俏俏話

自從教過澄澄乜嘢叫俏俏話(即係秘密)之後，佢就好鍾意同我講話有俏話話要同我講，然後就細細聲係我耳邊講嘢。起初佢都唔係太識，以為掩住咀响耳邊講嘢就係，所以講嘢同平時無分別，係人都聽到；後來佢開始知道秘密係屬於少數人可以知道嘅，佢就開始講得好小心，好細聲。

佢嘅俏俏話包括有:等爸爸返咗印尼，就同媽咪去廸士尼! 因為爸爸會覺得好貴，唔贊成經常去，所以澄澄就從我入手，因為我嘅朋友有時都會約埋幾個family一齊俾啲小朋友去開心吓。但係我都只係會一年帶佢去一次，就好夠；相反海洋公園比較平，亦多啲嘢睇，加上我有annual pass，帶佢去兩三次都唔係問題，但係澄澄就緊係鍾意廸士尼多啲啦!

另一個常講嘅俏俏話就係:我鍾意媽咪多啲...起初佢仲話唔鍾意爸爸，於是我問佢點解，佢又講唔出，其實佢係唔識講鍾意一個多啲，一個少啲，後來我教佢唔可以咁講，因為爸爸聽到會好唔開心，自始之後佢就轉咗口講，我鍾意媽咪多啲，爸爸少啲。

其實佢已經明白到何謂秘密，就係一啲唔可以俾第三者知道嘅嘢。有次佢爸爸問佢同我講咗啲乜，佢都話係秘密唔講得，好好笑！

學校秋季旅行

本來今日係學校嘅旅行，目的地係九龍公園；因為澄澄嘅腸胃炎仲未完全好，怕佢仲會邊食邊嘔，麻煩到啲老師，於是幫澄澄請咗假。點知因為天氣差同打緊一號風球嘅關係，學校都取消咗今日嘅旅行；於是澄澄又可以有返個機會，可以等下次學校再搞先去。

一連兩晚要點點鐘起身睇吓澄澄有無發燒或者嘔，第二朝仲要返工，搞到我都有啲疲。如果果日我都有食海南雞飯，就連我都中招，反而係Idy姨姨幫我擋咗呢一劫，因為佢之後都有嘔，係輕微腸胃炎！

病咗兩日嘅澄澄，連面上嘅麵包仔都無咗，可憐！

House Warming Party變成腸胃炎

新屋入伙一個星期，剛啱又係Idy同Venda姨姨嘅生日，所以邀請咗大家一齊嚟我地屋企玩。下畫我地同丁丁一家人先去咗澳門茶餐廳食晏，當然唔少得澄澄嘅指定菜式....海南雞飯；之後就去咗Jusco買咗每人一份玩具，丁丁同澄澄嘅係扮靚嘅首飾玩具，洛程嘅就係煮飯仔。最後當然係扮靚嘅玩具最受歡迎啦！幾個八妹仔打扮到成個貴婦咁，好好笑！

因為樓上31/F間屋仲未到期交返俾業主，所以樓上就用嚟俾大朋友麻雀耍樂；而樓下就俾小朋友佢地玩，都幾唔錯！

黃昏時候同澄澄返咗學校參加中秋節親子活動，同往年一樣，一齊做吓月餅同燈籠，唔同嘅係上年做冰皮月餅，今年就做傳統嘅月餅；之後小朋友又出咗學校門口玩燈籠，因為已經六點幾，天都開始黑，小朋友攞住個着咗光嘅燈籠，你追我趕都玩得好開心...

節目完畢後，返屋企嘅時候澄澄開始同我講話個肚仔痛，我以為係佢想去poo poo，於是叫佢响厠所坐一陣，但係佢都無所出，只係話痛。唯有俾幾粒風沙丸佢食，起碼止咗痛先。

準備出門口食晚飯嘅時候，佢突然嘔起嚟，結果啲風沙丸都出返嚟。以為佢係頂唔順風沙丸嘅味至嘔，所以換過衫之後就去酒樓會合返丁丁佢地。點知一坐低澄澄又嘔過，我見佢咁嚴重，唯有打道回府，順便响屋企樓下睇埋醫生。

結果醫生話佢可能係腸胃炎，又或者腸絞痛，叫佢暫時唔好食飯。但係澄澄成晚食乜嘔乜，連飲啖水都嘔返出嚟，無辦法，唯有餓佢一晚半晚。最唔好彩係瞓到半夜，佢都有嘢嘔出嚟，結果張新床褥就咁沾污咗...

其實之前都有朋友提醒我最好同佢打地鋪，因為佢隨時都會再嘔，點知真係俾佢講中。可憐嘅澄澄因為下畫無瞓晏覺，可能太攰嘅關係，所以連嘔咗都唔起身，直至我入房摸吓佢有無發燒至知道佢嘔過！

搬新屋了

新屋經過個多月嘅裝修，終於可以搬入去喇！澄澄最落力嘅就係幫自己張床佈置一番...佢將所有嘅貼紙都貼晒响佢整張床同衣櫃，變成佢張dream bed。

雖然之前佢都應承咗我，搬新屋後就會自己一個人一間房，話晒都係新屋，又係第一晚，於是我都响房陪咗佢一陣，直到佢瞓着唯止。

其實新屋同之前住緊嗰度無乜大分別，尤其係個尺數；唯一分別就係個方向，因為之前31/F係向正西，所以下畫會好晒、好熱。而新屋就向正北，以為可以避開啲熱抖，點知港島東嘅玻璃幕牆將個陽光折射返過嚟，所以一樣有西斜嘅問題，不過就稍微有改善，起碼唔係由兩點就開始晒入屋，而係四、五點嘅時候，都無咁慘！

非常手段

經過一個漫長嘅暑假，澄澄可能唔係太適應學校生活，星期五連返躍思嘅普通話堂都喊，最後由許老師抱咗佢入課室...

星期六因為係第一次返Sunny Garden嘅English class，雖然話有佢熟悉嘅同學仔，都好難保證佢會無事；於是我唯有諗啲非常手段去對付呢個大喊十。我同佢講如果去上堂再喊，我就會留低佢响學校度，唔帶佢返屋企！

今朝早臨返學前我再提佢一次，佢雖然有啲驚都忍住唔敢喊，但係就一直拖住我隻手唔放；直至到見到佢識嘅景景同學，佢就成個都放心晒，甩開咗我隻手同人地行咗去第二度。其實英文班仲有幾個小朋友都係佢識得嘅同學，依家嘅有馮樂天，或者以前識嘅有天行同婉希，但係可能佢唔記得喇，因為都足足有年幾兩年無見！結果今日第一堂嘅英文班順利過渡，所以有時候威迫利誘都唔得就唯有用到非常手段都無計，但求有效果。

最好笑嘅係，夜晚佢玩扮大人嘅遊戲嘅時候，佢做媽咪嘅角色，扮打電話吩咐姐姐幫佢帶南南、菲菲返學，話如果佢地唔乖、返學喊，就留低佢地喺學校！竟然學足我同佢講嘢嘅口吻，真係俾佢笑死我...

大喊十

澄澄開始對陌生嘅人胆怯，對一啲佢無接觸過嘅同少接觸嘅都會害怕，甚至大喊!

九月開始因為芭蕾舞學校重新安排過上堂嘅日子同時間，我都幫佢改咗上堂嘅日子，澄澄見跳舞嘅小朋友都唔同咗，一連幾堂都喊住話要搵我；噙日放學嘅時候，因為嫲嫲帶咗Yun Yun姑姑同姨婆嚟接佢放學，於是佢話嚇親所以又大喊，到我打電話俾佢嘅時候，只係聽到佢喊，一句話都講唔到，加上背後嫲嫲氹佢把聲，我就更加乜都聽唔到，激死!

都唔知點解佢越大越怕事，上暑期班係咁，連依家佢最鍾意嘅ballet class都係咁....

招積表姐

星期日澄澄好期待返婆婆度，因為佢想探表妹凝凝。表妹今個星期係第一次返學(K1)，之前佢都無上過playgroup或者親子班，所以返學第一日就喊到喉嚨痛，夜晚仲發燒，結果休息咗兩日。表妹以為媽咪唔要佢，放學之後仲嬲埋佢媽咪；之後再返學都係喊住咁返，每朝早都話唔想返學...

於是我買咗張貼紙叫澄澄送俾表妹，同佢講唔使驚啦! 澄澄真係好似大人嘅口吻咁同凝凝講：

返學都唔使驚啦，有好多小朋友同你玩，又有嘢食，食完玩吓就放學... 但係表妹都仲係好唔想返學，扁扁咀; 於是澄澄又叫表妹：不如你嚟我間學校啦，咁我咪可以照顧你囉！我學校都有好多弟弟妹妹，我係姐姐我會照顧你地架!

想當年澄澄咪又係喊足一個月，本來過咗兩個星期開始習慣，點知又遇上流感高峰期要停課兩週，之後再開學澄澄又要再適應過，所以搞足一個月，依家佢竟然牙擦擦同表妹講...希望表妹都可以好快咁適應啦!

誰人變心?

噙晚瞓覺嘅時候，澄澄話有'俏俏話'要同我講，原來佢話佢依家個老公係卓謙！我俾佢嘅一番話引到哭笑不得...

我都好認真咁問返佢點解唔係心健嘅？係咪佢地鬧咗交呢？定係澄澄鍾意卓謙呀？澄澄話梗係唔係啦，係卓謙同我講要同我結婚，叫我做佢嘅老婆，我都應承咗喇! 吓??先斬後奏??

我同澄澄講唔可以隨便同人結婚架，尤其係佢每年換結婚對象更加唔得啦，K1係心健，K2係卓謙；我問佢咁你每年換一個老公，K3會係邊個呀？佢竟然答我係富聰....我的天，真係笑死人!

聽電話

澄澄學會打電話好耐，有時同姐姐玩得唔開心，佢又會打電話俾我向我投訴；有時佢响學校俾老師稱讚過，佢又會急不及待打電話第一時間話我知；特別係佢有嘢要我買嘅時候，仲可能唔止一個電話，定時定候就會打嚟提醒我...

今日佢接到一個電話，佢話係一個姐姐打嚟搵爸爸，我問佢咁你點答呀？佢照事實同人講話爸爸唔係度，喺印尼...

其實佢又無講錯嘅，不過我覺得有啲嘢响佢呢個年紀，係好難分析乜嘢叫啱，乜嘢叫做錯。我亦唔想教佢講大話，所以我同佢講如果電話裡頭嘅人係唔識嘅，就唔好講咁多嘢俾人知喇，同對方講會叫媽咪打返俾你就得喇!

當初佢識背我個電話號碼嘅時候，我都同佢講過唔可以週圍講我個號碼，怕有人會偷聽咗做啲犯法嘅嘢；澄澄都好聽話好好咁記住無亂噏，所以我相信佢呢次都會聽我嘅說話，以後會小心聽電話嘅!

咀gel gel囡囡

澄澄其實有時都幾牙擦擦，可能係似爸爸，腦筋都轉得幾快....

今晚睇電視嘅時候，有個姐姐問佢嘅公公：...棵樹會唔會走咗去架? 澄澄聽到即刻就答咀：樹又無腳點會走咗去呀?

最近兩堂ballet都轉咗老師，澄澄上完堂返嚟同我講，之前個Miss Lee都唔知點解要咁惡講嘢? 其實有次我去觀課，都留意到呢位Miss Lee真係有啲唔同，可能係小朋友唔留心聽佢講嘢，所以佢突然間挈大個口好大聲咁問個小朋友: ...可唔可以企起身架? 但係啲小朋友個個都好細，要每個小朋友都坐定定聽你講嘢，又談何容易。可能同佢鍾唔鍾意小朋友都有啲關係，因為我都未見過佢笑，真係有啲cool。結果果次個小朋友落堂嘅時候無貼紙攞(老師係根據上堂表現嚟獎勵小朋友嘅)，連佢喊晒都無補於事。不過個小朋友又真係比較曳，又唔聽老師講，落堂嘅時候又唔肯排隊出去，要推開其他小朋友自己排第一...

今日我臨放工嘅時候，澄澄打電話俾我叫我快啲返屋企，因為我應承咗佢食Macdonald餐幫佢換個結他玩具。佢叫我同地鐵司機講開快啲啦，因為佢個囡囡等緊佢呀! 當我講完想收綫嘅時候，佢仲叫住我，教我要行前去車頭，司機先會聽到架!

今晚澄澄飲湯嘅時候，話婆婆煲嘅湯好好味，同姐姐講：不如聽日去婆婆度煮呢個湯啦？我同佢講婆婆聽日要返醫院覆診都唔喺屋企....跟住佢問我：咁你無鎖匙咩? 我其實都唔知自己嫁咗之後仲有無keep住婆婆屋企條匙，澄澄聽到我咁講就話我：梗係你唔記得擺咗係邊啦！哈，我聽到都唔知係好嬲定好笑!