澄澄好鍾意睇電視廣告，睇到啲鍾意嘅廣告會即刻停低佢手頭做緊嘅或者玩緊嘅嘢。
早期嘅有大金冷氣廣告，每次佢睇到就會又唱又跳；第二個係吉百利嘅朱古力廣告，佢睇到就會學廣告戚眼戚鼻；第三個就係近期嘅全城响應清潔運動，佢第一時間就去攞把吹氣搥仔嚟扮掃把，學人掃地跳舞；仲有一個係威猛先生，佢同我講威猛先生真係好乾淨架，吱佢再浸落水度就乾淨晒喇...然後仲問我有無用呀？點解唔用呀?...
但係最搞笑嘅係得成女傭嘅廣告，澄澄可能聽得唔係咁清楚，佢學其中一個女傭講: 佢都係我公公喎!... 哈哈，其實人地係話"佢都係我同鄉喎"! 另一個電視節目"星星同學會"，佢又聽錯咗以為係"星星同亞妹"?
有啲劇集嘅主角佢都好記得，例如韋小寶、柴九哥同四奶奶、Laughing哥、老婆大人嗰個BB；但係可能佢唔係好清楚呢啲係由藝員扮嘅，所以當佢喺第二套劇見到之前見過嘅同一個藝員，佢會好疑惑咁問我呢個人咁似嗰一套果個嘅?
其實佢都唔算好鍾意睇電視，不過就好好記性!
睇少少好啦， 唔好睇太多。
回覆刪除我個女又係好鐘意睇廣告, 又係要停晒手眼定定咁去睇, 睇完就會望住我哋笑...
回覆刪除佢最鐘意睇嘅廣告係"玉桂園", 即係呀安德尊黎耀祥同朱咪咪做嗰個.... 跟住就係"點解要擦牙縫三角位"嗰個喇!!
敝喇，我真係有啲out，唔及小朋友佢地好記性，所以兩個廣告我都唔識嘅?? :p
回覆刪除