬌啫!

Jazz & Ballet

好快就暑假，因為決定咗留返响香港，所以週圍搵適合澄澄嘅courses幫佢增值吓。

之前已經報咗個course學英文同'煲冬瓜'，但係如果成個假期都只係得學術性嘅course，又好似唔夠平衡，怕會悶親佢。所以最後帶佢搵咗間SDM Jazz & Ballet Academic報咗一個為期一年嘅Ballet/Jazz class，每年仲會有個澳洲升級試要考，希望佢真係學得一技傍身。

因為佢响學校都有學緊Jazz，仲好鍾意跳；加上呢間學校仲有埋條ballet裙同鞋襪，同一個書包，佢睇到已經好雀躍；只可惜八月中响伊館舉行嘅annual performance佢就參加唔到，因為到八月佢先開始學，唯有再等一年後嘅演出啦！

唔想搬屋?

最近我地又開始睇樓，始終租人地方住，間屋唔係自己嘅都係無咁舒服。

以前我同澄澄講過，如果將來搬咗屋，澄澄有自己嘅房間，就要自己同姐姐瞓喇，佢都好正面回應我。點知近日再同佢一齊去睇樓嘅時候，佢就話唔想搬，要住返呢度。於是我問佢點解？以為有乜特別原因。

原來佢驚萬一搬咗屋，就唔可以再同媽咪一齊瞓，要搬過隔離房，所以佢唔要搬屋。但係我同佢講話會俾佢自己'簡'自己鍾意嘅床，同裝一個低啲嘅燈掣俾佢自己開關，佢又有啲心動喎。

我知道就算我真係跟佢意思幫佢'簡'咗張佢鍾意嘅床，佢都係會扭計，唔想自己一間房，但係好快佢就四歲，唔可以再跟住我，所以呢次要强硬啲對佢，唔可以心軟...

有好朋友陪食飯

澄澄近日經常同我講"唔想再响學校食飯"，可能因為無伴啦；好彩老師終於幫佢搵到佢最鍾意嘅好朋友Jaycee，下個月一齊留响學校食飯。所以我勸佢要繼續，否則下個月就得番Jaycee自己，於是佢又肯留返响學校食飯。

依家澄澄已經會自己'筆'飯食，有時快有時慢，總算係有進步啦。同埋响學校食飯有個好處係佢唔會偏食，學校煮乜就食乜，連平時佢唔會食嘅粥都無得避免，一樣要試，真係好！

不過澄澄就似足爸爸，好鍾意食燒肉、燒鵝、叉燒等肉類，菜就食得唔夠，好彩佢都鍾意食水果，又每日都有便便，算係咁啦！

好貪靚!!!

澄澄越大越貪靚，又要學人留長頭髮(不過媽咪都想佢留長)，但係紥辮只肯紥一條，因為佢話要學大人一樣，好似媽咪咁；我自己當然唔會紥兩條啦，但又好難搵個大人紥兩條辮嘅俾佢睇，所以每朝返學或者去街，都要講一輪數，至決定到紥一條定係兩條...唉!

佢又好鍾意着裙，放學返咗屋企，佢都要搵條裙嚟着，有時仲着到不倫不類，吊帶裙入面又加見T-shirt，總之唔俾佢着就唔得，迫到我最後唯有將啲裙收埋，佢至心息。

最近佢仲連星期二同四，返學着運動衫嘅日子，都話要着裙，真係貪靚！

小一選校家長會

星期五學校舉辦咗一場小一選校家長會，請嚟咗一班响躍思畢咗業嘅學生家長同我地分享一吓佢地嘅子女就讀緊嘅小學嘅優與劣，呢個家長會都好有用。

雖然澄澄依家仲係K1，但係好快就要搵小學。原本我想幫佢搵間課程輕鬆啲嘅，自由啲無乜壓力嘅學校，最緊要佢enjoy讀書，求知識；但係爸爸就覺得應該搵返傳統嘅小學，等佢將來可以涵接到升中或者大學嘅要求，甚至要出外留學都會優勝啲，咁都啱嘅。

我覺得澄澄都係一個可以操練嘅小朋友，因為每逢我叫佢練習寫字，佢都唔會say no，或者講價寫幾多，佢都會乖乖地寫，有時甚至係佢自己話'好耐無寫字喎'，所以我都唔太担心佢會適應唔到傳統學校嘅教學法。

不過最後都係睇佢自己考成點，做家長嘅就係盡力幫佢搜集每間學校嘅資料，將好嘅同適合佢嘅安排俾佢去約見，有時人地口中嘅好又未必一定合適，順其自然啦！

唔想响學校食飯

今朝澄澄起身擦完牙之後，好似好慘咁走嚟同我講，唔想喺學校食飯。可能因為初頭嘅新鮮感已經過咗，加上無佢嘅同學仔一齊食，只係得啲高班嘅小朋友同埋老師。

我同佢講因為今個月交咗錢，所以至少要食完今個月，加上佢都未係可以食得好快，偶然佢仲係會依賴姐姐餵佢；所以我要佢食飯有改善至停止，佢聽完都無特別反對。放學佢依然會留低食完飯至走。

我諗佢主要係因為見到放學嘅時候，所有小朋友都離開學校返屋企，唯獨剩低佢一個，所以佢唔想响學校食飯。諗落又真係幾可憐嘅，所以我都諗住俾佢試完呢個月就算啦，怕且經過一個月嘅訓練，都應該有少少改善哇...

盪韆鞦

澄澄細個嘅時候去到公園最鍾意就係打韆鞦，又唔會驚；但後來唔知點解，佢怕咗韆鞦，無論我地點氹佢，佢都唔肯玩。其實佢又無試過有唔好嘅經歷，就係突然間抗拒玩，佢自己話怕高喎！

但係一直我地都有鼓勵佢玩，有時氹佢玩小小，輕輕推兩下就由得佢玩第二樣，都係想佢壯返個胆。到最近佢鍾意玩返韆鞦喇，仲可以玩得高啲，不過當佢叫停，唔想我地再推佢，我就會聽佢講，唔想嚇倒佢。終於佢都克服咗自己嘅心理關口，仲成日要去打韆鞦...

今日放咗學之後仲扭計要姐姐同佢去公園打韆鞦，去之前雖然都有打電話問我，但係我同佢講因為正正下午一點嘅時候，真係好晒，怕佢會中暑；但係佢話有樹樹遮住唔會晒啦...真係無佢乎，結果批准佢玩十分鐘啦！

下畫佢瞓醒臨食飯前，爺爺嫲嫲又帶佢去玩一次，因為佢地唔知道澄澄放學已經玩過，佢自己當然唔會講啦，最後玩到跌損咗膝頭哥。我放工返嚟，佢已經知道會俾我教訓，所以有啲擅擅驚驚。我話完佢幾句之後，佢都答應我唔再扭計，等放假先至去公園玩韆鞦。呢個亦係佢嘅優點，講過佢就會聽，唔會野蠻唔算數! 還好...

到臨瞓前，姐姐先同我講，原來澄澄响學校顧住玩連厠所都唔去，結果忍唔住，整到條褲都濕埋...真係激死!