要搬家！

最近我地想搬屋，因為住緊果度嘅樓上樓下、左右隔離都經常發出一啲好滋擾嘅聲音，唔係樓上搬抬搬櫈，就係隔離'砰'門聲 (经常性穿梭兩個單位)，一係就輪到樓下隻狗吠聲 (因為佢嘅主人遲歸，可能間屋無燈無糧)。呢個情況維持咗足足三年，話說係因為我無再响SCB返工之後，唔需要响外邊留到十二點幾，所以至知道有呢啲騷擾。前前後後我亦投訴過好幾次，不過都無改善。

今晚十點左右，澄澄剛入睡，樓上突然又'砰隆'一聲，嚇到澄澄醒咗大喊。我問佢咩事呀？佢話: 澄澄唔開心，喊呀...好淒凉 (呢句係佢嘅口頭禪)。我曾經同佢講過係樓上個哥哥唔聽話，於是佢同我講: 叔叔唔乖，跌嘢嘈醒澄澄，我地買新屋啦，唔住南豐。之後又問我幾時買？我話等爸爸返嚟先啦，佢都話要依家，可能佢今次俾樓上嚇親，所以唔想住呢度！

今朝早佢又同我講，媽媽買張床床，澄澄瞓下面，大個先瞓上面，自已瞓得喇。佢開始意識到就嚟要搬家了！

又跌落床？

澄澄每晚都係攬住Minnie就自己瞓覺，我就会把握呢段黃金時間去處理一下我嘅私人事務。噙晚我寫緊Blog嘅時候，突然"砰"一聲，跟住就係澄澄嘅喊聲，我即刻就意識到佢一定係跌咗落床，於是乎即刻入房睇吓佢，已經見佢"趴"咗响地上面。我問佢有無邊度痛，佢都只係一邊喊一邊又好眼瞓。於是我幫佢檢查過佢嘅頭、手同脚，見佢無特別喊得厲害就應該係無大礙嘅，尤其係佢一向都跌慣，佢係呢張床大大話話都跌過十次八次，嗰陣都只係一歲左右！

今朝起身我再問返佢，佢都已經唔記得哂，仲問我係咪細個果陣？算啦好彩佢都無乜大礙。咁岩前晚學校派咗本書返嚟要家長同佢講解，裡面曾經見過一張上下格床嘅圖書，佢即時就聯想起，仲同我講: 澄澄依家細個，要瞓下面，大個先瞓上面，因為會跌落床架！幾醒....哈哈！

澄澄係姐姐？

今日同澄澄去律師樓辦埋少少瑣事，我同澄澄講：啲律師哥哥、姐姐，仲有律師姨姨都好叻，咁你大個要唔要做律師呀？點知佢擰哂頭話唔要。可能佢都仲未知律師究竟係點解！

之後我地就去咗婆婆度，澄澄話要去揾表妹盈盈，初頭佢兩個見到面都唔係太熱情，但係當澄澄想玩表妹啲玩具時，佢都肯先問一下表妹可唔可以俾佢玩，然後表妹又好願意俾佢玩，都無搶嘢玩。之後熟落咗，仲玩到糖痴豆咁。差唔多夠鐘要返婆婆度食飯嘅時候，澄澄成個大家姐咁問盈盈要唔要一齊去，仲拖住佢只手邊講邊出門口。落到街我話等我拖表妹同佢啦，佢竟然話唔駛，仲話盈盈細個要兩個一齊拖住佢，睇見佢兩個小鬼真係好得意。之後澄澄仲做個好榜樣俾表妹睇，食哂碗飯仲飲完一碗湯，不過表妹就唔肯食飯！

澄澄叫"阿薇"

澄澄呢幾日好得戚，聽到嫲嫲或者婆婆佢地叫我個名，佢又嗌埋一份，我不停咁同佢講，話佢細個唔可以咁樣叫我，於是佢又問我咁公公呢？爸爸呢？姑媽呢？....然後我話萍姑姐都唔得，因為佢細過我。

跟住佢就當唱歌咁，成日問住我萍姑姐唔可以叫乜嘢？我知佢常藉口又叫我個名，於是我話：唔可以叫我個名囉！佢即刻就問我：係咪"阿薇"呀？跟住佢就笑得好得戚！因為連萍姑姐都唔叫得，佢竟然可以講，激死！

三字經

最近我教澄澄三字經，只係讀咗幾次，佢就記得點唸。我發覺佢嘅記性都幾好，比起認字快好多，不過都要經常同佢溫習，否則就好似唸ABC咁，明明兩歲前已經識得背哂A-Z，上星期我再問返佢，只係得返A-E，真係激死喇！

弊喇，澄澄鍾意鍚鍚 :(

最近唔知點解澄澄每當見到啲佢鍾意嘅嘢，無論廚窗裡面嘅招財貓，抑或係貨架上面嘅玩具，佢都嘟個咀埋去鍚一啖，真係激氣！

最近嘅手足口病仲咁猖獗，佢表妹只係五個月大都中咗招，澄澄响學校接觸咁多小朋友，我都好担心佢會唔會有事，好在學校嘅老師都好留意佢地嘅衛生同健康情況，每當有少少異樣，就會同家長聯絡，報告一吓近況。好似噙日老師話佢比平日多咗流眼水，不過就無紅無腫無眼膠，亦唔見澄澄有摔眼嘅現象，所以叫我多啲留意下佢就得喇。

呢排亦從佢口中聽多咗一啲我無教過佢嘅詞彙，例如"裝修、轉燈、地震"...等等。唔知佢响邊度學返嚟，有時佢食完飯飽飽嘅時候，佢就摸吓自己個肚皮話"我有BB呀"，俾我好多驚喜！

母親節

學校因應即將來臨嘅母親節，教咗小朋友一啲小手工。

今日放工返嚟，澄澄就指住枱面嘅一個勞作話送俾媽媽架。裡面係一個小朋友自己整嘅紫菜麵包圈，另外仲有一條用膠珠穿成嘅手鏈。我問係咪澄澄做架，佢就點頭然後攬住我話 '攬吓媽媽先，我好鍾意媽媽架'。聽到佢咁講真係好窩心，有乜唔開心都可以拋諸腦後。成晚佢對我都好熱情，又攬又鍚。

後尾幫佢檢查書包嘅時候，見到佢嘅手工簿，貼咗首歌頌媽媽嘅兒歌，我問佢點讀架，佢就即刻表演俾我睇。你地都睇吓個video啦！同時亦將佢送俾每一個母親。Have a Happy Mother Day!

澄澄受傷了！

下午收到幼稚園蔡主任嘅電話，心諗唔通澄澄唔舒服定係唔乖？原來老師話佢响學校玩韆鞦嘅時候，有個小朋友幫佢推嘅時候唔小心篤倒佢嘅下眼皮，好彩唔係眼睛，只係差一亳米距離，真係好險。老師話當時聽到澄澄'哇'一聲大喊，於是問佢咩事，佢就喊住話俾老師聽好痛，老師幫佢檢查一番，發覺無乜大礙就安撫咗佢，再問佢係咪响屋企定係學校整傷？澄澄就話响學校玩韆鞦整到呀。老師當時並無同我講係邊個小朋友整傷澄澄，只係通知我有呢件事發生。

放工我返到去即刻就幫佢檢查多次，都只係少少皮外傷，然後就問佢點解整到架？佢就話俾我知，"我玩韆鞦,宝軒推我呀"。於是我同佢講，小朋友係一時唔小心整到澄澄呀，咁你原諒佢啦，佢就點一點頭。我咁講係唔想佢對小朋友有咗種抗拒感，唔敢同人玩，最緊要佢無受傷，小小碰撞實在聽所難免。

第一次食糖

噙日响玩具反斗城澄澄見到瑞士糖，係都要我買俾佢，後來我話買軟糖啦，但係又無得賣，結果就成全佢買咗佢想要嘅第一筒糖。初初佢攞咗一粒揸住响手點都唔肯食，後尾我話要沒收咗佢筒糖至肯食。因為佢係第一次食糖，而瑞士糖又有啲硬，食食吓黏住响啲牙度，佢覺得好唔舒服，於是猛叫我地幫佢整返出嚟。之後我問佢仲要唔要食糖，佢就耍手兼擰頭。有剩嗰啲糖我叫佢帶返學校請小朋友食，佢都無反對！

迎奥運

今日學校大慨係同小朋友佢地講解奧運會嘅課題，放學嘅時候又派每人一把火炬，我問澄澄係咩嚟架？佢就舉起手話'傳聖火呀，跑跑跑！'

沿路响街上一路都見到好多小朋友揸住唔同形式嘅火炬。依家嘅學校果然活動教學，因應住唔同嘅節日就講唔同嘅教材，比起我地嘅年代，真係變咗好多！