我返學喇！

我剛剛兩歲，媽媽就送我返幼兒園。我間學校叫"躍思"，裡面有好多小朋友同老師。因為有媽媽陪，又有好多嘢玩，所以我都好鍾意嘅。

但係返到第四日，媽媽送我到學校門口就同我拜拜，我就有啲驚同唔開心，我諗媽媽會唔會唔要我呢？後來老師同我講，放學時間媽媽就會嚟接我走，所以我就聽老師講，返入課室再玩過，然後等放學，果然媽媽真係响門口等我喎，仲有婆婆添！

當我開始適應到嘅時候，又已經weekend啦.....到咗星期一，所有嘢都由頭嚟過，結果我喊咗好耐呀！雖然有老師安撫我，不過我都係有啲驚。後尾老師叫我幫忙執返倒瀉咗嘅波波，分散咗我嘅注意力至無再喊 :p

星期二我仲帶埋蓉蓉返學，同佢玩騎馬仔，不過一諗起媽媽我又喊喇，真係無用喇。

今日我開始慢慢適應，雖然仲有喊，但係起碼老師氹我，我都肯接受，所以老師今日俾我十三分，多過早兩日兩分呀！慢慢我就可以自己返學喇，" 唔駛媽媽陪，唔駛婆婆陪，唔駛喊，澄澄自己返學！"