同病相憐！

上星期六帶咗澄澄去睇醫生，因為自從佢返學之後就幾乎每個月都要睇醫生，唔係傷風咳就係發燒，時好時壞足足大半年，乜嘢葯都試過，有效都變無效。所以同佢轉個醫生睇，醫生話佢係鼻敏感，所以每次傷風都會搞好耐。但係幾日嘅葯食完之後都仲係止唔到鼻水，今日又要再搵過個醫生再睇吓點。不過之前都有人同我講過，返咗學就係咁，起碼病三年啦，就當係build up佢嘅抵抗力，希望佢唔會病咁耐啦！

同佢睇開醫生，我自己都順便睇埋一份。可能因為之前食嘅腰骨葯食得太多，傷咗個胃，呢幾日都好唔舒服，真係一波未平一波又起。依家唯有停咗医腰骨嘅葯，搞返掂個胃先！

沒有爸爸的日子

學校有個親子活動，要小朋友同爸爸媽媽利用廢物造一個燈籠。呢樣正正係mommy嘅弱項，上次做月餅都仲可以，砌燈籠以前都係由公公做搶手，仲貼堂兼攞奬。所以今次唯有請公公出手相助，只係短短一個午睡(一個多小時)，公公就幫我做咗架巴士出嚟，估唔估到用咗乜嘢廢物呢？就係載tissue嘅盒做個車身，扭扭旦個殼做車轆，汽球嘅棍仔就做車軸喇。媽咪同Aan姐姐幫我做窗門，其餘啲乘客係我自已貼架，mommy再幫我修飾吓架車同埋揾我做司機。幾乎全屋總動員都有出力，好似婆婆幫我揾做窗門嘅胶片，舅父就幫我剪嘢啦....等等。

原本呢啲應該係由爸爸去做嘅，不過佢唔响度，唔知daddy係度又識唔識做呢？可能佢會用雲石砌架飛機俾我？!

阿澄整餅

今日學校有中秋節慶祝會活動，教小朋友做冰皮月餅、猜燈迷，砌花燈，都幾好玩，可以加强佢地對节日嘅認識。

澄澄仲第一次試食冰皮月餅(豆沙饀)，可能佢見到每個小朋友同家長都食，所以佢都無吐返出嚟。不過問佢仲要唔要，佢就耍手擰頭。

原唔原諒?

澄澄相對上比較驚佢daddy，但係佢就好怕激嬲mommy，有時候澄澄唔聽話，我唔睬佢佢就會驚，然後喊哂好淒凉咁問我原唔原諒澄澄呀？佢喊起嚟眼淚鼻涕都出晒嚟，好可憐咁，自自然然你就會心軟落嚟，唔再嬲或者激氣。

講真佢又未至於好難教，好百厭，至少佢都係個肯講道理嘅人，唔係刁蠻公主。呢樣唔知會唔會似佢爸爸咁大棚道理，變咗有佢講無人講呢？

澄澄又發燒！

唔知點解澄澄好容易就發燒，星期一晚佢玩得好好地，到食奶嘅時候，佢要枕响我大脾上面食奶，摸一摸佢個頭就覺得有啲熱，一探個額頭原來38.9C，其實就唔算好燒，不過摸埋佢隻手掌仔同脚仔都唔係平時嘅溫度，我就知佢係發燒，之後俾咗退燒葯佢食就上床瞓覺。到清晨五點幾，再摸吓佢都仲有啲，又叫醒佢食多次药，然後再瞓過。

朝早起身我同佢講因為澄澄有少少發燒，所以休息一日啦，點知佢即刻就問我好返可唔可以唔返學？真係激死，我於是問佢點解唔鍾意返學，係咪有嘢唔開心，原來佢話想媽咪湊佢返學。於是我同佢解釋，如果我要送佢返學先返工，咁我就會遲到。佢即刻扮老闆好大聲咁講：媽咪你做乜遲到唔返工，係咪唔要揾錢，唔買書書俾澄澄呀？

其實佢又未至於討厭返學，不過就係唔熱衷，有時候學校有工作紙派返嚟，佢又好積極同認真去做，仲講俾我聽係邊個老師教嘅，所以我估佢上堂都係留心嘅！

講故事...

喺印尼返嚟之後開始培養澄澄臨瞓前同佢講故事，話哂佢都已經正式返學，佢似乎好鈡意。其實佢有好多書，有啲姑姐俾，有啲我地買，只不過以前爸爸媽媽無恆心去同佢講，而佢比較細嘅時候個專注力亦無咁好，所以無認真實行。

依家每晚食奶或者瞓覺嘅時候，佢就要我同佢講故事，有時候係安徒生童話，有時候係三分鐘小故事，什至係三字經，佢都有興趣聽。有啲故事同佢講咗兩次，佢就會講返出嚟，當然唔會好detail，但係佢都幾好記性，講到個大概，仲問我呢個故事教小朋友要點呀！

有次佢一口氣睇咗八九本書，佢真係要我逐頁同佢講，都咪話唔疲....不過都總好過成日玩嘅。遲啲我幫佢報咗名學爵士舞，因為見佢都幾有音樂感，其實都係課外活動啫，接觸多啲唔同嘅老師同小朋友，等佢個胆練大啲。

大個女！

因為mommy腰骨痛無返工，可以送澄澄返學同接放學，澄澄僅係開心啦。媽媽仲見到佢識得自己除鞋換鞋，自己入課室，雖然放完一個月暑假，佢返學唔再喊仲適應到新環境，新班房，新同學，有朝佢個朋友仔"濤濤"返學喊得好犀利，佢仲叫人唔好喊，之後見到"景瑋"佢又同佢講早晨，澄澄真係大個咗。

平日下午放lunch嘅時候，我都會打電話返屋企同澄澄傾計，佢好早已經識得自已攞電話嚟聽，仲答得有紋有路，不過有時佢會無心機講電話，講唔夠兩句就bye-bye。於是有次放工返嚟我同佢講，話唔再打電話俾澄澄喇，因為佢唔要同媽媽講電話。第二日我打返去叫佢請姐姐聽電話，佢就好緊張咁問: 點解唔同澄澄講呀？仲猛講自己返學乖唔乖。所以物以罕為貴，原來係小朋友都識嘅！

好朋友轉校了！

開學頭幾天我都問過澄澄好幾次，邊個老師教佢，有邊個小朋友同佢一班，但係除咗幾個名之外，大部份澄澄都係話"無"、"唔知"，我都唔知佢係咪認真答我。直至有日响街見到蔡主任再問佢，至知道有好幾個小朋友已經轉咗學校，而教佢嘅老師其中一個係新嚟嘅"許老師"，難怪佢話唔知啦。

Eric有次同人傾起如果小朋友由細讀幼稚園可以揾到間附設中、小學嘅學校(即所謂"一條龍")，將來條路會好行啲。於是叫我幫澄澄轉去"蘇淅"，但係我問澄澄要唔要轉校，佢就擰哂頭。或者佢都仲未係好知乜嘢叫轉校，但係我個人亦唔想佢响呢個時候轉，起碼都讀完個K1先啦，免得嚇怕咗佢，連學都唔想返。因為到現時為止，雖然佢無再喊住咁返學，但係亦唔見得佢好鍾意，因為當澄澄一聽到打風、或者將近weekend，佢就問係咪唔使返學，好鬼雀躍，真激死！

中國加油!!!

臨近weekend終於可以定定地坐响度睇奥運，仲係國家隊嘅女排，對戰古巴。雖然只係爭銅牌，但係都打得好精彩，總好過對美國嗰場。澄澄都認得出邊隊係國家隊，仲舉高手叫"中國加油，澄澄叫佢加油，佢就加油。" 當佢見到個波打咗過古巴嗰邊，佢仲加多句"你地唔使加油"！好好笑 :p

可能今年中國嘅成績彪炳，每逢得到金牌就播國歌，所以澄澄都識得背首歌嘅旋律，仲加埋句"起來,起來....前進,前進,前進進"

澄澄的第一個暑假

好長一段時間無寫Blog，因為要忙搬屋，之後又去咗印尼三個星期，返到香港唔夠一個星期就開學！

今次去印尼，澄澄除咗哂黑咗之外，最大嘅進步就係學識咗企响浴缸入面洗頭同冲凉。臨走前一日已經同佢試响浴缸冲凉，都無乜大問題，但就唔肯洗頭。過到去因為無得揀，局住都要企响度洗，一邊洗佢就一邊喊，一邊問冲完未，好凄凉！後尾有次見佢飲益力多"鱷"到個頭好高，於是教佢洗頭嘅時候好似飲Yakult咁"鱷"高個頭，咁就刻服咗佢嘅心理障礙！

但係就因為有次爸爸同佢玩滑水梯，因為衝力大，兩個一齊入咗水底，上返水面後，澄澄嚇到將開口幾秒都喊唔出，之後當然喊過唔停，自此之後，同佢去泳池再玩水，佢都唔肯落水，只係肯坐响池邊踢水。又要諗個辦法幫佢刻服呢個心理障礙！

放完成個暑假之後，開學升K1要轉老師同課室，之前怕佢會唔适應，所以同佢做咗好多心理輔導，結果都無令我失望，仲好合作咁返學。