Halloween 2009

今年係澄澄自懂性以嚟嘅第二個萬聖節。今年學校無叫小朋友扮鬼扮馬返學校，反而個主題係相關嘅南瓜豐收節，教小朋友做同南瓜有關嘅小食，例如南瓜曲奇!

雖然學校無辦Halloween，澄澄班朋友仔就相約咗出嚟玩，所以我今年幫澄澄買咗套小妖精嘅服飾，但係我只係同佢講話係小精靈，因為佢唔鍾意做妖精或者巫婆之類，但係仙女响上年又已經買過；好彩澄澄都好鍾意呢個造型。

丁丁嘅裝扮就係花仙子，而洛程就係icy wincy spider，不過由於佢套衫比較厚，而星期六嘅天氣又出奇地熱，所以結果無着到；後尾連澄澄都頂唔順結果都除咗，好遺憾無趁佢地着住嘅時候一齊影返張相紀念!

我又整蠱澄澄話中環就會有啲鬼鬼出嚟拉你啲手手腳腳，於是佢又驚到喊；其實佢真係太細胆，Irene姨姨買咗一人一個mask，之前我已經同佢講定，叫佢唔使驚，因為mask係用嚟嚇人地，起初佢唔肯帶，後尾見洛程佢地都帶，佢至肯試，不過當小朋友扮鬼咬我嘅時候，佢又扁晒咀唔俾佢地咬我，其實都係玩吓啫，不過佢就好認真咁同人地講唔可以咬我個媽咪，都算佢錫我啦!

姨姨仲買咗一個木乃伊嘅蛋糕，澄澄因為驚所以又係唔肯食，真係無用!

忙碌嘅假期(下)

星期六一行八人就浩浩蕩蕩出發去港澳碼頭坐Turbo Jet去澳門，因為之前搭船澄澄嘔過，所以今次再搭佢都有啲陰影。反而我就唔係好頂得住Turbo Jet嘅氣油味，加上澄澄最後都係嘔咗小小朝早飲完嘅奶，加埋呢陣酸奶味，我仲覺得辛苦，如果多搭十分鐘我都可以嘔埋一份!

Check in咗酒店之後我地就開始咗呢個胃食之旅...第一站係九如坊食葡国菜，有血鴨、燒羊脾、咖喱雞等等；之後澄澄就急不及待過咗隔離買雪糕食，連出名嘅九記手打雪糕都等唔切；有人就去咗'拮魚蛋'，之後再去咗義順食燉奶, 總之人人都飽到攬住個肚。

食飽我地就去咗大三巴、又去咗氹仔果邊嘅威尼斯人酒店同新濠天地見識吓。晚飯嘅時候我介紹佢地去峰景餐廳食水蟹粥、炸米通球、蒸鱔...都無令大家失望，呢餐都未食完，已經有人計畫定宵夜要食細龜嘅干炒牛河同彈牙雲吞麵。

因為我地帶住澄澄，所以食完晚飯我地就各自活動，我地就當然返酒店啦，其他人就去咗葡京見識見識。

返到酒店，澄澄仲好乖聽我地講，臨瞓前做吓加數嘅練習題，睇見佢好認真個樣，我心裡面都好安慰，有此囡囡，畢生無憾! 結果當然係無人食宵夜啦，因為實在太飽。

第二朝食完buffet早餐，已經無乜特別節目，只係响附近咀香園買啲手信，就起程返香港，因為有啲朋友要搭夜晚機返澳洲。

响機鐵站仲有另外一啲朋友專誠嚟跟大家見過面，食個lunch。雖然行程短短兩日，但係節目緊湊，難得好耐無咁大班人嘅敍會，仲要遠道而來，離別時都有啲依依不捨, 我地已經相約咗出年响上海嘅Expo再見!

其間澄澄發生咗一段小插曲，响準備返香港前，佢忽然鬧起離愁別緒，好淒涼咁話好掛住佢個好朋友Jaycee! 話買嘢俾佢都話唔要，唔知佢真係掛住同學仔定係唔捨得uncles、aunties佢地呢? 情形就同上次從鄉下返嚟一樣，好掛住詩詩表姐!?

忙碌嘅假期(上)

爸爸剛啱由北京返嚟，就同一班由澳洲返嚟嘅大學同學去遊船河。其實隻船我响兩個月前已經book咗，將個消息講咗俾澄澄聽之後，佢就經常問住我幾時先去坐船? 終於等到呢一日，佢好興奮!

朝早我地一齊去買咗啲小食同飲料就準備上船...澄澄其實唔係第一次搭船，之前都有坐過天星小輪，同返南海嘅渡輪，不過可能太細個無乜印象!

之後上咗舺舨上面，天氣非常好，唔熱兼且有啲海風吹埋嚟，好舒服。間中有啲船駛過，我地就有啲搖擺，呢個時候澄澄反而覺得好刺激! 不停响船上面走嚟走去，跌跌踫踫，非常享受。

中途我地上咗東龍島行咗一陣，因為無乜嘢睇，所以唔到半個鐘就掉頭上返船；我見已經差不多五點，於是叫澄澄食小小麵包，結果就出事喇... 澄澄食完無耐就叫個肚唔舒服，話有啲嘢頂住咁，我已經知道佢可能想嘔。睇住佢嘅嘴唇慢慢變白，終於將成個包嘔返晒出嚟佢就舒服晒，之後仲生猛過之前，繼續玩過!

可惜之後因為停响尖沙咀碼頭等人太耐，隻船實在擺得太犀利，連大人都頂唔順，唯有放棄去西貢食海鮮，掉頭返碼頭上岸。雖然係咁，但係大家都好開心，因為諗起聽日仲會搭船去澳門，大家都寧願保持體力，第二日再玩過，就咁第一日嘅節目就完咗喇!

若有所失

自從搬屋之後，澄澄就開始一個人自己瞓,有時我叫佢過嚟陪我瞓，佢都唔肯，話我間房無Hello Kitty，因為佢間房貼滿晒佢鍾意嘅貼紙。

但係呢幾日佢又一反常態，話要去我個房瞓。問佢點解，佢只係話想；今晚我再問佢，佢終於講我知，原來澄澄知道爸爸就快由北京返嚟，佢唔想爸爸瞓我張床，所以佢想霸住個位；仲話爸爸返嚟要去廚房瞓! 唔知點解佢覺得媽咪係屬於佢嘅，但係我同佢講老婆係爸爸嘅佢又唔贊成....

所以到依家，有時佢見到爸爸搭我膊頭或者拖手，佢都係唔俾，即刻就會拉開我走，難為了爸爸!

"糉"嘅笑話

有次澄澄响大陸見到茶樓門口擺滿一隻隻用草繩綑縛住嘅大閘蟹，佢以為係端午節食嘅糉! 指住大叫，好多糉呀!

今晚我地响金不換叫咗一個拼盆小食，裡面有一款香葉包雞，佢又話係糉呀! 真係俾佢笑死！似乎佢係未識得分用糉葉包出嚟嘅食物。凡係類似嘅嘢食,佢都歸類為"糉"...

自動自覺

上咗K2之後，澄澄開始寫英文字同中文字，比起無學卷嘅幼稚園，澄澄嘅學校係相對遲開始寫字嘅練習。

起初頭兩三個星期，仲只係做吓畫綫嘅練習，到依家至真係寫字。好彩過去嘅悠長假期，我已經開始俾澄澄每日做練習，所以基本嘅大小楷同數目字佢已經學會；而綫條嘅練習亦已經開始咗，再加上一啲比較簡單嘅中文字，例如大、小、人、天、木等等，佢都有練習過。

如果暑假嘅時候無幫佢打定底，唔知佢會唔會覺得吃力呢？因為澄澄起初學寫字，都真係有啲醜怪，東歪西倒，經過長時間嘅練習至有今日嘅成績。

依家佢每日放學返嚟都會做學校嘅功課，再加兩本我俾佢嘅練習；暑假嘅時候我每朝出門前都會提醒佢要做嘅嘢，但係依家佢已經會自動自覺做要做嘅嘢；除咗間中佢會同我要求做完部份玩一陣再做埋其他、或者瞓醒再做。

澄澄嘅優點係佢從來唔抗拒做功課，又或者要講數至做，有時就算佢係玩緊，只要叫佢做，佢都會即刻放低啲玩具，話做完再玩過，的確值得一讚嘅!

尿濕張床

一連兩日嘅晏畫覺，澄澄都尿濕張床，佢嘅解釋係因為臨瞓前飲咗好多水。我噙日同佢講叫佢唔好再响張床度賴尿，因為張床褥會好快唔要得；今晚我放工嘅時候打電話俾佢，佢就第一時間同我報告，唔小心賴濕咗張床。我問佢點解呀？因為噙日佢應承咗我唔會再賴濕濕，點知佢話唔記得咗喎!

都唔知要到幾時佢至真係可以戒到下畫條片？依家每晚差唔多十二點半左右，我就會抱佢起身去廁所，有時候佢都係半夢半醒之間，到第二朝我問返佢，佢都唔記得有件咁嘅事。

我都明白要戒片唔係一件易事，不過都好想知道有無方法可以容易啲呢？

感性嘅澄澄

因為澄澄响鄉下嘅太嫲身體唔係咁好，所以星期六、日上咗去睇吓佢。澄澄一知道要返大陸就好興奮，因為可以見到佢好掛住嘅杰杰表哥。

星期五晚食完飯，佢已經好心急摧我要執行李；佢自己又要執一份，之後仲成晚揹住個袋唔肯除低，不知幾期待。

可惜今次上去，啲表哥表姐全部星期六、日都要返學，因為黃金週補假嘅中關係，唯獨是詩詩表姐唔使返學，所以相對澄澄同表姐玩嘅時間亦都多啲。

今日到要走嘅時候，我同佢係火車站等車嘅時候，澄澄特然間喊起嚟，話好掛住詩詩表姐...於是我幫佢打個電話返屋企，佢喘晒氣咁同人講掛住表姐！氹咗佢一陣收咗聲，隔一陣佢又喊過，又係講同一句說話，一直到上咗火車，然後瞓醒覺都係講住果句說話，總之就難捨難離，好淒慘咁！其實我以前細個都試過，不過就唔係咁快，起碼玩咗兩三日至會有呢種依依不捨嘅感覺。

然後成晚佢都問住我幾時再返大陸？我話要等到聖誕節有假期先去得，點知佢話唔使等咁耐，星期六日就去得，一陣又話冬天就去，唔好等到聖誕節；因為佢知道冬天就嚟到喇，所以好快就可以再去...

迎月夜

今晚係中秋前夕，亦即係迎月夜；夜晚去咗姑婆屋企食晚飯，之後就帶咗啲燈籠同螢光棒去鰂魚涌公園玩。沿途唔係見到好多人玩燈籠，反而玩螢光棒嘅就唔少，不過更加多嘅係細細個嘅小朋友落嚟公園玩，話晒聽日係假期，小朋友都玩得好開心。

澄澄一見到個韆鞦就連燈籠都唔要，不過因為子君有啲驚，所以玩咗一陣就唔玩；澄澄因為要做大家姐照顧表妹，所以都只好放棄唔玩韆鞦，跟住個表妹。

結果佢地都玩咗陣螢光波波，然後又去咗玩'sir'滑梯，真正玩燈籠嘅時候可能係無，除咗去公園途中，佢地自己攞住個燈籠，之後就無玩過，不過兩個豆丁都玩到濕水雞咁，啲大人就跟住佢地兩個四圍走，兼且做埋亞四幫佢地抹汗、遞水...等等。

總之假期嘅前夕，澄澄已經玩到好興奮；可能因為消耗咗好多體力嘅關係，返屋企途中澄澄已經要扭我抱佢，然後仲唔係要飲奶，而係要食蛋糕，因為太肚餓嘅緣故。

欺負姐姐

澄澄有時都好識搵人嚟欺負，响屋企佢對Aan姐姐有時都好無禮貌，又容易對人發脾氣。可能佢係學咗我，有時個姐姐做錯咗嘢，我都會話佢，可能無刻意避開唔俾澄澄睇，所以佢又有樣學樣，如果姐姐唔聽佢講，佢就會鬧人，真係唔係幾好。

佢甚至乎試過話唔要呢個姐姐，叫佢返印尼，但係佢又要人同佢玩，仲要聽佢嘅玩法嚟玩，都幾霸道。

不過姐姐有時候又激得我好嬲，所以都無理會對澄澄有乜不良影響，都要將佢嚟教訓。如果有得我拺，我寧願自己湊澄澄，唔請工人，可能對澄澄仲會好啲。

有次爸爸同佢講過，等澄澄讀小學，媽咪就唔使返工，專心照顧澄澄，所以澄澄依家經常掛响口邊，叫我唔好做嘢湊佢返學、放學，爸爸就留响印尼做嘢搵多啲錢...澄澄咁錫媽咪，我緊係開心啦，但係一諗到自己無咗經濟能力要等人養，買樣嘢都要算過度過，我又有啲難以決擇，最好就係維持依家咁嘅狀況，即是爸爸可以樣搵埋我份錢，仲可以俾埋我洗，咁就真係唔錯喇！