小糾察

澄澄越嚟越似一個小糾察隊，經常捉挾爸爸媽媽一啲唔應該講嘅、或者錯嘅行為。媽媽因為有句口头禅'痴綫'經常衝口而出，所以同澄澄講呢句話係唔可以講，於是每次當我一講，澄澄就會問'媽媽你講乜嘢呀?' 百發百中，絕對無走鷄。

又有一次媽媽响紅燈嘅時候過馬路，佢就同爸爸講話媽媽唔停响度，媽媽雖然聽到佢打小報告，不過無即時回應佢。后來去度婆婆屋企樓下入咗lift，澄澄繼續質問媽媽剛才紅燈過馬路，於是我想反駁話無喎，好似係綠燈喎，佢好認真咁話：係紅燈呀！媽媽唯有投降，講對唔住，然後問佢咁應該點呀？澄澄就指著媽媽話 'stop'! 真係醒呀。

夜晚臨食飯嘅時候，婆婆攞咗盒燒煵仔出嚟，媽媽因為一時為食，無用筷子或者牙簽就隨手攞起一塊嚟食，點知俾澄澄見到，佢即時大叫'咁汚漕，唔用牙簽!' 媽媽即時又要認錯，真係唔知好嬲定好笑....

廸士尼之旅

三月二十九日 星期六


一連兩日，澄澄同爸爸媽媽去咗廸士尼玩。响佢兩歲嘅時候曾經去過海洋公園，嗰次佢都玩得幾開心，所以無諗過佢今次反而有好多嘢唔敢玩、唔鍾意玩，特別係一啲室內嘅遊樂區，燈光比較昏暗嘅，佢就喊哂口，好淒涼！


澄澄最鍾意玩嘅就係璇轉木馬、咖啡杯、小飛象、飛碟等等嘅電動遊戲機。仲同好多卡通人物影相，除咗Groofy，因為佢有鬍鬚所以點都唔肯同佢影相。


當我地問佢仲要唔要再嚟Disneyland玩，佢都唔見得好雀躍，或者對佢嚟講仲係細咗啲，無乜興趣。反而對啲勁歌熱舞仲有反應，一直跳過唔停。

別了！悠長假期

三月二十四日 星期一

一連幾日嘅復活節假期對澄澄嚟講可能無乜唔同，反正每次爸爸由印尼返嚟，就係變得好忙，平日建立咗嘅作息飲食時間都好難如常運作。

假期嘅第一日返咗大角咀同婆婆飲茶，講起都已經好耐無去飲茶，因為怕公衆場所人流多，空氣唔流通容易傳播細菌。可能因為耐無飲茶，澄澄好好胃口，食咗個半义燒飽，同個半旦撻。跟住下晝瞓咗兩個半鐘午睡，夜晚再食咗一碗大飯、半碗湯，都只係半個鐘頭，算好叻啦！

星期六Eric約咗兩個舊同事飲茶，澄澄今日嘅表現就無咁好，做咗喊包。爸爸因為想將澄澄嘅一舉一動或者一啲有趣嘅成長點滴留作日後回憶，终於買咗部camcorder。

星期日去咗探表妹子君，之後去咗赤柱食晏。席間爸爸因為澄澄'洩洩'，碌到對眼好大望住澄澄，澄澄即時淚如泉湧，之後仲嬲咗爸爸，唔肯睬佢同唔望佢，呢次係澄澄嘅第一次'嬲人'。原來小鬼已經漸漸長大，有自已嘅情感世界。夜晚爸爸就同澄澄玩茶客嘅遊戲，拍咗第一個有趣嘅video。

今日輪到媽媽約咗佢嘅一班舊同學，有班小朋友一齊去咗白石燒烤場BBQ，成班小鬼都玩得好開心。最遺憾就係無個啲家庭單車出租，如果唔係一個family租一部齊齊玩都係一件賞心樂事。

四日假期咁就過咗，唔知對澄澄有乜特殊意義，但係對爸爸媽媽嚟講，除咗身心俱疲之外，就係可以親身感受到自己個女在成長中，好想珍惜每一分每一秒共處嘅時間。正因為咁，媽媽有時都會諗如果我無做嘢，就唔會miss咗呢一切，但係我地都要為將來做好準備，只好暫時犧牲一下，所以做人有時就係好茅盾！

心思思有件事？

三月十六日 星期日

澄澄今早一起身就話要去婆婆度，因為平時佢慣咗每個禮拜都返婆婆度，但係因為近日流感，當諗到路途遙遠，要困响車廂裡面大半個鐘，心理上覺得唔係好衛生，因為咁樣惹到細菌就唔抵啦。於是我同佢講

媽咪：等我上網check吓近日嘅流感數字先，如果無增加就去啦 (.....但係媽媽check唔到邊度有呢個update)
澄澄：check完去婆婆度呀？
媽咪：媽媽揾唔到呀，不如打個電話俾婆婆先啦.... (咁啱電話又無人聽)，婆婆唔係屋企喎？
澄澄：咁舅父呢？'飛飛' (正確係輝輝)呢？
媽咪：都唔係度喎，無人聽電話！不如等下個禮拜爸爸返嚟先去啦，好遠呀
澄澄：好遠呀？搭116啦！

其實平時都係搭港鐵，甚少坐巴士，就算係都102啦，澄澄講116係因為116巴士總站响屋企附近。可能因為最近兩星期佢都無返婆婆度，又屈咗幾日無出街，所以我見樓下公園無乜人玩，就同澄澄講話同佢出去打佢最鍾意嘅韆鞦啦，算係幫佢止吓舖去街癮。佢一聽到呢個消息，就跑咗去門口度，好興奮咁大叫'打韆鞦、打韆鞦'！

悠長假期

三月十三日 星期四
因為流感响學校內傳播有上升趨勢，教統局終於宣佈全港小學、幼稚園及特殊學校都即時停課，提早放復活節假。於是我將呢個消息講俾澄澄聽，佢第一個反應問我：
澄澄：唔使返學呀？
媽咪：係呀，無得返呀。
澄澄：咁澄澄同媽媽、同姐姐去婆婆、公公度。
媽咪：但係媽媽要返工喎，無假放。
澄澄：唔返工老闆會鬧，無錢俾你呀？(平時返工佢唔想我走，我都係用呢個籍口)
媽咪：係呀。
澄澄：Kiss媽媽，拜拜......
(呢個小鬼竟然比平時仲易話為，全因為突如其來嘅假期唔使返學，就連我唔可以响屋企陪佢都無所謂，激死！)

我要靚靚

三月十一日 星期二
今朝返工前一時興起塗了少許防晒粉上面，平時我都好少會用，澄澄更加無見過，所以佢好好奇就問我：
澄：媽咪，你做咩呀？
媽：媽咪扮靚靚囉！
澄：媽咪買個俾澄澄扮靚啦！好唔好？
媽：哦....
果然愛美係人嘅天性，一個卄六個月大嘅小鬼都知道要靚！？