非常手段

經過一個漫長嘅暑假，澄澄可能唔係太適應學校生活，星期五連返躍思嘅普通話堂都喊，最後由許老師抱咗佢入課室...

星期六因為係第一次返Sunny Garden嘅English class，雖然話有佢熟悉嘅同學仔，都好難保證佢會無事；於是我唯有諗啲非常手段去對付呢個大喊十。我同佢講如果去上堂再喊，我就會留低佢响學校度，唔帶佢返屋企！

今朝早臨返學前我再提佢一次，佢雖然有啲驚都忍住唔敢喊，但係就一直拖住我隻手唔放；直至到見到佢識嘅景景同學，佢就成個都放心晒，甩開咗我隻手同人地行咗去第二度。其實英文班仲有幾個小朋友都係佢識得嘅同學，依家嘅有馮樂天，或者以前識嘅有天行同婉希，但係可能佢唔記得喇，因為都足足有年幾兩年無見！結果今日第一堂嘅英文班順利過渡，所以有時候威迫利誘都唔得就唯有用到非常手段都無計，但求有效果。

最好笑嘅係，夜晚佢玩扮大人嘅遊戲嘅時候，佢做媽咪嘅角色，扮打電話吩咐姐姐幫佢帶南南、菲菲返學，話如果佢地唔乖、返學喊，就留低佢地喺學校！竟然學足我同佢講嘢嘅口吻，真係俾佢笑死我...