Goodbye Jack & Jill

澄澄終於上完最後一堂Active English，因為之後我同佢報咗另一間Sunny Garden，都係由外籍老師教授，最大分別係報讀嘅小朋友係佢依家一齊讀躍思嘅書友仔，可能佢會無咁驚；因為自從Summer course轉咗個老師，佢每次去上堂都唔開心，仲會喊。完咗個course之後輪返星期六嘅Active English，又到Miss Nita要去生BB，所以澄澄已經有啲驚唔想去返學；最後我用貼紙氹佢，於是佢又心大心細....

行到課室門口，佢用好猶疑嘅眼光望住我，仲叫我陪佢上堂，我都有企响課室門外睇佢，點知佢突然行去冚課室門，於是裡面就剩低佢同另外一個試堂嘅男仔同老師；前後兩三分鐘就搞掂咗！

放學嘅時候佢當堂醒晒，因為佢知道唔使再上Jack & Jill。但係佢都知道遲吓要去另一間上堂，亦都知道有邊幾個同學仔一齊上，所以佢又無話唔想返喎！希望佢真係會讀得開心啲啦，呢兩日見佢有時都會無端端用英文講嘢，例如let me see...I want xx...，都講得有紋有路，最緊要係夠胆講，所以我都唔會笑佢，或者即時糾正佢，起碼令佢有啲自信心先，就可以事半功倍。