感性嘅澄澄

因為澄澄响鄉下嘅太嫲身體唔係咁好，所以星期六、日上咗去睇吓佢。澄澄一知道要返大陸就好興奮，因為可以見到佢好掛住嘅杰杰表哥。

星期五晚食完飯，佢已經好心急摧我要執行李；佢自己又要執一份，之後仲成晚揹住個袋唔肯除低，不知幾期待。

可惜今次上去，啲表哥表姐全部星期六、日都要返學，因為黃金週補假嘅中關係，唯獨是詩詩表姐唔使返學，所以相對澄澄同表姐玩嘅時間亦都多啲。

今日到要走嘅時候，我同佢係火車站等車嘅時候，澄澄特然間喊起嚟，話好掛住詩詩表姐...於是我幫佢打個電話返屋企，佢喘晒氣咁同人講掛住表姐！氹咗佢一陣收咗聲，隔一陣佢又喊過，又係講同一句說話，一直到上咗火車，然後瞓醒覺都係講住果句說話，總之就難捨難離，好淒慘咁！其實我以前細個都試過，不過就唔係咁快，起碼玩咗兩三日至會有呢種依依不捨嘅感覺。

然後成晚佢都問住我幾時再返大陸？我話要等到聖誕節有假期先去得，點知佢話唔使等咁耐，星期六日就去得，一陣又話冬天就去，唔好等到聖誕節；因為佢知道冬天就嚟到喇，所以好快就可以再去...