澄澄仲記得噙晚嘅事

今朝澄澄一起身第一句就問我噙晚點解媽咪唔幫我擦牙？我好意外佢醒咗第一件事就問返我噙晚嘅嘢，我照樣同佢講返，因為佢曳唔聽話，不過我亦都讚返佢原來澄澄已經大個女識得做好多嘢，自己塗牙膏、擦牙、洗面、痾vivi、着尿片、着褲。於是今朝起身佢又要自己擦牙，唔使姐姐幫手，亦唔俾佢企喺度睇，後來我同佢講姐姐睇吓你係咪真係咁叻嘛，佢至肯叫姐姐睇佢擦牙、洗面。

今日澄澄學校派返呢一個月學過嘅書簿同習作返屋企，原來澄澄已經學咗好多個字，例如眼、耳、口、鼻、手、腳、日、月、星、風、雨、雲、屋、門、爸、媽；當我問佢嘅時候佢都識讀，不過可能佢係睇到副圖畫，所以講得出個字。之後我又幫佢溫習返其他科目，有普通話、數學、英文同唱遊。然後再做埋功課，咁聽日就可以安安樂樂去學校搞嘅旅行喇！