扁桃腺發炎

噙日澄澄終於都返唔到學要留响屋企休息一天，因為朝早起身摸佢嘅額頭同手掌都有啲燙手，體溫38.3-38.8C，而且已經食過好幾次退燒藥都唔見佢完全退燒，所以我都臨時請假留响屋企照顧佢。

一早起身我就煲咗啲藥草俾佢飲，主要幫佢降溫；見佢精神都唔錯，又無喉嚨痛，所以無即時帶佢睇醫生，因為退燒藥都只係得一種，而屋企都有存貨...但係到晏晝食完粥，再摸吓佢越嚟越熱，一探仲39.7-40.2C，真係有啲嚇親，於是即刻帶佢去睇醫生，Dr.話佢扁桃腺兩邊都有啲腫，可能未痛出嚟，所以佢無覺得唔舒服，結果要食抗生素....唔知係咪啲藥重，食完係無咁高燒，不過就不停留汗，就算佢坐定定唔郁，都不斷標汗，連汗衫都濕埋。

到瞓晏覺嘅時候，連佢個枕頭仔都濕晒，我仲以為佢賴濕床，原來係佢頭汗水，真係誇張! 有人話係啲藥太散，雖然我唔係好知點解，但係咁出汗法，唔多唔少都會令到個人脫水，唔係好事，不過都無辦法，總好過燒壞腦...

夜晚開始見佢有好轉，無乜燒，胃口仲比下晝好，食到碗幾通心粉，可能同肚餓有關?! 起碼可以放下心頭大石....點知到半夜四點佢又再有返少少燒，結果半夜都要搞醒佢起身食藥，真可憐，最慘係瞓到佢成身濕晒，由底到面，不過實在唔忍心再整醒佢，唯有幫佢墊條毛巾隔開件"濕"底衫。

好彩今朝起身終於退晒燒，佢仲好想返學，因為好朋友返埋呢個星期就走喇，於是講講吓佢仲聲淚俱下，好可憐嘅小寶....於是今日澄澄帶住口罩都要返學!

下晝我打電話問佢仲有無燒，佢探咗幾次都話係35點幾度，搞到我半信半疑，不過平時佢都識得幫自己探熱，所以唔應該質疑佢嘅能力嘅，最後求証埋姐姐都話無燒，我就安心喇! 放工返嚟見到佢，忽然一陣心酸，我寧願自己病都好過係佢；佢仲叫我坐底先，然後攞杯水俾我飲，真係感動。

夜晚終於見佢生猛番晒，又叫又跳，又唱國歌，希望佢真係好返，然後至可以幫佢調理返好個身體，做個健康嘅小寶。

陌生人電話?

今日澄澄突然打電話俾我，問我如果有人打嚟問佢"媽咪個電話號碼幾號，我就會話唔係好清楚喎!" 我問佢係咪有人打嚟搵我呀？佢答我話"唔係，我只係話如果啫；我唔會講俾人聽嘅，如果唔係就會有壞人呃你，然後捉咗你..."

其實係我好耐以前教過佢嘅，因為嗰陣(大約三歲左右)佢開始背我嘅電話號碼，我怕佢响街上面亂咁講闖出禍，所以我將個後果嘅嚴重性講俾佢聽，要佢好好記住，估唔到事隔咁耐，佢都有記起心裡面，真好!

晒親定發燒??

噙日天氣回暖又有陽光，於是同澄澄去咗鰂魚涌公園玩佢最鍾意嘅韆鞦。咁啱佢又撞倒同班嘅朋友仔鄧海攸，起初人地叫佢一齊玩佢都唔係好想，後尾佢就跟到實一實，人去邊佢又去邊。

攸攸因為年紀比 澄澄大，所以爬高爬低嘅都難佢唔倒，相反澄澄就無胆玩喇!

玩咗一個鐘實在太晒工都不宜久留，之後去咗姑媽屋企食飯；之後如常瞓晏覺，直到夜晚同表姨食飯。澄澄對上一次見表姨已經係兩年幾前，所以初初見到佢都係慣常嘅表現...怕醜! 之後食飯佢已經唔再驚，仲叫表姨食完飯上我地度玩Wii。

一整晚都唔覺澄澄有乜異樣，係好間中聽佢咳一兩聲，點知今朝起身摸摸佢額頭有微微嘅熱，但係探熱都係37.5至38左右，唔算發燒，所以都照俾佢返學；到放學嘅時候，再叫佢探吓熱，已經38.3、4左右，於是吩咐姐姐俾佢食定退燒藥。一路到我放工返嚟，佢都係有啲熱，但係又一頭汗，都唔知無端端點解會發燒，唔通噙日晒過頭，無散熱? 希望佢聽朝瞓醒無事....

影宣傳相

上次澄澄參加完小小Model選舉之後，得獎就會被挑選去幫學校影一輯宣傳相；而今日就上咗studio影相，我除咗幫佢換好跳舞衣同梳頭之外，跟住就交俾學校同佢化妝，然後影相，為時三個鐘。一開始澄澄都有啲驚，唔想影，後來知道有得化妝，於是我話唔好影佢都唔肯。

趁佢影相之際，我去咗皓皓屋企參觀吓，間屋面積雖然細，但係同樣好見地方用。最重要係有個超正景觀，有小小海景之餘仲可以睇到煙花添，間屋一樣開揚。同噙日睇過嘅除咗面積大少有異，公屋同私人樓分別之外，影觀一啲都唔會輸蝕，其實講到尾都係最緊要住得舒服啫!

夠鐘去接返澄澄，原來除咗佢地果一輪，仲有第二輪大個小小嘅都係影相；响我未到嘅時候，澄澄乖乖咁喺間房度等我，亦都無驚，已經係一大進步! 讚

參觀豪宅

朋友仔丁丁最近搬咗去烏溪沙銀湖天峰，於是今日我地去咗探訪佢嘅新居。可能因為Idy、William都係設計出身，所以間屋嘅色調好舒服，加上露台望到少少海景，又夠開揚，整體感覺好自在，難怪佢地話唔捨得賣返出去....

依家嘅新樓全部都會有齊會所、康樂設施嘅配套，所以house-warming party可以分別娛樂大人同小朋友。大朋友就攻打四方城，小朋友就落會所玩，各自各精彩!

夜晚仲book咗BBQ場燒烤，有水有爐，有張長餐枱，好有布吉feel；難得連天氣都唔太熱，真係好"正"。班細嘅醫飽個肚就走晒去會所再玩過，簡直樂而忘反。

不過唔知點解，三個小鬼開始玩分化，得三個人都要話唔同其中一個玩，真係煩! 澄澄雖然唔係講果個，但係佢就好易俾人擺佈；日頭就孖住丁丁攬頭攬頸，到走嘅時候因為我地跟洛程架車，於是佢又同人好friend咁，真過份!好彩小朋友都係唔記仇啫，之後澄澄仲相約佢地下次嚟我地屋企玩Wii呢!

澄澄同爹啲媽咪嘅Wii

澄澄每次去Carmen姐姐屋企都會玩Wii，佢第一次接觸Wii可能係三歲半左右，嗰陣我都無玩，所以無乜興趣；直到上次復活節我玩過打網球嘅遊戲之後，就愛上咗呢部機! 原本爸爸上次都問澄澄買部返屋企好唔好，點知澄澄話唔好，因為佢想去Carmen屋企同Carmen一齊玩!

反而我就心思思，終於最近响Jusco見有discount，就買咗返屋企；剩係砌部機(主要係connect去部電視同set up)都搞咗我兩個鐘，無辦法因為屋企少咗個男人就要親力親為啦! 澄澄一邊好心急想玩，但係佢又知道唔可以催促我；砌好之後，澄澄當然急不及待要玩啦，佢最想玩就係踩單車同劍擊，幾乎肉緊到打埋部電視機度；玩咗一陣，我叫佢去瞓晏覺休息吓，好在佢都肯聽，可以好刻制自己，無話玩到唔願停...

之後夜晚同姑媽、姑姐佢地一齊去咗Outback据扒，因為今日係姑媽生日。 食完澄澄想叫姑媽上我地度玩Wii，不過因為已經九點幾，所以無玩到。我都同佢約法三章，只係會週末或放假嘅時候至可以玩，平時要專心讀書返學，佢都應承我，呢個女都算係咁啦!  讚!!!

其實除咗玩之外，我亦希望佢要謹記樣樣事都唔好怕輸，呢個道理我地由細到大都有提住佢，佢亦無令我地失望，不過有時候佢都會唔忿氣要求輸咗再玩，始終佢都係個四歲嘅小寶寶啫。

近日我好鍾意叫佢做小寶，佢都好鍾意我咁叫，不過佢強調唔要做韋小寶就得喇!

好窩心嘅小鬼

澄澄把口有時真係好似佢爸爸咁口甜舌滑。因為我膊頭長期勞損，依家要做物理治療嚟舒緩痛楚，有一次澄澄見我睇完醫生返嚟，於是問我醫生點講呀? 我話醫生叫我試吓做針灸，可能會見效啲；正當我想同佢講解咩嘢係針灸，點知佢即刻就意識到佢曾經睇宮心計見過劉三好俾人幫佢施針救返佢隻手，所以佢估計會好痛，於是好驚咁同我講，叫我唔好做呀，我唔想你痛呀! 我聽到之後好感動，亦好驚歎佢連咁耐嘅電視劇都仲記住...

有一次同佢去Jusco買咗一條十二卷庄嘅厠紙，佢係要搶住幫我拎，佢話唔想我咁辛苦，要幫手拎一啲嘢；結果我要再攞另一樣嘢叫佢幫手，佢至肯交俾我拎。一路行佢仲同我講，我地行快啲返屋企，咁你咪可以休息囉!

又有一晚我放工返到屋企，佢叫我坐低啦，然後攞咗杯水俾我叫我飲，又問我返工辛唔辛苦呀? 原來佢係响普通話堂學返嚟嘅....

不過有時佢都會令你好激氣，但係美好嘅回憶同時刻係多於一齊嘅。

暢遊海洋公園

星期日同表弟皓皓約定去海洋公園玩，好在天氣都唔錯，因為前一日仲落緊雨，估唔到星期日又無雨喎，不過朝早都有啲濕立立嘅感覺。

首先喺金鐘嘅名都飲茶當早餐，之後至出發，去到已經十一點幾，因為搭巴士由集古村果邊入(平時多數坐潘潘姑長車就由正門入)，所以都唔係好知應該點樣行先至啱!

結果第一站係睇海獅、海豹，澄澄本來話餵海獅，點知當工作人員叫佢開始洗手同將啲魚遞俾佢，叫佢掉出去餵海獅，佢就驚到喊；可能因為佢由細到大都無接觸過真嘅魚，就算上次返大陸去海產市場佢都一樣步步為營...呢個女真係太細胆，可能似我細個嘅時候?!

沿途經過啱我地大人玩嘅過山車、滑水天梯都無玩到，唔知係咪因為有個女，寧願陪個女排隊玩璇轉木馬、摩天輪，自己唔玩都無乜所謂。轉眼已經一點幾，小朋友夠鐘醫肚，於是去咗個嵐灣茶座食lunch。

醫完肚就搭澄澄最鍾意嘅纜車，但係原來Mandy舅母就最驚坐纜車....

返過正門果邊，有澄澄鍾意嘅木馬、小火車、摩天輪，之後又去咗威威劇場睇表演，其實澄澄唔係好想睇，因為有佢最怕嘅小丑，不過最後佢都坐到完場為止，反而表弟就驚，尾段已經出咗去!

終於我地仲睇埋海洋錧至走，其間我地見到有個二十幾歲嘅女仔徒手攞起一條魚嚟影相，之後有個工作人員行埋嚟同佢講唔可以，於是個女仔影完相之後放低咗條魚，就行埋去個工作人員度，睇佢個工作証叫咩名，有途人都覺得睇唔過眼；係佢自已做錯，仲好似要擇低人地個名咁。雖然婆婆話佢係內地自由行，但係我跟响佢後面，完全聽唔出佢有鄉音，打扮亦同時下嘅香港年青人無分別，如果此人真係香港人，就真係失禮鄉親， 連澄澄都識得講佢咁樣係唔啱嘅!

Jaycee 同 Heidi 到訪

今個假期Jaycee同Heidi要準備收拾行裝準備移民，所以輪到佢地兩姊妹過嚟我地屋企玩。澄澄當然好開心，但係相反Jaycee就無澄澄咁熱情；有時仲會同妹妹講唔好同思澄玩，於是乎澄澄又喊。我都明白Jaycee咁講會好hurt澄澄心，但係細路仔童言無忌，有時都好難控制!不過幾個女仔都玩得好開心...

Heidi因為細個，所以唔係樣樣都一齊玩，不過都自得其樂；佢叫我嘅時候，經常漏講王思澄三個字，只係叫我做媽咪，好可愛!

三個都算玩得好開心，仲話下次再玩過，不過仲有一個月，Jaycee佢地已經要走，怕且都無乜機會，除咗返學嘅時候!希望佢地將來仲可以保持聯絡，記住呢個兒時嘅玩伴，話晒Jaycee都係澄澄第一個好朋友。

復活節回鄉渡假

復活節一家大細回鄉探親兼放假，澄澄自從上次同詩詩表姐玩過之後，口裡面經常話掛住詩詩表姐。今次返到去，玩唔夠幾個鐘，已經熟落晒，夜晚食飯嘅時候，佢仲忍唔住要攬住表姐話我最鍾意係你....@#$%

第二日舅父帶我地去咗長鹿公園，裡面有好多機動遊戲同水上活動，例如坐船仔都有好幾款，但係澄澄偏偏怕水，乜都唔肯玩，激死人!反而年紀比較細嘅表弟表妹仲夠胆玩...

第三日舅母帶我地去擇士多啤梨，澄澄起初都唔肯落塊田度，因為佢怕污糟，雖然有水鞋，但係因為之前落過雨，所以滿地泥濘；最後佢都有落田，仲叻到唔使人拖住佢。

之後又去咗海產市場買海鮮準備夜晚餐海鮮餐，澄澄一見到水就有恐懼，人地行過濺濕少少水都鬼叫。幾個細路食完飯之後玩返學，一陣話春遊，一陣又玩賣物會，玩得好開心；不過表哥表姐第二日要返學，所以只可以玩到呢度為止。

今次澄澄走嘅時候，婆婆叫澄澄唔好再喊，結果佢都係喊，話唔捨得婆婆喎!