有改善

自從上次澄澄無做好功課，罰佢企過之後，呢兩日澄澄都算有改善，肯聽話完成我吩咐佢要做嘅練習。對姐姐又有禮貌咗，無咁容易同姐姐發脾氣或者大叫，希望佢繼續維持落去。

今日朝早澄澄返學校嘅爵士舞班，見到佢無見好耐嘅Jaycee同希愛，所以佢好開心，仲問我聽日係咪返學；我同佢講依家仲停課，放緊假；佢竟然反問返我點解放咁耐？又話好想返學...可能佢係掛住佢啲好朋友，而且放假又唔可以去街，因為媽咪無假放，二來豬流感肆虐，都係少出街為妙，否則病咗就要將佢隔離；所以佢都好合作無扭計要去街玩。

我同佢講要經常保持衛生，萬一佢染病，就會俾人分開佢同我；佢好天真咁同我講，咁你同我一齊病啦！哈，真係激死！