唔想响學校食飯

今朝澄澄起身擦完牙之後，好似好慘咁走嚟同我講，唔想喺學校食飯。可能因為初頭嘅新鮮感已經過咗，加上無佢嘅同學仔一齊食，只係得啲高班嘅小朋友同埋老師。

我同佢講因為今個月交咗錢，所以至少要食完今個月，加上佢都未係可以食得好快，偶然佢仲係會依賴姐姐餵佢；所以我要佢食飯有改善至停止，佢聽完都無特別反對。放學佢依然會留低食完飯至走。

我諗佢主要係因為見到放學嘅時候，所有小朋友都離開學校返屋企，唯獨剩低佢一個，所以佢唔想响學校食飯。諗落又真係幾可憐嘅，所以我都諗住俾佢試完呢個月就算啦，怕且經過一個月嘅訓練，都應該有少少改善哇...