扮鬼扮馬

今日萬聖節，爺爺嫲嫲一早就過咗嚟睇澄澄打扮成點。去到學校門口見到好多小朋友，個個都扮鬼扮馬着到古靈精怪，女仔多數扮公主或者天使，男仔嘅有Peter Pan，機械人，南瓜俠，魔鬼......等等。有啲仲戴哂面具，連係邊個都唔知，好可愛。

起初澄澄見到啲小朋友，都唔肯入門口，後尾見到越嚟越多小公主出現，佢先肯入去，後來連見到有小朋友戴咗面具嘅佢都唔驚，亦都無喊，可能佢已經明白咗佢地全部都係自己嘅好朋友！

Halloween 扮咩好?

？

星期五Halloween，澄澄嘅學校都有party，叫小朋友穿著自已喜歡嘅服裝返學，澄澄咁細胆就當然唔肯著到古靈精怪啦，再加上佢又貪靚，最後都係買咗套天使服俾佢。

自從上次佢俾Denzel表哥嚇過之後，佢就成日掛住响口邊，話好驚面具，所以我都幫佢做晒心理輔導，就算佢唔扮醜樣，都會有其他小朋友扮，但係佢地姶終係澄澄認識嘅好朋友，所以係唔使驚嘅！唔知其他小朋友會扮咩嘢呢？

澄澄有進步

自從澄澄上咗K1之後，學多咗好多英文，好似What is this，Excuse me，仲有最長果句Can you wash it for me please，今日佢就學咗句Let's go vivi，佢仲會响適當時候運用出嚟。

基本上好多英文名詞，或者句子佢都聽得明識得答，好似叫佢朝早起身幫我Switch off the air-cond，go to brush your teeth，take a bath, go to sleep...等等，但係到你要佢用英文講返出嚟，就未係好得(七成度啦)。好多時候就算明明佢係識講，佢都怕醜唔夠膽講。

中文字方面好似一般嘅眼、耳、口、鼻、爸、媽....都已經學到，問題係佢記唔記得！同埋我唔知道佢係真係識得個字定係認得個圖畫??

俾狗咬

噙日返婆婆屋企，澄澄係要同毛毛玩，連毛毛要食嘢佢都唔停手，係要掃佢肚腩，結果撩到毛毛發火，都唔知佢係個口啲牙定係隻手啲爪將澄澄塊面畫花咗，好可憐！

澄澄一邊喊，一邊怪罪毛毛話係佢唔乖，話唔同佢玩，搞到所有人都鬧阿毛，其實最無辜嘅係阿毛至真！反而澄澄好快就無事，搭地鐵途中仲好好唱口，自己作曲作詞，簡直旁若無人！

放暑假??

澄澄一連兩個星期都只係返三日學，唔係教師進修日就係運動日，然後就係重陽節或者學校補假，搞到澄澄都以為放暑假一樣，日日問住我係咪唔使返學。

上個月就因為颱風所以成日放假，今個月就因為公眾假期加學校假期，總之啲學費就交得唔係好抵。

鬼靈精

有次我同Jayme講，媽咪返咗工都會諗住澄澄，如果我打電話返嚟，澄澄同我講佢都掛住我，咁媽咪就會好開心。自此之後，每逢我打電話返嚟佢就第一時間同我講"I Miss You, Mommy"。夜晚我放工返嚟，佢又會同我講"好耐無攬你呀，攬吓先"，跟住就抱住我，好sweet架。佢呢啲口甜舌滑唔知係咪遺傳佢爸爸呢？

漸漸長大，佢啲脾氣都開始出嚟。有時候佢要某啲嘢或者唔要姐姐幫佢手，佢就會好忟憎，一係就挈開個口喊。不過佢呢啲"曳"嘢都只係夠胆向姐姐發出嚟，所以佢都好識得睇人嚟"恰"。爸爸問佢有無"曳"，佢就話"媽咪係度會鬧"，真係人細鬼大。

今朝我返工嘅時候，佢見我要搽防哂粉，佢係都要搶住幫我搽。有時候佢玩扮靚，仲會問我"小姐，你想要咩色呀?"。 然后幫我塗眼蓋、胭脂、搽唇膏，仲有搽指甲油，搽完就問"你睇吓靚唔靚?"。有時佢仲叫我將啲返工衫(佢認為好靚嘅)留返俾佢大個返工着，好好笑。

無膽鬼

澄澄越嚟越無胆，以前細細個玩韆鞦可以玩到好高，依家連上韆鞦都唔肯，就算氹到佢上去坐响度，佢都唔肯俾人搖個韆鞦，真係激死！

上星期六佢話要去公園玩單車，結果踩得一個半個圏又話唔玩。依家唯一剩返滑梯佢係肯玩，反而擒高擒低佢就最啱。

呢個月係Halloween，有次係Toys'R'us見到好多面具，佢驚到喊，幾經解釋至令佢接受面具係セ嘢嚟，唔駛再驚。原因係佢俾Danzel表哥用頭盎嚇過，自此就好怕類似面具嘅物體。


不過問佢要唔要着南瓜衫扮南瓜，佢就唔制，貪靚要扮公主。所以最後都係買咗套天使造型嘅服飾俾佢用嚟返學開party用。

三字經(三)

澄澄好鍾意唸三字經嗰本書，每晚瞓覺前都要由頭唸一遍，平均三至四晚佢就學識一首，依家佢已經背到八、九首喇，一首八句，其實都好佩服細路仔嘅驚人記憶力，所以千祈唔好講完就算，佢地連瞓醒一覺都仲會記得架！

音樂感好强

澄澄由細到大對音樂都特別有反應，一聽到Music就自然而然郁身郁勢，拍手扭pat pat乜都有。有次响Toys"R"us見到部玩具鋼琴，佢就即刻坐埋去彈琴，仲有哂姿勢。

夜晚有啲電視劇播主題曲，無論新播出街定係舊嘅，佢都哼埋一份，連湊佢嘅姐姐都話佢跟到啲melody，所以我都想幫佢揾啲music class俾佢玩吓，發掘吓佢嘅興趣！

驗腎日

趁今日澄澄學校係教師進修日，爸爸帶咗澄澄去醫院做檢查，其實明知佢都唔會有事，不過都係求個安心。結果檢查咗佢嘅小便，同問咗佢一堆問題，証實佢好正常，都好放心。

之後澄澄去咗蘇淅幼稚園交表格，佢見到入面有好多哥哥姐姐，於是乎亦好興奮咁跑來跑去。萬一佢真係要轉校，起碼佢都知道間學校係點嘅。不過學校話要入上午班嘅機會都比較微.....

角色扮演 - 成長篇

最近澄澄好鍾意扮人地，下面就係佢噙晚玩過嘅角色。

事件(一) 人物：澄澄 (老師)，Aan姐姐 (學生)
老師同小朋友講: 依家食茶點，你地每人攞個碟，派麵包....
隔咗一陣，老師問小朋友：你食完未呀？
小朋友：未呀，咁大個麵包。
老師：吓，你仲未食完，又包尾呀！

我地即刻估佢呢句說話一定係平時老師用嚟話佢，所以佢講得咁神似。

事件(二) 人物：澄澄 (媽咪), Cindy媽咪 (婆婆), 菲菲公仔 (女女), 爸爸 (公公)
有日媽咪帶住女女去探公公婆婆，婆婆問媽咪：點解得你兩個嘅？菲菲個爸爸呢？
媽咪：佢爸爸响印尼呀！
婆婆：吓，佢响印尼做咩呀？
媽咪：佢响印尼做嘢架。
婆婆：你又嫁個响印尼做嘢嘅人呀，咁菲菲咪好可憐囉，成日都唔見到爸爸。

原來澄澄不自覺咁就認定咗爸爸嘅角色就係好理所當然會唔响自已身邊，要出外揾錢養家！現今嘅小朋友真係唔簡單......

國慶日

星期三放假，帶咗澄澄去維園玩，點知原來果日都係印尼回教人嘅新年，所以成個維園變咗一個小小耶加達，仲利害過賓妹廣場，澄澄仲話好多Aan姐姐嘅朋友呀！

瞓覺瞓到半夜，澄澄又發燒(38.8C)，係微燒不過啲手手脚脚就好熱，但係就無傷風咳，唔知係咪燒骨折呢？後尾俾咗退燒葯佢食，又退咗燒無事喎！