做Project

今日係澄澄上咗K1之後嘅第二個project，上學期做咗個蘋果project，今次係同食物有關。

開始由幾個故事媽媽帶領，講完故事之後，有一個爸爸發問問題，目的係引導小朋友進入主題，睇吓佢地有興趣做邊類型嘅食物，就由佢地去決定。可惜美中不足就係因為天氣唔好，唔可以帶小朋友出外邊買佢地想做嘅食材返嚟；個好處係成個過程俾佢地親身經歷過，可以令佢地加深印象，同明白每個步驟，其次係誘發佢地對食物嘅興趣！

最後澄澄選擇咗做pizza同飯團。

澄澄對處理食物嘅過程都百份百投入，因為佢可以自己攞起把刀自己切腸仔、菠蘿，然後又揸茄膏上麵包，再加上什菜同芝士就可以放入焗爐焗，成個過程澄澄都唔俾我同爸爸幫手，要自己搞掂。不過放材料嘅時候，佢都曾經因為唔鍾意食什菜而唔肯放青豆，後來我地都勸服咗佢，因為仲有其他小朋友要食喎!

到整飯團嘅時候，就有啲難度喇。因為放咗材料之後仲要用舊飯包返住啲餡，唔好迫爆出嚟，之後再用一塊紫菜包响外邊。其他小朋友一包好就急不及待要食，唯獨是澄澄就唔肯食，最後都係要迫佢至食咗一啖咁大把!

結果成個project做咗差唔多四個鐘(呢個已經係濃縮版)，對小朋友嘅得着唔知有幾多呢? 但係至少我又學多咗兩種食譜，可惜屋企無焗爐，焗唔到pizza，因為實在好容易做，而且又好味!

結婚十週年 - Tin Anniversary

不經不覺結婚已經十年，我向來對呢啲特別日子都唔係特別記得，反過來Eric喺呢方面比我心思細密，最近幾年都係由佢提返醒我。

我同澄澄講聽日係爸爸同媽媽結婚十週年喎，佢當然唔知點解，不過佢識得問我係咪澄澄未出世呀？醒目!!

我同佢講唔知爸爸會唔會帶埋澄澄嚟接我放工食飯呢？澄澄只係記得要問我老闆會唔會喺度架？因為佢曾經要求過去公司揾我，當時我同佢講老闆喺度唔可以俾佢嚟架，會話澄澄阻住媽咪返工，所以佢仲好記得，又睇吓佢兩父女聽日邊個記得提邊個啦！

學習態度

澄澄學嘢都唔算慢，但係如果係玩，就寧捨快，如果佢大個讀書都係咁就好喇!

早兩個星期買多咗一副UNO俾佢喺婆婆屋企玩，我以為同屋企果副一樣，原來新買呢一副係複雜啲嘅；比起玩開果副多咗好多function cards，例如Skip, Reverse, Wild Draw Four。我見咁複雜所以都無諗住教澄澄點用，只係叫佢將呢啲cards收起，等佢大個啲至教佢。二來呢啲cards要起碼三個人至玩到，屋企大部份時間都只係得澄澄同姐姐兩個，所以我叫佢將副牌留低响婆婆屋企，等星期日返去婆婆度至玩，澄澄都無異議，好聽話!

上星期日响婆婆屋企，澄澄同舅父、慈姐姐玩UNO，佢地教咗澄澄點玩呢啲function cards，之後澄澄就識得玩；後來慈姐姐仲話有好多玩法，如果手上有同色同字嘅cards(甚至多過一隻)，只要同枱面上嘅牌一樣，就可以cut人牌打出嚟。呢種玩法連我都唔識，但係澄澄竟然學識咗；當然仲有啲更複雜嘅，例如要將手上剩餘嘅牌計分，越少分就越好，呢種玩法等澄澄大少少用嚟教佢計數，唔知會唔會有同樣效果，一學就識呢？

半夢半醒嘅澄澄

有一晚臨瞓前我嘅胃好唔舒服，於是瞓落床嘅時候我同澄澄訢苦，其實澄澄已經瞓咗，當時已經係一點幾鐘。我問澄澄媽咪個胃唔舒服，可唔可以陪我去see doctor呀？佢半夢半醒之間應我話可以，隨即佢又問我咁夜點see呀？...原來佢都仲清醒，知道已經係三更半夜無醫生睇喇！

有時澄澄瞓着咗唔知係咪發夢，喺度郁手郁腳，好似想打人咁；如果佢打到空氣，佢會唔係好忿氣咁，想繼續揾個目標出嚟俾佢發洩。我最怕係佢一係打咗落牆，一係打落我度，因為佢都唔係有心，所以又唔可以怪佢，但係發夢打人又真係幾痛，因為佢又唔會就住你嚟打！

心儀嘅對象

澄澄曾經講過亞B係佢老公，亞B其實係雯雯姑姐嘅老公，即係Jaden表弟嘅Daddy；但係澄澄耐唔耐就同我提返亞B係佢老公。其實澄澄唔係見過亞B好多次，只係舊年十二月嘅時候，佢地一家返咗嚟住响我地屋企，但係亞B都唔係同澄澄玩得特別多，就係唔明點解佢會成日講住佢老公就係亞B?? 唔知雯雯姑姐會唔會呷醋呢?

就算鄉下嘅杰杰表哥，佢都好掛住佢，成日問我同婆婆幾時又去探表哥，有個玩具送俾佢，佢都唔會話杰杰就係佢老公，真係費解!

早一排，佢已經開始同我講學校裡面邊個係邊個老公、老婆，初時我仲笑佢乜佢地咁快就結咗婚喇？點知今晚佢同我講姜心健係我老公；哎，乜依家啲豆丁咁人細鬼大，K1已經講埋啲咁嘅嘢？再問佢點解佢係澄澄個老公？因為佢好鍾意澄澄？佢答我因為心健成日叫澄澄，你嚟啦，你嚟啦! 可能澄澄覺得咁樣就代表人地好鍾意自己，因為有人好在乎佢！

Project Approach

今晚放工返嚟要返澄澄學校開"兒童設計活動"嘅家長會，其實去之前我都唔係好知個主題想講乜...聽咗差不兩個半鐘頭，原來係要家長幫手準備下星期同小朋友一齊做嘅Project！

題目暫定係圍繞食物做主題，例如從一個偏食嘅小朋友開始，要引導小朋友對食物有啲乜嘢嘅認知，點樣去幫個偏食嘅小朋友；開始會從講故事出發，然後從小朋友身上搜集資料，定咗個方向同規模之後，就開始外出搜尋物料，之後再返學校完成埋佢。成個過程講緊係四個鐘頭內完成，到時總共會有二十二個家庭參與；話就話老師會從旁協助，但係我都想像到會有幾亂，因為真正要做project嘅係一班兩至三歲嘅小朋友，所以老師都話呢個係一個濃縮版本嘅project!

家長要各自準備相關嘅用具或者材料，另方面亦要响呢短短一個星期內貫輸有關嘅知識俾佢地，起碼小朋友到時唔會一片空白；但係又唔可以抹殺咗小朋友佢地最純真、直接嘅意見，否則到時係大人做而唔係小朋友做。因為校長話小朋友嘅潛能其實係無限，我地要俾小朋友自由發揮，最忌就係樣樣都話呢樣唔好，嗰樣唔得...

今時今日嘅教學方法真係同我地以前嘅年代完全兩碼子嘅事，連家長都一樣要返學，做功課...諗到呢度我就好肉痛澄澄仲有漫漫長路要走落去...唉!

課外活動

聽日係澄澄學校嘅課外活動 - 去維多利亞公園參觀現正舉行嘅花卉展覽

澄澄好期待，佢以為係去旅行；其實都差不多啦，因為都係佢自己跟老師去，無家長陪同，同上年去香港公園一樣，要坐旅遊巴，我仲幫佢準備咗小小零食，其實係澄澄自己'簡'嘅，佢仲話會同小朋友分享嫁。

之後我同姐姐講叫佢聽朝幫澄澄帶定個書包返學校，萬一老師話唔須要至幫佢帶返屋企啦...
點知澄澄話要帶書包呀，因為我要去旅行，仲有，我要帶水壺自己揹住喎！

唔知係咪學校提佢地要帶嘅嘢呢，因為早前老師曾經同我講過，唔會再每樣嘢都派回條俾家長，會教小朋友自己記住再轉述俾爸爸媽媽知道。所以只要係澄澄話係邊個老師講嘅，我都會信佢。

我仲同澄澄講，聽日去公園之前一定要去咗v v先，因為老師好難照顧咁多個小朋友，最重要係公園嘅小馬桶唔同屋企或者學校咁有人清潔，唔可以坐上去，如果真係要去，就唯有叫老師幫手抱你去。於是澄澄應承我會去完v v至去旅行。

佢仲話要帶埋菲菲一齊去旅行，仲已經同老師講咗；佢雖然好緊張菲菲，但係佢都試過留低咗菲菲响學校唔記得帶佢返嚟，萬一聽日佢真係留低咗菲菲响公園，佢就會好唔開心！

今晚我攞咗個新嘅公仔，個樣都有啲似菲菲嘅，問佢用嚟代替咗菲菲好唔好？佢答我嗰個都唔係菲菲，不如叫佢豬豬啦，佢係爛瞓豬....講真我自己都唔係好捨得搵另一個公仔嚟代替菲菲，好似有咗感情咁，更何況菲菲係澄澄個女，佢點捨得唔要菲菲丫!

適當嘅鹽同醋

噙晚教訓過澄澄之後，今日澄澄乖咗好多，放工返屋企食飯嘅時候，佢一輪機關槍同我講要小心飲湯呀，唔好倒瀉呀...飲水都係呀...唔好做唔啱嘅嘢呀，會俾人話唔乖嫁...

之後又同我講噙日我喺床度賴尿，今日無喇... 睇電視嘅時候，佢聽到有人講傻仔同痴綫，即刻就同我報告話佢地講唔講得嘅說話!! 都算佢啦，仲記得乜嘢係唔可以講嘅...

最後仲好緊張話要收拾好玩具做功課。所以小朋友都係耐唔中要加啲鹽加啲醋教訓吓至會學乖!

誰人失控?

今晚要澄澄練習寫abc同數目字，教到我都有啲情緒失控。教小朋友真係要好好耐性，太嚴厲又怕佢會對學習失去咗興趣，太輕鬆佢又學習唔認真，搞到威迫利誘，軟硬兼施，樣樣都出齊...

一時意氣之下，我無理佢就去咗沖涼，澄澄就夠鐘食奶；點知佢突然大叫問姐姐我着咗片片未呀？原來佢上咗床食奶仲賴濕咗張床，佢仲好緊張同我報告話整濕咗條褲...真係激死!!!

都唔知係佢俾我鬧完，一時失控賴尿，定係佢真係矇矇地唔知道自己做緊乜？

倦極嘅澄澄

懇親會之後，約咗丁丁同洛程一齊去昂平坐纜車；原本洛程同澄澄都有啲驚，但係都懷著蠢蠢慾試嘅心態上咗纜車，仲不知幾興奮。
沿途又見到大佛，又見到飛機起飛，去到市集嘅時候，又有試食(蛋卷)，玩到樂而忘返，連回程嘅時候都仲講住話下次再去過，仲要坐纜車，之前嘅擅擅驚驚已經一掃而空，不過條件係要係原班人馬至肯去！

因為我地買嘅係連埋機場二號客運大樓嗰邊嘅4D影院、航空探知館同一啲免費嘅遊戲，所以對小朋友嚟講已經係好精彩，唯一我地都担心嘅係三個小朋友都唔敢又或者未去過戲院睇戲，所以唔知佢地會唔會喊又或者唔肯入去；最後一包爆谷就將佢地三個嘅心理障礙徵服咗，成套二十分鐘嘅魔塔之旅都睇晒，中間有啲水滴落嚟嘅動感效果佢地都無投訴過，真係好叻！

之後當然係玩佢地期待咗好耐嘅'碌ling'遊戲，反正啲代幣都係送嘅；唔覺唔覺都玩到差不多八點至食晚飯，散band嘅時候已經九點幾。上車一陣，澄澄已經好眼瞓，於是十分鐘就瞓着咗，一路到屋企為止；但係竟然喺呢個時候，搭緊lift上樓途中，澄澄忍唔住已經响lift入面整濕咗條褲，佢話真係好急喎... oh no!

沖過涼食過奶，差不多十一點幾，澄澄已經倦極入睡...我諗呢一日佢地都玩得好盡興，澄澄响機場準備走嘅時候，仲曾經話要去丁丁屋企再玩過，幾咁依依不捨!

二十一週年懇親會

澄澄今早一起床就嚷着要返學，可能有表演，所以佢好期待。前一晚我同佢採排嘅時候，佢竟然自我介紹我係C3A唔乖嘅王思澄！

今朝早帶佢返學校採排練習嘅時候，佢同老師都好合作，所以到佢嗰班出場表演嘅時候都做得幾好，幾乎整套動作都做晒。之後因為佢有參加興趣小組嘅爵士舞，所以又有份表演，但係佢已經唔係好肯跳，連佢嘅好朋友Jaycee叫佢跳，佢都係怕怕醜醜、扭扭擰擰咁企咗响度，有啲表演失準。
點知同佢報咗名表演背誦三字經嗰一個項目都怯場，氹咗佢一陣至背咗一首人之初，原本响屋企練習嘅時候，每次都背到九至十首，點知臨場不在狀態...唉!

又放假

聽日因為學校停電，所以放假一日，然後星期六係學校二十一週年嘅懇親會，所以星期一又休息一天，呢間學校真係多假期；連澄澄都學我講"side晒啲學費"!

今年懇親會我問澄澄想表演乜嘢，我特登唔問佢要唔要表演，怕佢會籍詞推搪，最後佢選擇咗念三字經。其實佢都有一段時間無再學，都係因為媽咪懶惰囉.... 點知一考佢，原來已經唔記得咗三成，即刻唔敢怠慢要幫佢操練番；好彩小朋友記性真係好啲，練咗兩次佢已經記返九成，希望到時佢唔會怕醜唔肯讀啦！

今日學校派咗本薄薄嘅英文書返嚟，我揭到書嘅最後一頁，有張紙仔用英文寫住如果小朋友能夠自己讀晒本書，就請家長响上面簽名交返學校，到時會有獎勵。於是我睇吓啲內容有幾難，想考驗吓澄澄...
"What's in this egg? A nose, a hand, a foot, a leg, a head, a monster"
我有啲意外澄澄竟然真係識讀，讀完仲催促我幫佢响書上面簽名。當佢讀"monster"個字嘅時候，仲發音得好好聽，我都有啲感動，澄澄真係長大緊！

依家佢已經係自己去peepee，除褲，搣紙巾，去完自己抹pat，倒尿尿，沖洗小馬桶，然後放返好再洗手抹手，一手包辦，唔使假手於人。

唯獨是食飯都仲係要姐姐餵，如果要佢自己食，兩三啖佢就停咗落嚟；有時我係怕佢食到飯餸都凍埋，所以都無硬性要佢自己食，所以我都有啲責任。真係好希望佢快啲學識自己食飯，唔好要人勞氣，呢樣係人人見到佢食飯都話怕怕嘅... 唉！

講真定假

今晚澄澄臨瞓前突然同我講，鄧老師、許老師同Miss Parri佢地話俾個玩具澄澄玩，叫我自己留响課室度，唔使驚...
我問澄澄點解要留响課室呀？澄澄話因為老師佢地要去買香蕉同提子...吓？
我開始有啲半信半疑，學校點會叫小朋友獨自留响課室呢？我同澄澄講真定假嫁？等我星期六返學校問吓老師先！於是澄澄話講吓咋???
我都唔知到底係老師同佢開玩笑講吓，定係佢同我講吓，如果係後者，咪即係澄澄自己作嘅抑或講大話？真係要返學校問過清楚...

種紅豆

澄澄今次係第二次帶植物返屋企種，第一次係三色花，可惜唔成功，一個星期就玩完；之後我幫佢再買一盆返屋企都係唔成功，可能因為屋苑做大維修，搭咗棚阻擋咗啲陽光入屋，所以種唔成。
上個月尾學校又派咗紅豆俾小朋友返屋企，要佢地學照顧植物；今次紅豆長得好快，三日已經高出咗個杯，我叫澄澄返學校問老師需唔需要幫豆豆轉盆，因為再長高就企唔穩。
第二日澄澄真係問完老師講返俾我聽，不過佢話唔使轉喎！咁點算好呢?

媽咪都唔記得細個嘅時候有無種過紅豆，就算有都唔記得點種，睇嚟要向公公請槍喇！

有辦法

澄澄近來好喜歡講"呀，有一個辦法...."
今晚食完飯同澄澄去咗超市逛咗一圈，見到有細細包嘅肚臍餅，於是買咗俾佢試吓。澄澄聽到個名咁得意就話"吓？咁搞笑嘅"，仲急不及待要食。
點知佢食完幾粒又幾粒，差唔多食奶嘅時候，我同佢講唔可以再食喇，因為已經九點，留返第二晚先食啦。
"咁幾時係第二晚呀?即係幾多點呀?"
等到第二晚我放工返嚟食完飯嘅時候啦，鐘鐘行完一個圈就係喇...
澄澄跟住就同我講"呀，有一個辦法，不如買個唔會郁嘅鐘吖"(真係虧佢想得到)
咁你想個鐘停响幾多點吖?
"十點"....十點已經瞓咗覺喎...
"九點"....九點要食奶喎...।
"八點"....停咗喺八點咪以後都無得食奶同瞓覺?...
最後澄澄俾媽咪搞到無辦法接落去，終於就無再扭計要食肚臍餅！哈哈!!

胆小如鼠

澄澄真係好細胆，有人鬧交佢會喊，去Disneyland嘅3D影院，聲量大啲佢又會喊；早幾日買咗隻崖上的波兒嘅DVD，諗住佢仲未敢入戲院，應該喺屋企睇都得掛，點知睇唔到十分鐘，佢睇到有一幕宗介用石頭打落個玻璃樽度救波兒出嚟，佢又話驚；事隔一個星期，我再跳咗一部份，諗住俾佢睇波兒見返宗介哥哥之後嘅故事，佢一樣係喊，因為佢見到波兒同宗介跳落水準備坐船去搵里莎，佢又話驚....真係無佢咁好氣，兩次加埋都睇唔夠十分鐘！

今日同佢去老人院探姑太，起初佢都話驚個地方唔俾小朋友去；後來同佢解釋醫院先唔俾小朋友去，因為果啲地方細菌好多，所以唔俾小朋友入去，怕佢地會染病；但係老人院就無問題啦，因為啲老人家無人照顧先至要去果度啫，講完佢至放心。點知佢見到姑太隔離坐咗個婆婆，可能佢係因為中風所以講唔到話，只識得依依吖吖，個咀仲有啲歪；澄澄見到佢响度叫，突然又喊，話要返屋企。

我同婆婆都解釋俾佢聽，個婆婆唔係鬧佢，只係佢自己控制唔到，唔識講嘢；如果澄澄喊反而會嚇親個婆婆，但係佢都係喊住話要走...都無佢乎。

澄澄講錯說話

澄澄近來講說話越嚟越粗魯，可能係同睇電視有關！

夜晚爸爸打電話返嚟要同澄澄講兩句，於是我pass個電話俾佢...爸爸可能問澄澄食咗飯未，澄澄竟然答梗係食咗啦，傻仔！

之後佢俾返個電話我聽，我以為佢聽到爸爸鬧，所以唔想聽，原來佢顧住玩唔得閑講。我之後講俾佢爸爸聽，爸爸梗係嬲啦，佢話一定會記住今晚俾個女話佢傻仔，好激氣。

於是佢要澄澄再聽佢講，今次可能係怪責佢；我見澄澄開始喊，喊到喘晒氣咁！都係時候要俾人教訓吓佢，因為佢近來實在有啲曳，教到有時我都無咗份耐性，始終得我一個人帶佢都真係會幾攰...

除此之外，爸爸仲話澄澄專係欺負嫲嫲，對佢又唔禮貌我都知有呢個問題；但係有時問題係雙方面嘅，一個放肆，一個縱容；我可以做嘅只係同澄澄講唔可以，但係有時連我自己都好激氣... 總之要教好一個小朋友真係唔容易!

澄澄打電話俾媽咪

呢兩日嫲嫲教識咗澄澄我個電話號碼，於是今晚我放工嘅時候，十分鐘佢就打咗五次電話俾我，仲响電話裡頭大聲咁朗讀我個電話'冧巴'，我叫佢唔好講喇，佢都唔聽！ 返到屋企姐姐同我講澄澄係自己攞起個電話打俾我嘅，以後我個電話就無得寧靜落嚟.....

其實我一向都唔讚成咁早俾佢知道屋企或者我地嘅手提電話號碼，同埋屋企地址；因為佢都仲細，無乜危機意識，萬一佢喺街度當唱歌咁唱，俾啲陌生人聽到就唔係幾好！

依家嫲嫲唔教都教咗，我唯有同佢講：唔可以响街上面亂講個電話號碼，會俾壞人偷聽到，然後講大話嚟呃我地；另外就係唔可以成日打電話俾我，因為我要返工，老闆會鬧嫁!

澄澄於是同我講，"老闆會問你係咪唔想返工呀？唔使揾錢呀?" 真係要學澄澄講番句"oh! dear me"!!!

轉變中嘅澄澄

澄澄近來開始有啲轉變，變得有啲頑皮，爬高爬低不再話下；今日老師仲話佢在校內踢其他小朋友，我問佢係唔係，佢仲同我講話唔係，連大話都講埋，真係激死！最後佢都承認咗踢過濤濤....

但係當我同佢講說話嘅時候，佢仲一啲悔意都無，好似唔驚咁！

下畫瞓覺嘅時候佢又扭計要帶埋架玩具手推車上床瞓，當然姐姐無容許佢咁做啦。

佢有時唔鍾意或者野蠻起嚟，仲會惡返轉頭大聲叫囂；好似上星期日我電咗髮，返嚟問佢認唔認得媽咪呀？佢望咗我一陣，特登話唔認得，仲好似唔滿意咁叫我剪晒佢！

可能佢近來睇電視睇得多，連講話都粗魯咗，動不動就話殺咗佢...都唔知點樣教返好佢！

澄澄點嚟?

自從我知道咗澄澄點解唔鍾意爸爸掂我、或者親近我，唯有想個辦法幫佢解開呢個結...

有個朝早佢望見電視前面一張爸爸搭住媽咪膊頭影嘅相，佢又同我講"如果我出咗世呢，我會推開爸爸嫁"！於是我同佢講"無爸爸就唔會有澄澄啦，剩係得媽咪一個生唔出澄澄喎，要爸爸幫手嫁"。講到呢度我都唔識得點樣再講落去，好彩澄澄已經唔再問落去。

點知佢好快就抱起菲菲話"爸爸幫我手生菲菲出嚟嫁"...(吓?唔係澄澄同爸爸喎???)

我問佢邊個爸爸呀?原來澄澄話"係菲菲個爸爸呀，佢喺印尼做嘢嫁"！佢所講嘅並唔係澄澄自己嘅爸爸，而係佢幻想出嚟嘅人物，但係佢好清楚知道嗰個即係佢老公噃！因為佢識得教菲菲叫我做婆婆，叫Eric做公公...真係救命呀!