學校生活...

最近澄澄返學已經唔再喊喇，仲識得同姐姐講'拜拜'然後自己行入學校同課室。每朝我出门口返工前，佢仲會kiss媽咪同講'拜拜'，仲跪响門口睇住我入lift至返入屋，係好大進步！

學校嘅蔡主任噙日仲打電話俾我同我講澄澄最近嘅情形。初初我仲以為佢返學有啲乜嘢問題，原來佢主要同我講返澄澄日前唔肯俾叔叔同佢影學生相，話驚驚喎，所以退返啲費用俾我。





老師話澄澄嘅協調能力比起同齡嘅小朋友好好多，好留心同肯接受老師嘅指示或者教導，每當老師話要揾小朋友出嚟幫手，澄澄總係第一個行出去或者話'澄澄要幫'。如果有小朋友唔乖，佢又好鍾意留意老師點樣去manage個小朋友，對眼仲瞪得好大咁望住老師。老師仲話澄澄其實有啲嗲，好想俾老師摟抱，所以有時佢見到啲老師，就會好得意咁叫啲老師，等佢地都讚吓佢又或者攬吓佢，佢就會好開心。

原來澄澄仲好鍾意畫畫，成日問老師攞紙畫畫，又叫老師教佢畫蘋果，然後佢就不停咁畫，好投入！

其實我都有留意到佢比較鍾意跟住老師而唔係同小朋友一齊玩，可能咁所以佢亦無同小朋友爭嘢玩或者打交。聽完老師嘅update，我都好開心亦都好放心，總算係一個正面嘅評價！

澄澄好細胆！

最近發覺澄澄開始怕黑，有時房間無着燈，佢就會話"有客人，好驚"。唔知係咪跟工人姐姐學返嚟？"黑"變咗"客"，可能姐姐想話佢知，"黑黑，好嚇人"，結果就變咗"有客人，好驚"。

佢對一啲類似crocodile同dinosaur嘅卡通都好大反應，今日晏晝姐姐打電話俾我，話澄澄要揾我，點知佢一攞起個電話就喊到喘哂氣，好淒涼咁。原來佢睇到電視播嘅兒歌有只疑似恐龍嘅怪獸，所以佢驚到喊！

問題少女

今晚澄澄喺度睇電視嘅時候，一連問咗我六、七個'佢做乜咁'，等於其他小朋友問'點解'，問到我投降。後來我問返佢點解佢噙日唔聽話，點解噙日食飯唔坐定定，點解佢噙日唔乖....於是乎佢停咗唔再向我發問。可能咁樣停止咗佢嘅發問唔係咁好，但係真係解得我一有啲吃力。

近日佢又有啲咳同鼻水，食咗藥之後變得好忟憎，好臭脾氣。平時佢最高興見到嘅姑媽，有晚姑媽上嚟探佢，佢都唔同姑媽玩，宁願要姐姐。後來姐姐做完嘢出嚟，佢就問姐姐：'姐姐係咪做完嘢喇？... 好嘢，澄澄好開心。' 佢仲開心到响個廳度跳嚟跳去，真係激死。呢啲就係小鬼佢地天真而又無機心嘅一面，但係事實有時就係好傷人心！我諗嗰一刻姑媽心裡面都可能有種酸溜溜嘅感覺？！

澄澄在學習中

放完復活節已經返咗學一個星期，頭幾日入到學校門口就喊，直到今日至無，跟住又放清明節。可能因為近來流感高鋒期，學校都比較着重個人衛生，所以有次同佢去完洗手間，佢搶住要洗手，仲同我講話要捽乾淨啲手指罅隙。今日佢又話要交叉手洗手，然後仲要自己摟毛巾，學校嘅影响力果然有效，同時亦令我知道除咗玩同唱歌，真係有嘢教啲小朋友。

學校今日派咗本故事書返嚟，俾家長同小朋友利用講故事去建立多啲親子學習時間。故事個主角係Hello Kitty，講到最後媽媽話：呢個故事教我地唔好偏食，好似Kitty咁做個健康嘅小朋友....

澄澄就指住Kitty話：呢個唔係小朋友，王思澄係小朋友呀！

之後澄澄又同啲公仔講: 你要唔要飲咖啡，要呀，唔該！(佢不停重複又重複對住一個個公仔講呢幾句話)

所以我估計學校可能係教佢地要有禮貌，講'唔該'!