性急嘅澄澄

今朝早七點四個字，澄澄就起身等住去海洋公園。其實之前我已經同佢講如果落雨就唔去得喇，可能係咁，所以佢好緊張今日有無落雨，結果又幾好天，但係姑丈話今朝九點就會打電話嚟再決定去唔去。所以澄澄一直係度等電話，又問我去得未？直到姑姐打電話嚟話去啦，不過要等君君食完奶，大約十點出發，於是澄澄又繼續等，期間不停咁問我去得未，一直到我出咗去做物理治療至可以耳根清靜一下。好唔容易至等到十一點幾，姑姐終於話嚟緊接我地；呢個時候開始有雨，仲越落越密，間中仲有一兩吓雷聲；我地曾經講笑話不如唔好去，澄澄即刻話落雨都去得嫁，連雷聲都唔驚喇！

結果全日都係着住件雨褸嚟玩，最狼狽就係响海洋劇場睇表演嘅時候，又顧住食嘢，又睇表演，仲要忽然一大片黑雲剎到，顧得擋雨，又顧唔到啲嘢食，真係狼狽到暈！

澄澄原來最鍾意嘅就係搭纜車，好唔耐煩咁催促我地，唔想留低响熊貓館同睇金魚嘅地方。最後唯有搭纜車過去睇海洋劇場。澄澄今次比起年多前果次有進步，全日都係自己行，除咗人多嘅地方我抱咗佢一陣；第二就係佢唔怕啲魚喇，夠胆企近個玻璃，當有魚游埋嚟嘅時候，仲用手掂個窗；有啲遊戲係只可以澄澄自己一個玩同排隊，佢都做得到；唯獨是有個踫踫船嘅遊戲，有個哥哥排响佢前面嘅，見澄澄企前過佢又企咗响另一邊，於是哥哥拍咗澄澄幾吓膊頭，然後問澄澄係咪打尖，佢就放聲大喊，結果唔玩就走返出嚟！其實就算無發生呢件事我都唔信佢玩得到，因為佢又怕水，如果玩緊嘅時候有人撞到佢隻船，佢實驚話唔玩...

臨走嘅時候終於落場大雨，每個人都濕咗一半，澄澄一啲都唔覺有問題，仲問我幾時再去海洋公園！

浪卡到訪!

踏入夏季，亦即是颱風嘅季節；今年第一個颱風浪卡到訪，就令到澄澄滿懷希望、準備去海洋公園嘅夢想破滅咗，好可憐呀！

我原本都打算六月帶澄澄去Ocean Park玩返次，點知一係就好熱，完全唔適宜戶外活動；一係就流感當道，再唔係就打風落雨，真係福無從至、禍不單行。唔通要豁出去，坐言起行？

澄澄為咗要去海洋公園，好努力學乖，因為我要佢儲夠三十個貼紙先可以去；要有貼紙就要佢perform 得好，無扭計至有，當然我好多時都唔會刻扣佢嘅貼紙嘅，只要佢唔係特別曳、唔聽話。

其實如果聽日唔係太大雨，我都會同佢去嘅，等佢了咗件心事.....話晒放咁耐假要留佢响屋企又都幾悶嘅！

暑期活動要改期了...

今日我打咗電話返澄澄學校，問老師關於學校停課安排，剛啱學校今早開完會，所以我得到第一手資料。

澄澄嘅老師話由下個月十號開始學校會有活動俾小朋友參加，為期三個星期，每日一小時，費用全免；而六月份因為澄澄交了膳食費，所以可以在活動完後再食埋飯。我諗呢個安排係想幫家長舒緩一下突如奇來嘅停課，令好多家長唔知點幫小朋友打發時間，其次亦令家長們覺得七月份嘅學費無蝕咁多；所以我即時答覆咗老師會俾澄澄參加。

至於學校原定開設嘅暑假活動，就會延遲到八月尾嘅下午時份進行，即係澄澄報咗名嘅游水班都會改期。呢個改動我就有啲保留，須要再考慮，因為有可能撞咗澄澄嘅午睡時間；不過我地仲有時間去考慮，因為呢個都係學校初步嘅構思，到決定咗就會打電話徵詢家長意見。

我對學校今次嘅安排都好滿意，因為真係無諗到突然間會有成兩個月嘅暑假，仲要今年無打算去印尼，想留返香港學嘢充實吓。如果所有活動都停晒，日子真係會變得百無聊賴，我亦都請唔到咁多假陪澄澄；不過就真係要做好衛生嘅防護，要帶mask同勤洗手...

父親節

今年的父親節，因為流感關係，學校停課，連要完成的父親節咭都沒有完成到，只好將咭紙連同習作派回家由媽咪幫小朋友完成，所以今年再沒有做紫菜卷類似的禮物！

星期六回婆婆家跟公公慶祝父親節，因為星期日萍姑姐約了我們一齊慶祝。

澄澄昨天起床的時候，突然學婆婆講了一句說話:除咗個大包袱先(即是穿了一夜的尿片)，然後澄澄問我為什麼婆婆很久沒有來探澄澄，陪澄澄睡覺？所以今日澄澄見到婆婆又問一次...

到了父親節正日，反而好像變成澄澄的日子，倒過來像是幫她慶祝。早上帶她去公園玩她最喜歡的韆鞦，但不到一會因為天氣太悶熱，唯有離開。之後帶她去了Hagen Dazs食雪糕，因為早前澄澄一直有咳，已經好久沒有食生冷的東西，像橙、香蕉、朱古力、雪糕和果汁等等。但自從學校停課之後，她就好起來，難到真的跟學校的空氣流通有關？

之後澄澄要求食McDonald，同姑媽share了半個漢堡飽和薯條，之後又跟姑媽玩電腦，直到差不多午睡時候才回家休息。晚上約了姑姐一家人同爺爺一家在鯉景灣附近食飯慶祝父親節。最後還約好了下星期六去澄澄最期待的海洋公園，本來我都打算在我生日那天帶她去玩，所以每日澄澄都問我幾時去。聽到這個好消息之後澄澄更加心花怒放；希望到時天公造美，讓我們好好享受這一日！

有改善

自從上次澄澄無做好功課，罰佢企過之後，呢兩日澄澄都算有改善，肯聽話完成我吩咐佢要做嘅練習。對姐姐又有禮貌咗，無咁容易同姐姐發脾氣或者大叫，希望佢繼續維持落去。

今日朝早澄澄返學校嘅爵士舞班，見到佢無見好耐嘅Jaycee同希愛，所以佢好開心，仲問我聽日係咪返學；我同佢講依家仲停課，放緊假；佢竟然反問返我點解放咁耐？又話好想返學...可能佢係掛住佢啲好朋友，而且放假又唔可以去街，因為媽咪無假放，二來豬流感肆虐，都係少出街為妙，否則病咗就要將佢隔離；所以佢都好合作無扭計要去街玩。

我同佢講要經常保持衛生，萬一佢染病，就會俾人分開佢同我；佢好天真咁同我講，咁你同我一齊病啦！哈，真係激死！

假期開始，已經失控!

澄澄只係放咗兩日假同一個weekend，已經玩到唔識得自制。平時我都會打電話俾佢叫佢寫吓ABC，佢都做得到；見佢放假咁得閒，我都交低咗一啲練習吩咐佢要做，但係一連兩日佢都唔達標。

第一日佢完全無掂過本練習簿，話咗佢之後，今日稍為寫咗啲數目字，但係ABC依然等到我返嚟至做；我吩咐佢做嘅嘢，佢只係收到'食蛋糕'呢個指令；朝早仲跟嫲嫲去行公園，玩過食過都唔做功課；我仲一日打咗兩次電話俾佢提醒佢要做啲乜嘢，但係佢都只係當耳邊風，所以我真係有啲嬲。 已經夜晚夜咗瞓覺，叫極佢都唔聽，星期六晚因為我有啲公司嘅嘢帶咗返屋企做，佢係都要等到我瞓佢至肯瞓，結果等到十一點幾，無佢乎唯有我唔做住。星期日我原本要完成埋公司嘅嘢，點知夜晚又行雷行得好厲害，嚇到佢唔敢一個人瞓，結果我唯有草草了事做完就陪佢瞓覺。

嬲嬲地我要佢寫完要寫嘅練習就罰企，要佢反醒吓點解我要罰佢；佢之後同我講'佢唔會再去公園'，我同佢講唔係因為呢件事，佢又話'唔敢再玩'.....唉，睇嚟佢係唔明我點解嬲！

於是我唯有再同佢講多次，我只係要求佢玩時玩，做功課嘅時候就要正經做，做一陣又休息吓，之後再完成埋佢，唔通咁樣嘅安排對佢都好高難度?

不過我都知我罰佢可能係有啲過火，但係突然間放咁長嘅假，真係會放到佢無晒自律同自覺，變得鬆散!

H1N1殺到,學校停課

政府根據流感大流行，宣佈全港小學同幼稚園須要停課十四天，令到唔少家長措手不及。我都覺得好無奈，半個月學費無咗唔在講，無端端十幾日嘅假期俾個小朋友百無聊賴亦都好浪費光陰。家長亦未必即時可以請假陪小朋友，但係又唔可以幫佢地搵定啲summer course，因為唔知呢個'豬流感'會唔會繼續惡化落去，連課外活動或者興趣班都要暫停。

我幫澄澄報咗兩個summer courses，一個language(英文+普通話)，一個學校辦嘅兒童工作坊(游水+戶外探索)，都唔知會唔會受影響要cancel，如果要再延長停課十四天，咁澄澄今個K1就完結喇，仲放足兩個月嘅暑假，真閉翳!

最慘因為流感肆虐，傳染性又高，連一般嘅社交活動都受影響，因為無人知身邊有無人帶菌，萬一中招就要被隔離七日，好煩!

希望呢場流感快啲過去，否則成個暑假都要泡湯!

澄澄愛嗲

呢幾日澄澄變得好嗲，唔知點解呢？

夜晚瞓覺嘅時候，有時會忽然喊到好可憐，話唔要我做嘢陪佢瞓覺。呢兩晚我放工返嚟，佢就第一時間同我講，晏畫佢瞓覺嘅時候都喊，因為佢好掛住我喎！

寫到呢度又聽見佢喊住問我做完嘢未？結果要陪佢瞓咗至可以繼續寫埋落去；最後搞咗個幾鐘頭，佢終於瞓咗。唔知係咪同佢近來鍾意跟住老師，想搵個依傍有關？遲啲如果搬咗屋，唔知佢係咪真係可以自己一個人瞓覺，佢把口就係咁同爸爸講，話唔使同爸爸媽媽瞓，自己瞓醒起身就會過嚟我地房間叫醒我地。希望佢過幾日會回復正常，唔好再鬧情緒。

家長教師日

星期六係澄澄學校嘅家長教師日，老師update咗我澄澄响學校嘅情形，有啲係連我都估唔到，大至上係好壞參半。

老師話澄澄有時都幾蠱惑，知道有啲嘢唔做得嘅，就會週圍望吓有無人望住佢先曳曳。最近佢又好喜歡跟住老師，以前嘅澄澄好獨立，樣樣嘢都會自己做；原來佢係學佢嘅好朋友Jayce，要'癡'住老師，結果一人mark咗一個老師。

另外老師話澄澄喜歡模仿人地，有時上堂要小朋友自己靠想像力創作一啲圖畫或者手工，澄澄會睇人地嘅然後又做一樣嘅嘢，所以老師話佢唔夠獨立。

澄澄又好細胆，學校有時有啲大肌肉訓練，叫小朋友爬高爬低，佢都話唔敢，呢樣可能係因為同我平時叫佢唔好做啲危險動作有關，怕會令佢受傷；做父母真係難，想保護佢竟然又變成害咗佢...唉！

老師都有讚澄澄嘅，就係佢好好記性，平時教小朋友嘅語文或者兒歌，澄澄都係第一個學識嘅，仲朗朗上口；再者，就係佢上堂好專心聆聽老師講嘅話。

有時老師講一句好過我地講十句，所以結果都係老師幫手勸服咗澄澄今個暑假參加游泳班，學啲簡單嘅踢水技巧，希望佢真係肯玩，唔好到時唔肯落水就好喇！

最後老師都有讚佢自從六月多咗兩個小朋友响學校食飯，澄澄都多咗份推動力，食飯都有進步，又唔會偏食。總括嚟講我都算滿意佢嘅表現，不過真係要諗吓可以點樣令佢獨立啲，大胆啲，千祈唔好似媽咪咁'籐雞'....

心情好了!

踏入六月，澄澄嘅好朋友Jayce都開始留响學校食午飯，於是我再聽唔到澄澄楚楚可憐咁話唔想喺學校食飯。聽佢講仲有卓謙都係响學校食，但係頭兩日澄澄話卓謙都唔肯食，要求姐姐帶佢走，老師亦無强逼佢，直到噙日即係第三日，卓謙終於肯留低喇！

第一日澄澄話食得最快嘅係Jayce，佢就第二；今日澄澄話三個都好叻，一齊食得好快喎，食飯又無偏食，有食蛋、菜、蘿蔔同飯，唔知真定假呢？今個星期六家長會嘅時候，等我問吓老師了解吓先...

不過可以肯定嘅係....澄澄心情好咗，願意繼續喺學校食飯，希望經過呢兩個月嘅訓練，對佢有幫助，至少唔需要依賴姐姐餵...我都安慰啦！

忽然心傷?

澄澄習慣每晚九點半就上床瞓覺，我幫佢蓋好被，say過goodnight，就會熄燈關門，等佢自己先瞓。

噙晚一切如常，但係唔夠五分鐘就聽見佢把聲，一開門原來澄澄喊到聲淚俱下，好可憐！我問佢乜嘢事，佢只係話唔想我喺出面做嘢，想我陪佢瞓覺！

我都唔知佢最近發生乜事，有時朝早我返工出門口，佢又同我講唔想我去返工，要我唔好做嘢留响屋企湊佢，唔知會唔會同剛啱放完一連四日嘅假期有關，因為我陪咗佢咁多日，唔通佢唔捨得？

今晚臨瞓前，佢自己都識講，噙晚我自己唔瞓倒，要媽咪陪...好彩今晚佢無事喇，自己上床就瞓覺。可能佢都係想嗲吓、撒吓嬌啫!