期待自己嘅生日會

前兩晚瞓覺嘅時候，澄澄話要同我講"俏俏話"...原來佢想開生日會，仲話要請邊個小朋友、老師。我見佢都無真正開過屬於自己嘅生日會，於是我同佢講等佢四歲嘅時候就幫佢開啦！

點知第二晚佢又話同我講"俏俏話"，原來佢朝早返學已經同佢嘅好朋友Jacey同阮令嘉講咗話請佢地去佢嘅生日會，所以呢兩個小朋友問澄澄"係咪你同你媽咪講咗喇？我地可唔可以嚟?"

首先我無諗住佢咁快就邀請好朋友去生日會，因為都仲有好幾個月至係；第二我突然聽到佢提阮令嘉個名，呢個小朋友我都識，响K1某次活動，知道佢好鍾意同另一個男仔馮樂天一齊玩，所以佢同澄澄曾經鬥咀話'你唔係我好朋友，我唔同你玩'。當時我同澄澄講，叫佢算啦，如果人地唔同你玩，你就同第二個玩囉!

估唔到依家佢地竟然做咗朋友，澄澄仲話佢地兩個都係佢嘅好朋友；反而綽謙同心健，我就唔聽見佢再提，小朋友嘅喜好真係變得好快! 都好嘅，咁細個係唔應該小器嘅.....

唔知澄澄到時仲會邀請邊個呢？如果佢請啲唔請啲，會唔會俾人話大細超呢？萬一個個都請又唔知點收科,唉，我都要好好準備吓先。

Goodbye Jack & Jill

澄澄終於上完最後一堂Active English，因為之後我同佢報咗另一間Sunny Garden，都係由外籍老師教授，最大分別係報讀嘅小朋友係佢依家一齊讀躍思嘅書友仔，可能佢會無咁驚；因為自從Summer course轉咗個老師，佢每次去上堂都唔開心，仲會喊。完咗個course之後輪返星期六嘅Active English，又到Miss Nita要去生BB，所以澄澄已經有啲驚唔想去返學；最後我用貼紙氹佢，於是佢又心大心細....

行到課室門口，佢用好猶疑嘅眼光望住我，仲叫我陪佢上堂，我都有企响課室門外睇佢，點知佢突然行去冚課室門，於是裡面就剩低佢同另外一個試堂嘅男仔同老師；前後兩三分鐘就搞掂咗！

放學嘅時候佢當堂醒晒，因為佢知道唔使再上Jack & Jill。但係佢都知道遲吓要去另一間上堂，亦都知道有邊幾個同學仔一齊上，所以佢又無話唔想返喎！希望佢真係會讀得開心啲啦，呢兩日見佢有時都會無端端用英文講嘢，例如let me see...I want xx...，都講得有紋有路，最緊要係夠胆講，所以我都唔會笑佢，或者即時糾正佢，起碼令佢有啲自信心先，就可以事半功倍。

古靈精怪電視迷

澄澄好鍾意睇電視廣告，睇到啲鍾意嘅廣告會即刻停低佢手頭做緊嘅或者玩緊嘅嘢。

早期嘅有大金冷氣廣告，每次佢睇到就會又唱又跳；第二個係吉百利嘅朱古力廣告，佢睇到就會學廣告戚眼戚鼻；第三個就係近期嘅全城响應清潔運動，佢第一時間就去攞把吹氣搥仔嚟扮掃把，學人掃地跳舞；仲有一個係威猛先生，佢同我講威猛先生真係好乾淨架，吱佢再浸落水度就乾淨晒喇...然後仲問我有無用呀？點解唔用呀?...

但係最搞笑嘅係得成女傭嘅廣告，澄澄可能聽得唔係咁清楚，佢學其中一個女傭講: 佢都係我公公喎!... 哈哈，其實人地係話"佢都係我同鄉喎"! 另一個電視節目"星星同學會"，佢又聽錯咗以為係"星星同亞妹"?

有啲劇集嘅主角佢都好記得，例如韋小寶、柴九哥同四奶奶、Laughing哥、老婆大人嗰個BB；但係可能佢唔係好清楚呢啲係由藝員扮嘅，所以當佢喺第二套劇見到之前見過嘅同一個藝員，佢會好疑惑咁問我呢個人咁似嗰一套果個嘅?

其實佢都唔算好鍾意睇電視，不過就好好記性!

澄澄...大個女

開學一個星期，澄澄已經回復正常，亦都唔聽見佢再講話掛住許老師、鄧老師，可能佢已經明白到升班嘅分別喇！亦好明顯佢已經大個女喇，佢都當自己係大姐姐，話要照顧低班啲嘅弟弟妹妹。

學校有啲訂圖書嘅單章派返嚟，佢都會同我講，如果想買就買啦，唔買都得嘅！另一張係課外活動嘅，佢又同我講可以簡自己鍾意嘅活動參加...其實呢兩張單章都無回條跟返嚟，只係靠小朋友把口，將老師响學校講過嘅嘢轉述返嚟，呢方面我都深信佢有能力做得到。

但係另方面，佢嘅脾氣都越嚟越大，有時同姐姐玩得唔合佢心意，就會好嬲，好惡，可能同我有時同樣咁對佢有啲關係，我都要自我檢討下！

因為小朋友最喜歡模仿，而父母親人就係佢地最易接觸到同模仿嘅對象，真係要小心！

表現麻麻

今日澄澄第一日開學，但表現認真麻麻...

臨出門口前佢已經開始發作，一時話好掛住鄧老師同許老師，一時又話唔想讀K2，要留返响K1；一時又問Jacey會唔會返學，一時又話唔想留响學校食飯....

可能係我疏忽咗，以為佢都已經响呢間學校讀咗兩年，應該唔會有乜問題，所以開學前無同佢做心理輔導。但係事實係呢個暑假實在放得太耐，起初間中仲會返學校跳舞同上普通話堂，但係完咗之後就足足有成個幾月無再返學校；加上呢個星期佢响Jack & Jill上堂嘅恐懼，所以佢知道今日要升班同換老師，佢又有啲驚。

最後又要用芭蕾舞堂嚟威脅佢，至肯收聲唔喊，出門口返學；但係去到學校門口就一味抱住我隻腳，幾乎要搵個窿匿埋；最後都係由鄧老師拖住佢入咗課室...

但係下畫因為姐姐唔請佢食麵包，澄澄喊到好淒涼咁打電話俾我，話唔要呢個姐姐，叫佢返印尼，又叫我搵個第二個姐姐嚟，一係就叫我唔好返工去揍佢！佢竟然會講啲咁嘅嘢，其實都有啲蠻不講理！到底佢受咗啲乜嘢刺激呢? 咁決絕?

K2開學了

澄澄嘅漫長暑假終於放完喇....

其實開課前呢兩個星期，澄澄都去咗Jack & Jill上普通話同英文，普通話堂都還好，起碼肯講肯上堂；但係呢個星期輪到英文，就變得好難搞，幾乎每朝返到課室門口就喊，起碼擾攘十幾分鐘！
噙日因為我同佢講如果返學再喊，下畫就無得上芭蕾舞，結果好湊效，佢無喊到；但係今日我出門口前同佢講，呢堂係最後一堂喇，要乖乖地完成埋，佢都應承我，但係最後都係做唔到，又係喊咗好耐，連姐姐都搞佢唔掂，打咗幾次電話俾我，最後要我發惡，叫姐姐唔好理佢，留低佢喺學校由佢喊....

我之後都有打返學校問吓澄澄嘅情形，Miss話可能係之前我帶佢返學，所以佢成日講住話要媽咪；但係Miss同佢講話會幫佢打電話俾媽咪叫我嚟接佢放學，佢又會答Miss話媽咪要返工嚟唔到。

其實我知佢係因為英文轉咗Miss Sara而唔係之前嘅Miss Nita，而讀暑期班嘅小朋友又唔同咗，所以佢有啲驚。不過普通話堂除咗第一日有咁嘅情形，之後就無再發生。但係英文就由第一堂到最後呢堂都無改善，不過聽日已經要開學，我問佢好唔好上埋最後一堂，等下星期至返學？佢都唔肯，寧願返幼稚園，話好掛住啲小朋友....

我睇過佢由暑期班帶返嚟嘅material又真係幾深，教嘅係啲樂器嘅名稱，一來佢無接觸過，除咗guitar 同 violin，有啲連我都無見過，唔難想像佢上堂嘅時候可以理解到幾多，如果係唔明嘅又邊有興趣返學呢！所以我都唔想勉強佢...

不過我都有問佢點解返學要喊？佢話因為有個小朋友嘅叔叔佢係警察嚟...我都唔知佢講真定講假，反正聽日佢就唔使再上，希望佢可以好好享受校園生活嘅樂趣。

學減數

終於俾我諗到個方法教佢學減數，就係利用倒數再混用心算去學。澄澄由十倒數返去一就已經好熟，於是要考佢由二十倒數返去一；再將較大嘅數好似加數咁放响心裡面，用埋手指，就可以計到兩位數。

不過起初學嘅時候，澄澄都有啲混淆，會將減變成加，需要時間練習。

至於乘數表，佢已經學到三字訣嘅下半部；比起初學二字訣嘅時候，進度慢咗啲，不過佢都無話唔想學；但係都要配合返我有時間至可以教佢，因為要佢學得快，最有效嘅時間就係臨瞓前熄咗燈，佢就最能夠集中精神，可以事半功倍，不過我就要陪佢一齊早瞓喇！

加減數

今個暑假教識咗澄澄用心去計加數，當然唔係兩粒數都可以心算，而係教佢將較大嘅數先放响心裡面，再用手加另一粒數；比起減數，加數相對容易掌握。簡單嘅例如二加二、三加三、五加五，佢已經可以唔使諗就答到，正如念乘數表一樣，當口訣咁記！

減數我暫時都仲未諗到可以點樣令佢容易啲用心去計，但係睇住啲圖去計佢係無問題嘅。

慶幸澄澄都算肯學嘢，唔會推搪；有時叫佢做功課、寫吓字，佢都好聽話即刻就去攞練習簿同筆；希望佢呢種良好嘅學習態度可以持之以恆。千祈唔好似佢細個嘅時候，好鍾意食魚，但係唔知係咪太多嘅關係，依家佢開始無咁大興趣，有時仲話唔食... 可能係物極必反!?

興趣班 ~ 芭蕾舞

今日係澄澄轉去SDM嘅第一堂Ballet Jazz，因為有晒成套舞衣兼且要紥起個髻仔，可能佢覺得好靚，所以知道有堂上就好雀躍。

因為上堂嘅時間稍為早咗啲，結果要提早叫醒佢，佢都無賴床，第一時間聽到話去跳舞就彈咗起身。可能係因為佢鍾意嘅，所以就算係上第一堂，老師同小朋友都係唔識嘅，佢都無怕醜；放學嘅時候佢仲問我點解咁快完嘅？

其實SDM嘅堂只係45分鐘，比起以前學校學嘅一個鐘又真係短咗啲嘅，不過就一個星期上兩堂，見佢咁鍾意我都放心啲，因為我幫佢報咗一年嘅course，之後仲會考個澳洲嘅國際試至可以升級。

落堂前嘅五分鐘我可以入去觀課，因為係第一堂，我見佢都跟得到老師教嘅每一個動作，反而有啲小朋友就唔係太專心，只係坐咗响度自己玩，睇到澄澄呢份專注，心裡面都覺得好安慰，覺得物有所值！

暑期班 ~ 普通話

今日係澄澄暑期班第一堂普通話，上堂前發生咗段小插曲...

事緣佢見到有個身形魁梧嘅叔叔企咗响度，所以佢攬實我响度喊，唔肯行入課室；我以為佢怕生保，因為小朋友同老師都唔同咗。我將佢半推半氹送咗入課室之後就同佢揮手say goodbye。後來我問返佢點解會喊呢？佢話以為個叔叔係老師，所以佢好驚唔想上堂...其實人地係某個小朋友嘅家長啫！

澄澄顯然對普通話嘅興趣係濃厚過上英文，出咗課室之後，佢仲不停咁重溫學咗嘅果首兒歌，講得好好聽。

咁啱個普通話老師同佢幼稚園嗰位又係一樣叫孫老師，可能因為咁澄澄覺得有親切感啦！

長隆之旅

趁澄澄學校嘅暑期活動完結咗有一個long weekend，帶佢同公公婆婆去咗長隆玩咗兩晚，最開心嘅當然又係澄澄，因為有佢最鍾意嘅機動遊戲同兒童樂園。

可能係因為星期五嘅關係，人比較少，澄澄玩每一樣嘢都唔使排隊，兼且可以玩完又玩，坐咗上去就唔使落嚟，直到佢自己唔玩為止。不過有啲遊戲就有高度限制，明明响香港玩得嘅嘢，嚟到長隆反而唔玩得。相反，澄澄响Ocean Park見過嘅星際蜘蛛、過山車同海盜船，喺長隆就有得俾小朋友玩。

起初，澄澄都唔敢玩海盜船，後來玩完一次之後就一連玩好幾次，好似上咗癮咁。不過因為太熱嘅關係，加上帶住兩個老人家，好難任由澄澄玩到夠為止。

澄澄另一個最鍾情嘅節目就係酒店房裡面有張上下格床，每次一返入酒店，佢就不停咁爬上爬落，仲要求我地俾佢自己一個瞓上面；難得有咁嘅機會，所以我地亦順吓佢意。不過瞓到半夜結果都係大執位，因為佢成晚輾轉反側撞落張床度，嘈到大家都無得瞓...哈！不過都總算滿足咗佢啦。

澄澄仲第一次睇馬戲，佢依然係對小丑呢類角色有啲抗拒，不過佢都好留心睇完成個表演，之後仲描述得繪形繪色，好似佢話啲人喺上面玩交換韆鞦；我初初仲担心佢會睇睇吓就唔肯睇(因為無胆)，但係佢又好投入喎，可能真係佢大個咗啦！

最後我地臨返香港前仲返去探澄澄最掛住嘅杰杰表哥，雖然只係見咗一兩個鐘頭，澄澄都好滿足!