夢寐以求的廸士尼之旅

澄澄自從知道約咗洛程同丁丁去廸士尼之後，經常問我幾時去呀？

終於等到七月二十八日呢個日子，雖然天氣有啲熱，但係小鬼們都玩得不亦樂乎；幾乎個個遊戲都重複玩完又玩，例牌節目如咖啡杯、璇轉木馬更加玩極都唔厭！

最辛苦嘅當然係小鬼們嘅爸爸媽媽，簡直係亞四咁，斟茶遞水，抹汗撥涼，仲要幫手排隊等佢地同Cinderella, Belle, Snow White等公主們影相；啲汗水由面就濕到落底，之後濕完又乾，乾完又濕過...

結果由十二點開始就玩到夜晚放完煙花至走，連晏覺都唔使瞓；但係當各自歸家嘅時候，澄澄搭咗一個站就已經頂唔順，要我抱佢瞓覺；一瞓就瞓足一程車，臨落車嘅時候仲叫極都唔願起身，好彩啲人見我抱住個女都肯讓個位俾我坐...

不過今次澄澄已經有好大進步，玩巴斯光年嘅時候只係排隊嘅時候喊住話要等埋丁丁，之後佢都肯玩，無再好似上次咁喊足全程；坐Pooh Pooh車亦都無問題，其實都係因為唔衰得嘅關係。

其實今次都唔係我地第一次去廸士尼，但係就有個共通點，就係我地全部人都係第一次去米奇大屋搵Mickey同Minnie影相，總括而言，都係一次難忘之旅。

課外活動之一...游(玩)水

可能因為天氣太悶熱嘅關係，學校都專程安排咗一次水上活動俾小朋友，仲吩咐小朋友可以帶備水槍；我都特登幫澄澄準備咗一支，等佢enjoy吓游水嘅樂趣。

可能係爸爸返嚟之後帶澄澄游過兩次水，所以澄澄呢次表現得都唔錯，連老師都讚佢比預期中大胆。因為之前見家長我都有提過想幫澄澄報名參加學校暑期嘅游水活動，但係澄澄唔想參加，當時老師仲幫手鼓勵澄澄；所以老師都以為澄澄會喊或者要擾攘一輪至肯落水，結果係佢玩得好開心，就算有人唔小心整濕佢，佢都無喊；就憑住對水袖，佢都可以自己游出中間，唔會再攬到你實一實唔放，真係有啲意外！

乘數表

我諗返起澄澄細個嘅時候，我响佢臨瞓前會同佢念ABC，佢好快就會學識；於是我又開始返呢個習慣，不過今次教佢嘅係念乘數表。第一晚教佢一字訣，即刻一一如一、一二如二....，只係讀咗兩次，佢就已經入咗腦，好快喎，於是我再教佢二字訣。



因為有啲唔同，所以澄澄只係可以一次過記到五，但係都只係同佢念咗兩三次佢就學識咗。其實利用臨瞓前嘅時間教佢一啲新嘅嘢係幾湊效，可能因為熄咗燈，只係用腦去思想，學習會變得較為習中。


其實我都只係想佢學咗個口訣，將來真係學嘅時候會相對易掌握。

九號風球

星期六趁爸爸返咗嚟去咗廣州探George表伯，但係因為作打風嘅關係，天氣非常悶熱；澄澄玩咗一陣電動車之後已經'吽'晒，面仔紅卜卜咁，真係有種焗到抖唔到氣嘅感覺。

到黃昏時候，突然天色一變，成個天好似就快跌落嚟咁，不過就未有雨。我地响廣州都可以感受到呢個風响香港一定好犀利.....

澄澄自懂性以來，呢個九號風球可能係佢第一次親身體驗，不過因為我地都留返响屋裡面，所以佢唔係太驚！

貪靚鬼澄澄

澄澄好早就會自己簡鍾意嘅衫或者裙嚟着，有時明明我已經幫佢搵咗啲衫出嚟，叫佢着去返學，佢之後都會自己再簡過。我都試過同佢講唔可以簡衫着，因為媽咪買嘅時候，都係因為靚至會買，如果澄澄唔肯着就會浪費咗條裙...

但係澄澄一於好少理，依然我行我素，一係就要我迫佢至肯着。直到有一次同佢講一個故事，有個小女孩好鍾意着某一對鞋，婆婆同佢講去教堂嘅時候係唔可以着架，但係佢都唔聽；終於有一日有個神仙向佢施法，令到佢無辦法再除低對鞋，仲要佢一直咁跳舞，跳到攰死為止。雖然個結果有啲過份，但係就對澄澄起到阻嚇作用！

澄澄聽完個故事都有唔開心，仲喊起上嚟...最近佢又簡裙着，於是我同佢提返起呢個故事，佢即刻就話唔好，今日佢鍾意肯着我簡俾佢嗰條裙...唉，有時候都要使出一啲非常手段，至可以令佢聽話！

學校復課了

澄澄期待學校復課嘅日子終於到喇，前一晚澄澄仲話好掛住啲同學仔呀！

雖然只係返學返個半鐘，不過都好過成個暑假喺度玩。起碼學校有溫習功課嘅時候，又有遊戲同課外活動，都算多元化，放學之後仲可以食埋飯至返屋企，都幾好。完咗學校嘅summer course，就輪到英文同普通話班，都可以增值吓。

澄澄仲好期待個芭蕾舞班，如果一早知道學校嘅Jazz class提早完成，咁就唔使等到八月至開始，連Annual Performance都可以參加到！

嚟緊嘅月尾仲會同丁丁同洛程一齊去Disneyland，然後同公公婆婆去長隆渡假村，呢個假期都算唔錯啦！

媽咪嘅日子

星期日我嘅一班同學幫我慶祝生日，其間Irene姨姨問澄澄知唔知媽咪幾時生日，澄澄梗唔知啦，因為我都無特別同佢講，反而洛程就講啱咗喇！

所以嗰朝早我叫澄澄畫張生日咭送俾我先，佢都好樂意。之後佢仲送咗份'大禮'俾我，就係熱辣辣嘅'豆腐花'；因為朝早飲完奶之後同佢坐巴士去搵公公婆婆飲茶，結果佢頂唔順，我正打算早一兩個站落車，佢都等唔到，一邊落車，一邊成支奶嘔出嚟，搞到我條褲都濕咗....唉! 好鬼狼狽。

之後我地同佢去咗廸欣湖踩單車；沿途經過Disneyland，佢仲好興奮以為我地會入去玩。好彩佢無扭計一定要去...

澄澄仲係第一次除咗對鞋行去個小小噴水池入面，其實佢係有啲驚，不過佢見我玩，同埋又讚佢大個咗，連草地都夠胆行喇，所以佢唯有頂硬上入去行個圈交差。

對上一次嚟係佢一歲左右，果陣佢死都唔肯企响草地上面，依家佢又怕水會整濕佢，但係呢日佢都戰勝咗自己，肯行出佢嘅第一步...

回程嘅時候，佢已經好眼瞓，但係又硬頸唔肯瞓；結果返到婆婆屋企，我同佢就倒頭大睡喇！夜晚食完飯，就輪到佢幫我吹蠟燭，食佢簡俾我嘅生日蛋糕；所以我嘅生日又變成佢嘅日子！

性急嘅澄澄

今朝早七點四個字，澄澄就起身等住去海洋公園。其實之前我已經同佢講如果落雨就唔去得喇，可能係咁，所以佢好緊張今日有無落雨，結果又幾好天，但係姑丈話今朝九點就會打電話嚟再決定去唔去。所以澄澄一直係度等電話，又問我去得未？直到姑姐打電話嚟話去啦，不過要等君君食完奶，大約十點出發，於是澄澄又繼續等，期間不停咁問我去得未，一直到我出咗去做物理治療至可以耳根清靜一下。好唔容易至等到十一點幾，姑姐終於話嚟緊接我地；呢個時候開始有雨，仲越落越密，間中仲有一兩吓雷聲；我地曾經講笑話不如唔好去，澄澄即刻話落雨都去得嫁，連雷聲都唔驚喇！

結果全日都係着住件雨褸嚟玩，最狼狽就係响海洋劇場睇表演嘅時候，又顧住食嘢，又睇表演，仲要忽然一大片黑雲剎到，顧得擋雨，又顧唔到啲嘢食，真係狼狽到暈！

澄澄原來最鍾意嘅就係搭纜車，好唔耐煩咁催促我地，唔想留低响熊貓館同睇金魚嘅地方。最後唯有搭纜車過去睇海洋劇場。澄澄今次比起年多前果次有進步，全日都係自己行，除咗人多嘅地方我抱咗佢一陣；第二就係佢唔怕啲魚喇，夠胆企近個玻璃，當有魚游埋嚟嘅時候，仲用手掂個窗；有啲遊戲係只可以澄澄自己一個玩同排隊，佢都做得到；唯獨是有個踫踫船嘅遊戲，有個哥哥排响佢前面嘅，見澄澄企前過佢又企咗响另一邊，於是哥哥拍咗澄澄幾吓膊頭，然後問澄澄係咪打尖，佢就放聲大喊，結果唔玩就走返出嚟！其實就算無發生呢件事我都唔信佢玩得到，因為佢又怕水，如果玩緊嘅時候有人撞到佢隻船，佢實驚話唔玩...

臨走嘅時候終於落場大雨，每個人都濕咗一半，澄澄一啲都唔覺有問題，仲問我幾時再去海洋公園！

浪卡到訪!

踏入夏季，亦即是颱風嘅季節；今年第一個颱風浪卡到訪，就令到澄澄滿懷希望、準備去海洋公園嘅夢想破滅咗，好可憐呀！

我原本都打算六月帶澄澄去Ocean Park玩返次，點知一係就好熱，完全唔適宜戶外活動；一係就流感當道，再唔係就打風落雨，真係福無從至、禍不單行。唔通要豁出去，坐言起行？

澄澄為咗要去海洋公園，好努力學乖，因為我要佢儲夠三十個貼紙先可以去；要有貼紙就要佢perform 得好，無扭計至有，當然我好多時都唔會刻扣佢嘅貼紙嘅，只要佢唔係特別曳、唔聽話。

其實如果聽日唔係太大雨，我都會同佢去嘅，等佢了咗件心事.....話晒放咁耐假要留佢响屋企又都幾悶嘅！

暑期活動要改期了...

今日我打咗電話返澄澄學校，問老師關於學校停課安排，剛啱學校今早開完會，所以我得到第一手資料。

澄澄嘅老師話由下個月十號開始學校會有活動俾小朋友參加，為期三個星期，每日一小時，費用全免；而六月份因為澄澄交了膳食費，所以可以在活動完後再食埋飯。我諗呢個安排係想幫家長舒緩一下突如奇來嘅停課，令好多家長唔知點幫小朋友打發時間，其次亦令家長們覺得七月份嘅學費無蝕咁多；所以我即時答覆咗老師會俾澄澄參加。

至於學校原定開設嘅暑假活動，就會延遲到八月尾嘅下午時份進行，即係澄澄報咗名嘅游水班都會改期。呢個改動我就有啲保留，須要再考慮，因為有可能撞咗澄澄嘅午睡時間；不過我地仲有時間去考慮，因為呢個都係學校初步嘅構思，到決定咗就會打電話徵詢家長意見。

我對學校今次嘅安排都好滿意，因為真係無諗到突然間會有成兩個月嘅暑假，仲要今年無打算去印尼，想留返香港學嘢充實吓。如果所有活動都停晒，日子真係會變得百無聊賴，我亦都請唔到咁多假陪澄澄；不過就真係要做好衛生嘅防護，要帶mask同勤洗手...