Jazz & Ballet

好快就暑假，因為決定咗留返响香港，所以週圍搵適合澄澄嘅courses幫佢增值吓。

之前已經報咗個course學英文同'煲冬瓜'，但係如果成個假期都只係得學術性嘅course，又好似唔夠平衡，怕會悶親佢。所以最後帶佢搵咗間SDM Jazz & Ballet Academic報咗一個為期一年嘅Ballet/Jazz class，每年仲會有個澳洲升級試要考，希望佢真係學得一技傍身。

因為佢响學校都有學緊Jazz，仲好鍾意跳；加上呢間學校仲有埋條ballet裙同鞋襪，同一個書包，佢睇到已經好雀躍；只可惜八月中响伊館舉行嘅annual performance佢就參加唔到，因為到八月佢先開始學，唯有再等一年後嘅演出啦！

唔想搬屋?

最近我地又開始睇樓，始終租人地方住，間屋唔係自己嘅都係無咁舒服。

以前我同澄澄講過，如果將來搬咗屋，澄澄有自己嘅房間，就要自己同姐姐瞓喇，佢都好正面回應我。點知近日再同佢一齊去睇樓嘅時候，佢就話唔想搬，要住返呢度。於是我問佢點解？以為有乜特別原因。

原來佢驚萬一搬咗屋，就唔可以再同媽咪一齊瞓，要搬過隔離房，所以佢唔要搬屋。但係我同佢講話會俾佢自己'簡'自己鍾意嘅床，同裝一個低啲嘅燈掣俾佢自己開關，佢又有啲心動喎。

我知道就算我真係跟佢意思幫佢'簡'咗張佢鍾意嘅床，佢都係會扭計，唔想自己一間房，但係好快佢就四歲，唔可以再跟住我，所以呢次要强硬啲對佢，唔可以心軟...

有好朋友陪食飯

澄澄近日經常同我講"唔想再响學校食飯"，可能因為無伴啦；好彩老師終於幫佢搵到佢最鍾意嘅好朋友Jaycee，下個月一齊留响學校食飯。所以我勸佢要繼續，否則下個月就得番Jaycee自己，於是佢又肯留返响學校食飯。

依家澄澄已經會自己'筆'飯食，有時快有時慢，總算係有進步啦。同埋响學校食飯有個好處係佢唔會偏食，學校煮乜就食乜，連平時佢唔會食嘅粥都無得避免，一樣要試，真係好！

不過澄澄就似足爸爸，好鍾意食燒肉、燒鵝、叉燒等肉類，菜就食得唔夠，好彩佢都鍾意食水果，又每日都有便便，算係咁啦！

好貪靚!!!

澄澄越大越貪靚，又要學人留長頭髮(不過媽咪都想佢留長)，但係紥辮只肯紥一條，因為佢話要學大人一樣，好似媽咪咁；我自己當然唔會紥兩條啦，但又好難搵個大人紥兩條辮嘅俾佢睇，所以每朝返學或者去街，都要講一輪數，至決定到紥一條定係兩條...唉!

佢又好鍾意着裙，放學返咗屋企，佢都要搵條裙嚟着，有時仲着到不倫不類，吊帶裙入面又加見T-shirt，總之唔俾佢着就唔得，迫到我最後唯有將啲裙收埋，佢至心息。

最近佢仲連星期二同四，返學着運動衫嘅日子，都話要着裙，真係貪靚！

小一選校家長會

星期五學校舉辦咗一場小一選校家長會，請嚟咗一班响躍思畢咗業嘅學生家長同我地分享一吓佢地嘅子女就讀緊嘅小學嘅優與劣，呢個家長會都好有用。

雖然澄澄依家仲係K1，但係好快就要搵小學。原本我想幫佢搵間課程輕鬆啲嘅，自由啲無乜壓力嘅學校，最緊要佢enjoy讀書，求知識；但係爸爸就覺得應該搵返傳統嘅小學，等佢將來可以涵接到升中或者大學嘅要求，甚至要出外留學都會優勝啲，咁都啱嘅。

我覺得澄澄都係一個可以操練嘅小朋友，因為每逢我叫佢練習寫字，佢都唔會say no，或者講價寫幾多，佢都會乖乖地寫，有時甚至係佢自己話'好耐無寫字喎'，所以我都唔太担心佢會適應唔到傳統學校嘅教學法。

不過最後都係睇佢自己考成點，做家長嘅就係盡力幫佢搜集每間學校嘅資料，將好嘅同適合佢嘅安排俾佢去約見，有時人地口中嘅好又未必一定合適，順其自然啦！

唔想响學校食飯

今朝澄澄起身擦完牙之後，好似好慘咁走嚟同我講，唔想喺學校食飯。可能因為初頭嘅新鮮感已經過咗，加上無佢嘅同學仔一齊食，只係得啲高班嘅小朋友同埋老師。

我同佢講因為今個月交咗錢，所以至少要食完今個月，加上佢都未係可以食得好快，偶然佢仲係會依賴姐姐餵佢；所以我要佢食飯有改善至停止，佢聽完都無特別反對。放學佢依然會留低食完飯至走。

我諗佢主要係因為見到放學嘅時候，所有小朋友都離開學校返屋企，唯獨剩低佢一個，所以佢唔想响學校食飯。諗落又真係幾可憐嘅，所以我都諗住俾佢試完呢個月就算啦，怕且經過一個月嘅訓練，都應該有少少改善哇...

盪韆鞦

澄澄細個嘅時候去到公園最鍾意就係打韆鞦，又唔會驚；但後來唔知點解，佢怕咗韆鞦，無論我地點氹佢，佢都唔肯玩。其實佢又無試過有唔好嘅經歷，就係突然間抗拒玩，佢自己話怕高喎！

但係一直我地都有鼓勵佢玩，有時氹佢玩小小，輕輕推兩下就由得佢玩第二樣，都係想佢壯返個胆。到最近佢鍾意玩返韆鞦喇，仲可以玩得高啲，不過當佢叫停，唔想我地再推佢，我就會聽佢講，唔想嚇倒佢。終於佢都克服咗自己嘅心理關口，仲成日要去打韆鞦...

今日放咗學之後仲扭計要姐姐同佢去公園打韆鞦，去之前雖然都有打電話問我，但係我同佢講因為正正下午一點嘅時候，真係好晒，怕佢會中暑；但係佢話有樹樹遮住唔會晒啦...真係無佢乎，結果批准佢玩十分鐘啦！

下畫佢瞓醒臨食飯前，爺爺嫲嫲又帶佢去玩一次，因為佢地唔知道澄澄放學已經玩過，佢自己當然唔會講啦，最後玩到跌損咗膝頭哥。我放工返嚟，佢已經知道會俾我教訓，所以有啲擅擅驚驚。我話完佢幾句之後，佢都答應我唔再扭計，等放假先至去公園玩韆鞦。呢個亦係佢嘅優點，講過佢就會聽，唔會野蠻唔算數! 還好...

到臨瞓前，姐姐先同我講，原來澄澄响學校顧住玩連厠所都唔去，結果忍唔住，整到條褲都濕埋...真係激死!

母親節

今個母親節，澄澄响學校學做咗張咭送俾我，再加多句"Happy Mother Day, I Love You"，佢同我講張咭有好多心心，代表澄澄好錫媽咪，聽到我都好滿足喇！

其實母親節都無乜特別點慶祝，尤其澄澄仲細個，反而係同佢去咗公園玩佢最鍾意嘅韆鞦同泡泡槍；夜晚就同公公、婆婆去咗食buffet，相信佢地都應該好滿意，我因為最近胃炎所以都唔敢食得太放肆，不過都食得好開心。因為澄澄係第一次食buffet，佢都好乖食咗啲烏冬、麵包、粟米，然後再食咗杯焦糖燉蛋、梳乎厘、朱古力雪糕、啫喱等dessert。因為佢仲係有啲咳，所以佢都肯乖乖合作先食完一啲熱嘅嘢，再食凍嘅，仲好有節制，唔會扭計。成餐飯都係佢自己食，真係進步咗，係送俾我最好嘅母親節禮物！

學校用午膳

今個月開始幫澄澄報咗响學校食午飯，目的都係想佢學習自己食飯，同埋食得快啲同多啲就最好啦，否則訓練到佢自己食都已經好好。

喺學校食咗兩日，夜晚餐飯果然有進步，真係學會咗自己食，不過就慢啲。我問佢午飯有啲乜嘢食，佢都會講返俾我聽；都係離唔開蔬菜、肉類同魚類等等，有時又會食麵或者粥，都幾多花款；佢仲話唔使老師餵，係自己食完。 叻女！

不過學校咁早食飯，我估佢都唔會食得好多，因為十點幾先食過茶點，有時放學返到屋企問佢仲要唔要食麵包，佢都話要好似未飽咁樣...不過只要佢肯食，而又唔係一啲無益嘅junk food，我都會由得佢，反正食多啲都無壞！總算係個好開始...

Long Weekend返大陸

五月第一個長假期，同澄澄返咗鄉下探佢最掛住嘅杰杰哥哥。

可惜沿途都有交通失事，所以好塞車，結果我地坐架車仲死埋火，經過六個鐘頭終於返到去。當晚我地去咗海邊附近BBQ，之後係澄澄期待已久，全晚嘅高潮.....放煙花!

澄澄玩得好開心，連晏覺都無瞓，一直到差不多十一點至上床瞓覺。臨瞓前幫佢擦牙嘅時候，佢問我點解佢仲未甩牙？因為佢見杰杰哥哥下畫去牙醫度補牙....於是我同佢講每個人都會換一次牙，到第二次甩嘅時候就差唔多死喇!

我其實只係想打個比喻，並唔係想嚇佢；點知佢聽完之後，好唔開心仲走去同婆婆講"我唔想死"。婆婆聽到一頭霧水，同佢講無人要佢死喎! 後來我同婆婆講返件事嘅前因後果，至知道係乜嘢一回事。於是同澄澄講唔想死就要食多啲嘢，強壯啲、健康啲，做多啲運動，就會長命百歲喇!

雖然我用嘅比喻唔係幾好，不過希望佢聽完婆婆番話會食飯食得叻啲啦!

第二日去咗食sushi，之後去咗美奇樂園(類似冒險樂園)玩波波池，十五蚊任玩，所以依家澄澄好鍾意返大陸，因為有好多表哥表姐同佢玩嘛!

此行澄澄仲學埋响電腦玩填顏色嘅遊戲，佢見到表哥表姐佢地一人一部電腦，佢都唔會扭計爭玩，反而會坐响一邊睇佢地點玩，值得一讚!