悠長假期

三月十三日 星期四
因為流感响學校內傳播有上升趨勢，教統局終於宣佈全港小學、幼稚園及特殊學校都即時停課，提早放復活節假。於是我將呢個消息講俾澄澄聽，佢第一個反應問我：
澄澄：唔使返學呀？
媽咪：係呀，無得返呀。
澄澄：咁澄澄同媽媽、同姐姐去婆婆、公公度。
媽咪：但係媽媽要返工喎，無假放。
澄澄：唔返工老闆會鬧，無錢俾你呀？(平時返工佢唔想我走，我都係用呢個籍口)
媽咪：係呀。
澄澄：Kiss媽媽，拜拜......
(呢個小鬼竟然比平時仲易話為，全因為突如其來嘅假期唔使返學，就連我唔可以响屋企陪佢都無所謂，激死！)