盪韆鞦

澄澄細個嘅時候去到公園最鍾意就係打韆鞦，又唔會驚；但後來唔知點解，佢怕咗韆鞦，無論我地點氹佢，佢都唔肯玩。其實佢又無試過有唔好嘅經歷，就係突然間抗拒玩，佢自己話怕高喎！

但係一直我地都有鼓勵佢玩，有時氹佢玩小小，輕輕推兩下就由得佢玩第二樣，都係想佢壯返個胆。到最近佢鍾意玩返韆鞦喇，仲可以玩得高啲，不過當佢叫停，唔想我地再推佢，我就會聽佢講，唔想嚇倒佢。終於佢都克服咗自己嘅心理關口，仲成日要去打韆鞦...

今日放咗學之後仲扭計要姐姐同佢去公園打韆鞦，去之前雖然都有打電話問我，但係我同佢講因為正正下午一點嘅時候，真係好晒，怕佢會中暑；但係佢話有樹樹遮住唔會晒啦...真係無佢乎，結果批准佢玩十分鐘啦！

下畫佢瞓醒臨食飯前，爺爺嫲嫲又帶佢去玩一次，因為佢地唔知道澄澄放學已經玩過，佢自己當然唔會講啦，最後玩到跌損咗膝頭哥。我放工返嚟，佢已經知道會俾我教訓，所以有啲擅擅驚驚。我話完佢幾句之後，佢都答應我唔再扭計，等放假先至去公園玩韆鞦。呢個亦係佢嘅優點，講過佢就會聽，唔會野蠻唔算數! 還好...

到臨瞓前，姐姐先同我講，原來澄澄响學校顧住玩連厠所都唔去，結果忍唔住，整到條褲都濕埋...真係激死!