二十週年校慶懇親會

懇親會本來係三月舉行，後來因為流感高峰期，於是延遲到六月舉行。每一班嘅小朋友都可以自願參加表演，什至個人天才表演，我知要澄澄個人表演就好難(因為佢好無胆)，不過都想佢參加團體性嘅表演，等佢練大胆啲。

上到台佢一直望住台下蔡主任嘅提示嚟做動作，話晒成班細路都只係得兩歲半、三歲，所以肯企响台上面到表演完為止，唔走嚟走去已經算唔錯，仲點會計較啲動作齊唔齊，記唔記得。

完哂所有表演之後就係攤位遊戲，學校請咗一批歷屆畢業生返嚟幫手，有啲已經讀緊中學，如果到澄澄將來讀中學嘅時候，仲可以返去幫手，感覺都幾特別，不過唔知佢到時仲記唔記得呢？

預祝生日

今日我嘅朋友同我預早慶祝生日，晏晝去咗Irene屋企玩，然後夜晚食飯。

幾個小朋友都玩得好開心，無爭嘢玩，就連澄澄都好投入，肯同丁丁&洛程一齊玩，係一大進步。食完飯之後仲有birthday cake，澄澄即刻就問係邊個生日，之後三個小鬼都話要吹蠟燭，但係就吹極都唔熄，結果都係由我吹返。澄澄食蛋糕仲食得好開心，好好胃口！

Jayme's show time

澄澄將成首 "I Love Daddy" & "I Love Mommy" 唱哂俾爸爸同媽媽聽。So sweet！

I Love Daddy, I Love Daddy, yes I do, yes I do.

And my Daddy loves me, and my Daddy loves me, yes he does, yes he does.

I Love Mommy, I Love Mommy, yes I do, yes I do,

And my Mommy loves me, and my mommy loves me, yes she does, yes she does.

飲喜酒

一連兩個星期都有朋友結婚，我同澄澄講係Peggy姨姨同Sunny叔叔結婚，仲有就係Andrew叔叔，點知佢mix up咗係Peggy姨姨同Andrew叔叔結婚！？

雖然見到好多人，澄澄都唔係太驚，除咗要去'vi vi'，基本上佢都好乖，坐响自己個位直到散蓆，除咗Frankie要同佢握手，佢唔想所以就喊！

到第二個星期飲Andrew嗰歺，澄澄已經唔再怕，仲好興奮，見到有個小朋友着咗件紗裙，就話同佢自己一樣係公主，見到同枱嘅Linda着咗條白裙，又話佢同個新娘一樣，其實佢意思係話佢地一樣咁靚。

有個姨姨同樣都係飲咗呢兩歺，見到澄澄兩次都好乖咁，坐得好定，成兩個幾鐘頭都無話要落地玩，大讚澄澄好乖女。咁呢樣又真係值得一讚嘅，就算平時去飲茶，佢都唔會中途落地玩。好叻女架！

父親節

澄澄上星期五响學校學咗首I Love Daddy Song同埋親手做咗個爸爸同女女嘅餅仲有件恤衫送俾爸爸做父親節禮物。

相比起母親節，澄澄無咁熱情，無經常掛响口邊度講'父親節快樂'，或者主動話要錫錫daddy，可能係同佢比較少同爸爸相處嘅關係有關。不過佢都可以將成首I Love Daddy Song 唱哂出嚟。

呢兩件餅餅老師話係澄澄自己一手一腳做，包括入盒同貼膠紙。佢唔再好似以前樣樣都怕汚漕唔肯掂，佢真係大個女喇！

家長教師會談日

今日係澄澄學校嘅家長教師日，主要係同家長講吓小朋友响學校嘅情況。

澄澄嘅班主任叫蔡主任，佢一開始就俾澄澄好好嘅評價，佢話以澄澄咁嘅歲數(係細女個Group)，佢嘅認知能力、辯識(對於配對、大小)都掌握得好好，好好記性，又好肯做，有時候老師叫小朋友做嘅嘢佢好快就做完，然後又要求要幫老師手，做額外嘅嘢。例如母親節嘅時候，佢地要做個紫菜麵包圈送俾媽咪，佢第一個就做完，問老師仲要做乜嘢，於是老師叫佢幫手搣雙面膠紙，搣完條紙條佢仲識得放入垃圾桶，好有條理。蔡主任仲話佢其實好鈡意俾人讚，一讚佢就會好開心。

不過佢好容易就話驚驚，對一啲突然嘅轉變，就好容易話驚同埋喊。好似最近端午節，學校响另外一個課室搭咗個龍舟景，叫啲小朋友過去睇，點知佢唔肯去，後尾佢問老師係咪全部小朋友都會過去，老師話係佢至肯去。蔡主任話都無諗過佢會咁問，但係只要預先同佢講清楚要做乜，佢都會接受到。

原本佢依家讀緊嘅'橙組'係俾啲細仔細女嘅，隔離'萍果'組就俾啲足咗三歲嘅小朋友，以澄澄咁嘅能力，老師話其實佢都可以轉組，不過我怕佢未必接受到轉組同埋轉老師。但係放完暑假升K1其實佢都一樣要适應，唯有事前同佢講多啲，做足準備功夫，否則佢又變喊包喇！呢樣亦係老師唯一comment佢最近常見嘅問題，話澄澄一唔想做嘅嘢佢就會喊，以為咁樣可以得呈。所以要同佢解釋，有乜嘢唔鈡意要用把口表达出嚟。我地其實响屋企都做緊同樣嘅嘢，睇佢幾時領悟到！

除此之外，原來佢响學校已經係自己食飯同飲湯，响屋企可能因為有姐姐嘅關係，所以反而唔見佢做，我諗呢次嘅溝通其實都好有幫助，至少我可以知道屋企方面可以做啲乜嘢同學校作出适當配合。

睇樓記

上星期六我地一家人去咗睇樓，因為要準備下個月搬屋。澄澄都有跟埋我地去，仲俾意見邊間好。之後佢經常掛响口邊，話要搬新屋。新屋將來更加近佢嘅幼稚園，一出屋苑門口就到，所以我同佢講，第日出街無論去Jusco、百佳、抑或去公園都會見到學校，佢即刻就話唔好，因為佢以為要返學....哈哈！

先後有序

澄澄近來好明顯長大了，對事情發生嘅先後次序都表達得好有條理。話說今日下午婆婆打電話俾我，電話裡頭傳嚟澄澄好淒凉嘅喊聲。放工返嚟我問澄澄做乜咁淒凉呀，佢同我講返：因為我唔肯"vi vi"完先瞓覺，姐姐就唔同我玩，所以喊！

夜晚婆婆打電話嚟，澄澄搶咗個電話講俾婆婆聽：澄澄之前喊呀，唔要"vi vi"。佢竟然識得用'之前'兩個字！

夜晚玩緊嘅時候，佢同我講：澄澄坐船船喊呀...

媽媽：你幾時坐過船呀？

澄澄：有elephant嗰個呀！上次去迪士尼呢...

(但係我都無印象？Dumbo小飛象唔係船嚟格？)

澄澄：佢整濕媽媽背脊呀！

哦，我晃然大悟，原來佢係講紧上次坐觀光船，因為經過一啲火山會噴火同好大煙，又有猩猩同鱷魚，所以佢驚到喊。另外就係有隻elephant玩噴水，噴到我個背脊濕晒，原來呢兩幕對佢留下咁深刻嘅印象。

佢其實真係好好記性，呢樣就似埋佢爸爸，一啲好detail嘅細節都記得一清二楚。

廣告歌

最近有個電視廣告一味唱住嗰句"豈有此理"，澄澄一聽到就即刻唱埋一份。有時候連八點鐘嗰套"同事三分親"佢都唱，然後好得意咁同我講佢都識唱啦！

澄澄其實唔算好鈡意睇電視，反而鈡意同姐姐玩，可能係同佢由細到大，我無刻意唔開電視有關，最緊要係唔好企得太近部電視，自然佢就唔會咁渴望想睇。

過度活躍？

澄澄上星期四放學回來後，就開始有咳嗽同流鼻涕嘅跡象，食飯又嘔，我連忙幫她檢查手脚同口腔，怕她是手足口病，不過沒有發現有白點或者水泡，所以我就給她普通傷風咳藥，直到零晨時份，我一探摸她的前額，又是慣常的熱烘烘，只好把地弄醒再服退燒藥。 第二天早上我再帶她去見醫生，確定她只是普通傷風咳就放心。但每次她服藥過後就明顯情緒變得比平時暴躁，什至有點過度活躍，連午睡的時間也比平常短，半夜又無故醒來，擾攘了一個多小時才入睡。

星期日晚連我自己都病倒了，一早起來準備要返工的時候，混身酸痛，只好躺臥在梳化上，澄澄見狀都慬得媽媽是生病了就乖乖跟姐姐去返學。我看罷医生就順便接她放學，老師就問我她是否早上吃過葯？因為她的行為有點不能自控，連老師叫她，她都沒有停下來，繼續不停地跑來跑去。到她午睡的時候，由於我的葯力還未過，於是再跟她午睡，这次她睡了兩個小時就醒過來，她見我沒有起床的意欲，就一個人在床上自言自語、行來行去，結果還是把我弄醒為止。

食過晚飯我還是覺得很疲累，又再躲進房裡休息，這次有姐姐陪她玩，我終於可以休息了。如果没了姐姐，我这回肯定累透了，也不可能迅速復元。