澄澄嘅好朋友

澄澄成日將心健掛响咀邊，連屋企玩玩吓，攞住佢自己個電話，佢都話'喂，心健老公呀？我就嚟搭飛機嚟心健屋企喇....'佢連一啲唔好意思都無，講得好鬼自然，真要命！

我已經同佢講咗好多次，唔好講呢啲嘢，好醜怪架。但係佢話唔會喎，仲話佢都係响屋企度講之嘛！

澄澄另外一個好朋友就係羅Jacey，佢話自己好錫Jacey喎，放學仲好鍾意跟住Jacey話要返去佢屋企；Jacey有個妹妹叫Heidi，澄澄成日話要抱Heidi，仲話要帶妹妹返屋企，搞到Jacey都妒忌，唔俾澄澄掂妹妹... 之後澄澄返屋企就同我講叫我生個妹妹俾佢，唉！小朋友嘅世界真係簡單同純真。

澄澄有進步

自從由印尼返嚟之後，澄澄嘅英文進步咗好多，可能係學校學返嚟，又或者係星期六嘅英文班，又或者係我都同佢講多咗，所以佢都用佢有限度嘅英文嚟答我。

今晚佢同我講'I want this'，'no want'，其實有啲文法佢都未係好得，不過起碼佢肯嘗試講，已經係一大進步，而且每當佢聽唔明，佢就會問我即係乜嘢呀？之後佢仲話自己今晚講咗好多英文呀，我問佢點解咁叻嘅？佢就話係响印尼間學校學返嚟，果度真係一個好好嘅推動力，令佢愛上咗英文！Very Good!

希望佢由聽多啲學起，慢慢再學講，至少有人用英文同佢講，佢都知道人地問緊佢乜嘢。

澄澄嘅call!

今晚因為臨走前俾老闆捉咗入去問啲嘢所以遲咗半個鐘頭至走，澄澄見我未返到屋企就打電話問我點解仲未返到呀？我同佢講因為老闆搵我嘛...於是澄澄又同我講，咁你同老闆講話你好掛住囡囡要走啦！吓，佢竟然識得教我咁講，真係嚇人！

隔咗幾分鐘佢又打俾我話想去Jusco騎馬馬，突然又話騎馬馬好貴架，不如玩第二樣啦...
收咗線之後佢又打嚟話不過我無錢呀，媽咪去'唱'錢吖？

我都未返到屋企，飯又未食，佢就一連打幾個電話嚟；自從澄澄學識咗我個電話號碼之後，我個電話就變得繁忙咗，少少嘢佢就打俾我，有時都唔知好唔好嬲佢，不過聽到佢把聲又好開心...

普通話

復活假後澄澄開始學多樣普通話，因為學校講嘅時間唔太多，又唔多聽見佢返嚟講；或者因為屋企無人同佢講嘅關係都唔定，但係有時婆婆同嫲嫲用普通話問佢嘢，佢都唔係好敢講，都唔知佢係咪聽唔明？所以都係幫佢正經搵堂上可能效果會好啲，咁啱學校嘅課外活動都有普通話俾三歲班嘅小朋友；出面試過搵過好幾間都話三歲太細，要起碼四歲或者上咗K2至收；所以唯有响學校學住先，反正咁近。

早一晚我已經同佢講話要返學校學普通話，佢都無乜異議；今日下畫佢放學返嚟，我再提醒佢，佢反過嚟問我今日咪已經學咗普通話囉，點解仲要學啫？

放工返到屋企我再問佢有幾多小朋友一齊學呀？佢就數俾我聽有四個，有馮樂天同佢，仲有兩個係橙橙組同蘋果組嘅... 唔，其實我都唔知道佢講得有幾真確，因為橙橙組同蘋果組都係nursery嘅小朋友，即係三歲都無，應該唔係掛！

之後我又問佢咁好唔好玩呀？佢又無特別話唔要讀喎，可能有佢熟悉嘅同學同老師啦，因為澄澄同我講係孫老師教，即係朝早返學普通話堂嘅老師。有時學校放長假前會派返啲書簿習作返嚟俾家長同小朋友溫習，聽佢讀返啲普通話教嘅兒歌，啲音又似模似樣；不過我唔係呢方面嘅專家，所以應該都唔會差過我嘅！

反而今次去完印尼返嚟，我好多時會用英文同佢講嘢，佢一聽唔明就會問我乜乜係點解呀？噙晚佢同我玩踢波，佢仲突然講咗個字'coming'，佢其實係話個波踢緊嚟我度...哈哈！

可惡女傭事件簿

噙日收咗個email關於一個女傭出腳踢一個同澄澄差唔多年紀嘅細路，之後仲踩上個小朋友個背脊度當舞台咁跳，睇到我心翳得嚟又好火滾。最後個女傭判監兩年，但係個小朋友就唔知有無事...

最近經常有啲關於印傭嘅負面報導，我都有啲驚，怕對佢差啲，佢會對澄澄唔好；雖然澄澄都有番咁大，如果姐姐打佢或者糟質佢，佢都會識得講俾我知；但係如果佢响啲食物度落手腳，我就真係管唔倒，到出咗事嘅時候就以經遲...

所以噙晚臨瞓前，我同澄澄講述返女傭件事，佢都識得話係唔可以嘅，因為大人唔可以踩小朋友...然後我叫佢如果真係遇到咁嘅情形，一定要話俾我知，但係佢竟然同我講，"我唔想無咗姐姐，要自己一個人..."。因為佢驚講咗出嚟我會報警搵警察叔叔拉咗姐姐，佢對呢個姐姐真係感情深厚；就由我地响印尼返香港，佢見到姐姐喺車站等我地，都未落車就好緊張咁大叫姐姐，落咗車仲第一時間攬住姐姐隻腳，好似無見好耐咁，比起去見爸爸都未有咁熱情嘅場面！

不過最後我都有問佢姐姐有無對佢唔好，佢都話無，仲好鍾意Aan姐姐！

復活節假期

澄澄剛剛放完一個悠長嘅復活節假，响呢個假期裡面，澄澄有多方面嘅進步，令我同爸爸都有份驚喜。

其實澄澄都期待咗呢個旅程一段時間，佢經常掛响咀邊問幾時放暑假去爸爸度？今次臨去前，爸爸同佢講過要佢學好啲英文，因為有個地方教小朋友做pizza嘅學校要小朋友識講英文至俾小朋友去玩；於是澄澄就要求我同佢講多啲英文...

其實嗰個係一個role play嘅theme park，裡面係一個小社會嘅縮影；小朋友可以選擇唔同種類嘅角式去工作同賺錢，好似澄澄就選擇咗去Nusery Centre幫手湊BB，由換衫沖涼、度高磅重到餵奶掃風都一手包辦；最後澄澄賺到十五蚊... (呢個係最搵錢嘅項目，其餘嘅都只係五至十蚊)

初頭澄澄都唔係好肯自己玩，因為由佢去銀行開戶口開始，所有嘢都要佢自己做，連爸爸媽媽企响側邊陪佢都唔得，我地只可以企响外面睇。但係開始咗玩之後佢就唔再驚，仲交足功課俾啲instructors；每每有人同佢講嘢，佢都點頭，好似好明白咁。

澄澄仲去咗做漢堡飽，個製成品仲好味過我地响場內俾錢買嘅，都幾得架！之後又學做蒸溜水、公仔麵、雪條、朱古力、cereal...等等，都分別有糧出；當然佢都有用錢嘅時候，例如佢去咗painting school畫畫。

不過因為澄澄未夠四歲，所以有啲要再大一啲至可以玩嘅，澄澄就唔玩得住，例如supermarket嘅cashier、機師同賽車手之類嘅role play就唔可以玩；仲有好多其他角式例如消防員、警察、牙醫、外科醫生、電力維修、大厦外牆清潔、油漆...等等。

澄澄都好鍾意呢個活動，佢依家個戶口已經由原本開戶時候嘅五十蚊增加到九十蚊，可以留返下次再去印尼嘅時候再玩過！

另外澄澄又學會自己食飯、食麵，仲食得快過平時(少少咁啦)，亦都食多咗嘢，都算安慰！

大衛叔叔?!

今日下畫打電話俾澄澄，點知兩次都無人聽，第三次終於聽到澄澄把聲，但係就喊得好淒涼。問佢乜嘢事，佢話好驚警察叔叔；再問佢點解，佢話嫲嫲屋企有警察叔叔... 我都唔知佢講真定講假？第一，無理由嫲嫲屋企無端端有警察；第二，就算有澄澄都唔使驚啦，又唔係响我地屋企！

我同佢講如果澄澄無做錯嘢，警察叔叔唔會揾澄澄... 於是澄澄問我如果佢真係嚟咗咁點呀？我教佢咁咪唔好開門俾佢囉... 之後澄澄至收聲。

返到公司我再打俾佢，佢仲係喊，我問佢仲驚乜嘢呀？原來佢係話驚大衛叔叔！大衛叔叔係嫲嫲一個做警察嘅朋友。我估可能係澄澄以為大衛叔叔要嚟我地屋企，所以佢驚啦。後來我問姐姐乜事，原來嫲嫲打電話俾澄澄，澄澄無心機講，於是嫲嫲話有大衛叔叔喺屋企，所以澄澄就好驚。

其實成件事我都未有機會了解清楚，無理由嫲嫲要用大衛叔叔嚟嚇澄澄，純粹因為澄澄唔肯聽佢電話？我都試過打電話返嚟，佢唔肯聽，我都覺得好upset，於是嬲咗澄澄幾日，等佢都知道如果無人理佢係好慘嘅！

夜晚臨瞓前，澄澄同我講，嫲嫲話如果屋企個電話壞咗，就叫大衛叔叔嚟整... 哦！聽到呢度我估我知道係乜嘢一回事。其實係澄澄唔肯聽電話，可能佢放低個電話唔肯聽；於是嫲嫲話如果佢整壞咗個電話，就叫大衛叔叔嚟整返好佢啦... 所以澄澄咪驚囉！

我同佢解釋警察係捉賊同捉壞人，唔係修理電話嘅，電話公司嘅人至係整電話架；仲有就係凝凝嘅爸爸都係警察啦，我地都唔會驚佢，最緊要係澄澄乖無做錯嘢嘛...

希望佢唔好再對警察有個誤解，什至驚警察；亦唔會怕咗呢位我都未見過嘅大衛叔叔啦！