別了！悠長假期

三月二十四日 星期一

一連幾日嘅復活節假期對澄澄嚟講可能無乜唔同，反正每次爸爸由印尼返嚟，就係變得好忙，平日建立咗嘅作息飲食時間都好難如常運作。

假期嘅第一日返咗大角咀同婆婆飲茶，講起都已經好耐無去飲茶，因為怕公衆場所人流多，空氣唔流通容易傳播細菌。可能因為耐無飲茶，澄澄好好胃口，食咗個半义燒飽，同個半旦撻。跟住下晝瞓咗兩個半鐘午睡，夜晚再食咗一碗大飯、半碗湯，都只係半個鐘頭，算好叻啦！

星期六Eric約咗兩個舊同事飲茶，澄澄今日嘅表現就無咁好，做咗喊包。爸爸因為想將澄澄嘅一舉一動或者一啲有趣嘅成長點滴留作日後回憶，终於買咗部camcorder。

星期日去咗探表妹子君，之後去咗赤柱食晏。席間爸爸因為澄澄'洩洩'，碌到對眼好大望住澄澄，澄澄即時淚如泉湧，之後仲嬲咗爸爸，唔肯睬佢同唔望佢，呢次係澄澄嘅第一次'嬲人'。原來小鬼已經漸漸長大，有自已嘅情感世界。夜晚爸爸就同澄澄玩茶客嘅遊戲，拍咗第一個有趣嘅video。

今日輪到媽媽約咗佢嘅一班舊同學，有班小朋友一齊去咗白石燒烤場BBQ，成班小鬼都玩得好開心。最遺憾就係無個啲家庭單車出租，如果唔係一個family租一部齊齊玩都係一件賞心樂事。

四日假期咁就過咗，唔知對澄澄有乜特殊意義，但係對爸爸媽媽嚟講，除咗身心俱疲之外，就係可以親身感受到自己個女在成長中，好想珍惜每一分每一秒共處嘅時間。正因為咁，媽媽有時都會諗如果我無做嘢，就唔會miss咗呢一切，但係我地都要為將來做好準備，只好暫時犧牲一下，所以做人有時就係好茅盾！