新姐姐!

照顧咗澄澄兩年嘅Aan姐姐終於噙日last day咗! 起初我以為澄澄會唔捨得同喊，但係唔知佢係因為鬥氣抑或真係無唔捨得......

因為朝早澄澄要返英文，放學我就要帶姐姐去Agent度辦埋手續就離開；我曾經同澄澄講不如叫姑媽或者爺爺接佢放學，等我搞掂就接返佢，但係佢係都唔要；朝早嫲嫲仲打電話嚟話接佢放學，可能澄澄聽到我地講電話，已經發脾氣又扮嬲；我之後同佢講咁你唔好到時喊喎，點知佢答我話：我唔鍾意嗰啲人我唔會喊嘅!

去到Agent度見到新嘅Yani姐姐，佢怕醜唔肯望人，仲纏住Aan姐姐，點知無耐，佢就同Aan姐姐握手bye bye，之後就鬼咁熱情咁攬住個新姐姐隻腳，玩得不知幾開心! 我都唔明點解澄澄對啲印尼姐姐總係咁熱情?

相處咗都唔夠半日，澄澄已經同Yani姐姐講，叫佢第日唔好返印尼，哈，唔通係一見鍾情?

課外活動 ~ 溜冰

噙日係澄澄學校搞嘅課外活動之一，去太古城中心嘅溜冰場溜冰，時間大約一個鐘。起初我都以為小朋友無乜機會玩，因為大部份嘅小朋友都係未玩過嘅，如果每個小朋友玩一陣，頂多都係玩五至十分鐘；原來負責教呢二十幾三十個小朋友嘅都只係得三個人，即係一個負責八至九個小朋友，真厲害!

開始嘅時候，全部小朋友都係坐响膠櫈上面，開始學踏步，因為對溜冰鞋對小朋友嚟講都幾重。之後就開始扶住張櫈學行；再者就運送膠圈，然後就徒手傍住張櫈行，成個過程都唔使半個鐘，完全係速成班!

澄澄起初都喊，但係個叔叔同佢傾咗兩三句就收咗聲，之後澄澄仲好投入，玩得好開心。小朋友嘅學習能力真係好快，簡單幾個方法就已經令佢地掌握到，想當年我都係跌跌撞撞咁學，邊有咁快咁見效!
 
澄澄之後仲同我講想喺呢度學溜冰添，叻女!

賴濕床

其實澄澄下畫瞓覺唔着尿片已經有成半年時間，但係澄澄間中仲係會失手；有時遲咗瞓，於是又遲起身，結果就會唔識起身去厠所；有時臨瞓前飲多咗水就更難避免....依家幾乎每日下午我都會打電話提佢去完厠所至好上床，但係都會失手，真係無晒乎!


搬屋後我同佢張新床都已經唔止一次中招，最後我都要鋪多張床墊以防萬一，但係張床單就好難避免，除非要佢着返片片瞓覺，但係我又唔想，二來佢自己都覺得着片唔係咁舒服；所以唯有繼續冒遲早報銷床褥呢個險，希望佢早日成功戒掉條片，不過我都知道夜晚嗰條仲更加有難度，唔知上小學前戒得甩未呢?

我都有試過買戒片褲俾佢着，但係都係無用嘅，濕起上嚟，一樣濕到床褥；我諗要佢先戒咗唔飲夜晚餐奶可能仲有啲機會，但係佢仲係prefer飲奶先至瞓。
 
上星期日朝早，我叫佢不如唔飲奶，去同公公婆婆飲茶啦，起初佢都話好，但係轉頭又好可憐咁同我講，都係好想飲奶，唔通支奶真係咁好味?

英文生字

澄澄上咗K2之後，我除咗教佢加減數，中文字之外，每日我都叫澄澄背兩個英文生字，到依家佢已經背默到四十幾個，加埋中文字，都應該有七、八十個詞彙，因為澄澄讀嘅係有學卷嘅幼稚園，所以到咗K2先開始學筆畫、線條，英文字母同簡單嘅生字，所以我要私下幫佢惡補，等佢唔好比同齡嘅小朋友落後太多。


好在澄澄都係個肯學嘅小朋友，叫佢做功課同讀書佢都會照做，只係有時佢都會同我講數，umbrella太長，讀uncle一個先啦!
 
至於一啲個位加個位，或者十嘅combination，佢已經朗朗上口，有時佢仲會心算，連手指都唔使用，有時我都會担心會唔會逼得佢太犀利，但係小朋友嘅學習能力真係唔可以低估，佢地就好似一塊海棉咁，你教佢幾多佢就吸幾多，好難預計佢地嘅容量有幾深!
 
希望澄澄繼續努力，唔好越大越懶惰就好喇!
 

參觀小學

今日係澄澄嘅學校辦第二次參觀學校，第一次佢無乜特別鍾意定唔鍾意，反而呢一次佢同我講唔要參加...我覺得有啲奇怪?

問佢點解，佢話佢會喊，唔通上次佢都喊? 再問多兩句，佢話唔鍾意做佢地要做嘅嘢! 其實我都唔係好明佢唔鍾意老師要佢做嘅嘢，抑或哥哥姐姐佢地上堂做嘅嘢?

我同佢解釋只係去參觀吓，到時佢再話我知鍾意邊間學校多啲啦! 當然我都有提佢唔好喊，咁樣會影響到哥哥姐姐上堂...

結果佢都順利參觀咗間學校，仲收到學校送俾佢嘅一大袋小食禮物同一盆植物；到我問佢鍾意邊間學校，佢就話兩間都唔鍾意，佢想讀萍姑姐嗰間小學! 但係我就無乜印象姑姐讀邊間小學，所以都唔明佢點解咁想讀嗰間學校，等我遲吓調查吓先。

但係轉過頭佢又同我講，不如去加拿大啦...原來佢仲係想跟著佢個好朋友Jaycee，讀埋同一間學校!

講大話?

澄澄踏入四歲，我開始覺得有啲horrible four嘅病態...


澄澄有時好大脾氣，尤其係姐姐同佢玩嘅時候唔啱佢心意，佢就好忟憎；有時候甚至我同佢講嘅嘢佢都唔當一回事，以前放學返嚟我叫佢要做功課，跟住瞓晏覺，但係佢就照佢自己嘅意思而行，之後仲好多籍口去解釋點解呢樣未做，果樣未做....

最可怕嘅係依家佢仲開始講大話，事緣係噙日佢無洗頭，我叫佢今日放學返嚟要洗，點知夜晚我問佢有無洗頭，佢起初答我答得唔係好肯定，於是我再問多佢一次，佢都答我話有，後尾佢仲叫我唔使問姐姐，我就覺得有啲奇怪；於是我問姐姐，原來姐姐唔知道我噙日無同佢洗頭，所以下晝佢幫澄澄沖涼嘅時候問佢係咪要洗頭，佢就同姐姐講話唔使，真係俾佢激死，只係洗頭咁小事都搞到要講大話。

本來洗唔洗頭只係小事，問題係點樣糾正佢講大話呢個惡習，唔好俾佢繼續錯落去!

感情豐富

今日係爸爸假期嘅終結喇，要返印尼再投入工作，澄澄聽日亦要準備收拾心情返學；我知澄澄一定會唔捨得爸爸，自從上次去澳門我已經留意到佢感性嘅一面。


於是我特登早啲帶佢出門返婆婆度，但係爸爸又話送佢去地鐵站，沿途我都同佢做咗唔少心理準備，要解釋俾佢聽爸爸都要做嘢，好似澄澄要返學一樣，放假嘅時候先可以返嚟；但係澄澄又追問點解爸爸唔留响香港同媽咪一齊返工，咪可以放工見到澄澄囉？我唯有再同佢解釋爸爸因為想做生意，但係响香港做生意要好多錢，相反印尼會容易啲，可以快啲儲夠錢就唔使媽咪再做嘢....每次佢聽到我話媽咪唔使做工可以陪澄澄讀書，佢就唔會再追問落去。


有時我都會同佢講，有朝一日當我真係唔使做嘢嘅時候，可能澄澄都同樣唔使媽咪陪喇，當然佢依家梗係誓神劈願話唔會啦，所以我叫佢要自己好好記住講過啲乜，希望將來有得兌現啦!